Luk 18
18
Kunlanvolɛ raalɛ ne nee ndɛnebuavolɛ ne anwo ɛrɛlɛ
1Akee Gyisɛse bule ɛrɛlɛ ɛhye hilele ye ɛdoavolɛma ne mɔ vale hilele kɛ ɔwɔ kɛ bɛyɛ nzɛlɛlɛ dahuu na ɔnle kɛ bɛkpo aze. 2Ɔse, “Ndɛnebuavolɛ bie woale suakpole bie azo. Ndɛnebuavolɛ ɛhye ɛnzulo Nyamenle yɛɛ ɔmbu sonla biala. 3Kunlanvolɛ raalɛ bie noko wɔ sua ne azo; dahuu ɔkɔ ndɛnebuavolɛ ne ɛkɛ ɔfa ye edwɛkɛ ɔkɔto ɔ nyunlu kɛ, ‘Awie ɛlɛgyegye me, di me edwɛkɛ ye maa me.’ 4Mekɛ dɔɔnwo ne ala ɛnee ɔngulo kɛ ɔkɛboa raalɛ ne, na nzinlii ɔhanle ɔhilele ɔ nwo kɛ, ‘Menzulo Nyamenle, yɛɛ membu sonla bɔbɔ ɛdeɛ, 5noko kɛ raalɛ kunlanvolɛ ɛhye ɛlɛsi agyegye me la, mebanlea ye edwɛkɛ ne meamaa ye, anrɛɛ ɔnrɛmaa me nwo ɛnrɛdɔ me.’ ”
6Na Awulae vale zɔle zolɛ kɛ, “Bɛdie mɔɔ ndɛnebuavolɛ alane ne hanle a. 7Asoo Nyamenle ɛnrɛli ɔdaye ye menli ne mɔɔ kpondɛ moalɛ na bɛtea bɛfɛlɛ ye nɔɔzo nee ewiazo la ati edwɛkɛ? Asoo ɔkɛhwenlehwenle ɔ bo aze wɔ bɛ moalɛ nwo? 8Meka meahile bɛ, ɔkɛli bɛ edwɛkɛ ɔkɛmaa bɛ ndɛndɛ zo somaa. Na asoo saa medame Sonla Ra meba a, menwɔnwu awie mɔɔ ɔ rɛle wɔ Nyamenle anu la?”
Falasiinli ne nee adwuledievolɛ ne anwo ɛrɛlɛ
9Eza Gyisɛse bule ɛrɛlɛ ɛhye hilele bɛdabɛ mɔɔ bɛbu bɛ nwo na bɛmbu awie biala la. 10Ɔse, “Menli nwiɔ bie hɔle Ɛzonlenlɛ Sua ne anu kɛ bɛkazɛlɛ; ko le Falasiinli yɛɛ ko le adwuledievolɛ.
11“Falasiinli ne gyinlanle nzisi na ɔzɛlɛle kɛ, ‘Nyamenle, meyɛ wɔ mo kɛ membɔ apo, menli nzisi yɛɛ mendo awuvolɛvalɛ mɛla ne kɛ awie biala de la; meyɛ wɔ mo kɛ menle kɛ adwuledievolɛ ɛhye bɔbɔ mɔɔ wɔ lɔ la. 12Dapɛne ko anu mekye ɛhɔne fane nwiɔ, yɛɛ mebu me ezukoa mɔɔ menyia ye la anu bulu metu ko memaa wɔ.’
13“Na adwuledievolɛ ne gyinlanle ahane ɛleka bie, yeangulo kɛ ɔkɛkpogya ɔ ti zo bɔbɔ. Ɔvale ɔ sa ɔguale ye ɛbolɛ zo na ɔzele kɛ, ‘O Awulae Nyamenle, nwu me anwunvɔne na mele ɛtanevolɛ!’ ” 14#Mat 23.12; Luk 14.11 Na Gyisɛse vale zɔle zolɛ kɛ, “Meka meahile bɛ, adwuledievolɛ ne zɔle Nyamenle anye wɔ mekɛ mɔɔ ɔlɛkɔ sua nu la dɛlale Falasiinli ne. Ɔluakɛ awie biala mɔɔ memaa ɔ nwo zo la Nyamenle bɛlɛ ye aze, yɛɛ mɔɔ bɛlɛ ɔ nwo aze la Nyamenle kpogya ye zo.”
Gyisɛse yila ngakula
(Mat 19.13-15; Mak 10.13-16)
15Menli bie vale bɛ mra rale kɛ Gyisɛse ɛva ɔ sa ɛgua bɛ nwo zo na ɔyila bɛ. Ɛdoavolɛma ne nwunle bɛ la bɛdendɛle bɛ. 16Na Gyisɛse vɛlɛle ngakula ne mɔ wɔ ɔ nwo ɛkɛ ne na ɔzele kɛ, “Bɛgyakyi ngakula ne mɔ bɛmaa bɛrɛla me nwo, bɛmmatua bɛ, ɔboalekɛ bɛdabɛ mɔɔ bɛle kɛ ɛhye mɔ zɛhae la yɛɛ Nyamenle Belemgbunlililɛ ne le bɛ ɛdeɛ a. 17Bɛhakye ɛhye, awie biala mɔɔ anyɛ ɔ nwo kɛ kakula anlie Nyamenle Belemgbunlililɛ ne ando nu la ɛnrɛnyia ye.”
Sukoavolɛ ne nee Gyisɛse
(Mat 19.16-30; Mak 10.17-31)
18Dwuu kpanyinli bie bizale Gyisɛse kɛ, “Kilehilevolɛ kpalɛ, duzu a menyɛ na meanyia ngoane mɔɔ ɛnlɛ awieleɛ a?”
19Gyisɛse bizale ye kɛ, “Duzu ati a ɛse mele kpalɛ a? Awie biala ɛnle kpalɛ kɛ Nyamenle angomekye. 20#Ade 20.12-16; Mɛla 5.16-20 Ɛze mɛla ne mɔ: mmato awuvolɛvalɛ mɛla ne, mmayɛ kɔdiawu, mmadi daselɛ adalɛ, mmawua, di ɛ ze nee ɛ nli eni.”
21Nrenya ne buale kɛ, “Sumunli me nretee ne ala yɛɛ menvale mɛla ɛhye mɔ azo ɛlilɛ a.”
22Gyisɛse dele ɛhye la, ɔzele ye kɛ, “Yeha wɔ debie ko. Tɔne debie biala mɔɔ ɛlɛ la amuala na kyɛ ezukoa ne maa ehyianvolɛma, na ɛkɛnyia anwonyia wɔ Nyamenle anwo lɔ, na akee bɛla badoa me bo zo.” 23Nrenya ne dele ɛhye la nyane hunle ye kpole, ɔluakɛ ɔle sukoavolɛ kpole.
24Gyisɛse nleanle ye koonwu na ɔzele kɛ, “Ɔyɛ se ɔmaa bɛdabɛ mɔɔ bɛnyia bɛ nwo la kɛ bɛkɛnyia Nyamenle Belemgbunlililɛ ne a. 25Ɔluakɛ ɔnyɛ se kɛ afunlumu kɛwolo agbuyia tokule nu tɛla kɛ sukoavolɛ kɛnyia Nyamenle Belemgbunlililɛ ne a.”
26Menli mɔɔ dele mɔɔ Gyisɛse hanle la bizale kɛ, “Ɛnee nwane bɔbɔ a kɛnyia ngoane a?”
27Gyisɛse buale kɛ, “Mɔɔ yɛ se maa sonla la ɛnyɛ se ɛmmaa Nyamenle.”
28Na Pita zele kɛ, “Nea o, yɛgyakyi debie biala yɛɛ yɛdoa ɛbo zo o!”
29Gyisɛse zele bɛ kɛ, “Ɛhɛe, ɔle zɔhane, noko bɛdie: Awie biala mɔɔ ɛgyakyi ye sua, ɔ ye nee ɔ mediema, ye awovolɛ anzɛɛ ɔ mra wɔ Nyamenle Belemgbunlililɛ ne ati la 30banyia ye mɔnwo wɔ mekɛ ɛhye ala anu nee ngoane mɔɔ ɛnlɛ awieleɛ, wɔ mekɛ mɔɔ bara la anu.”
Gyisɛse ka ye ewule nwo edwɛkɛ mɔɔ tɔ zo nsa
(Mat 20.17-19; Mak 10.32-34)
31Gyisɛse vale ɛdoavolɛma bulu nee nwiɔ ne hɔle ahane na ɔzele bɛ kɛ, “Bɛdie! Yɛlɛkɔ Gyɛlusalɛm, na ɛkɛ ne yɛɛ debie biala mɔɔ Nyamenle kpɔmanvolɛma hɛlɛle wɔ medame Sonla Ra me nwo la bayɛ zɔhane a. 32Bɛbaye me bɛawula menli mɔɔ ɛnle Dwuuma la asa anu, na bɛbazi me amgbu, bɛayɛ me aholoba na bɛatoto nyɛlɛ me nyunlu. 33Bɛbabila me mbaka na bɛahu me, na ye kenle nsa ne anzi, mebadwazo meara ngoane nu.”
34Ɛdoavolɛma ne ande ninyɛne ɛhye mɔ biala abo; bɛvale edwɛkɛ ne anwo ndelebɛbo bɛveale bɛ, yemɔti bɛannwu mɔɔ Gyisɛse ɛlɛka la anzi.
Gyisɛse yɛ anyenzinliravolɛ bie ayile
(Mat 20.29-34; Mak 10.46-52)
35Mɔɔ Gyisɛse bikyele Gyɛleko la, ɛnee anyenzinliravolɛ bie de adehane ne ɛlɛsɛlɛzɛlɛ ninyɛne, 36na ɔdele menli dɔɔnwo ne mɔɔ ɛlɛse la ane la, ɔbizale kɛ, “Duzu ɔ?”
37Bɛbuale ye kɛ, “Gyisɛse mɔɔ vi Nazalɛte la a ɛlɛse a.”
38Na ɔdeanle nu ɔzele kɛ, “Gyisɛse, Devidi ara! Nwu me anwunvɔne!”
39Menli mɔɔ lumua la deɛdeanle ye nu na bɛzele ye kɛ ɔyɛ koonwu; na akee ɔdeanle nu kpole kpalɛ kɛ, “Devidi ara, nwu me anwunvɔne!”
40Yemɔti Gyisɛse gyinlanle na ɔzele kɛ, “Bɛva nrenya anyenzinliravolɛ ne bɛrɛla.” Mɔɔ ɔrale la, Gyisɛse bizale ye kɛ, 41“Duzu a ɛkulo kɛ meyɛ memaa wɔ a?”
Na ɔbuale kɛ, “Yɛmenle, mekulo kɛ menwu debie bieko.”
42Na Gyisɛse zele ye kɛ, “Nwu debie! Wɔ diedi ɛyɛ wɔ ayile.”
43Na ɛkɛ ne ala ɔnwunle debie, na ɔdoale Gyisɛse ɔyele Nyamenle ayɛlɛ. Mɔɔ menli dɔɔnwo ne nwunle ɛhye la, bɛ muala bɛyele Nyamenle ayɛlɛ.
Currently Selected:
Luk 18: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
