Gaoi 9

Tafoki o Saulo

1Kae ko Saulo, leia koi oli aifai ki le fakaii ti mo le tukipooi o le kau tisipulo a le Aliki, na ano loa ki le fale o le pule faisakilifisio, 2o kole kiate ia ni tosi ki sinakoka o Tamaso, o tupu ka maua loa e ia ni iki o le ala lena, tagata pe fafine, ke saisai loa e ia latou o aumai ki Selusalemi.

3I lana fanoga i le ala, ti kua ofi atu ki Tamaso, na fokifa fai kua takatakai loa a ia e se malama gigila na au mei le lagi. 4Na vilo loa a ia ki lalo, ti na logo loa a ia ki se leo leia e pati mai kiate ia : Saulo, Saulo, kolea e ke fakavelivelii ai au ? 5Ti na tali loa a ia : Ko ai a koe, Aliki ? Ti na pati loa le Aliki : Ko au Sesu leia e ke fakavelivelii. E faigataa loa kiate koe ke akasi ia a ukamea kakai. 6Na lulu katoa loa a ia mo ofolele, o pati : Aliki, kolea e ke loto ke kau fai ? Ti na pati loa le Aliki kiate ia : Tuu ki aluga, o ulu ki le kolo, ti e fakasa atu loa kiate koe le nea leia e tonu ke ke fai. 7Ko tagata ala na kau fanoga mo ia na tutuu loa i lolatou punamauli ; na lotou logo ki le leo kae na leaise lotou tio ki se tasi. 8Na tuu ake loa Saulo mei le kele, ti na logo ai le mavaa o ona mata, kae na leaise tio fua a ia ki se nea ; ti na too loa a ia i lona lima, o taki ki Tamaso. 9Na nofo loa a ia i aso e tolu na leaise tio, ti na leaise kai, ti na leaise inu.

10Kae na i ai se tisipulo i Tamaso na igoa ko Ananiasi. Na pati loa le Aliki kiate ia i se tio : Ananiasi ! Ti na tali loa a ia : Ko leinei au, Aliki ! 11Ti na pati loa le Aliki kiate ia : Tuu, ti ke ano ki le ala leia e igoa ko le Ala Sako, ti ke afa i le fale o Suta se tagata e igoa ko Saulo, mei Talese. 12Ko leinei e faikole a ia, ti na tio a ia i se nea na sa ake kiate ia ki se tagata e igoa ko Ananiasi leia na ulu ake kiate ia, o teki ona lima kiate ia, ke toe tio ona mata. Ti na tali loa Ananiasi : 13Aliki, na kau logo mei se toka api ki le veli lasi kua fai e le tagata lena ki lau kau sagato i Selusalemi ; 14ti e maua e ia i leinei ni fakataga mei le kau pule faisakilifisio, ke sai latou fuli ala e faikole i lou suafa. 15Kae na pati loa le Aliki kiate ia : Ano, talie ko le tagata lena ko se nea gaoi kua kau filifili, ke ave ia loku suafa ki mua o puleaga, mo mua o sau, ti mo mua o vosa o Iselaele ; 16ti e kau fakasa loa kiate ia a nea fuli ala e tonu ke mamae ai o tupu ko loku suafa.

Apele o Saulo i le Laumalie Maokioki

17Ti na ano loa Ananiasi ; ti i lana kaku loa ki le fale, na teki loa e ia ona lima kia Saulo, o pati : Saulo, loku taina, ko le Aliki Sesu, leia na sa kiate koe i le ala leia na ke au ai, na kakau ia mai au, o tupu ke toe tio ou mata ti ke ke apele i le Laumalie Maokioki.

Papitema o Saulo

18I le lakaga fai lena, na maluku loa mei ona mata ni nea ofaipe ni unafi, ti na toe tio loa ona mata. Na tuu loa a ia ki aluga, ti na papitema loa a ia ;

Kamata akonaki a Saulo i Tamaso

19ti i le oki o lana kai, na toe maua loa e ia lona makeke. Ti na nofo loa Saulo mo le kau tisipulo i Tamaso i ni iki ga aso. 20Ti na kamata aifai e ia le fakasa i sinakoka ko Sesu ko le Alo o le Atua. 21Ko latou fuli ala na logo kiate ia na punamauli ai, o pati : Pe leaise ko ia leia na fakaveliveli i Selusalemi kia latou ala na faikole i le igoa lena, pe na leaise au a ia ki leinei ke saisai latou o ave ki mua o le kau pule faisakilifisio ? 22Kae na asilisili loto makeke Saulo, ti na tapono e ia a gutu o le kau Sutea ala na nonofo i Tamaso, o fakamaoki ko Sesu ko le Kilisito.

Sola o Paulo i Tamaso

23I le sili o ni aso mauke ai, na fono loa le kau Sutea ke tamate a ia, 24ti na iloa loa e Saulo lalatou fakatuutuu. Na leo a matapa o le kolo i le ao mo le pouli, o tupu ke tamate a ia. 25Kae, i se pouli, na too loa a ia e le kau tisipulo, o ifoaki i le paa o le kolo, i se fa kete.

Ano a Saulo ki Selusalemi

26I lana kaku loa ki Selusalemi, na faiga loa Saulo ke fakatasi mo le kau tisipulo ; kae na lotou i fuli kiate ia, talie na leaise lotou tui kua liliu a ia ko se tisipulo. 27Koia na too ai loa a ia e Palenapa, o taki ki le kau apositolo, ti na fakamatala loa e ia kia latou le tio a Saulo i le ala ki le Aliki, leia na masau kiate ia, ti mo lana fakasa maoki le igoa o Sesu i Tamaso. 28Ti na feanoaki a ia mo latou i Selusalemi, ti na masau a ia i le makeke katoa i le suafa o le Aliki. 29Na masau foki a ia ki le kau Elenise, o visi mo latou ; kae na lotou afa ke tamate a ia.

Toe liliu a Paulo ki Talese

30I le iloa loa e fetaina o le nea lena, na lotou ave loa a ia ki Sesalea, o kakau a ia ke ano ki Talese.

31Na maua e le Ekelesia se tokamalie i Sutea katoa, mo Kalilea, mo Samalia, ti na laga ake latou ofaipe se fale, ti na lotou saele i le i ki le Aliki mo le gaoi a le Laumalie Maokioki, ti na tupu ake a ia o lasi.

Milakulo a Petelo : Fakamauli o Eneo

32Ti ko leinei, i le fakatele e Petelo le kau sagato fuli, na ifo foki a ia kia latou ala na nonofo i Lita. 33Na maua loa e ia i ai se tagata na igoa ko Eneo, kua fetuu valu lana moemoe i se palepale, talie na palalisia a ia. 34Na pati loa Petelo kiate ia : Eneo, e fakamauli a koe e Sesu-Kilisito ; tuu ki aluga, o fakatoka lou palepale. Ti na tuu aifai a ia ki aluga. 35Na tio loa kiate ia le kakai fuli o Lita mo Salona, ti na lotou tafoki loa ki le Aliki.

Fakamauli o Tolokasi i le mate

36Na nofo i Sope, i le kau tisipulo, se fafine na igoa ko Tapita, ko lona uiga i le fakakeleka ko Tolokasi ; na fai e le fafine lena ni gaoi malilie lasi ai mo ni nea alofa. 37Ti na masaki loa a ia i aso ana, o mate. I le oki o lona fakamaanui, na tuku loa a ia ki se kogafale i fata. 38Kae na ofi a Lita ki Sope, ti i le iloa loa e le kau tisipulo kua nofo Petelo i ai, na lotou kakau loa ni tagata e toka lua kiate ia, o kole kiate ia ke au vave mua kia latou. 39Ti na tuu ake loa Petelo o ano mo laua. I lana kaku atu ki ai, na taki loa a ia ki le kogafale i fata. Ti na takatakai loa a ia e fafine lokonui fuli, o tagi mo fakasa ake kia Petelo a kofu mo taupulupulu ala na fai e Tolokasi i lana koi nofo mo latou. 40Ti na fakamavae loa e Petelo le kakai katoa ki fafo, ti na tuutuli loa a ia o faikole ; ti na maliu loa a ia ki le mate, o pati : Tapita, tuu ki aluga ! Ti na fakamavaa loa e ia ona mata, ti i lana tio kia Petelo, na tonatona loa a ia. 41Ti na falo loa e Petelo lona lima kiate ia, o fakatuu ake a ia ki aluga. Na kalagai loa e ia le kau sagato mo le kau fafine lokonui, o tuku kia latou a Tapita kua mauli. 42Na iloa loa le nea lena i Sope katoa, ti na toka api ai latou ala na tui loa ki le Aliki. 43Na nofo loa Petelo i se ga temi i Sope, i le fale o se tagata fai kilii manu na igoa ko Simone.

Currently Selected:

Gaoi 9: FB2000

Highlight

Copy