Senesi 38

Suta mo Tamale

1I le temi lena, na mavae loa a Suta i ona fetaina, ti na ano loa a ia ki se tagata o Atulami na igoa ko Ila. 2I ai, na tio loa a Suta ki le taine o se tagata Kanaane na igoa ko Sua ; ti na avaga loa a ia mo le taine lena ; ti na ano loa a ia kiate ia. 3Na tinae loa le fafine, ti na fanaui loa e ia se tama, leia na fakaigoa loa e ia ko Ela. 4Na toe tinae loa a ia, ti na fanaui loa e ia se tama, leia na fakaigoa loa e ia ko Onane. 5Na toe fanaui loa e ia se tasi a tama, leia na fakaigoa loa e ia ko Sela. Na nofo a Suta i Kesipi i le tupu o Sela.

6Na filifili loa e Suta ki lona vosa uluaki ko Ela, se fafine na igoa ko Tamale. 7Ko Ela, le vosa uluaki o Suta, na agaveli ai ki mata o le Eteleno ; ti na fakamate loa a ia e le Eteleno. 8Ti na pati loa a Suta kia Onane : Ano ki le avaga o lou taina, o too a ia, ti ke fakatupu se sakoga ki lou taina. 9Kae i le iloa e Onane e leaise ko lona sakoga loa a ia, na liligi loa e ia lona pulapula ki le kele i temi fuli ala na ano ai a ia ki le avaga o lona taina, o tupu ke aua na maua loa se sakoga ki lona taina. 10Na veli ai le nea lena ki mata o le Eteleno, leia na toe fakamate ia loa a ia. 11Ti na pati loa a Suta ki lona fugao ko Tamale : Ko leinei kua ke nofo toka tasi, toe liliu o nofo i le fale o lou tamana, o talitali ke lasi ake loku vosa ko Sela.

Na masau felaaki a ia talie na i a ia na toe mate loa lona vosa ko Sela ofaipe ona taokete. Ti na ano loa Tamale o nofo i le fale o lona tamana.

12Na fualoa ai, ti na mate loa le taine o Sua, le avaga o Suta. I le tokamalie loa o le loto o Suta, na pale loa a ia mo lona kau tagata ko Ila, tagata Atulami, ki Timina kia latou ala na koti ia lana kau ovi. 13Na fakasa loa le nea lena kia Tamale, o pati kiate ia : Ko leinei lou tamana kua pale ki Timina, o tuuti lana fului ovi. 14Ti na tatala loa e Tamale ona teu fakalokonui, ti na puloui loa e ia ona mata ki se kie, ti na ano loa a ia o tonatona i le matapa o Enaimi, leia na tuu i le ala o Timina ; talie na tio a ia kua lasi a Sela, kae na leaise soli a ia e Suta ke avaga mo Sela. 15Na tio loa Suta kia Tamale, ti na pati loa a ia ko se fafine faiaga, talie na puloui e Tamale ona mata. 16Ti na ano loa a ia o pati kia Tamale : Tuku mai ke kau natu kiate koe. Na leaise iloa loa e Suta ko lona fugao a ia. Ti na pati loa Tamale kiate ia : Kolea le nea leia e ke soli mai loa kiate au ke ke au ai kiate au ? 17Na tali loa Suta : E kau fakamomoli mai loa kiate koe se uviki koti o laku kau manu. Ti na pati loa Tamale : Tuku mai kiate au se fakamaoki o kaku ki le kaku mai o le nea lena. 18Na tali loa Suta : Kolea le fakamaoki leia e tonu ke kau tuku atu kiate koe ? Ti na pati loa Tamale : Ko lou mama fakamailoga totonu, mo lou kavei, ti mo le tokotoko lena e ke too i lou lima. Ti na tuku loa e Suta a nea ana kia Tamale, ti na ano loa a Suta kiate ia. Na tinae loa Tamale kia Suta. 19Na toe liliu loa Tamale ki lona kaiga ; ti na tatala loa e ia lona pulou, kae na toe tui loa e ia ona teu fakalokonui.

20Na kakau loa e Suta lona kaukau soa ko Atulami ke ano o ave le uviki koti, ti mo toe aumai a nea fakamaoki ala na tuku ki le fafine. Kae na leaise maua loa e ia le fafine. 21Ti na vesili loa a ia ki le kakai o le ganea lena : Kofea le fafine faiaga leia na tuu i Enaimi, i le ala o Timina ? Ti na lotou tali loa kiate ia : Na leikiaise maua i le fenua leinei se fafine faiaga. 22Ti na toe liliu loa le tagata kia Suta, o pati : Na leaise kau maua le fafine, ti na pati mai le kakai o le fenua kiate au : Na leikiaise maua i le fenua leinei se fafine faiaga. 23Na pati loa Suta : Ke taupau e ia a nea ana ma ana ! E leaise tonu ke katai tatou. Ko leinei, na kau ave le uviki koti, kae na leaise ke maua a ia.

24Na sili loa ki ai ni masina e tolu, ti na fakasa loa kia Suta : Kua faiaga lou fugao ko Tamale, ti ko leinei kua tinae a ia i lana faiaga. Ti na pati loa Suta : Kotou aumai a ia ke tutu mauli ! 25I le lolotoga o lona ave ki le tua kolo, na pati loa Tamale ke fakasa ki lona tamana ko Suta : Na kau tinae ki le tagata leia o ona a nea anei ; e kau kole atu kiate koe ke ke iloa pe a ai a nea ana, le mama fakamailoga, mo le kavei, ti mo le tokotoko. 26Na iloa loa e Suta a nea ana, ti na pati loa a ia : E ikiiki ake lana sala iate au, talie na leaise kau soli a ia ki loku vosa ko Sela ! Ti na leaise toe ano loa Suta kia Tamale.

27I le tatae ki le fanau o Tamale, ko leinei na nofo se masaga i lona manava. 28I le lolotoga o lana fanau, na sa ake loa ki tafa le lima o se tasi, ti na nonoa loa ki ai e le fafine fai fanau se va kula. Ti na pati loa a ia : Ko ia leinei na uluaki tupu ! 29Kae na toe sau e le toe lona lima, ti na vilo ake loa lona taina ki tafa. Ti na pati loa le fafine fai fanau : Ko le mavaa fea leia na ke ulu mai ai ki tafa ! Ti na soli loa e ia kiate ia le igoa ko Pelesi. 30Ti na vilo ake loa ki tafa lona taina, leia na nonoa lona lima ki le va kula, ti na soli loa kiate ia le igoa ko Selake.

Currently Selected:

Senesi 38: FB2000

Highlight

Copy