Senesi 48

Tapuaki a Sakopo ki vosa o Sosefo

1I le oki o nea ana, na fakasa loa kia Sosefo : Ko leinei kua masaki lou tamana. Ti na too loa e Sosefo ona vosa e toka lua ko Manase mo Efalaimi, o ave kia Sakopo. 2Ti na fakasa loa kia Sakopo : Ko leinei lou vosa ko Sosefo e au kiate koe. Ti na tanaki loa e Iselaele le gatoaga o lona ga makeke leia koi nofo mo ia, o tonatona i lona palepale.

3Ti na pati loa Sakopo kia Sosefo : Na sa mai kiate au le Atua mafimafi i Luse, i le fenua o Kanaane, ti na tapuaki mai a ia kiate au. 4Ti na pati mai a ia kiate au : E kau fakaliliu loa a koe o fanaunau, ti e kau liuliuga loa a koe, ti e kau fakasoko loa a koe ko ni kakai toka api, ti e kau soli loa le fenua leinei ki lou sakoga i ou muli, ke maua e ia o lee gato. 5I le aso nei, ko vosa e lua, ala na tupu kiate koe i le fenua o Esipito i mua o laku tau mai kiate koe i Esipito nei, e ke soli mai loa laua kiate au : E liliu loa Efalaimi mo Manase ko aku fanau ofaipe Lupeni mo Simeone. 6Kae ko vosa ala e ke toe maua loa ki muli, e soli atu loa latou kiate koe. E maua loa e Efalaimi mo Manase ola tofiga i le kele o la fetaina ko Lupeni mo Simeone.

7I laku toe liliu mei Patane, na mate loa Lasele i le ala i oku tafa, i le fenua o Kanaane, ofi ki Efalata ; i le ganea lena na kau tanu ai loa Lasele, i le ala o Efalata, leia ko Peteleemi.

8Ti na tio loa Iselaele ki vosa o Sosefo, ti na pati loa a ia : Ko ai ma laua anei ? 9Na tali loa Sosefo ki lona tamana : Ko oku vosa, ala na soli mai kiate au e le Atua i le fenua leinei. Ti na pati loa Iselaele : E kau kole atu kiate koe, ke ke fakafeofi mai laua kiate au ke kau tapuaki kia laua. 10Kua veveli a mata o Iselaele, talie kua matua ai a ia, ti na leaise koi tio malie a ia. 11Ti na pati loa Iselaele kia Sosefo : Na leaise kau amanaki e kau toe tio loa ki ou mata, ti ko leinei kua fakatio au e le Atua ki lou sakoga. 12Ti na too loa e Sosefo ona vosa, ala na ekeeke i tuli o lona tamana ko Sakopo, o tuku ki lalo, ti na punou loa a ia i ona mua. 13Ti na too loa e Sosefo ona vosa lualua, o taki tasi i ona lima : Ti na too loa e ia Efalaimi i lona lima atamai o fakatautonu ki le lima sema o Iselaele, kae too loa e ia Manase i lona lima sema o fakatautonu ki le lima atamai o Iselaele. Ti na fakafeofi ake loa e ia laua kia Iselaele. 14Na falo loa e Iselaele lona lima atamai o teki ki le ulu o Efalaimi, leia na muli, kae na falo loa e ia lona lima sema o teki ki le ulu o Manase, leia na mua. Na fai loa e ia le nea lena i le atamai malama. 15Na tapuaki loa a ia kia Sosefo, o pati : E kau kole ki le Atua leia na saele i mua o oku tamana ko Apalaamo mo Isaake, ki le Atua leia na taki ia au mei loku tupu o kaku mai ki le aso nei, 16ki le aselo leia na saofaki ia au mei tutamaki fuli, e kau kole kiate ia ke tapuaki ki fanau anei ! Ke la fakamauli loku igoa ofaipe le igoa o loku tamana ko Apalaamo mo Isaake, ti ke la liuliuga o lasi i le fenua katoa ! 17Na leaise malie kia Sosefo le aga a lona tamana o teki lona lima atamai ki le ulu o Efalaimi ; ti na fa loa a ia ki le lima o lona tamana, o too mei le ulu o Efalaimi, o teki ki le ulu o Manase. 18Ti na pati loa Sosefo ki lona tamana : E ke faisala, ei loku tamana ! E uluaki a ia leinei, ke ke teki lou lima atamai ki lona ulu ! 19Kae na fakafiti loa lona tamana, o pati kiate ia : E kau iloa, ei loku vosa, e kau iloa ! Mo ia foki e liliu loa a ia ko se kakai toka api, mo ia foki e liliu loa a ia ko se puleaga lasi ; kae e liliu loa lona taina muli o lasi ake iate ia, ti e liliu loa lona sakoga ko ni puleaga mauke. 20I le aso lena, na tuku loa e Iselaele lana tapuaki kia laua, o pati : E too loa e le kakai o Iselaele okoulua igoa, mo ka lotou fai loa ni tapuaki, o pati : Ke manava alofa le Atua kiate koe ofaipe lona manava alofa kia Efalaimi mo Manase !

21Na pati loa Iselaele kia Sosefo : Ko leinei ka kau mate loa ! Kae e nofo loa le Atua mo koutou, ti e toe fakaliliu loa koutou e le Atua ki le fenua o okoutou tamana. 22E kau soli atu kiate koe se vaega leia e lasi ake i vaega o ou fetaina, e kau soli kiate koe le fenua o Siseme leia na kau maua mei le lima o le kau Amole ki laku seleta mo laku gasau.

Currently Selected:

Senesi 48: FB2000

Highlight

Copy