Luk 12

Kɔkɔbɔlɛ wɔ adalɛ nabalaba nwo

(Mat 10.26-27)

1 # Mat 16.6; Mak 8.15 Menli dɔɔnwo rabɔle yiale ye, mɔɔ ɛnee akee asɛɛ bɛlɛtietia bɛ nwo zo la, Gyisɛse lumuale dendɛle hilele ye ɛdoavolɛma ne mɔ kɛ, “Bɛnlea bɛ nwo boɛ wɔ Falasiima mgbɔvonle ne anwo, meka bɛ adalɛ nabalaba ngilehilelɛ ne 2#Mak 4.22; Luk 8.17 Debie biala mɔɔ bɛheda zolɛ la, bɛbadukue zolɛ, yɛɛ debie biala mɔɔ vea la bala ali. 3Yemɔti, edwɛkɛ biala mɔɔ bɛha ye wɔ awozinli nu la, bɛbade ye ewia henlema, yɛɛ edwɛkɛ biala mɔɔ bɛdu ye azukue wɔ sua kunlu la, bɛbabɔ ye nolo wɔ sua ti zo.”

Mɔɔ ɔwɔ kɛ bɛsulo ye la

(Mat 10.28-31)

4Akee ɔzele bɛ kɛ, “Me gɔnwo mɔ, meka meahile bɛ, bɛmmasulo bɛdabɛ mɔɔ bɛkola bɛku nwonane ye ala, na bɛngola bɛnzɛkye ɛkɛla ne la. 5Mekile bɛ mɔɔ ɔwɔ kɛ bɛsulo ye la; bɛzulo Nyamenle, yemɔ yɛɛ ɔku sonla a ɔlɛ tumi ɔfuandi ye ɛkɛla ɔto senle ne mɔɔ ɛnnu ɛlɛ la anu a. Nɔhalɛ, meka meahile bɛ kɛ bɛzulo yemɔ.

6“Bɛtɔne nyamenleakatiba nnu ɛkpɔsɛba nwiɔ! Noko Nyamenle anye ɛnvo nuhua ko bɔbɔ ɛlɛ. 7Na bɛmɛ, bɛ ti enrinli bɔbɔ bɛdia ɔ muala. Yemɔti bɛmmasulo, ɔluakɛ bɛmɛ, bɛsonle bolɛ kpole bɛtɛla nyamenleakatiba kpolane!

Kelaese ɛlielɛ nee ye ɛkpolɛ

(Mat 10.32-33; 12.32; 10.19-20)

8“Meka meahile bɛ, awie biala mɔɔ kɛbɔ ye te wɔ bagua nu kɛ ɔle me ɛdeɛ la, medame Sonla Ra, mebayɛ ye zɔhane ala meamaa ye wɔ Nyamenle soanvolɛma anyunlu. 9Zɔhane ala yɛɛ mɔɔ kɛhakyi ɔ nzi kɛzi me wɔ bagua nu la, medame Sonla Ra noko menwɔhakyi me nzi menwɔzi ye wɔ Nyamenle soanvolɛma anyunlu a.

10 # Mat 12.32; Mak 3.29 “Awie biala mɔɔ kɛdendɛ kɛtia Sonla Ra ne la bɛkɛva ye ɛtane bɛkɛhyɛ ye. Na mɔɔ kɛha ɛtane kɛtia Sunsum Nwuanzanwuanza ne la bɛnrɛva bɛnrɛhyɛ ye.

11 # Mat 10.19-20; Mak 13.11; Luk 21.14-15 “Saa bɛfa bɛ bɛkɔ kɛ bɛkali bɛ edwɛkɛ wɔ nyianu azua ne mɔ anu anzɛɛ amɛnladoma nee arelemgbunli nyunlu a, bɛmmadwenle mɔɔ bɛbaha anzɛɛ kɛ ɔkɛyɛ na bɛalie bɛ nwo la anwo. 12Ɔluakɛ mekɛ ne anu, Sunsum Nwuanzanwuanza ne bahilehile bɛ mɔɔ ɔwɔ kɛ bɛka la.”

Sukoavolɛ koasea ne anwo ɛrɛlɛ

13Nrenya ko mɔɔ wɔ menli dɔɔnwo ne anu la hanle hilele Gyisɛse kɛ, “Kilehilevolɛ, ka kile me diema ne maa ɔ nee me ɛhyɛ agya ninyɛne ne mɔɔ yɛ ze gyakyile yɛ la.”

14Gyisɛse buale ye kɛ, “Me gɔnwo, nwane a manle me tumi kɛ membua ndɛne anzɛɛ mengyɛ bɛ mu nwiɔ bɛ agya ninyɛne memaa bɛ a?” 15Na ɔzɔle zolɛ ɔzele menli ne amuala kɛ, “Bɛmmayɛ anyebolo wɔ adenle biala anu, ɔboalekɛ sonla ngoane ɛnle ye anwonyia anzɛɛ ye ezukoa kpole mɔɔ ɔlɛ la anu.”

16Na Gyisɛse bule bɛ ɛrɛlɛ ɛhye: “Sukoavolɛ bie woale ɛkɛ mɔɔ ye egyinli nu aleɛ hyenle kpole kpalɛ a. 17Na ɔbɔle ɔ bo ɔdwenlenle nwolɛ kɛ, ‘Menlɛ ɛleka mɔɔ mesie me aleɛ ɛwolaa ɛhye a. Duzu a menyɛ a?’ 18Na ɔzele ɔ nwo kɛ, ‘Ɛhye yɛɛ meyɛ a; megolo me bonwolo dɛba ne mɔ na measisi bie mgbole, na meava me aleɛ nee me ninyɛne ne mɔ amuala meagugua zolɛ. 19Na akee meaze me nwo kɛ, Me ɛkɛla, ɛ ti ɛyɛ boɛ! Wɔnyia ninyɛne kpalɛ dɔɔnwo mɔɔ nee wɔ badwu ɛvolɛ dɔɔnwo a. Die wɔ ɛnwomenle, di, no, na die ɛ nye!’ 20Na Nyamenle zele ye kɛ, ‘Ɛle kɔnwɔne! Ɛnɛ nɔe ala bɛbaye wɔ ngoane ne bɛavi wɔ nuhua; na nwane a bava ninyɛne ɛhye mɔ amuala mɔɔ wɔva wɔzie wɔmaa ɛ nwo la a?’ ”

21Na Gyisɛse dwulale ye edwɛkɛ ne kɛ, “Kɛ menli mɔɔ kuohua anwonyia maa bɛ nwo na bɛnle sukoavolɛma wɔ Nyamenle anyunlu la de la ɛne.”

Fa ɛ rɛle wula Nyamenle anu

(Mat 6.25-34)

22Akee Gyisɛse zele ye ɛdoavolɛma ne kɛ, “Ɛhye ati meka meahile bɛ, bɛmmadwenle aleɛ mɔɔ bɛdi bɛanyia ngoane anzɛɛ ɛdanlɛ mɔɔ bɛkɛheda la anwo. 23Ngoane hyia kpole kpalɛ tɛla aleɛ, yɛɛ sonlabaka hyia kpole kpalɛ tɛla ndanlɛ. 24Bɛnlea ahɔhɔsɛlɛ: bɛnlua yɛɛ bɛmbu; bɛnlɛ bonwolo anzɛɛ ɛleka mɔɔ bɛsie bɛ ninyɛne a; Nyamenle a yɛne bɛ a. Bɛmɛ, bɛsonle bolɛ bɛtɛla nloma! 25Bɛ nuhua boni a saa ɔdwenle dɔɔnwo wɔ ye ngoane nwo a, ɔkɛhola ɔkɛva kenle ekyi bɔbɔ ɔkɛgua ye ngoane mekɛ zo a? 26Na saa nretee ɛhye bɔbɔ bɛngola ye yɛ a, ɛnee duzu ati a bɛdwenle ninyɛne mɔɔ ɛha la anwo ɛ? 27#1 Arl 10.4-7; 2 Edk 9.3-6 Bɛnlea kɛ ɛhoayelɛ nu aloa si nyi la: bɛnyɛ gyima yɛɛ bɛnnwo ndanlɛ. Noko meka meahile bɛ kɛ Belemgbunli Sɔlɔmɔn, wɔ ye anyunlunyia mekɛ ne amuala anu, yeannyia ndanlɛ mɔɔ le ngɛnlɛma kɛ ndotolo ɛhye mɔ la anu ko bɔbɔ. 28Nyamenle a keda ndile mɔɔ wɔ ɛbɔ nu, mɔɔ ɛnɛ fifi a, ɛhyema ɛnee bɛyela bɛ wɔ fonlomo nu la ndanlɛ a. Ɛnee bɛnea a ɔnrɛhola ɔnrɛheda bɛ ndanlɛ ɔ? Bɛ diedi le ekyi somaa!

29“Yemɔti bɛmmamaa bɛ adwenle sɛkye wɔ mɔɔ bɛkɛli nee mɔɔ bɛkɛnlo la anwo. 30(Ɔluakɛ bɛdabɛ mɔɔ bɛnze Nyamenle la a dwenledwenle ɛhye mɔ anwo a.) Bɛ Ze mɔɔ wɔ anwuma la ze kɛ bɛhyia ɛhye mɔ anwo. 31Zɔhane ati, bɛmaa Nyamenle Belemgbunlililɛ ne ɛhyia bɛ, na ɔdaye noko ɔkɛva ɛhye mɔ ɔkɛmaa bɛ.

Anwonyia wɔ anwuma

(Mat 6.19-21)

32“Me mboane ekpunli ekyi, bɛmmasulo, ɔluakɛ bɛ Ze mɔɔ wɔ anwuma la kulo kɛ bɛnyia Belemgbunlililɛ ne. 33Bɛdɔne mɔɔ bɛlɛ la amuala na bɛva ezukoa ne bɛmaa ehyianvolɛma. Bɛyɛ gya ahodoku mɔɔ ɛnzɛkye ɛlɛ la bɛmaa bɛ nwo, na bɛva bɛ anwonyia bɛzie ɛleka mɔɔ ɔnrɛminli ɛlɛ la, ɔboalekɛ awule asa ɛnrɛha ye, yɛɛ ɛlɛtɛba ɛnrɛhola ɛnrɛzɛkye ye. 34Ɛleka mɔɔ bɛ anwonyia ne wɔ la, ɛkɛ ne yɛɛ bɛ ahonle noko wɔ a.

Sonvolɛma mɔɔ sinza la

35 # Mat 25.1-13 “Bɛziezie bɛ nwo bɛmaa debie biala mɔɔ kɛzi bɛ adenle nu la, na bɛmaa bɛ ahɛnlaneɛ ɛda 36#Mak 13.34-36 kɛ sonvolɛma mɔɔ ɛlɛkendɛ bɛ menle mɔɔ vi atɔfolɛlielɛ bo ɛlɛba la, amaa saa ɔba na ɔbabɔ anlenkɛ ne anu a, bɛadukue ye ndɛndɛ. 37Nyilalɛ ɛha sonvolɛma mɔɔ mekɛ mɔɔ bɛ menle kɛra la ɔkɛrado bɛ kɛ bɛ nye gyi zo na bɛlɛkendɛ ye la. Nɔhalɛ, meka meahile bɛ kɛ ɔkɛmaa bɛkɛdɛnlɛdɛnla aze, ɔkɛkpa ɔkɛgua, na ɔkɛmaa bɛ debie. 38Na saa ɔsia ɔba alevinli mu nwiɔ avinli o, anzɛɛ akɔlɛmɔleɛ o, na ɔbato bɛ zɔhane ala a, bɛ nyilalɛ le kpole. 39#Mat 24.43-44 Na bɛhakye ɛhye! Saa awuke menle ze mekɛ holɛ ko mɔɔ awule ne kɛva kɛra la a, anrɛɛ ɔnrɛmaa ye adenle ɔnrɛmaa ɔnrɛbu ɔnrɛra ye sua ne anu. 40Zɔhane ala yɛɛ bɛdabɛ noko bɛziezie bɛ nwo a, ɔboalekɛ medame Sonla Ra, mebara bieko wɔ mekɛ mɔɔ bɛ nye ɛnla la.”

Sonvolɛ ne mɔɔ di nɔhalɛ anzɛɛ sonvolɛ ne mɔɔ ɛnli nɔhalɛ

(Mat 24.45-51)

41Pita bizale Gyisɛse kɛ, “Awulae, ɛbu ɛrɛlɛ ɛhye wɔamaa yɛdayɛ yɛ ngome anzɛɛ awie biala ɔ?”

42Awulae buale kɛ, “Ɛnee nwane a le sonvolɛ mɔɔ di nɔhalɛ na ɔle nrɛlɛbɛvolɛ la? Yemɔ a le sonla ne mɔɔ ɔ menle kɛyɛ ye kpanyinli wɔ ye awuke ne anu kɛ ɔmaa sonvolɛma mɔɔ ɛha la aleɛ wɔ mekɛ ne anloa la. 43Nyilalɛ ɛha sonvolɛ ne mɔɔ mekɛ mɔɔ ɔ menle kɛra sua nu la ɔkɛrado ye kɛ ɔlɛyɛ ɛhye la. 44Nɔhalɛ, meka meahile bɛ kɛ, ɔ menle ne kɛmaa ɔkɛnlea ye ninyɛne kpokpoti azo. 45Na saa sonvolɛ zɔhane ka kɛ, ‘Me menle bahyɛ na yeara,’ na ɔbɔ ɔ bo kɛ ɔbo sonvolɛma mɔɔ ɛha la, mrenya nee mraalɛ, na ɔdi, ɔno na ɔbo a, 46ɔ menle ne bara wɔ mekɛ mɔɔ ɔnze na ɔ nye ɛnla la. Na ɔ menle ne kɛye ye ali kɛmaa ɔkɛhɔboka anzosesebɛma anwo.

47“Sonvolɛ mɔɔ ze deɛ mɔɔ ɔ menle kpondɛ kɛ ɔyɛ, noko ɔnziezie ɔ nwo kɛ ɔyɛ mɔɔ ɔ menle kpondɛ la, bɛkɛbila ye empele kpalɛ kpalɛ. 48Na sonvolɛ mɔɔ ɛnze mɔɔ ɔ menle kpondɛ, na ɔyɛ debie mɔɔ ɔwɔ kɛ bɛbila ye empele a, yemɔ bɛkɛbila ye ekyii bie ala. Sonla mɔɔ bɛkɛmaa ye ninyɛne dɔɔnwo la, bɛkɛlie ninyɛne dɔɔnwo wɔ ye ɛkɛ ne, yɛɛ mɔɔ bɛkɛva dɔɔnwo kpalɛ bɛkɛwula ɔ sa nu la, bɛkɛbiza ye bɛkɛlie dɔɔnwo kpalɛ bɛkɛvi ye ɛkɛ.

Gyisɛse maa mgbakyemgbakye ba

(Mat 10.34-36)

49“Membale kɛ mebado senle wɔ azɛlɛ ye azo, yɛɛ me kunlu a anrɛɛ yezɔ dɛbadɛba. 50#Mak 10.38 Noko akee ɔwɔ kɛ mesɔ amaneɛnwunlɛ sa, na saa ɛhye ɛtɛsenle a me ti akunlu ɛtɛgyale! 51Bɛdwenle kɛ menvale anzonudwolɛ membale ewiade ɔ? Meka meahile bɛ, tɛ anzonudwolɛ ɔ, na mgbakyemgbakye ɔ. 52Ɔvi ɛnɛ mɔɔ kɔ la abusua ko mɔɔ menli nnu a wɔ nu la anu babu nwiɔ, na nwiɔ ne atia nsa ne. 53#Mae 7.6 Selɛma batia bɛ mra mrenya, yɛɛ mralɛ mrenya batia bɛ ze mɔ; ninlima batia bɛ mra mraalɛ, yɛɛ mralɛ mraalɛ batia bɛ nli mɔ; azebɛla batia ahileni na ahileni atia azebɛla.”

Mekɛ ne anwo ndelebɛbo

(Mat 16.2-3)

54Gyisɛse eza zele menli ne kɛ, “Saa bɛnwu kɛ maanle nu ɛmunla sɛnzɛne adɔleɛ na ɔlɛfo yeara a, ɛnee bɛse, ‘Ezule badɔ’, na ɔyɛ zɔhane. 55Mekɛ mɔɔ nyiakɛ anwoma ne kɛze kɛ ɔbɔ noko la, ɛnee bɛse, ‘Wuluwulu bara’, na ɔyɛ zɔhane. 56Adalɛ nabalabama! Bɛkola bɛnwu azɛlɛ ye azo nee anwomanyunlu sɛkɛlɛneɛ ne mɔ abo bɛkile, na kɛmɔti a bɛngola bɛngile mekɛ ɛhye mɔɔ yɛwɔ nu la abo ɛ?

Ɛ nee wɔ kpɔvolɛ bɛbɔ nu

(Mat 5.25-26)

57“Kɛmɔti a bɛdabɛ bɛ ngome bɛngola bɛmbua bɛ nwo ndɛne fɔɔnwo ɛ? 58Saa sonla nee wɔ lɛ edwɛkɛ na ɔfa wɔ ɔkɔ suakunlu a, bɔ mɔdenle kɛ mɔɔ bɛtɛnyianle bɛtɛkɔle edwɛkɛ ne azo la, ɛ nee ye bɛkɛziezie edwɛkɛ ne wɔ adenle nu kolaa na bɛadwu lɔ, amaa yeanva wɔ yeangɔmaa ndɛnebuavolɛ ne, na ndɛnebuavolɛ ne aye wɔ awula kpolisima asa anu, na kpolisima ahɔdo wɔ efiade. 59Na meka meahile bɛ, anrɛɛ bɛnrɛvi nu ɛlɛ, kyesɛ bɛtua bɛ kakɛ ne mɔɔ ndɛnebuavolɛ ne bule dole bɛ nwo zo la amuala mɔɔ ɛkpɔsɛba bɔbɔ ɛnga nu a.”

Currently Selected:

Luk 12: NB

Highlight

Copy