Senesi 37

Fakatau o Sosefo e ona fetaina

1Na nofo loa Sakopo i le fenua o Kanaane, leia na nofo fakatemi ai lona tamana.

2Ko leinei le sakoga o Sakopo. Na fetuu kau agafulu tupu fitu Sosefo, ti na tausi e ia le kau manu o lona tamana, o fakatasi mo ona fetaina ; ti na nofo le fanau lena mo vosa o Pila ti mo vosa o Silipa, ko tinifu o lona tamana. Ti na fakasa e Sosefo ki lolatou tamana alatou masau veli. 3Na alofa Iselaele kia Sosefo o lasi ake i ona vosa fuli, o tupu na maua e ia a ia i lona matua ; ti na fai loa e ia se kofu lanu kesekese kiate ia. 4Na tio loa ona fetaina na alofa lasi ake lolatou tamana kia Sosefo ia latou fuli, ti na lotou vesia loa kiate ia. Na leaise feala ke lotou masau malie kiate ia.

Moemiti a Sosefo

5Na fai loa e Sosefo se moe miti, ti na fakamatala loa e ia a ia ki ona fetaina, ala na toe asilisili vesia loa kiate ia. 6Na pati loa a ia kia latou : Ke kotou fakalogo mai ki le moe miti leinei kua kau fai ! 7Na tou lolotoga sai a fuiga fulumeto i faisaga ; ti ko leinei, na malaga ake loa laku fuiga fulumeto, o tuu fakasako ki aluga, ti na nake loa akoutou fuiga fulumeto o takatakai a ia, ti na lotou punou loa kiate ia. 8Na pati loa ona fetaina kiate ia : Pe maoki e ke pule loa kia matou ? Pe ke lagiaki loa kia matou ? Ti na lotou toe asilisili vesia loa kiate ia o tupu ko ana moe miti mo ana masau.

9Na toe fai foki e ia se tasi moe miti, ti na toe fakamatala loa e ia ki ona fetaina. Na pati loa a ia : Na kau toe fai foki se tasi moe miti : Na kau tio ki le laa, mo le masina, ti mo fetuu e kau agafulu tupu tasi, na tulolo i oku mua. 10Ti na fakamatala loa e ia lana moe miti ki lona tamana mo ona fetaina. Ti na valoki loa a ia e lona tamana, o pati : Kolea le uiga o le moe miti lena kua ke fai ? Pe tonu loa ke motou au, a au ko lou tamana, mo lou tinana, ti mo ou fetaina fuli, o punou ki le kele i ou mua ? 11Na finenonofo loa ona fetaina kiate ia, kae na taupau loa e lona tamana a nea ana i lona loto.

12Na ano loa fetaina o Sosefo ki Siseme, o fagai ai le kau manu o lolatou tamana. 13Ti na pati loa Iselaele kia Sosefo : Pe leaise fagai e ou fetaina le kau manu i Siseme ? Au, talie e kau loto ke ke ano kia latou. Ti na tali loa a ia, ko leinei au ! 14Na pati loa Iselaele kiate ia : E kau kole atu kiate koe ke ke ano o fakatele ki ou fetaina, o tio pe lotou malolo mo le kau manu ; ti ke au loa mo ni logo kiate au. Ti na kakau loa e Sakopo lona vosa ko Sosefo mei le vaivailiua o Epelone ; ti na ano loa Sosefo ki Siseme. 15Na felavei loa se tagata mo ia i lana foli i faisaga, ti na vesili loa le tagata kiate ia : Kolea e ke afa ? 16Na tali loa Sosefo : E kau afa oku fetaina. E kau kole atu kiate koe ke ke fakasa mai kiate au le ganea leia e lotou fagai ai a manu. 17Ti na pati loa le tagata kiate ia : Kua lotou mavae i leinei, talie na kau logo ki lalatou pati : Tou ano ki Totane ! Ti na ano loa Sosefo o afa ona fetaina, ti na maua loa e ia latou i Totane.

18Na lotou tio loa kiate ia mei mamao, kae i mua o lana kaku ake kia latou, na lotou fonofono loa ke tamate a ia. 19Na lotou fepatiaki loa : Ko leinei le tagata fai moe miti e au kia tatou ! 20Kotou au i le temi nei, tou tamate a ia, ti tou ti loa a ia ki se sosoni i sosoni anei. E tou pati loa kua kai a ia e se manu fekai, ti e tou tio loa pe iku feaki loa ana moe miti. 21Na logo loa Lupeni ki le nea lena, ti na fakapapau loa a ia ke saofaki e ia Sosefo mei lima o ona fetaina. Na pati loa a ia : Aua na tou tamate a ia. 22Ti na toe pati loa Lupeni kia latou : Aua na kotou liligi le toto ; kotou ti a ia ki le sosoni leinei i le toafa, kae aua na fafa okoutou lima kiate ia. Na masau felaaki loa a ia talie kua fakatuutuu e ia ke saofaki e ia Sosefo mei lima o ona fetaina, o toe fakaliliu a ia ki lona tamana.

23I le tau ake fai a Sosefo ki ona fetaina, na lotou tatala loa lona kofu, le kofu lanu kesekese leia na kofu e ia. 24Ti na lotou ti loa a ia ki le sosoni. Na masa le sosoni lena, ti na leaise se vai i ai. 25Na lotou tonatona loa ki lalo o kai. Na lotou tio loa ki se fanoga a se kau Isemaele. Na lotou au mei Kalaate, ti na lotou ano ki Esipito. Na amo e alatou kamelo ni laakau fakamanogi, mo ni kaloni, mo se mila. 26Ti na pati loa a Suta ki ona fetaina : Kolea sona aoga kia tatou o latatou tamate lotatou taina, mo latatou fufu lona toto ? 27Kotou au, ti tou fakatau a ia ki le kau Isemaele, kae aua na fafa otou lima kiate ia, talie ko lotatou taina a ia, ko lotatou tino. Ti na fakalogo loa ona fetaina kiate ia.

Fakatau o Sosefo ke ave ki Esipito

28I le kaku ake o le kau o Matiane kia latou, na lotou toso ake loa Sosefo mei le sosoni ki tafa, ti na lotou fakatau loa a ia o kau lua sikele paaga ki le kau Isemaele, ala na ave ia loa Sosefo ki Esipito.

29Na toe liliu loa Lupeni ki le sosoni ; ti ko leinei, kua puli Sosefo i le sosoni. Ti na sae loa e ia ona kofu. 30Ti na ano loa a ia ki ona fetaina o pati kia latou : Kua puli le toe ! Ti ko au, e kau ano loa kifea ? 31Na lotou too loa le kofu o Sosefo ; ti na lotou tamate loa se koti tagata, ti na lotou ukui loa le kofu ki le toto. 32Ti na lotou fakamomoli loa ki lolatou tamana le kofu lanu kesekese, o pati kiate ia : Ko leinei le nea leia na motou maua ! Tio pe leaise ko le kofu a ia o lou vosa.

33Na iloa loa e Sakopo le kofu, ti na tagi loa a ia, o pati : Ko le kofu a ia o loku vosa ! Kua kai a ia e se manu fekai ! 34Ti na sae loa e Sakopo ona kofu, kae tui loa e ia se taga, ti na tagi loa a ia ki lona vosa i se temi fualoa ai. 35Ti na nake loa ona vosa fuli mo ona taineliki fuli o fakapelepelei a ia, kae na leaise tali loa e ia se fakafimalie e tasi. Na pati loa a ia : E kau tagi loa ki loku vosa o kaku ki le aso leia e kau fakatasi ai loa mo loku vosa i le nofoaga o le kau mate ! Ti na tagi a ia ki lona vosa.

36Na fakatau loa e le kau Matiane a Sosefo i Esipito kia Potifale, ko le ofisa a Falaone, ko le pule o le kau leo.

Currently Selected:

Senesi 37: FB2000

Highlight

Copy