Gaoi 11

Masau a Petelo ki le Ekelesia o Selusalemi

1Ti na logo loa le kau apositolo mo fetaina ala na nonofo i Sutea, kua tali foki e le kau pagani le folafola a le Atua. 2Ti i le pale ake loa a Petelo ki Selusalemi, na fakavesilii loa a ia e le kau agatonu silikosisio, 3o lotou pati loa kiate ia : Na ke ulu ki fale o ni kau lee silikosisio ti na ke kai fakatasi mo latou.

4Ti na fakasa loa e Petelo mei le kamataaga, o fakamatala sosoko kia latou a nea fuli ala na soko. 5Ti na pati loa a ia : Na kau nofo i le kolo ko Sope, ti i le lolotoga o laku faikole, na kau tio loa ki se nea leia na sa mai kiate au : na fai a ia pe se kie laulasi, leia na nonoa i ona tapa e fa, ti na ifo a ia mei lagi, o kaku mai kiate au. 6I laku tio fakamaumau ki ai, o sivisivi fakamalielie a ia, na kau tio loa ki manu vae fa o le kele, mo manu kaikivao, mo manu totolo, ti mo manu lele o le lagi. 7Ti na kau logo loa ki se leo leia na pati mai kiate au : Petelo, tuu ki aluga, o tamate, ti ke kai. 8Kae na kau pati loa : Leai, Aliki, talie na leikiaise ulu i se aso se nea e tapu pe kelekele ki loku gutu. 9Ti na kau toe logo loa i le tua lua ki le pati mai a le leo lena mei lagi : Ko le nea leia kua fakasa e le Atua e mea, aua na ke tio ki ai o sakinake e kelekele. 10Na soko loa le nea lena o tua tolu, ti na toe too loa a nea fuli ki le lagi. 11Ti fokifa fai, kua kaku ake ni tagata e toka tolu na kakau mai mei Sesalea, o tutuu i le matapa o le fale leia na kau nofo ai. 12Ti na pati mai loa le Laumalie kiate au ke kau ano mo latou, kae aua na kau i. Ti na ano loa mo au a fetaina anei e toka ono, ti na motou ulu loa ki le fale o Kolenelio. 13Ti na fakamatala mai loa e le tagata lena kia matou lana tio i lona fale ki le aselo leia na sa ake kiate ia, o pati : Kakau se tasi ki Sope o afa mai Simone e igoa ko Petelo, 14leia e fakasa ia atu loa kiate koe a folafola ala e saofaki ai loa a koe mo lou fale katoa. 15Koi kamata laku masau, kae kua ifo loa le Laumalie Maokioki kia latou ofaipe lana ifo kia tatou i le kamataaga. 16Ti na kau manatui loa le folafola leinei a le Aliki : Na papitema Soane ki le vai, kae ko koutou, e kotou papitema loa ki le Laumalie Maokioki. 17Ko leinei kua soli foki e le Atua kia latou le nea alofa e tasi, leia na fai e ia kia tatou ala na tui ki le Aliki ko Sesu-Kilisito, ti ko ai au, ke kau taofi le Atua ?

18I le oki o lalatou fakalogo ki le nea lena, na lotou fimalie loa ti na lotou fakakololia ki le Atua, o pati : Kua tuku foki e le Atua le fakasemala ki le kau pagani, o tupu ke lotou maua le mauli lee gato.

I Atiokia : le igoa ko kilisiteano

19Ko latou ala na mavetevete o tupu ko le fakaveliveli leia na soko ia Setefano, na ano loa o kaku ki Fenisia, mo le motu ko Sipele, ti mo Atiokia, o fakasa le folafola ki le kau Sutea tefua. 20Kae na i ai loa ia latou ni tagata mei Sipele mo Silene ala na kaku loa ki Atiokia ti na lotou masau foki ki le kau Keleka, o fakasa kia latou le logo malie o le Aliki ko Sesu. 21Ti na nofo ia latou le lima o le Aliki, ti na tui loa se toka api, o tafoki ki le Aliki.

22Na kaku loa le logo lena ki taliga o le Ekelesia o Selusalemi, ti na lotou kakau loa Palenapa ki Atiokia. 23I lana kaku ki ai, o tio ki le kalasia o le Atua, na fiafia loa a ia, ti na ako loa e ia latou fuli ke lotou pipiki mau ki le Aliki. 24Talie ko se tagata malie a ia, mo apele i le Laumalie Maokioki mo le tui. Ti na tafoki ki le Aliki se kakai toka api ai.

25Na ano loa Palenapa ki Talese, o afa mai Saulo ; 26ti i lana maua a ia, na taki mai loa e ia a ia ki Atiokia. I le lolotoga o se fetuu katoa e tasi, na la kau loa ki fakatasi a le Ekelesia ti na la ako loa se kakai toka api ai. I Atiokia, na uluaki fakaigoa ai le kau tisipulo ko le kau kilisiteano.

Fai alofa o le Ekelesia o Atiokia ki sagato o Selusalemi

27I aso ana, na ifo loa mei Selusalemi ki Atiokia ni polofeta. 28Ko se tasi o latou na igoa ko Akapusi, na tuu loa ki aluga o fakasa i le Laumalie, e to loa se oge lasi i le malama nei katoa. Ti na to loa le oge lena i le temi o Kolote, sau o le kau Loma. 29Ti na fai loa se tonu e le kau tisipulo ke ave se tokoi ki fetaina i Sutea, o fakalogo ki le nea leia e mafai e le tagata taki toka tasi. 30Ti na lotou fakakaku loa le nea lena ki le kau fakamatuatua i le lima o Palenapa mo Saulo.

Currently Selected:

Gaoi 11: FB2000

Highlight

Copy