Mɔl 21
21
Ayezeke awolɛ ne
1Ɛdɛnkɛma rakpɔlale Sɛla, kɛmɔ ɔhanle ala la, na ɔyɛle mɔɔ ɔvale ɔbɔle ye ɛwɔkɛ la ɔmanle ye. 2#Hib 11.11 Na Sɛla nrenzɛle na ɔwole ralɛ nrenya ɔmanle Ebileham wɔ ye mrelera nu, wɔ mekɛ ne mɔɔ Nyamenle nee ye dendɛle nwolɛ la. 3Ebileham donle ralɛ nrenya ne mɔɔ ɔ ye Sɛla wole manle ye la, Ayezeke. 4#Mɔl 17.12; Gyi 7.8 Ayezeke lile kenle mɔtwɛ la, Ebileham yɛle ye mrenyanu nzonlɛ, kɛmɔ Nyamenle zele ye la. 5Ɛnee Ebileham ɛli ɛvolɛ ɛya yɛɛ ɔwole ɔ ra Ayezeke a. 6Na Sɛla hanle kɛ, “Nyamenle ɛmaa ɛzelekɛ ɛdɔ me nwo. Awie biala mɔɔ kɛde me nganeɛ la nee me bazele.” 7Na ɔvale ɔzɔle zolɛ kɛ. “Nwane ala bɔbɔ yɛɛ anrɛɛ kɛhola kɛze Ebileham kɛ Sɛla banloa ngakula nyɛfonlɛ a? Noko akee mɔɔ yeyɛ ɛrelera la mewo ralɛ nrenya memaa ye.”
8Kakula ne nyinli, na kenle ko ne mɔɔ ɔpɛle nyɛfonlɛ la, ɔ ze Ebileham dole nwolɛ ɛkponle kpole bie.
Bɛvoa Heega nee Yehyemeeyɛle
9Kenle ko Sɛla nwunle kɛ Yigyibitinli Heega ara Yehyemeeyɛle, mɔɔ ɔ nee Ebileham wole ye la ɛlɛsi Ayezeke amgbu. 10#Gal 4.29-30 Yemɔti ɔzele Ebileham kɛ, “To raalɛ akɛlɛ ne nee ɔ ra nrenya ne adenle zo, ɔluakɛ akɛlɛ ɛhye ara nrenya ne nee me ra Ayezeke ɛnrɛbɔ nu ɛnrɛli agya ko.” 11Ebileham anye anlie ɛhye anwo fee, ɔluakɛ ɔ ra nrenya a le kakula ne. 12#Wulo 9.7; Hib 11.18 Na Nyamenle zele Ebileham kɛ, “Mmadwenle ɛ ra nrenya ne nee wɔ akɛlɛ raalɛ ne anwo. Di edwɛkɛ biala mɔɔ Sɛla ɛha ɛhile wɔ la azo, ɔluakɛ ɛ bo zo amra vi Ayezeke anu a bara a. 13Mebamaa ɛ ra nrenya ne mɔɔ akɛlɛ raalɛ ne ɛwo ye la noko ada ayɛ maanle, ɔboalekɛ ɔle ɛ ra.”
14Yemɔti Ebileham dwazole nwonlomɔ mangyee ne ala na ɔvale aleɛ nee nzule nwoma kodoku ko ɔmanle Heega vale dole ɔ kɔme zo, na ɔdole ye nee ɔ ra ne adenle zo. Heega hɔle na ɔhɔluoluale Biyɛhyiba fienemgbole ne anu. 15Ye nzule ne wiele la, ɔgyakyile ɔ ra ne ɔdole aziakɛ bie abo. 16Akee ɔhɔdɛnlanle amozi moa kɛyɛ mita ɛya ko, na ɔhanle ɔhilele ɔ nwo kɛ, “Menrɛhola me ra ye anyunlu nea wɔ ye ewule nu.” Heega de ɛkɛ ne la ɛnee yehakyi ɔ nzi yezi kakula ne, na kakula ne bɔle ɔ bo kɛ ɔsu.
17Nyamenle dele kakula ne ane, na Nyamenle soanvolɛ vi anwuma vɛlɛle Heega na ɔbizale ye kɛ, “Heega, duzu a ɛlɛgyegye wɔ a? Mmasulo, ɔluakɛ Nyamenle ɛde kakula ne ane wɔ ɛleka mɔɔ ɔwɔ la. 18Dwazo, kɔmaa kakula ne zo na nea ye boɛ kpalɛ, ɔluakɛ mebamaa yeayɛ maanle kpole.” 19Akee Nyamenle bukele ɔ nye, na Heega nwunle bula bie mɔɔ nzule wɔ nu la, na ɔhɔle nwolɛ ɔhɔzale bie ɔguale ye nwoma kodoku ne anu ɔmanle ɔyile na ɔnloanle ɔ ra ne bie. 20Na Nyamenle boale kakula ne manle ɔnyinle. Ɔdɛnlanle fienemgbole ne anu na ɔbenle ɛda ɛdolɛ nu. 21Ɔdɛnlanle Pɛlan fienemgbole ne anu, na ɔ nli gyale Yigyibiti raalɛ maanle ye.
Ebileham nee Abemɛlɛke ngyehyɛlɛ ne
22 #
Mɔl 26.26
Mekɛ ne anu Belemgbunli Abemɛlɛke nee Faekɔlo, ye safohyenlema kpanyinli ne mɔɔ nea ye ɛlɔnema ne anwo zo la, hɔle Ebileham ɛkɛ hɔzele ye kɛ, “Nyamenle boa wɔ wɔ debie biala mɔɔ ɛkɛze kɛ ɛyɛ la anu. 23Zɔhane ati fa Nyamenle ka ndane kile me kɛ, ɛnrɛbɛlɛbɛla me, anzɛɛ me mra, anzɛɛ me bo zo amra mɔɔ bara la amuala, na kɛmɔ meli nɔhalɛ memaa wɔ la, zɔhane ala yɛɛ ɛbayɛ wɔamaa me nee azɛlɛ ye mɔɔ wɔra zolɛ la azo amra a.”
24Na Ebileham zele kɛ, “Mebɔ ɛwɔkɛ zɔhane.”
25Ebileham hanle nzule bula bie mɔɔ Abemɛlɛke sonvolɛma ne liele vile ɔ sa nu la anwo edwɛkɛ hilele ye. 26Na Abemɛlɛke zele kɛ, “Menze ahenle mɔɔ yɛle zɔhane debie la. Wɔanga wɔangile me, yɛɛ metɛtele ye ɛlɛ kɛ ɛnɛ.” 27Akee Ebileham vale mboane nee nlankɛ manle Abemɛlɛke, na bɛ mu nwiɔ bɛyɛle ngyehyɛlɛ na bɛhyele ɔ bo. 28Ebileham yele mboane mbelɛ nsuu vile ye mboane ne anu ziele ahane. 29Na Abemɛlɛke bizale Ebileham kɛ, “Mboane mbelɛ nsuu ɛhye mɔɔ wɔkpa nu wɔye wɔzie ahane la abo a le duzu?”
30Ebileham buale kɛ, “Die me sa nu mboane nsuu ɛhye fa di daselɛ, kɛ medame yɛɛ membɔle bula ɛhye a.” 31Ɛhye ati bɛvɛlɛle ɛleka ne Biyɛhyiba,#21.31 Biyɛhyiba: Ɔ bo a le “Amonlelilɛ Bula.” ɔboalekɛ ɛkɛ ne yɛɛ bɛ mu nwiɔ bɛlile amonle a.
32Yemɔti bɛyɛle ngyekyeleɛ ɛhye wɔ Biyɛhyiba, na Abemɛlɛke nee Faekɔlo, ye safohyenlema kpanyinli ne mɔɔ nea ye ɛlɔnema anwo zo la ziale hɔle Filisitia. 33Ebileham luale “Tamaleseke” baka wɔ Biyɛhyiba ɛkɛ, na ɔzonlenle Ɛdɛnkɛma, Damɛnlangoate Nyamenle ne wɔ ɛkɛ ne. 34Na Ebileham dɛnlanle Filisitia maanle nu hyɛle kpalɛ.
Currently Selected:
Mɔl 21: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
