Senesi 39

Sosefo i Esipito

1Na ave loa Sosefo ki Esipito ; ti ko le tagata Esipito ko Potifale, ofisa a Falaone, pule o le kau polisi, na totogi ia loa a ia i le kau Isemaele ala na ave ia a ia ki Esipito. 2Na nofo loa le Eteleno mo ia, ti na ano loa le manuia mo ia ; na nofo a ia i le fale o lona pule, le tagata Esipito. 3Na tio loa lona pule na nofo le Eteleno mo ia, ti na fakamanuia loa e le Eteleno a nea fuli i ona lima. 4Na malie ai Sosefo ki mata o lona pule, leia na fakagaoi ia loa a ia kiate ia, ti na fakanofo ia loa a ia ke pule ki lona fale, ti na tuku ia loa ki ona lima ana nea fuli. 5Talu mei le aso leia na fakanofo ai a ia e Potifale ke pule ki lona fale mo ana nea fuli, na tapuaki loa le Eteleno ki le fale o le tagata Esipito, o tupu ko Sosefo. Ti na ifo loa le tapuakina a le Eteleno ki ana nea fuli, i lona loto fale, ti mo ona faisaga.

6Ti na tuku loa e Potifale ana nea fuli ki lima o Sosefo, ti na leaise toe tokaga loa a ia ki se nea, gato fua ki le too o lana nea kai. Na kuaga malie a Sosefo mo tupulaga.

7I le sili o nea ana, na laukau loa le avaga o lona pule kia Sosefo, ti na pati loa a ia kiate ia : Au ke ta momoe ! 8Kae na fakafiti loa a ia, o pati ki le avaga o lona pule : Ko leinei, e leaise afa mai fua e loku pule kiate au se nea i lona fale, talie kua tuku mai e ia ana nea fuli ki oku lima. 9E leaise lasi ake a ia iate au i le fale leinei, ti e leaise tapui e ia se nea kiate au, gato fua kiate koe, talie ko lana avaga a koe. E feaki loa ke kau fai se nea veli fenaaki kiate ia, ti ke kau toe agasala ai ki le Atua ? 10Logo ai na masau le fafine i aso fuli kia Sosefo, kae na fakafiti aifai a ia, ke momoe mo ia, pe ke ofi kiate ia. 11Kae i se aso leia na ulu ai Sosefo ki le fale, o fai lana gaoi, ti na leaise nofo se tasi i le loto fale, 12na too loa e le fafine a Sosefo i lona kofu, o pati kiate ia : Momoe mo au ! Ti na tiaki loa e Sosefo lona kofu i lima o le fafine, kae sola loa a ia ki fafo. 13I le tio a le fafine kua sola Sosefo ki fafo, kae na tiaki e ia lona kofu i ona lima, 14na kalaga loa a ia ki le kakai o le fale, o pati kia latou : Kotou tio, kua aumai e ia se tagata Epeleo ke kakaai ia tatou. Na au le tagata lena kiate au ke momoe mo au, kae na kau kalaga o leo lasi. 15I lana logo ki laku kalaga leo lasi, na tiaki loa e ia lona kofu i oku tafa kae sola a ia ki fafo. 16Ti na tuku loa e le fafine le kofu o Sosefo i ona tafa, o kaku ki le ulu ake o lona pule ki fale. 17Ti na pati loa a ia ki lona avaga : Ko le tagata fakasausau Epeleo leia na ke aumai kia tatou, na au kiate au ke momoe mo au ; 18Kae i lana logo ki laku kalaga leo lasi, na tiaki loa e ia lona kofu i oku tafa, kae sola a ia ki fafo. 19I le logo a Potifale ki masau a lana avaga, leia na pati loa kiate ia : Ko lena le nea leia na fai e lau tagata fakasausau kiate au ! Na ita lasi loa le pule o Sosefo.

20Ti na pati loa a ia ke too Sosefo, o ti ki le fale pilisoni, ki le ganea leia e nofo ai le kau pilisoni a le sau : Ti na nofo loa Sosefo i le fale pilisoni.

21Na nofo loa le Eteleno mo Sosefo, ti na fakasa loa e ia lona agamalie kiate ia. Na tuku loa e ia kiate ia se kalasia i mua o le pule o le fale pilisoni. 22Ti na fakanofo loa e le pule o le fale pilisoni a Sosefo ke leoleo ki le kau pilisoni katoa ala na nonofo i le fale pilisoni. Ko ia leia na takitaki ia a gaoi fuli ala na fai e le kau pilisoni. 23Na leaise toe tokaga loa le pule o le fale pilisoni ki nea ala kua tuku ki lima o Sosefo, talie na nofo le Eteleno mo ia. Ti na fakamanuia loa e le Eteleno a nea fuli ala na fai e ia.

Currently Selected:

Senesi 39: FB2000

Highlight

Copy