Senesi 45

Fakasa o Sosefo ki ona fetaina

1Na leaise koi mafai loa e Sosefo le tataofi o ona loimata i mua o latou ala na nonofo mo ia i le fale, ti na kalaga loa a ia : ke fakaulu ki fafo le kakai katoa. Ti na nofo toka tasi loa Sosefo i le temi leia na fakasa ai a ia ki ona fetaina. 2Na tagi loa Sosefo o leo lasi, ti na logo loa ki ai le kau Esipito, ti na toe logo foki ki ai le fale o Falaone. 3Na pati loa Sosefo ki ona fetaina : Ko au Sosefo ! Pe koi mauli loku tamana ? Kae na leaise mafai ke tali ona fetaina, talie kua lotou sevaia i ona mua. 4Ti na pati loa Sosefo ki ona fetaina : Kotou fakafeofi mai kiate au. Ti na lotou fakafeofi ake loa kiate ia. Ti na pati loa a ia : Ko au Sosefo, ko lokoutou taina, leia na kotou fakatau ke ave ki Esipito. 5I le aso nei, aua na kotou mamae, ti aua na kotou ita i lakoutou fakatau au. Ko le Atua leia na kakau ia au i okoutou mua ke kau au ki le fenua leinei, ke saofaki ai lokoutou mauli. 6Ko leinei kua fetuu lua le oge i le fenua, ti koi toe foki ni iki fetuu e lima ala e leaise toe feala ai le gaoi ki le kele, ti e leaise toe maua ai se fulumeto. 7Na kakau mai au e le Atua ke kau muamua mai ia koutou ki le fenua leinei, o tupu ke mauli ai lokoutou sakoga i le fenua, ti ke kotou mauli foki o tio ki le alofa lasi o le Atua kia koutou o saofaki koutou. 8Koia e leaise ko koutou ala na aumai ia au ki leinei, kae ko le Atua. Kua fakanofo au e le Atua ko le tamana o Falaone, ko le pule o lona fale katoa, ti ko le kovana o le fenua katoa o Esipito. 9Kotou pale fakatavili ki loku tamana, o pati kiate ia : Ko leinei le masau o lou vosa ko Sosefo : Kua fakanofo au e le Atua ko le pule o Esipito katoa, ifo mai kiate au, aua na ke toe tuvai ! 10E ke nofo loa i le fenua o Koseni, ke ke feofi mai kiate au, mo au fanau, mo ou makopuna, mo au kau pipi, mo au kau ovi, mo au kau koti, ti mo au nea fuli. 11I leinei, e kau fagai loa a koe, mo lou fale, ti mo au nea fuli, ke aua na puli loa se nea kia koutou, talie koi toe foki ni fetuu oge e lima. 12Kua kotou tio mata totonu, ti kua tio mata foki loku taina ko Pesamino, ko au Sosefo, leinei e masau totonu atu kia koutou. 13Kotou fakamatala ki loku tamana loku kololia katoa i Esipito, mo nea fuli ala kua kotou tio ki ai. Ti kotou fakatavili loa o aumai loku tamana ki leinei.

14Na fui loa e Sosefo le ua o lona taina ko Pesamino, o tagi. Ti na tagi loa Pesamino i lona ua.

15Na toe fui foki e Sosefo ona fetaina fuli o tagi, ti na lotou kamata toa loa i le masau ake kiate ia.

16Na mafola loa le logo i le fale o Falaone kua kaku ake fetaina o Sosefo kiate ia. Na fiafia lasi ai Falaone mo ana minisi i le nea lena. 17Ti na pati loa Falaone kia Sosefo : Pati ki ou fetaina ke lotou fai le nea leinei : Kotou fakauta a amoga o akoutou manu, ti kotou toe liliu ki le fenua o Kanaane ; 18Kotou too loa lokoutou tamana, ti mo okoutou famili, ti kotou au loa kiate au. E kau soli loa kia koutou le koga fenua malie tukupau o Esipito, ti e kotou kai loa a fua malilie o le fenua. 19E kau tuku atu loa kiate koe le fakatotonu leinei, ke ke pati kia latou : Kotou fai le nea leinei : Kotou too i le fenua o Esipito ni saliote ke aumai ai okoutou avaga, mo okoutou fanau, mo lokoutou tamana. 20Ke aua na kotou fakasemala ki nea ala ka kotou tuku loa, talie e tuku atu loa kia koutou a nea malilie tukupau o Esipito.

21Na fai loa e vosa o Iselaele le nea lena. Na tuku loa e Sosefo kia latou ni saliote o mulimuli ki le fakatotonu a Falaone, ti mo ni nea kai ki le fanoga. 22Ti na soli loa e ia kia latou ni kofu foou, o tasi mo ia le kofu, kae soli loa e ia kia Pesamino ni kofu e lima mo ni fa sikele paaga e kau lelau tolu. 23Ti na fakamomoli loa e ia ki lona tamana ni asino tagata e kau agafulu o ave ai a fua malilie tukupau o Esipito, ti mo asino fafine e kau agafulu o ave ai le fulumeto, mo pane, mo nea kai ki le fanoga. 24Ti na kakau loa e ia ona fetaina ke ano, ti na lotou ano loa. Ti na toe pati loa a ia kia latou : Ke aua na kotou fefele loa i le ala.

25Na lotou mavae loa i Esipito o ano ki le fenua o Kanaane, ti na lotou kaku loa ki lolatou tamana ko Sakopo. 26Na lotou pati loa kiate ia : Koi mauli Sosefo, ti ko leinei foki ko ia leia kua pule i le fenua katoa o Esipito. Kae na momoko loa le mafu o Sakopo, talie na leaise tui loa a ia kia latou. 27Ti na lotou fakamatala loa kiate ia a masau fuli ala na fai e Sosefo kia latou. Na toe tio foki Sakopo ki saliote ala na fakamomoli ake e Sosefo ki lona fanoga. I le nea lena, na ofo loa le laumalie o lolatou tamana ko Sakopo. 28Ti na pati loa Iselaele : Kua feauga ! Koi mauli loku vosa ko Sosefo ! E kau ano loa, ti e kau tio loa kiate ia i mua o loku mate.

Currently Selected:

Senesi 45: FB2000

Highlight

Copy