Luk 13
13
Bɛgyakyi bɛ ɛtane ne mɔ anrɛɛ bɛkɛwu
1Mekɛ ne anu menli bie rahanle Galelima bie mɔɔ Paelɛte ɛmaa bɛhu bɛ wɔ mekɛ mɔɔ ɛnee bɛlɛbɔ azu bɛamaa Nyamenle la anwo edwɛkɛ hilele Gyisɛse. 2Gyisɛse buale bɛ kɛ, “Kɛmɔ bɛhunle Galelima zɔhane mɔ wɔ adenle zɔhane anu la, ɛnee bɛdabɛ bɛnea a ɔkile kɛ bɛle ɛtanevolɛma kpole bɛtɛla Galelima mɔɔ ɛha la amuala ɔ? 3Ɔnle zɔhane. Meka meahile bɛ, saa bɛdabɛ noko bɛanzia bɛanvi bɛ ɛtane ne mɔ anwo a, bɛ muala bɛbawu kɛ menli zɔhane mɔ ala la. 4Na menli bulu nee mɔtwɛ ne mɔɔ sua tendenle ne bule guale bɛ nwo zo hunle bɛ wɔ Saelowam la noko ɛ? Bɛdabɛ bɛnea a, ɛnee ɛhye kile kɛ menli zɔhane mɔ le ɛtanevolɛma kpole tɛla menli mɔɔ wɔ Gyɛlusalɛm la ɔ? 5Ɔnle zɔhane. Na meka meahile bɛ, saa bɛdabɛ noko bɛanzia bɛanvi bɛ ɛtane ne mɔ anwo a, bɛ muala bɛbawu kɛ menli zɔhane mɔ ala la.”
Feege baka ne mɔɔ ɛnzo ma la anwo ɛrɛlɛ
6Akee Gyisɛse bule bɛ ɛrɛlɛ ɛhye. Ɔse, “Ɛnee nrenya bie lɛ feege baka wɔ ye vanye tola bie anu. Na ɔhɔle kɛ ɔkakpondɛ ma wɔ zolɛ na yeannyia bie. 7Yemɔti ɔzele ye tola ne azo neavolɛ ne kɛ, ‘Nea, mekpɔla feege baka ye azo ɛvolɛ nsa kɛ mekpondɛ ma wɔ zolɛ na mennyia bie. Pɛ ye to aze! Ɔnle kɛ ɔgyinla ɛkɛ ne ɔsɛkye azɛlɛ ne mgbane!’ 8Na tola neavolɛ ne buale ye kɛ, ‘Yɛmenle, maa ɔgyinla ɛkɛ ne na yɛnlea ye ɛvolɛ ye noko; mebavuduvudu ɔ bo na meagugua ewula ɔ bo. 9Na saa ɛvolɛ ne kadwu na ɔso a, ɔle kpalɛ; yeanzo noko a, yɛkɛpɛ ye yɛkɛdo.’ ”
Gyisɛse yɛ raalɛ abubura bie ayile wɔ Ɛnwomenlelielɛ Kenle ne
10Ɛnwomenlelielɛ Kenle ko bie ɛnee Gyisɛse ɛlɛkilehile wɔ nyianu sua bie anu. 11Raalɛ ko wɔ ɛkɛ ne mɔɔ sunsum ɛtane vale ye la yedwu ɛvolɛ bulu nee mɔtwɛ, na yemaa ewule ɛdɔ ɔ nwo, yekpo kondokondo mɔɔ ɔngola ɔ nwo tenrɛ fee a. 12Mɔɔ Gyisɛse nwunle ye la, ɔvɛlɛle ye na ɔzele ye kɛ, “Ɔmɔ, bɛye wɔ bɛvi wɔ anwonyane ne anu!” 13Akee ɔvale ɔ sa ɔguale raalɛ ne anwo zo, na ɛkɛ ne ala ɔdenrɛle ɔ nwo fɔɔnwo na ɔyele Nyamenle ayɛlɛ.
14 #
Ade 20.9-10; Mɛla 5.13-14 Nyianu sua ne kpanyinli ne vale ɛya kɛ Gyisɛse ɛyɛ ayile wɔ Ɛnwomenlelielɛ Kenle ne a, na ɔzele menli mɔɔ wɔ ɛkɛ ne la kɛ, “Yɛlɛ kenle nsia mɔɔ ɔwɔ kɛ yɛfa yɛyɛ gyima a; yemɔti bɛrɛla kenle zɔhane mɔ bɛmaa bɛyɛ bɛ ayile, na bɛgyakyi Ɛnwomenlelielɛ Kenle ne bɛmaa ɔla ɛkɛ ne.”
15Awulae buale ye kɛ, “Bɛmɛ nabalabama! Saa ɔdwu Ɛnwomenlelielɛ Kenle a bɛ biala sianyi ye ɛnlankɛ anzɛɛ asoaso ɔfa ye ɔkɔmaa ye nzule. 16Na raalɛ ɛhye mɔɔ le Ebileham abo zo sonla, na Seetan ɛva ewule ɛkyekye ye toonwo ɛvolɛ bulu nee mɔtwɛ la, yɛɛ ɔnle kɛ bɛsianyi ye wɔ Ɛnwomenlelielɛ Kenle a?” 17Ye mualɛ ne manle ye agbɔvolɛ ne mɔ amuala anyunlu guale aze, na menli ne amuala lile fɛlɛko wɔ nwanwane ninyɛne mgbole mɔɔ ɔyɛle la anwo.
Mɛsetade baka ma nwo ɛrɛlɛ
(Mat 13.31-32; Mak 4.30-32)
18Gyisɛse bizale kɛ, “Kɛ Nyamenle Belemgbunlililɛ ne si de ɛ? Duzu a menva mendo nwolɛ a? 19Ɔle kɛ mɛsetade baka ma nretee bie mɔɔ awie vale luale ye tola nu la; ɔfifile, ɔnyinle ɔyɛle baka, na nloma yɛle bɛ sane wɔ ye ngane ne mɔ anu.”
Mgbɔvonle nwo ɛrɛlɛ
(Mat 13.33)
20Gyisɛse bizale bɛ bieko kɛ, “Duzu a menva Nyamenle Belemgbunlililɛ ne mendo nwolɛ a? 21Ɔle kɛ mgbɔvonle mɔɔ raalɛ fa wula ɛdɔkɛ nu la. Ɔmaa ɛdɔkɛ ne amuala tu.”
Anlenkɛ ekyi ne
(Mat 7.13-14,21-23)
22Gyisɛse kpɔsale azua nee namunamu zo hilehilele menli ne, na ɛnee ɔlua zo ɔlɛkɔ Gyɛlusalɛm. 23Awie bie bizale ye kɛ, “Yɛmenle, asoo ɔle nɔhalɛ kɛ menli ekyi bie ala a bɛbalie bɛ ngoane a?”
Gyisɛse buale bɛ kɛ, 24“Bɛbɔ mɔdenle bɛva anlenkɛ ekyi ne anu, ɔboalekɛ menli dɔɔnwo babɔ mɔdenle kɛ bɛfa nu, noko bɛnrɛhola. 25Sua menle ne badwazo ado anlenkɛ ne anu, na saa bɛka alie nwo na bɛbɔ anlenkɛ ne anu bɛse kɛ, ‘Yɛmenle, tukue yɛ anlenkɛ ne!’ a, ɔkɛbua bɛ kɛ, ‘Menze ɛleka mɔɔ bɛvi a!’ 26Na bɛmɛ bɛbabua kɛ, ‘Yɛ nee wɔ lile, nlonle; ɛhilehilele wɔ yɛ sua zo.’ 27#Edw 6.8 Na ɔbaze bɛ bieko kɛ, ‘Menze ɛleka mɔɔ bɛvi a. Bɛvi ɛkɛ ne bɛhɔ, amumuyɛma!’ 28-29#Mat 22.13; 25.30 Na akee mɔɔ bɛkɛnwu bɛ nlenya mɔ Ebileham, Ayezeke nee Gyekɔbo nee Nyamenle kpɔmanvolɛma ne mɔ mɔɔ bɛfa bɛ bɛtu bɛ nloa nu la amuala wɔ Nyamenle Belemgbunlililɛ ne anu, na menli vi aduduleɛ nee adɔleɛ, ɛbɔ nu nee nyevile nu ɛra ɛvoyia ne abo, na akee bɛye bɛmɛ bɛgua alie nwo nehane la, ɛkɛ ne yɛɛ bɛbazu na bɛadedɛ bɛ nwo bonrane nu a. #Mat 8.11-12 30#Mat 19.30; 20.16; Mak 10.31 Bɛdabɛ mɔɔ kɛkala bɛli amozi la baralumua, na bɛdabɛ mɔɔ kɛkala bɛlumua la arali amozi.”
Gyisɛse kulo Gyɛlusalɛm
(Mat 23.37-39)
31Mekɛ ne anu Falasiima bie rale Gyisɛse anwo ɛkɛ ne razele ye kɛ, “Ye ɛ nwo ɛke na kɔ ɛleka fofolɛ, ɔluakɛ Hɛlɔdo kpondɛ wɔ ahu wɔ.”
32Gyisɛse buale bɛ kɛ, “Bɛhɔ na bɛhɔze musuofoɔ ne kɛ, melɛtu mbɔnsam, meayɛ ayile ɛnɛ nee ɛhyema, na ye kenle nsa ne azo menwɔwie me gyima ne. 33Noko ɔwɔ kɛ mesɔ me adendulɛ ne azo ɛnɛ nee ɛhyema nee ye alehyenlɛ nu. Ɔnle kpalɛ kɛ bɛkɛhu Nyamenle kpɔmanvolɛ wɔ ɛleka gyɛne biala kyesɛ Gyɛlusalɛm ala.
34“Gyɛlusalɛm, O Gyɛlusalɛm! Wɔhu Nyamenle kpɔmanvolɛma ne, wɔzi menli mɔɔ Nyamenle zoanle bɛ ɛ nwo la awolɛ! Fane dɔɔnwo yɛɛ mehulo kɛ anrɛɛ menwɔva me sa menwɔbɛla bɛmɛ Gyɛlusalɛmma kɛ akɔlɛ ɛdane fa ɔ mra fea ɔ ndɛba abo la; na bɛammaa me adenle. 35#Edw 118.26 Yemɔti bɛ sua ye badɔ mgbane. Meka meahile bɛ kɛ bɛnrɛnwu me, kɔkpula kɛ mekɛ ne kɛdwu mɔɔ bɛbadeɛdea nu bɛaze kɛ, ‘Nyilalɛ ɛha mɔɔ lua Awulae duma nu ɛlɛba la.’ ”
Currently Selected:
Luk 13: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
