Mak 11
11
Gyisɛse kɔ Gyɛlusalɛm konimlilɛ nu
(Mat 21.1-11; Luk 19.28-40; Dw 12.12-19)
1Bɛbikyele Gyɛlusalɛm, mɔɔ ɛnee asɛɛ bɛdwu Bɛtefagye nee Bɛtani la, bɛradwule Ɔlivi Boka ne abo. Na Gyisɛse zoanle ye ɛdoavolɛma ne mɔ nwiɔ manle bɛlumuale ɔ nyunlu, 2na ɔzele bɛ kɛ, “Bɛhɔ namule ne mɔɔ wɔ bɛ nyunlu lɔ la azo, na bɛdwu ɛkɛ ne ala a bɛkɛnwu asoaso ralɛ mɔɔ awie ɛtɛtɛnlanle zolɛ ɛlɛ la kɛ ɔhenda ɛkɛ ne. Bɛzianyi ye bɛrɛla. 3Saa awie biza bɛ mɔɔ bɛlɛyɛ la abo a, bɛze ye kɛ, ‘Yɛ menle ne ɛhyia nwolɛ’ na ɔbamaa bɛ nee ye ara.”
4Ɛdoavolɛma nwiɔ ne hɔle na bɛhɔnwunle kɛ asoaso ne henda sua bie anuhɔlɛ wɔ gua ne azo. Mɔɔ bɛlɛsianyi ye la, 5menli mɔɔ gyigyi ɛkɛ ne la bie bizale bɛ kɛ, “Kɛ bɛyɛ asoaso ne mɔɔ bɛlɛsianyi ye ɛ?”
6Ɛdoavolɛma nwiɔ ne yele bɛ ɔ nloa, kɛmɔ Gyisɛse zele bɛ la, na menli ne mɔ gyakyile bɛ manle bɛ nee ye hɔle. 7Bɛvale asoaso ralɛ ne bɛrɛlɛle Gyisɛse, bɛvale bɛ ndanlɛ bɛguale zolɛ na Gyisɛse vole dɛnlanle zolɛ. 8Menli dɔɔnwo vale bɛ ndanlɛ sesɛle adenle ne anu, yɛɛ bie mɔ noko bubule nya guguale adenle ne anu. 9#Edw 118.25-26 Na menli mɔɔ li ɔ nyunlu nee bɛdabɛ mɔɔ bɛli ɔ nzi la deɛdeanle nu hanle kɛ, “Ayɛlɛyelɛ ɛha Nyamenle! Nyamenle ɛyila mɔɔ lua Awulae duma nu ɛlɛba la! 10Nyamenle ɛyila yɛ ze Devidi Belemgbunlililɛ ne mɔɔ ɛlɛba la. Ayɛlɛyelɛ ɛha Nyamenle!”#11.10 Ayɛlɛyelɛ ɛha Nyamenle: Anzɛɛ Hozana ɛha Nyamenle wɔ anwuma.
11Gyisɛse dwule Gyɛlusalɛm la, ɔhɔwolole Ɛzonlenlɛ Sua ne anu, na ɔnleɛnleanle nuhua ninyɛne ɔyiale. Na kɛmɔ ɛnee aleɛ asɛɛ ɛdwo la ati, ɔ nee ye ɛdoavolɛma bulu nee nwiɔ ne ziale hɔle Bɛtani.
Gyisɛse wa feege baka ne amonle
(Mat 21.18-19)
12Aleɛ hyenle na bɛvi Bɛtani bɛsia la, ɛhɔne hunle Gyisɛse. 13Ɔnwunle feege baka bie mɔɔ ɛwula buzuu la wɔ moa moa lɔ, na ɔhɔle nwolɛ saa ɔkɛnyia ma bie wɔ zolɛ a. Ɔhɔdwule nwolɛ la, nya ala a ɔnwunle ye wɔ zolɛ a, ɔluakɛ ɛnee mekɛ ɛtɛdwule mɔɔ zɔhane mbaka ne mɔ so a. 14Gyisɛse zele feege baka ne kɛ, “Awie ɛnrɛli wɔ ma bieko ɛlɛ!”
Na ye ɛdoavolɛma ne dele mɔɔ ɔhanle la.
Gyisɛse kɔ Ɛzonlenlɛ Sua ne anu
(Mat 21.12-17; Luk 19.45-48; Dw 2.13-22)
15Bɛdwule Gyɛlusalɛm la, Gyisɛse hɔle Ɛzonlenlɛ Sua ne anu na ɔvoanle bɛdabɛ mɔɔ bɛlɛdi gua wɔ nu la amuala. Ɔbutubutule bɛdabɛ mɔɔ bɛlɛsenza ezukoa la ɛkponle ne mɔ nee bɛdabɛ mɔɔ bɛtɔne mɔlɔnoma la mbia ne mɔ, 16na yeammaa adenle yeammaa awie biala anzoa debie ampɛ nu wɔ Ɛzonlenlɛ Sua ne anu. 17#Aye 56.7; Gyɛ 7.11 Akee ɔhilehilele menli ne na ɔzele kɛ, “Bɛhɛlɛ ye Nyamenle Edwɛkɛ ne anu kɛ Nyamenle se, ‘Bɛbavɛlɛ me Ɛzonlenlɛ Sua ne maanle maanle nzɛlɛlɛ sua’; na bɛmɛ bɛhakyi ye awulema fealeka.”
18Sɛlɛvolɛ mgbanyinli nee mɛla kilehilevolɛma ne mɔ dele ɛhye la, bɛbɔle ɔ bo kɛ bɛkpondɛ adenle bɛalua zolɛ bɛahu Gyisɛse. Noko bɛzulole, ɔluakɛ ye ngilehilelɛ ne zinle menli dɔɔnwo ne amuala anwo.
19Ye nɔsolɛ nu, Gyisɛse nee ye ɛdoavolɛma ne vile suakpole ne azo hɔle.
Feege baka ne anwo ɛzukoalɛdeɛ
(Mat 21.20-22)
20Nwonlomɔ mangyee ne mɔɔ bɛlua adenle ne anu la, bɛnwunle kɛ feege baka ne ɛwu bɔkɔɔ. 21Na Pita hakyele mɔɔ zile la na ɔhanle ɔhilele Gyisɛse kɛ, “Kilehilevolɛ, nea, feege baka ne mɔɔ ɛwale ye amonle la ɛwu.”
22Gyisɛse buale kɛ, “Bɛlie Nyamenle bɛli. 23#Mat 17.20; 1 Kɔl 13.2 Bɛhakye ɛhye: saa bɛdie Nyamenle bɛdi, na bɛanzu kpolera wɔ bɛ ahonle nu, na bɛdie bɛdi bɔkɔɔ kɛ mɔɔ bɛkɛha la kɛyɛ ɛkɛ a, bɛbahola bɛaze boka ɛhye kɛ, ‘Tudu kɔdɔ nyevile nu,’ na ɔkɛyɛ zɔhane. 24Ɛhye ati meka meahile bɛ, saa bɛsɛlɛ bɛabiza debie a, bɛlie bɛli kɛ bɛ sa ɛha ye, na debie biala mɔɔ bɛkɛbiza la, Nyamenle kɛva kɛmaa bɛ. 25#Mat 6.14-15 Na saa bɛgyi bɛlɛsɛlɛ, na awie ɛvo bɛ a, bɛva bɛhyɛ ye na bɛ Ze mɔɔ wɔ anwuma la ava bɛ ɛtane ahyɛ bɛ. [ 26Na saa bɛanva bɛ gɔnwo mɔ ɛtane bɛangyɛ bɛ a, bɛ Ze mɔɔ wɔ anwuma la ɛnrɛva bɛ nyɛleɛ ɛtane ne mɔ ɛnrɛhyɛ bɛ.”]
Gyisɛse tumi ne anwo kpuyia
(Mat 21.23-27; Luk 20.1-8)
27Bɛradwule Gyɛlusalɛm bieko na Gyisɛse lua Ɛzonlenlɛ Sua ne anu la, sɛlɛvolɛ mgbanyinli ne nee mɛla kilehilevolɛma ne nee mgbanyima ne mɔ rale ɔ nwo ɛkɛ 28na bɛbizale ye kɛ, “Duzu tumi a ɛlɛ ye kɛ ɔwɔ kɛ ɛyɛ ninyɛne ɛhye mɔ a? Nwane a manle wɔ tumi ɛhye a?”
29Gyisɛse buale bɛ kɛ, “Medame noko mebiza bɛ edwɛkɛ ko, na saa bɛye me ɔ nloa a, menwɔha tumi holɛ ko mɔɔ mefa meyɛ ninyɛne ɛhye mɔ la menwɔhile bɛ. 30Nienwu a Dwɔn tumi ne mɔɔ ɔvale ɔzɔnenle la vi a, ɔvi sonla anzɛɛ ɔvi Nyamenle ɛkɛ ɔ? Bɛha bɛhile me.”
31Bɛ ngome bɛzule ɛhye anwo kpolera na bɛzele kɛ, “Duzu edwɛkɛ a yɛha a? Saa yɛbua kɛ, ‘Ɔvi Nyamenle ɛkɛ’ a, ɔkɛbiza kɛ, ‘Ɛnee duzu ati a bɛanlie Dwɔn bɛanli ɛ?’ 32Saa yɛka noko kɛ, ‘Ɔvi sonla a…’ ” (Bɛzulole menli ne mɔ, ɔluakɛ ɛnee awie biala ɛlie ɛdo nu kɛ Dwɔn le Nyamenle kpɔmanvolɛ.) 33Na bɛbuale kɛ, “Yɛnze.”
Gyisɛse zele bɛ kɛ, “Medame noko menrɛha ahenle holɛ ko mɔɔ manle me tumi kɛ menyɛ ninyɛne ɛhye mɔ la menrɛhile bɛ.”
Currently Selected:
Mak 11: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
