Luk 19
19
Gyisɛse nee Zakeɛse
1Gyisɛse hɔle Gyɛleko na ɔlɛpɛ nu sua ne azo. 2Adwuledievolɛ kpanyinli bie noko wɔ sua ne azo mɔɔ ɛnyia ɔ nwo kpole a; bɛfɛlɛ ye Zakeɛse. 3Nrenya ɛhye bɔle mɔdenle kɛ ɔkɛnwu Gyisɛse sonla holɛ na kɛmɔ ɔle adwola na menli ne zonle la ati ɛnee ɔnnwu ye. 4Yemɔti ɔnriandile ɔlumuale ɛlɔne ne anyunlu na ɔhɔvole baka bie mɔɔ bɛfɛlɛ ye “sekamɔ” la azo saa ɔkɛnwu ye a, ɔluakɛ ɛkɛ ne ala a Gyisɛse bape a. 5Gyisɛse dwule ɛkɛ ne la, ɔdole ɔ nye anwuma na ɔzele Zakeɛse kɛ, “Zakeɛse, ka ɛ nwo dwu aze, na ɛnɛ mebazokoɛ wɔ.”
6Ndɛndɛ ne ala Zakeɛse dwule aze na ɔvale fɛlɛkolilɛ kpole ɔliele Gyisɛse. 7Menli mɔɔ nwunle ye la amuala dendɛle bɛ nzo abo kɛ, “Akee ɛtanenli ɛhye sua nu a nrenya ye ɛhɔ kazokoɛ a!”
8Na Zakeɛse dwazole na ɔhanle ɔhilele Awulae kɛ, “Awulae, mebabu me ninyɛne mɔɔ melɛ la anu nwiɔ na meava ko meamaa ehyianvolɛma, na saa meli awie ndunlumi a, mebadua ye kakɛ mɔnwo nna.”
9Gyisɛse zele ye kɛ, “Ɛnɛ kenle ye, bɛlie wɔ ngoane, ɛdawɔ noko ɛle Ebileham anlɔnra. 10#Mat 18.11 Ɛhye ala ati yɛɛ medame Sonla Ra membale a. Membale kɛ mebakpondɛ bɛdabɛ mɔɔ bɛminli la na mealie bɛ ngoane.”
Ezukoa nwo ɛrɛlɛ
(Mat 25.14-30)
11 #
Mat 25.14-30
Menli mɔɔ ɛnee ɛlɛtie edwɛkɛ ɛhye mɔ la zuzule ye bɛ ti anu kɛ, kɛmɔ bɛbikye Gyɛlusalɛm la, Nyamenle Belemgbunlililɛ ne asɛɛ ɛra ɛwie. Yemɔti Gyisɛse bule bɛ ɛrɛlɛ ɛhye. 12Ɔse, “Nrenya bie mɔɔ lɛ duma la yɛle kɛ ɔkɔ maanle zo moa moa yeamaa bɛazie ye belemgbunli na akee yeazia yeara sua nu. 13Mɔɔ ɔbanyia nwo la, ɔvɛlɛle ye sonvolɛma bulu ne, ɔmanle ko biala sɔnvɛlɛ ko na ɔzele bɛ kɛ, ‘Menle ɛke, yemɔti bɛva ezukoa ɛhye bɛli gua bɛnlea mɔɔ bɛkɛnyia ye nwolɛ la.’ 14Kɛmɔ ɔdaye ye maanle ne anu amra kpɔ ye la ati, bɛdule menli bɛmanle bɛhɔzele kɛ, ‘Yɛngulo kɛ nrenya ɛhye di yɛ belemgbunli.’
15“Noko bɛziele nrenya ne belemgbunli na ɔziale ɔrale sua nu. Ɔradwule ala la, ɔmanle bɛvɛlɛvɛlɛle ye sonvolɛma ne kɛ bɛrabu bɛ mgbonda bɛmaa ɔnwu nvasoɛ mɔɔ bɛnyianle ye la. 16Mɔɔ lumua la rale rahanle kɛ, ‘Yɛmenle, menyia sɔnvɛlɛ bulu meboka wɔ ɛdeɛ ko ne mɔɔ ɛvale ɛmanle me la anwo.’ 17Belemgbunli ne zele ye kɛ, ‘Mo, ɛle sonvolɛ kpalɛ! Kɛmɔ wɔli nɔhalɛ wɔ ninyɛne ngyikyi nwo la, mebamaa wɔanlea azuamgbole bulu azo.’ 18Mɔɔ tɔ zo nwiɔ la rahanle kɛ, ‘Yɛmenle, menyia sɔnvɛlɛ nnu meboka ko ne mɔɔ ɛvale ɛmanle me la anwo.’ 19Belemgbunli ne zele ye kɛ, ‘Ɛdawɔ noko ɛbanlea azuamgbole nnu azo.’
20“Sonvolɛ ko noko rale na ɔrahanle kɛ, ‘Yɛmenle, wɔ sɔnvɛlɛ ko ne ɛne; membɔle ye duku nloa menziele. 21Mesulo wɔ, ɔboalekɛ ɛle sonla mɔɔ ɛ ti yɛ se; ɛfa mɔɔ ɛnle wɔ ɛdeɛ la yɛɛ ɛbu mɔɔ wɔanlua la.’ 22Belemgbunli ne zele ye kɛ, ‘Wɔmɔ sonvolɛ ɛhye, ɛnle kpalɛ! Mefa ɛdawɔ ɛ nloa edwɛkɛ meabua wɔ ndɛne. Ɛse me kɛ me ti yɛ se, mefa mɔɔ ɛnle me ɛdeɛ yɛɛ mebu mɔɔ tɛ me a menluale la. 23Duzu ati a wɔanva me ezukoa ne wɔangɔndo bange ɛ? Anrɛɛ mera la, mehɔlie me ezukoa ne boka nwolɛ nzinwo ne amuala.’
24“Na ɔzele menli mɔɔ gyigyi ɛkɛ ne la kɛ, ‘Bɛlie sɔnvɛlɛ ko ne wɔ ɔ sa nu bɛva bɛmaa mɔɔ lɛ bulu ne la.’ 25Bɛzele ye kɛ, ‘Yɛmenle, yemɔ, ɔlɛ sɔnvɛlɛ bulu dɛba.’ 26#Mat 13.12; Mak 4.25; Luk 8.18 Na ɔbuale bɛ kɛ, ‘Meka meahile bɛ: Mɔɔ lɛ bie la, bɛmaa ye bie dɔɔnwo bɛboka mɔɔ ɔlɛ la anwo; na mɔɔ ɛnlɛ bie la, ekyi ne bɔbɔ mɔɔ ɔlɛ la, bɛdie ye wɔ ɔ sa nu. 27Akee me agbɔvolɛ ne mɔ mɔɔ se bɛngulo kɛ medi bɛ belemgbunli la, bɛva bɛ bɛrɛla bɛrahu bɛ wɔ me nyunlu ɛke!’ ”
Gyisɛse kɔ Gyɛlusalɛm konimlilɛ nu
(Mat 21.1-11; Mak 11.1-11; Dw 12.12-19)
28Gyisɛse hanle ɛhye na akee ɔlumuale bɛ nyunlu kɛ ɔkɔ Gyɛlusalɛm. 29Ɔbikyele Bɛtefagyi nee Bɛtani, wɔ Ɔlivi Boka ne azo la, ɔzoanle ye ɛdoavolɛma ne nwiɔ ɔmanle bɛlumuale ɔ nyunlu, 30na ɔzele bɛ kɛ, “Bɛhɔ namule ne mɔɔ wɔ bɛ nyunlu lɔ la azo. Saa bɛdwu ɛkɛ ne a, bɛkɛnwu asoaso ralɛ mɔɔ awie ɛtɛtɛnlanle zo ɛlɛ la kɛ ɔhenda ɛkɛ; bɛzianyi ye bɛrɛla. 31Saa awie biza bɛ kɛ duzu ati a bɛlɛsianyi ye a, bɛze ye kɛ, ‘Awulae#19.31 Anzɛɛ Yɛmenle. ɛhyia nwolɛ.’ ”
32Bɛhɔle na bɛhɔnwunle debie biala, kɛmɔ Gyisɛse hanle hilele bɛ la. 33Mɔɔ bɛlɛsianyi asoaso ne la, ɔ menle mɔ bizale bɛ kɛ, “Duzu ati a bɛlɛsianyi asoaso ne ɛ?”
34Ɛdoavolɛma ne buale kɛ, “Awulae ɛhyia nwolɛ.” 35Na bɛvale asoaso ne bɛrɛlɛle Gyisɛse. Akee bɛsesɛle bɛ ndanlɛ wɔ asoaso ne azo na bɛmanle Gyisɛse dɛnlanle zolɛ. 36Na mɔɔ ɔlɛkɔ la, bɛsesɛle ndanlɛ azɛlɛ nwo bɛmanle ɔluale zolɛ.
37Ɔbikyele Gyɛlusalɛm wɔ Ɔlivi Boka ne ndololeɛ nu la, ye ɛdoavolɛma bebelebe ne bɔle ɔ bo vale fɛlɛkolilɛ yɛle Nyamenle mo yele ye ayɛlɛ wɔ ninyɛne mgbole ne mɔ mɔɔ bɛnwunle bɛ la ati, 38#Edw 118.26 na bɛzele kɛ, “Nyamenle ɛyila belemgbunli ne mɔɔ lua Awulae duma nu ɛlɛba la! Anzonudwolɛ wɔ anwuma na anyunlunyia ɛha Nyamenle!”
39Falasiima mɔɔ wɔ menli ne anu la bie mɔ zele Gyisɛse kɛ, “Kilehilevolɛ, maa wɔ ɛdoavolɛma ne ɛmua bɛ nloa!”
40Gyisɛse buale kɛ, “Meka meahile bɛ, saa bɛmua bɛ nloa bɔbɔ a, awolɛ bɔbɔ kɛdeɛdea nuhua.”
Gyisɛse su Gyɛlusalɛm
41Gyisɛse bikyele Gyɛlusalɛm na ɔnwunle sua ne la, ɔzunle, 42na ɔzele kɛ, “Anrɛɛ ɛnɛ kenle ye bɔbɔ wɔahola wɔanwu deɛ mɔɔ maa anzonudwolɛ la! Na kɛkala ɛdeɛ, ɛnrɛhola ɛnrɛnwu ye! 43Mekɛ bara mɔɔ wɔ kpɔvolɛma bapɛ ɛ bo kuma ayia; bɛbadua wɔ adenle, na bɛvi ɛbɔ nu nee ɛnweazo bɛaraholo ɛ nwo zo. 44Bɛbagologolo wɔ bɛagua na bɛazɛkye menli mɔɔ wɔ zolɛ la amuala; bɛnrɛgyakyi bolɛ ko bɔbɔ wɔ ɔ bo zo ne, ɔboalekɛ wɔannwu mekɛ ne mɔɔ Nyamenle rale kɛ ɔbalie wɔ ngoane la.”
Gyisɛse kɔ Ɛzonlenlɛ Sua ne anu
(Mat 21.12-17; Mak 11.15-19; Dw 2.13-22)
45Akee Gyisɛse wolole Ɛzonlenlɛ Sua ne anu, na ɔbɔle ɔ bo kɛ ɔfoa gualilɛma ne mɔ, 46#Aye 56.7; Gyɛ 7.11 na ɔzele bɛ kɛ, “Bɛhɛlɛ ye wɔ Nyamenle Edwɛkɛ ne anu kɛ, Nyamenle se, ‘Bɛbavɛlɛ me Ɛzonlenlɛ Sua ne Nzɛlɛlɛ Sua!’ Na bɛmɛ, bɛhakyi ye nwule fealeka.”
47 #
Luk 21.37
Kenle biala Gyisɛse kilehile wɔ Ɛzonlenlɛ Sua ne anu. Sɛlɛvolɛ mgbanyinli ne, mɛla kilehilevolɛma ne, yɛɛ mgbanyima ne mɔ kpondɛle kɛ bɛkɛhu ye, 48na bɛannyia nwolɛ adenle, ɔboalekɛ ɛnee menli ne amuala kulo kɛ bɛtie ye, amaa ye edwɛkɛ ne kpɔkɛ ko bɔbɔ andɛla bɛ nzo.
Currently Selected:
Luk 19: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
