Senesi 46

Sakopo mo lona famili i Esipito

1Na ano loa Iselaele mo ana nea fuli. Na kaku loa a ia ki Pele-Sepa, ti na momoli loa e ia ni sakilifisio ki le Atua o lona tamana ko Isaake. 2Ti na masau loa le Atua kia Iselaele i se moe miti i le pouli, o pati : Sakopo ! Sakopo ! Ti na tali loa Iselaele : Ko leinei au ! 3Ti na pati loa le Atua : Ko au ko le Atua, ko le Atua o lou tamana. Ke aua na ke tuania i le ifo ki Esipito, talie e kau fakaliliu loa a koe ko se puleaga lasi i le fenua lena. 4Ko au totonu, e kau ifo loa mo koe ki Esipito, ti ko au totonu, e kau toe aumai ia loa a koe ki leinei. I lou mate ko Sosefo leia e tapono ia loa ou mata.

5Na mavae loa Sakopo i Pele-Sepa. Ti na fakaeke loa e vosa o Iselaele lolatou tamana ko Sakopo, mo alatou fanau, mo alatou avaga, ki saliote ala na fakamomoli ake e Falaone ke aumai ai latou. 6Na lotou ave foki alatou kau manu, mo alatou nea fuli ala na lotou maua i le fenua o Kanaane. Ti na ano loa Sakopo ki Esipito mo lona famili katoa.

7Na ave loa e ia ki Esipito ona vosa, mo vosa o ona vosa, mo ona taineliki, mo taineliki o ona vosa, ti mo lona famili katoa.

8Ko nei a igoa o vosa o Iselaele, ala na ifo loa ki Esipito.

Ko Sakopo mo ona vosa.

Ko le vosa uluaki o Sakopo ko Lupeni.

9Ko vosa o Lupeni : Ko Enoke, mo Palu, mo Eselone, mo Kalimi. 10Ko vosa o Simeone : Ko Semuele, mo Samine, mo Oate, mo Sakine, mo Soale ; ti mo Saulo, ko le vosa ki le fafine Kanaane. 11Ko vosa o Levi : Ko Kelesoni, mo Keati, mo Melali. 12Ko vosa o Suta : Ko Ele, mo Onane, mo Sela, mo Pelesi, mo Selake. Na mate loa Ele mo Onane i le fenua o Kanaane. Ko vosa o Pelesi ko Eselone mo Amule. 13Ko vosa o Isakale : Ko Tola, mo Puva, mo Sopo, mo Similoni. 14Ko vosa o Sapulone : Ko Seleti, mo Eloni, mo Saleli. 15Ko vosa ana ala na fanaui e Lea kia Sakopo i Patane-Alame, ti mo lona taine ko Tina. Na fakatasi latou mo alatou fanau ko le tino tolu tupu tolu.

16Ko vosa o Kate : Ko Sifesoni, mo Aki, mo Suni, mo Eteseponi, mo Eli, mo Aloti, mo Aleeli. 17Ko vosa o Asele : Ko Simena, mo Siseva, Sisevi, mo Pelia ; ti ko lolatou tuagaane ko Selake. Ti ko vosa o Pelia : ko Epele mo Malikiele.

18Ko vosa ana ala na fanaui e Silipa, leia na tuku e Lapane ki lona taine ko Lea ; ti na fanaui e ia latou kia Sakopo. Na fakatasi latou ko le tino agafulu tupu ono.

19Ko vosa o Lasele, avaga o Sakopo : Ko Sosefo mo Pesamino. 20Na tupu loa kia Sosefo, i le fenua o Esipito, a Manase mo Efalaimi, ala na fanaui kiate ia e Asenate, taine o Potifela, ko le pelepitelo o Oni. 21Ko vosa o Pesamino : Ko Pela, mo Pekeli, mo Asipeli, mo Kela, mo Neemani, mo Esi, mo Losi, mo Mupimi, mo Upime, mo Aleti.

22Ko vosa ana ala na fanaui e Lasele kia Sakopo. Na lotou fakatasi ko le tino agafulu tupu fa.

23Ko vosa o Tane : Ko Usime.

24Ko vosa o Nefetali : Ko Sateseele, mo Kuni, mo Setesele, mo Silemi.

25Ko vosa ana ala na fanaui e Pila, leia na tuku e Lapane ki lona taine ko Lasele ; ti na fanaui e ia latou kia Sakopo. Na lotou fakatasi ko le toka fitu.

26Ko le api o le famili o Sakopo, latou ala na ifo totonu meiate ia, ti na ifo mo ia ki Esipito, ko le tino ono tupu ono, kae na leaise lau a avaga o vosa o Sakopo.

27Na maua e Sosefo ni vosa e toka lua, ala na tupu kiate ia i Esipito. Ko le api katoa o le famili o Sakopo leia na nofo loa i Esipito ko le tino fitu.

28Na kakau loa e Sakopo a Suta ke muamua iate ia kia Sosefo, o fakasa kiate ia, ke nake a ia ki Koseni, talie e ifo loa a ia ki ai. 29Na teuteui loa e Sosefo lana saliote, ti na eke loa a ia ki ai, ti na ano loa a ia ki Koseni, o fakafelavei ki lona tamana ko Iselaele. I lana tio ki lona tamana, na makape loa a ia o kalu ki lona ua, o sogi kiate ia, ti na tagi loa a ia o fualoa i lona ua. 30Na pati loa Sakopo kiate ia : Ke kau mate i le temi nei, talie kua kau tio ki ou mata, ti koi ke mauli !

31Na pati loa Sosefo ki ona fetaina, mo le famili katoa o lona tamana : E kau ano o fakasa kia Falaone kua kaku mai kiate au oku fetaina mo le famili katoa o loku tamana, ala na nofo i le fenua o Kanaane. 32E kau fakasa loa kiate ia ko ni tagata tausi manu koutou, ti na kotou aumai akoutou kau pipi, mo akoutou kau ovi, mo akoutou kau koti, ti mo akoutou nea fuli. 33Ti kapau e kalagai loa koutou e Falaone ke kotou nake kiate ia, ti ka vesili atu loa a ia kia koutou : 34Pe kolea lakoutou gaoi ? Kotou tali loa kiate ia : E tausi manu au tagata fakasausau talu mei lomatou liliki o kaku mai ki le aso nei, ofaipe omatou tamana. I le nea lena e fakataga loa e ia kia koutou ke kotou nonofo i le fenua ko Koseni, talie e fakalialia le kau Esipito ki kau tausi manu fuli.

Currently Selected:

Senesi 46: FB2000

Highlight

Copy