Mak 10
10
Ewolebɔlɛ nwo ngilehilelɛ
(Mat 19.1-12; Luk 16.18)
1Gyisɛse vile ɛkɛ ne rale Dwudiya maanzinli nu na ɔpɛle ɔdɔle Azule Dwɔdan ne anzi. Menli dɔɔnwo rayiale ye bieko, na kɛmɔ ɔta ɔyɛ la, ɔhilehilele bɛ.
2Falasiima bie rale kɛ bɛbazɔ ye bɛanlea, na bɛbizale ye kɛ, “Asoo yɛ mɛla ne maa nrenya adenle maa ɔbɔ ɔ ye ewole? Ka maa yɛdie.”
3Gyisɛse bizale bɛ kɛ, “Duzu mɛla a Mosisi vale manle bɛ a?”
4 #
Mɛla 24.1-4; Mat 5.31 Bɛbuale kɛ, “Mosisi manle adenle kɛ nrenya ne ɛhɛlɛ ewolebɔlɛ kɛlata ɛmaa ɔ ye na ɔgyakyi ye.”
5Gyisɛse zele bɛ kɛ, “Ɔlua bɛ anzosesebɛ ti yɛɛ Mosisi hɛlɛle mɛla ɛhye manle bɛ a. 6#Mɔl 1.27; 5.2 Na aloa kabɔ ɔ bo la, Nyamenle Edwɛkɛ ne se, ‘Nyamenle bɔle bɛ nrenya nee raalɛ. 7#Mɔl 2.24 Ɛhye ati nrenya ne bade ɔ nwo avi ɔ ze nee ɔ nli bɛ nwo na ɔ nee ɔ ye ahɔdɛnla, 8na bɛ mu nwiɔ bɛayɛ nwonane ko.’ Yemɔti ɛnee bɛnle nwiɔ bieko na bɛle nwonane ko. 9Zɔhane ati mɔɔ Nyamenle ɛha ɛbɔ nu la, awie biala mmakpakye nu.”
10Bɛziale bɛhɔle sua nu la, ɛdoavolɛma ne bizale Gyisɛse ewolebɔlɛ ne anwo edwɛkɛ bieko. 11#Mat 5.32; 1 Kɔl 7.10-11 Na ɔzele bɛ kɛ, “Saa nrenya bɔ ɔ ye ewole na ɔgya fofolɛ a, ɛnee yeyɛ ɛtane. 12Zɔhane ala yɛɛ saa raalɛ gyakyi ɔ hu ɔkɔ agyalɛ fofolɛ a, ɛnee ɔdaye noko yeyɛ ɛtane a.”
Gyisɛse yila ngakula
(Mat 19.13-15; Luk 18.15-17)
13Menli bie vale ngakula rale kɛ Gyisɛse ɛva ɔ sa ɛgua bɛ nwo zo, na ye ɛdoavolɛma ne duale bɛ kɛ bɛmmagyegye ye. 14Mɔɔ Gyisɛse nwunle ye la, ɔvale ɛya na ɔzele ye ɛdoavolɛma ne mɔ kɛ, “Bɛgyakyi ngakula ne mɔ bɛmaa bɛrɛla me nwo, bɛmmatua bɛ, na bɛdabɛ mɔɔ bɛle kɛ ɛhye mɔ zɛhae la yɛɛ Nyamenle Belemgbunlililɛ ne le bɛ ɛdeɛ a. 15#Mat 18.3 Bɛhakye ɛhye! Awie biala mɔɔ anyɛ ɔ nwo kɛ kakula, anlie Nyamenle Belemgbunlililɛ ne ando nu la ɛnrɛnwu Nyamenle Belemgbunlililɛ ne.” 16Na ɔmanle ngakula ne mɔ zo ngoko ngoko ɔziele ɔ gyakɛ azo, ɔvale ɔ sa ɔguale bɛ nwo zo na ɔyilale bɛ.
Sukoavolɛ ne mɔɔ rale Gyisɛse ɛkɛ ne la
(Mat 19.16-30; Luk 18.18-30)
17Gyisɛse zile nu bieko kɛ ɔkɔ la, nrenya bie lɛ ɛnriandilɛ rahotole ɔ nyunlu ɛkɛ ne na ɔzele ye kɛ, “Kilehilevolɛ kpalɛ, duzu a menyɛ na meanyia ngoane mɔɔ ɛnlɛ awieleɛ a?”
18Gyisɛse bizale ye kɛ, “Duzu ati a ɛse mele kpalɛ ɛ? Awie biala ɛnle kpalɛ kɛ Nyamenle angomekye. 19#Ade 20.12-16; Mɛla 5.16-20 Ɛze mɛla ne mɔ: ‘Mmayɛ kɔdiawu, mmafa awuvolɛ, mmawua, mmadi daselɛ adalɛ, mmadi nzisi, di ɛ ze nee ɛ nli eni.’ ”
20Nrenya ne buale kɛ, “Kilehilevolɛ, sumunli me ngakula nu yɛɛ menvale ɛhye mɔ azo ɛlilɛ a.”
21Gyisɛse nleanle ye koonwu, ɔhulole ye na ɔzele ye kɛ, “Yeha wɔ debie ko. Kɔ na kɔdɔne ninyɛne mɔɔ ɛlɛ la amuala, na kyɛ ezukoa ne maa ehyianvolɛma na ɛkɛnyia anwonyia wɔ anwuma, na akee bɛla badoa me bo zo.” 22Nrenya ne dele edwɛkɛ ɛhye la, ɔ nyunlu zale, na ɔvale nyane ɔhɔle, ɔluakɛ ɔle sukoavolɛ kpole.
23Gyisɛse hakyile ɔ nye nleanle ye ɛdoavolɛma ne mɔ na ɔzele bɛ kɛ, “Ɔbayɛ se yeamaa sukoavolɛma kɛ bɛkɛnyia Nyamenle Belemgbunlililɛ ne a.”
24Edwɛkɛ ɛhye hwenle ɛdoavolɛma ne nu kpalɛ, na Gyisɛse hɔle zolɛ zele kɛ, “Ayi mɔ, Nyamenle Belemgbunlililɛ ne ɛnyianlɛ yɛ se kpalɛ! 25Na ɔyɛ se noko kpalɛ ɔmaa sukoavolɛ kɛ ɔkɛnyia Nyamenle Belemgbunlililɛ ne, tɛla kɛ afunlumu kɛwolo agbuyia nye nu a.”
26Edwɛkɛ ne zinle ɛdoavolɛma ne mɔ anwo kpole na bɛbizale bɛ nwo ngoko ngoko kɛ, “Ɛnee nwane bɔbɔ a kɛnyia ngoane a?”
27Gyisɛse nleanle bɛ koonwu na ɔzele bɛ kɛ, “Mɔɔ yɛ se bo sonla nwo zo la ɛnyɛ se ɛmmaa Nyamenle, ɔluakɛ Nyamenle kola yɛ debie biala.”
28Pita hanle kɛ, “Nea o, na yɛgyakyi debie biala yɛɛ yɛdoa wɔ o!”
29Gyisɛse zele bɛ kɛ, “Ɔle zɔhane, noko bɛdie! Awie biala mɔɔ me ti, nee Edwɛkpa ne ati yegyakyi sua, mediema mrenya anzɛɛ mediema mraalɛ, ninli anzɛɛ selɛ, mralɛ anzɛɛ azɛlɛ la 30banyia bɛ molozo wɔ kɛkala mekɛ ye anu. Ɔbanyia azua, mediema mrenya nee mraalɛ, ninlima nee mralɛ nee azɛlɛ mɔnwo mɔnwo. Bɛbayɛ ye kpɔdekpɔde ɛdeɛ, noko kenle bie ɔkɛnyia ngoane mɔɔ ɛnlɛ awieleɛ. 31#Mat 20.16; Luk 13.30 Bɛdabɛ dɔɔnwo ne ala mɔɔ ɛnɛ lumua la bali amozi, na amozi amra alumua.”
Gyisɛse ka ye ewule nwo edwɛkɛ mɔɔ tɔ zo nsa
(Mat 20.17-19; Luk 18.31-34)
32Akee Gyisɛse nee ye ɛdoavolɛma ne dɔle adenle zo kɛ bɛkɔ Gyɛlusalɛm, na ɛnee Gyisɛse lumua bɛ nyunlu. Ɛdoavolɛma ne akunlu ɛdu kpalɛ, yɛɛ ɛzulolɛ noko ɛha menli mɔɔ doa bɛ la. Na Gyisɛse eza vale ye ɛdoavolɛma bulu nee nwiɔ ne hɔle ahane na ɔhanle ninyɛne mɔɔ bɛbava bɛayɛ ye la amuala ɔhilele bɛ. 33Ɔzele bɛ kɛ, “Bɛdie, yɛlɛkɔ Gyɛlusalɛm, na bɛbaye medame Sonla Ra bɛawula sɛlɛvolɛ mgbanyinli nee mɛla kilehilevolɛma ne mɔ asa anu. Bɛbabua me fɔlɛ kɛ bɛhu me na bɛaye me bɛawula bɛdabɛ mɔɔ bɛnle Dwuuma la asa anu. 34Menli ɛhye mɔ noko bagolo me nwo, atoto me nwo nyɛlɛ, abila me mbaka na bɛahu me. Na ye kenle nsa ne anzi, mebadwazo meara ngoane nu.”
Gyemise nee Dwɔn bɛ ɛbizalɛdeɛ
(Mat 20.20-28)
35Gyemise nee Dwɔn, mɔɔ le Zɛbɛdi amra ne mɔ rale Gyisɛse ɛkɛ rahanle kɛ, “Kilehilevolɛ, yɛkulo kɛ yɛsɛlɛ wɔ debie ko.”
36Gyisɛse bizale bɛ kɛ, “Duzu a bɛkpondɛ kɛ meyɛ memaa bɛ a?”
37Bɛbuale kɛ, “Anrɛɛ ɛnee kenle mɔɔ ɛkɛdɛnla wɔ anyunlunyia belemgbunli ebia ne anu la, wɔamaa yɛ nee wɔ adɛnla, ko adɛnla wɔ fema zo na ko noko adɛnla wɔ bɛne zo.”
38 #
Luk 12.50
Gyisɛse zele bɛ kɛ, “Bɛnze mɔɔ bɛlɛbiza bɛalie la. Asoo bɛkɛhola amaneɛnwunlɛ dwora ne mɔɔ ɔwɔ kɛ meno nu la anu no, anzɛɛ bɛkɛhola ewule ɛzɔnenlɛ ne mɔɔ ɔwɔ kɛ bɛfa bɛsɔne me la die?”
39Bɛbuale kɛ, “Yɛkɛhola.”
Gyisɛse zele bɛ kɛ, “Amgba, bɛkɛhola amaneɛnwunlɛ dwora ne mɔɔ ɔwɔ kɛ meno nu la anu no, bɛkɛlie ewule ɛzɔnenlɛ ne mɔɔ bɛfa bɛazɔne me la die, 40noko me sa fema nee bɛne zo ɛdɛnlanlɛ ɛdeɛ, tɛ me a mekpa nu meye menli mɔɔ ɔwɔ kɛ tɛnla la a. Selɛ ne a bava amaa bɛdabɛ mɔɔ yeziezie yemaa bɛ la a.”
41Mɔɔ ɛdoavolɛma ne mɔ mɔɔ hale la dele ɛhye anwo bie la, bɛvale Gyemise nee Dwɔn anwo ɛya kpole. 42#Luk 22.25-26 Yemɔti Gyisɛse vɛlɛle bɛ muala ɔ nwo ɛkɛ ne na ɔzele bɛ kɛ, “Bɛze kɛ maanle maanle arelemgbunli si yɛ bɛ menli kpɔdekpɔde la, yɛɛ kɛ bɛ mgbanyima noko si di bɛ nwo zo tumi la. 43#Mat 23.11; Mak 9.35; Luk 22.26 Ɛhye ɛnle zɔhane wɔ bɛ nu. Saa bɛ nuhua bie kpondɛ kɛ ɔyɛ kpole wɔ bɛ avinli a, ɔyɛ bɛ muala bɛ sonvolɛ 44yɛɛ saa bɛ nuhua bie kpondɛ bɛ ti ali a, ɔyɛ bɛ muala bɛ akɛlɛ. 45Medame Sonla Ra bɔbɔ, meamba kɛ bɛzonle me; membale kɛ mebazonle na meava me ngoane meado aze meakpɔne menli dɔɔnwo.”
Gyisɛse yɛ anyenzinliravolɛ Baatemeɛse ayile
(Mat 20.29-34; Luk 18.35-43)
46Bɛrale Gyɛleko, na mɔɔ Gyisɛse nee ye ɛdoavolɛma ne mɔ nee menli dɔɔnwo vi sua ne azo bɛlɛkɔ la, ɛnee nrenya anyenzinliravolɛ bie mɔɔ bɛfɛlɛ ye Baatemeɛse, mɔɔ le nrenya Temeɛse ara ne, de adehane ne ɛlɛsɛlɛzɛlɛ ninyɛne. 47Mɔɔ ɔdele kɛ Gyisɛse mɔɔ vi Nazalɛte la a ɛlɛse la, ɔdeanle nu kɛ, “Devidi Ara Gyisɛse! Nwu me anwunvɔne!”
48Menli ne mɔ dɔɔnwo deanle ye na bɛzele ye kɛ ɔyɛ koonwu. Noko ɔdeanle nu kpalɛ kɛ, “Devidi Ara, nwu me anwunvɔne!”
49Gyisɛse gyinlanle na ɔzele kɛ, “Bɛvɛlɛ ye bɛmaa me.”
Bɛvɛlɛle nrenya anyenzinliravolɛ ne na bɛzele ye kɛ, “Ka wɔ ahonle to azule nu; dwazo na ɔlɛfɛlɛ wɔ.”
50Nrenya ne dwazole, ɔvuandinle ye ɛdanlɛ ne ɔguale, na ɔrale Gyisɛse anwo ɛkɛ ne.
51Gyisɛse bizale ye kɛ, “Duzu a ɛkulo kɛ meyɛ memaa wɔ a?”
Nrenya ne buale kɛ, “Kilehilevolɛ, mekulo kɛ menwu debie bieko.” 52Gyisɛse zele ye kɛ, “Kɔ, wɔ diedi ɛyɛ wɔ ayile.”
Na ɛkɛ ne ala ɔnwunle debie na ɔdoale Gyisɛse.
Currently Selected:
Mak 10: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
