Luk 14
14
Gyisɛse yɛ nrenya wuleravolɛ bie ayile
1Ɛnwomenlelielɛ Kenle ko Gyisɛse hɔle kɛ ɔkakpula ɔ sa wɔ Falasii mgbanyima ne mɔ ko sua nu. Mekɛ ne anu ɛnee menli ɛlɛtɛ ye kpalɛ. 2Nrenya bie mɔɔ mutulemutule ɛyɛ ye la rale Gyisɛse anwo ɛkɛ ne, 3na Gyisɛse bizale mɛla kilehilevolɛma ne nee Falasiima ne mɔ kɛ, “Asoo yɛ mɛla ne tua ayileyɛlɛ wɔ Ɛnwomenlelielɛ Kenle ne, anzɛɛ ɔndua?”
4Na bɛandɛ bɛ nloa anu. Yemɔti Gyisɛse vale nrenya ne na ɔyɛle ye ayile ɔmanle ɔhɔle. 5#Mat 12.11 Akee ɔbizale bɛ kɛ, “Bɛ nuhua boni yɛɛ saa ɔ ra nrenya anzɛɛ ye ɛnlankɛ#14.5 Ɛnlankɛ: Mbuluku ne bie mɔ se asoaso. tɔ bula nu Ɛnwomenlelielɛ Kenle ne a, ɛkɛ ne ala ɔnrɛye ye a?”
6Na bɛangola ɛhye noko anloa ye.
Mɛlɛbɛnwoaze nee nyɛvolɛlielɛ
7Gyisɛse nwunle bɛdabɛ mɔɔ bɛdole ɛsalɛ bɛvɛlɛle bɛ la kɛ bie mɔ anye ɛbolo ɛlɛkpondɛ ɛleka kpalɛ adɛnla, yemɔti ɔbule bɛ muala ɛrɛlɛ ɛhye: 8#Mrɛ 25.6-7 “Saa awie to ɔ sa fɛlɛ wɔ wɔ atɔfolɛlielɛ bo a, mmakɔtɛnla ɛleka kpalɛ ne. Ɔkɛyɛ kɛ bie a ɛnee bɛvɛlɛ awie mɔɔ lɛ dibile tɛla wɔ la, 9na ahenle mɔɔ vɛlɛle yemɔ nee wɔmɔ la ɔwɔ kɛ ba na ɔbase wɔ kɛ, ‘Dwazo, fa ɛ bo zo ne maa sonla ɛhye.’ Ɛnee akee ɛlɛ nyiane ɛbahɔdɛnla bɛ nzi lɔ ebia zo. 10Yemɔti saa bɛto ɛsalɛ bɛfɛlɛ wɔ a, kɔdɛnla bɛ nzi lɔ ɛleka bie, na saa mɔɔ vɛlɛle wɔ la ba a, yeaze wɔ kɛ, ‘Me gɔnwo, bɛla badɛnla ɛleka kpalɛ.’ Ɛhye kɛyɛ anyunlunyia kɛmaa wɔ wɔ menli mɔɔ nee wɔ de ɛkponle ne anwo la anyunlu. 11#Mat 23.12; Luk 18.14 Ɔluakɛ mɔɔ memaa ɔ nwo zo la Nyamenle bɛlɛ ye aze, yɛɛ mɔɔ bɛlɛ ɔ nwo aze la Nyamenle kpogya ye zo.”
12Akee Gyisɛse zele nrenya ne mɔɔ dole ɛkponle ne la kɛ, “Saa ɛto ɛkponle ewiazo anzɛɛ nɔsolɛ nu a, mmafɛlɛvɛlɛ ɛ gɔnwo mɔ anzɛɛ ɛ mediema anzɛɛ wɔ mbusuafoɔ anzɛɛ wɔ kpalɛzo sukoavolɛma angome, ɔluakɛ bɛdabɛ noko bɛbavɛlɛ wɔ bie bɛazie wɔ ɛdeɛ ne abo zo. 13Na saa ɛto ɛkponle a, fɛlɛvɛlɛ ehyianvolɛma, abuburama, bɛdabɛ mɔɔ bɛ sa anzɛɛ bɛ gyakɛ le azinli, yɛɛ anyenzinliravolɛma, 14na Nyamenle kɛyila wɔ. Ɔluakɛ bɛmɛ, bɛdabɛ bɛnrɛhola bɛnrɛzie wɔ ɛdeɛ ne abo zo. Nyamenle ala a bazie ɔ bo zo amaa wɔ wɔ mekɛ mɔɔ menli kpalɛ ne mɔ vi ewule nu kɛdwazo la a.”
Ɛkponledolɛ kpole ne anwo ɛrɛlɛ
(Mat 22.1-10)
15Menli mɔɔ de ɛkponle ne anwo la anu ko mɔɔ dele ɛhye la hanle hilele Gyisɛse kɛ, “Nyilalɛ ɛha bɛdabɛ mɔɔ bɛbadɛnla ɛkponledolɛ kpole ne abo wɔ Nyamenle Belemgbunlililɛ ne anu la!”
16Gyisɛse zele ye kɛ, “Nrenya bie dole ɛkponle na ɔvɛlɛle menli dɔɔnwo. 17Mɔɔ mekɛ ne dwule la, ɔzoanle ye sonvolɛma kɛ bɛhɔze bɛdabɛ mɔɔ yedo ɛsalɛ yevɛlɛ bɛ la kɛ, ‘Bɛrɛla na mewie debie biala yɛ.’ 18Na bɛ muala bɛbɔle ɔ bo kɛ bɛtwenlehwenle bɛ bo aze. Mɔɔ lumua la zele kɛ, ‘Medɔ me azɛlɛ bie na ɔwɔ kɛ mekɔnea. Yemɔti mmanyia ɛya.’ 19Ko noko ɔdaye ɔhanle kɛ, ‘Medɔ nlankɛ nwiɔ nwiɔ fane nnu na mekɔ meahɔnlea bɛ. Yemɔti mebodo wɔ mmanyia ɛya.’ 20Bieko noko zele kɛ, ‘Megya raalɛ, zɔhane ati menrɛhola ba.’
21“Sonvolɛ ne ziale hɔbɔle ɔ menle ne amaneɛ. Awuke menle ne vale ɛya kpole na ɔzele ye sonvolɛ ne kɛ, ‘Maa ɔyɛ ndɛ, kɔ sua ye azo kpalɛ ne mɔ azo nee awɔdenle ne mɔ anu kɔsesa ehyianvolɛma, abuburama, anyenzinliravolɛma, yɛɛ bɛdabɛ mɔɔ bɛ sa nee bɛ gyakɛ le azinli la ɛ nee bɛ ɛrɛla.’ 22Yeangyɛ biala yɛɛ sonvolɛ ne ziale rale a na ɔrahanle ɔhilele ɔ menle ne kɛ, ‘Yɛmenle, mɔɔ ɛhanle la meyɛ ye zɔhane, noko ɛleka tɛbɔ ɛkɛ ne.’ 23Yemɔti awuke menle ne zele ye sonvolɛ ne kɛ, ‘Kɔ ademgbole ne mɔ nee ndenle ngyikyi ne mɔ anu na twe menli maa bɛrɛla bɛrayi me sua ye. 24Na meka meahile bɛ, bɛdabɛ mɔɔ menlumuale menvɛlɛle bɛ a bɛamba la, me aleɛ ne nretee bɔbɔ ɛnrɛtia biala agye zo.’ ”
Ɛdoavolɛ ɛyɛlɛ
(Mat 10.37-38)
25Kenle ko menli dɔɔnwo bie nee Gyisɛse lua bɛlɛkɔ la, ɔhakyile ɔ nwo ɔzele bɛ kɛ, 26#Mat 10.37 “Awie biala mɔɔ ba me nwo arayɛ me ɛdoavolɛ, na yeangulo me edwɛkɛ yeandɛla ɔ ze nee ɔ nli, ɔ ye nee ɔ mra, ɔ mediema mrenya nee mraalɛ nee ɔdaye mumua ne ɔ nwo la ɛnrɛhola ɛnrɛyɛ me ɛdoavolɛ. 27#Mat 10.38; 16.24; Mak 8.34; Luk 9.23 Awie biala mɔɔ anzoa ye meanubaka ne anli me nzi la ɛnrɛhola ɛnrɛyɛ me ɛdoavolɛ.
28“Saa bɛ nuhua bie kpondɛ kɛ ɔsi sua a, ɔdumua ɔtɛnla aze, ɔsese ye bolɛ, na ɔnea saa ɔlɛ ezukoa mɔɔ sa ye si la a. 29Saa yeanyɛ ye zɔhane na ɔwula sua ne aze a, bie a ɛnee yeangola ye si. Saa bɛnwu ye zɛhae noko a bɛbazi ye amgbu kɛ 30‘Nea, nrenya ɛhye sua ko mɔɔ ɔbɔle ɔ bo la, yeanwie ye si ɛlɛ!’
31“Saa belemgbunli bie fa menli apenle bulu kɛ ɔ nee belemgbunli ko mɔɔ lɛ menli apenle abulanwiɔ la kaho a, ɔbalumua yeadɛnla aze yeadwenle nwolɛ saa ɔkɛhola ɔkɛgyinla belemgbunli zɔhane anyunlu wɔ konle nu a. 32Saa ɔnea na ɔnrɛhola ye a, ɛnee mɔɔ belemgbunli zɔhane yɛ la a le kɛ, mɔɔ kpɔvolɛ ne wɔ moa moa, na ɔtɛnyianle ɔtɛdwule ɛkɛ ne la, ɔsoa ye kpɔmanvolɛ ɔmaa bɛkɔka bɛyɛ anzonudwolɛ ngyehyɛlɛ.” 33Na Gyisɛse dwulale ye edwɛkɛ ne kɛ, “Zɔhane ala yɛɛ saa bɛ nuhua ko biala angyakyi debie biala mɔɔ ɔlɛ la anzi ɛlilɛ a, ɔnrɛhola ɔnrɛyɛ me ɛdoavolɛ a.
Ngyenle mɔɔ ɛda la
(Mat 5.13; Mak 9.50)
34“Ngyenle sonle bolɛ, na saa ɔta a bɛngola bɛnyɛ ye menlemenle. 35Bɛfa bɛyɛ debie biala a ɔnyɛ boɛ; bɛgua ye lɔ. Yemɔti mɔɔ lɛ ɛnzonlɛ la ɛdie!”
Currently Selected:
Luk 14: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
