Senesi 49

Tapuaki a Sakopo ki ona vosa

1Na kalagai loa e Sakopo ona vosa, o pati : Kotou fakatasi mai. Ti e kau fakasa loa kia koutou le nea leia ka soko loa kia koutou i temi ki muli.

2Kotou fakatasi mai kiate au, ti kotou fakalogo mai kiate au, ei vosa o Sakopo !

Kotou fakalogo ki lokoutou tamana ko Iselaele !

3Lupeni, ko koe ko loku vosa uluaki,

Ko loku makeke ti ko uluaki fua o loku makeke.

E ke fakalaka i ou fetaina i le mamalu mo le makeke ;

4Ko se tafe makeke a koe, kae e leaise ke maua loa le tuulaga o le uluaki,

Talie na ke pale ki le moeaga o lou tamana,

Ti na ke fakakelekele loku moeaga i lau pale ki ai.

5Ko Simeone mo Levi e tautaina ;

Ko la seleta ko ni nea gaoi o le tukipo.

6Ke aua na kau loku laumalie ki ala fono fakafufu.

Ke aua na fakatasi loku laumalie ki ala fakatasiga, talie na la tamate ni tagata i lola ita,

Ti na la tutuuti a vae o pipi i lola agaveli.

7Ke malaia lola ita, talie na veli ai lola ita !

Ke malaia lola itaita, talie na tukipo a ia ! Koia e kau fakamavaevae ai loa laua i le fenua o Sakopo,

Ti e kau veteki loa laua i le fenua o Iselaele.

8Ko Suta, e ke tali loa a fakavikiviki o ou fetaina ;

E teki loa lou lima ki le muli ulu o ou fili ;

E tulolo loa a vosa o lou tamana i ou mua.

9Ko Suta ko loku vosa, e ke faipe se laione muli.

E ke au mei le tamatea, ei loku vosa !

E peluki e ia ona vae o moe pe se laione tagata,

Ofaipe se laione fafine : Ko ai e toe lagai ia a ia ki aluga ?

10E leaise fakamamao loa le pala fakasau ia Suta,

Ti mo le tokotoko fakaaliki i lima o lona sakoga,

O kaku ki le aso leia e sa ai loa le Silo (leia e tonu ke maua ia a ia),

Ti ke fakalogo loa kiate ia a kakai fuli.

11E sai loa e ia lana asino ki le vite,

Ti mo le uviki o lana asino fafine ki le tafito vite malie.

E fo loa e ia lona kofu i le vino,

Ti mo lona taupulupulu i le toto o le fua o le vite.

12E kukula ona mata i le vino,

Ti e tetea ona nifo i le sua manu.

13Ko Sapulone, e nofo loa a ia i le mata tai,

E nofo loa a ia i le taulaga o vaka,

Ti e kaku loa lona kele ki Sitone.

14Ko Isakale ko se asino makeke,

Leia e moe i fale manu.

15E tio a ia e malie le ganea leia na malolo ai,

Ti e malie le fenua ki le nofo.

Koia na tali ai loa e ia ke teki se amoga ki lona tuauma,

Ti mo le totogi o se tukusau.

16Ko Tane, e fakamaaui ia loa lona kakai,

talie ko ia ko se tasi o famili o Iselaele.

17E fai a Tane pe se gata i le ala,

Pe se gata kona i se ala lau ikiiki,

Leia e uuti ia a taga vae o osi,

Ke vilo ai ki muli le tagata leia e eke i aluga.

18E kau fanaki ki le Eteleno, ko loku tokoi !

19Ko Kate, e osoi loa a ia e ni kau tagata kaia,

Kae toe osoi loa e ia latou ti e toe kapu loa e ia latou.

20Ko Asele, e fakatupu loa e ia se nea kai malie ai, ti e teuteui loa e ia a nea kai fakaeteete a sau.

21Ko Nefetali, ko se koti fafine vao a ia e mauli faifaitalisa,

Ti e fai e ia ni masau fulumalie.

22Ko Sosefo, ko le uli a ia o se laakau fua,

Le uli o se laakau fua i tafa o se matapuna vai ;

E malaga loa ona laa i aluga o le kaua.

23Na fakaveliveli kiate ia ni tagata fai kalolo,

Ti na lotou kaloloi a ia ki alatou kalolo,

Ti na lotou kapu a ia i lolatou vesia.

24Kae na tuu makeke aifai lana kalolo,

Ti na fakamakeke ona lima

E lima o le Atua makeke o Sakopo :

Koia leia na liliu ai a ia ko le tagata tausi manu, mo le utu o Iselaele.

25Ko le gaoi a ia a le Atua o lou tamana, leia e tokoi loa kiate koe ;

Ko le gaoi a ia a le Mafimafi, leia e tapuaki loa kiate koe,

Ki tapuakina o le lagi i aluga,

Ki tapuakina o le vai i lalo,

Ki tapuakina o u mo manava o fafine.

26E fakalaka a tapuaki o lou tamana i tapuaki o oku tamana,

o kaku ki tumutumu o mauga lee gato. Ke ifo a tapuaki ana ki le ulu o Sosefo,

Ki le tumutumu o le ulu o le aliki o ona fetaina !

27Ko Pesamino ko se lupo fekai leia e sae ia.

I le usu e kai e ia lana nea kai,

Ti ko le afiafi, e vae e ia lona koloa i le tau.

28Ko latou fuli ana, na tupu mei ai a famili e tino agafulu tupu lua o Iselaele. Ti ko masau ana, na tuku kia latou e lolatou tamana, i lana tapuaki kia latou. Na tuku e ia lana tapuaki ki le tagata taki toka tasi.

Mate mo le tanu o Sakopo

29Ti na tuku loa e ia kia latou le fakatotonu leinei : Ka kau ano loa ki loku kakai ; ke kotou tanu loa au i le tanuma o oku tamana, i le ana leia e tuu i le faisaga o le tagata Eti ko Efelone, 30I le ana o Makepela, leia e ofi ki Mamele, i le fenua o Kanaane. Na totogi le faisaga lena e Apalaamo ki le tagata Eti ko Efelone, ke liliu ko lona tanuma. 31Kua tanu i ai Apalaamo mo lana avaga ko Sala ; Kua tanu i ai Isaake mo lana avaga ko Lepeka ; ti na kau tanu foki i ai a Lea. 32Ko le faisaga mo le ana leia e tuu i ai, na totogi a ia mei vosa o Eti.

33I le oki o le tuku e Sakopo o ana fakatotonu ki ona vosa, na too loa e ia ona vae o tuku ki le palepale, ti na tukumanava fakaoki loa a ia, ti na ano loa a ia ki lona kakai.

Currently Selected:

Senesi 49: FB2000

Highlight

Copy