Gaoi 10

Petelo mo Kolenelio

1Na i ai i Sesalea se tagata na igoa ko Kolenelio, ko se pule tau o le kau solia na pati ko le solia Italia. 2Na tausi malie a ia mo alofa ki le Atua, a ia mo lona fale katoa ; ti na fai e ia ni nea alofa lasi ki le kakai, mo faikole tuumau ki le Atua.

3I se sili lalatea vae ola tolu, na tio malama loa a ia i se sa ki se aselo a le Atua na ulu ake ki lona fale, o pati ake kiate ia : Kolenelio ! 4Ti i lana tio fakamaumau kiate ia mo se i lasi, na tali loa a ia : Aliki, kolea ? Ti na pati loa le aselo kiate ia : Kua kaku au faikole mo ou nea alofa ki mua o le Atua, ti kua manatui e ia latou. 5Kakau i le lakaga nei ni tagata ki Sope, o taki mai Simone leia e igoa ko Petelo ; 6e nofo a ia i le fale o se tagata gaoi kilii manu e igoa ko Simone, leia e ofi lona fale ki le tai.

7I le mavae a le aselo leia na masau kiate ia, na kalagai loa e Kolenelio se toka lua i ana tagata fakasausau, ti mo se tagata solia agatonu ia latou ala na tausi kiate ia ; 8ti i le oki o lana fakamatala kia latou o nea fuli, na kakau loa e ia latou ki Sope.

Tio a Petelo ki se kie na ifo mei lagi

9I le pogipogi ake, i le lolotoga o lalatou fanoga i le ala, ti kua lotou ofi foki ki le kolo, na pale loa Petelo ki le tua aluga o le fale, i le vae tupu lua lalatea, o faikole. 10Ti na fia kai loa a ia, ti na loto loa a ia ke kai. I le lolotoga o le teuteui o se nea kai kiate ia, na fakatio loa a ia ki se tio. 11Ti na tio loa a ia ki le lagi kua mavaa, ti ko se nea leia na faipe se fa kie lasi kua nonoa i ona tapa e fa, na ifo loa o kaku ki le kele, 12ti na maua i ai a manu vae fa fuli, mo manu totolo o le kele, ti mo manu lele o le lagi. 13Ti na pati loa se leo kiate ia : Petelo, tuu ki aluga, ti ke tamate, o kai. 14Kae na tali loa Petelo : Leai, Aliki, talie e leikiaise kau kai fua i se aso ki se nea e tapu pe kelekele. 15Ti na toe pati loa le leo kiate ia ko lona tua lua a ia : Ko le nea leia kua fakasa e le Atua e mea, aua na ke tio ki ai ofaipe se nea e kelekele. 16Na soko tua tolu le nea lena, ti na toe too loa a ia ki le lagi.

17Ti i le lolotoga fifili a Petelo ki le uiga o le nea leia na tio ki ai, ko leinei, na tutuu ake loa ki le matapa a tagata ala na kakau mai e Kolenelio, o afa le fale o Simone. 18Ti na lotou vesili loa o leo lasi pe nofo i leinei a Simone, leia e igoa ko Petelo.

19I le fakakaukau a Petelo ki le nea leia na tio ki ai, na pati loa le Laumalie kiate ia : Ko nei ni tagata e toka tolu e afa ia a koe ; 20tuu ki aluga, o ifo ki lalo, ti ke ano mo latou ; aua na ke i, talie ko au leia na kakau ia mai latou. 21Ti na ifo loa Petelo, o pati ki tagata ana : Ko leinei, ko au leia e kotou afa ; kolea le nea e kotou au ai ? 22Ti na lotou tali loa : Ko Kolenelio, ko se setulio Loma, tagata agatonu mo alofa ki le Atua, leia kua fakamaoki ki ai le puleaga katoa o le kau Sutea, na fakasa kiate ia e le Atua i lana aselo maokioki ke aumai a koe ki lona fale, ke logo a ia ki au folafola.

Ano a Petelo ki le fale o Kolenelio

23Ti na fakaulu loa e Petelo latou ki fale, o fakamomoe i ai. I leia ake aso, na tuu loa a ia ki aluga, o ano mo latou. Ti na ano foki ni iki i fetaina o Sope mo ia.

24Na lotou kaku loa ki Sesalea i leia ake a aso. Ti na talitali Kolenelio kia latou, ti kua fakaafe e ia ona matua mo ona kaukau nea. 25I le kaku atu a Petelo, na au loa Kolenelio o fakafetaulaki mai kiate ia, ti na fakapulou loa a ia ki lalo i ona vae ke su kiate ia. 26Kae na fakatuu ake loa a ia ki aluga e Petelo, o pati : Tuu ki aluga ; ko au foki ko se tasi tagata. 27Ti na koi masau a ia kiate ia, na ulu loa a ia ki fale, o maua se kakai toka api kua fakatasi i ai. 28Ti na pati loa a ia kia latou : E kotou iloa e tapu ki se Sutea ke fakatasi mo se matapule pe ke ulu ki lona fale ; kae na fakasa mai e le Atua kiate au ke aua na kau tio ki se tagata fua e tasi e tapu pe kelekele. 29Koia na leaise faigataa ai kiate au ke kau au, talie kua kotou kalagai au ; ti e kau kole atu loa kia koutou pe kolea na kotou aumai ai au.

30Ti na pati loa Kolenelio : Kua aso fa nei loa, i le ola leinei, na kau faikole i loku fale i le vae ola tolu sili lalatea ; ti ko leinei, na tuu mai loa ki oku mua se tagata kua teu gigila, o pati : 31Kolenelio, kua tali lau kole, ti kua manatui e le Atua au nea alofa. 32Koia kakau se tasi ki Sope, o aumai Simone, leia e igoa ko Petelo ; e nofo a ia i le fale o Simone, tagata gaoi kilii manu, i le mata tai. 33Ti na kau kakau atu aifai se tasi kiate koe, ti ko se nea malie ai lau au. Koia i le temi nei, kua motou nofo fuli i leinei i mua o le Atua, ke fakalogo ki nea fuli ala kua fakatotonu atu e le Aliki kiate koe ke fakasa mai kia matou.

Akonaki a Petelo ki le kau pagani

34Ti na fakamavaa loa e Petelo lona gutu, o pati : E maoki e kau iloa e leaise filifili lanu le Atua, 35kae i puleaga fuli, ko leia e alofa kiate ia mo saele i le maokioki, e malie a ia ki ona mata. 36Na kakau e ia le folafola ki vosa o Iselaele, o fakasa kia latou le tokamalie ia Sesu-Kilisito, leia ko le Aliki o tagata fuli. 37Ti kua kotou iloa le nea leia na soko mua i Kalilea, o sosolo i Sutea katoa, i le oki o le akonaki mo le papitema a Soane. 38Ti kua kotou iloa le fakanofo e le Atua o Sesu mei Nasaleti i le Laumalie Maokioki mo le makeke. Ti kua kotou iloa foki le ano saele a Sesu i le fenua katoa o fai a nea malilie ti mo fakamauli latou fuli ala na saisai e le pule o le temonio, talie na nofo iate ia le Atua. 39Ko tagata fakamaoki matou o nea fuli ala na fai e ia i le fenua o le kau Sutea mo Selusalemi. Na lotou tamate a ia, o tautau i le laakau. 40Kae na toe fakatuuake a ia e le Atua i le tolu o aso, ti na fakataga e ia ke sa a ia, 41o leai ki le kakai katoa, kae ki tagata fakamaoki ala na filifili fakatomua e le Atua, kia matou ala na kai mo inu fakatasi mo ia, i le oki o lona toe tuuake mei le kau mate. 42Ti na fakatotonu mai e Sesu kia matou ke fakasa ki le kakai mo fakamaoki ko ia totonu leia kua fakanofo e le Atua ko le tui fakamaau o le kau mauli mo le kau mate. 43Ti na fakamaoki kiate ia le kau polofeta fuli : ko leia e tui kiate ia e tali loa e ia i lona suafa le fakamolemole o agasala.

Ifo o le Laumalie Maokioki ki le kau pagani

44Ti na koi puaki e Petelo a masau ana, ko leinei na ifo loa le Laumalie Maokioki kia latou fuli ala na fakalogo ki le folafola. 45Ti na punamauli loa le kau agatonu silikosisio leia na au mo Petelo, o tupu kua toe tufaki foki le nea alofa o le Laumalie Maokioki ki le kau pagani. 46Talie kua lotou logo kia latou e masau i masau kesekese, o fakakololia ki le Atua.

47Ti na pati loa Petelo : Pe mafai ke taofi le vai o le papitema kia latou ala kua tali ia le Laumalie Maokioki ofaipe tatou ? 48Ti na fakatotonu loa e ia ke papitema latou i le suafa o le Aliki. Ti na lotou kole loa kiate ia ke toe nofo mua mo latou i ni iki ake ga aso.

Currently Selected:

Gaoi 10: FB2000

Highlight

Copy