Senesi 47

Le famili o Sakopo i Koseni

1Na ano loa Sosefo o fakasa kia Falaone : Kua tau mai oku fetaina mo loku tamana mei le fenua o Kanaane, mo alatou kau ovi, mo alatou kau pipi, ti mo alatou nea fuli ; ko nei latou kua nonofo i le fenua o Koseni. 2Na too loa e Sosefo le toka lima i ona fetaina, o ave latou ki mua o Falaone. 3Ti na pati loa Falaone kia latou : Kolea lakoutou gaoi ? Na lotou tali loa kia Falaone : E tausi manu au tagata fakasausau, ofaipe omatou tamana. 4Ti na lotou toe pati foki kia Falaone : Kua veli ai le oge i le fenua o Kanaane, ti e leaise koi maua se nea ke fagai ai a manu o au tagata fakasausau, koia kua motou au ai o nofo fakatemi i le fenua nei. Ke ke fakataga ki au tagata fakasausau ke lotou nonofo i le fenua o Koseni. 5Ti na pati loa Falaone kia Sosefo : Ko leinei kua tau mai kiate koe lou tamana mo ou fetaina, 6e fakalogo le fenua katoa o Esipito kiate koe. Filifili e koe le ganea malie tukupau o le fenua ke lotou nonofo ai. Ke lotou nonofo i le fenua o Koseni ! Ti kapau e ke maua ia latou ni tagata poto i le tausi manu, ti ke tuku latou ke tokaga ki aku kau manu.

7Na toe ave foki e Sosefo lona tamana ko Sakopo ke felavei mo Falaone. Ti na tapuaki loa Sakopo kia Falaone. 8Na pati loa Falaone kia Sakopo : E fetuu fia lou mauli ? 9Na tali loa Sakopo kia Falaone : Ko fetuu o loku mauli, i le temi leia na kau feanoaki ai, ko le kau lelau kau tolu. E teiki fua fetuu o loku mauli mo veveli, e leaise lotou kaku ki fetuu o oku tamana. 10Na tapuaki loa Sakopo kia Falaone, ti na mavae loa a ia i mua o Falaone.

11Na soli loa e Sosefo ki lona tamana mo ona fetaina se kele i le fenua o Koseni ke lotou nonofo ai, i le ganea malie tukupau o le fenua, i tafa o Lamisese, o fai ki le fakatotonu leia na tuku e Falaone.

12Na tokaga loa Sosefo ki le pane o lona tamana, mo ona fetaina, mo le famili katoa o lona tamana, o fakafuafua ki lolatou api.

13Na leaise koi maua se pane i le fenua katoa, talie na lasi ai le oge ; ti na gaegae ai le fenua o Esipito mo le fenua o Kanaane o tupu ko le oge. 14Na tanaki loa e Sosefo le paaga katoa leia na maua i le fenua o Esipito mo le fenua o Kanaane, o fetogi ki le fulumeto. Ti na fakaulu loa e ia le paaga lena ki le fale o Falaone. 15Ti na oki loa le paaga o le fenua o Esipito mo le fenua o Kanaane, ti na ano loa le kakai o Esipito kia Sosefo, o pati : Soli mai kia matou se pane ! Pe tonu ke motou mamate i ou mua talie kua oki lamatou paaga ? 16Na pati loa Sosefo : Kotou soli mai akoutou kau manu, ti e kau soli atu loa kia koutou se pane, mo kapau kua oki akoutou paaga. 17Na latou avake loa kia Sosefo alatou kau manu, ti na soli loa e Sosefo kia latou se pane o totogi ki osi, mo ovi, mo pipi, mo asino. I le fetuu lena na soli loa e Sosefo se pane ki le kakai o Esipito, o totogi ki alatou kau manu.

18Na oki loa le fetuu lena, ti na lotou toe ano loa kia Sosefo i leia ake fetuu, o pati kiate ia : E leaise motou fufu foki ki lomatou aliki, kua oki amatou paaga, ti kua nofo mo koe amatou kau manu. Koi toe fai ki omatou tino totonu mo omatou kele ke aumai kiate koe. 19Kolea loa ke motou mamate ai i ou mua, kae tuu noa omatou kele ? Ke ke totogi matou mo omatou kele, kae ke ke soli mai kia matou se nea kai. Ti ko matou mo omatou kele, e motou fakasausau loa kia Falaone, talie e leaise motou fia mate. Soli mai kia matou ni pulapula ke to ti ke motou mauli ai, ti ke aua na tuu noa omatou kele. 20Na totogi loa e Sosefo a kele fuli o Esipito ma Falaone ; talie na veli ai le oge, ti na tasi fakatau loa e le kau Esipito lana faisaga. Ti na liliu loa le fenua ko le kele o Falaone. 21Na fakaliliu loa e Sosefo le kakai katoa o Esipito o popula kia Falaone, mei leia a potu ki leia a potu. 22Na gato tasi ki kele o le kau pelepitelo na leaise totogi e Sosefo, talie na i ai se lao a Falaone leia na puipui ia latou. Ko Falaone leia na tokaga ki olatou mauli. Koia na leaise totogi ai e Sosefo olatou kele. 23Na pati loa Sosefo ki le kakai : I le aso nei kua kau totogi koutou mo okoutou kele ke kotou popula kia Falaone, e kau soli loa kia koutou se pulapula ke to ai a faisaga. 24Kae i le temi tanaki o le fulumeto, e kotou soli loa kia Falaone le vaega lima o le fulumeto. E fakalogo loa ala ake vaega e fa kia koutou, ke to ai akoutou faisaga, ti ke fagai ai akoutou fanau mo latou fuli ala e nofo i okoutou fale. 25Na lotou pati loa : E ke saofaki omatou mauli ! Ti ko leinei e ke toe fakasa lou alofa kia matou i le nea leinei, koia e motou tali ai ke motou popula kia Falaone.

26Na fakatuu loa e Sosefo le nea lena ko se lao o kaku mai ki le aso nei : E soli loa le vaega lima o fua o le kele kia Falaone. Na gato fai ki kele o le kau pelepitelo na leaise maua loa e Falaone.

27Na nofo loa Iselaele i Esipito, i le fenua ko Koseni. Na lotou maua loa i ai ni kele, ti na lotou maua loa ni fanau, ti na lotou liliu loa o lasi ai.

28Na mauli loa Sakopo i Esipito i fetuu e kau agafulu tupu fitu. Ko fetuu o le mauli o Sakopo ko le kau lelau kau fa tupu fitu. 29Na fakafeofi loa Iselaele ki le temi o lona mate, ti na kalagai loa e ia lona vosa ko Sosefo, o pati kiate ia : Kapau e ke alofa kiate au, ti ke fakasa loa kiate au lou alofa mo lou agatonu : Aua na ke tanu loa au i Esipito. E kau kole atu kiate koe, ke ke fakapapau mai kiate au, o velo mai lou lima ki lalo o loku tega. 30Ka kau moe loa o fakatasi mo oku tamana, ke ke ave loa au ke mamao mei le fenua o Esipito, ti ke tanu loa au i le tanuma o oku tamana. Na tali loa Sosefo : E kau fai loa o mulimuli ki lau masau. 31Ti na pati loa Sakopo : Fakapapau mai kiate au ! Ti na fakapapau ake loa Sosefo kiate ia. Ti na punou loa Iselaele ki le fugaulu o lona palepale.

Currently Selected:

Senesi 47: FB2000

Highlight

Copy