Mɔl 22
22
Nyamenle se Ebileham ɛva Ayezeke ɛbɔ azu
1Ɛhye mɔ anzi Nyamenle zɔle Ebileham nleanle na ɔzele ye kɛ, “Ebileham!” Na Ebileham liele zolɛ, “Mewɔ ɛke.”
2 #
2 Edk 3.1
Ɔzele ye kɛ, “Fa ɛ ra nrenya ne, ɛ ra kokye Ayezeke, mɔɔ la wɔ ahonle nwo la, na kɔ Molaya azɛlɛ zo kɔyela ye bɔ azu wɔ awoka ne mɔ ko mɔɔ mebahile wɔ la azo maa me.”
3Yemɔti Ebileham dwazole nwonlomɔ mangyee ne ala na ɔzieziele ye asoaso ne, ɔvale ye sonvolɛma nwiɔ yɛɛ ɔ ra Ayezeke; akee ɔpepɛle ɛyɛne ne mɔɔ ɔfa yeayela azubɔdeɛ ne la, na ɔhɔle ɛleka ne mɔɔ Nyamenle ɛha kɛ ɔhɔ la. 4Bɛzile nu na ye kenle nsa ne azo, Ebileham nwunle ɛleka ne kɛ ɔwɔ moa moa nehane. 5Ebileham zele ye sonvolɛma nwiɔ ne kɛ, “Bɛ nee asoaso ne ɛhendɛ ɛke, na me nee kpavolɛ ye yɛkɔ nehane yeahɔzonle na yɛara.”
6Akee Ebileham vale ɛyɛne ne zoale ɔ ra Ayezeke na ɔdaye ɔvale senle ne nee dadeɛ ne. Na bɛ mu nwiɔ bɛzile nu kɛ bɛkɔ. 7Ayezeke vɛlɛle ɔ ze Ebileham, “Egya!”
Na ɔliele zo, “Me ra nrenya, mewɔ ɛke.”
Ayezeke bizale ye kɛ, “Senle ne nee ɛyɛne ne ɛne, na boane ralɛ ne mɔɔ yɛkayela ye yɛabɔ azu ne la wɔ nienwu?”
8Ebileham buale kɛ, “Me ra nrenya, Nyamenle ɔdaye ɔbava boane ralɛ holɛ ko mɔɔ yɛbayela yɛabɔ azu ne la yeamaa yɛ.” Na bɛ mu nwiɔ bɛluale nwolɛ bɛhɔle.
9 #
Gye 2.21
Mɔɔ bɛhɔdwule ɛleka ne mɔɔ Nyamenle hanle nwolɛ edwɛkɛ hilele Ebileham la, Ebileham zile azukponle wɔ ɛkɛ ne, ɔvale ɛyɛne ne ɔguale zolɛ, na ɔkyekyele ɔ ra Ayezeke ɔdole azukponle ne azo, wɔ ɛyɛne ne azo. 10Akee Ebileham dole ɔ sa vale dadeɛ ne kɛ ɔku ɔ ra ne. 11Na Ɛdɛnkɛma soanvolɛ vɛlɛle ye vile anwuma, ɔse, “Ebileham, Ebileham!”
Ebileham liele zolɛ, “Mewɔ ɛke!”
12Ɛdɛnkɛma soanvolɛ ne zele ye kɛ, “Mmafa ɛ sa ɛka kakula ne anzɛɛ mmayɛ ye debie. Ɔluakɛ kɛkala, menwu kɛ ɛsulo Nyamenle, ɔboalekɛ wɔanva ɛ ra kokye ne wɔanyɛ me abokɛ.”
13Na Ebileham manle ɔ nye zo na ɔnwunle kɛ, ɔ nzi ɛkɛ ne ala, boane nyinli kpole ko mɔɔ ye mɛne ne mɔ ɛmaa yetosa aziakɛ bie anu la gyi ɛkɛ. Ebileham hɔyele boane nyinli ne, ɔgyakyile ɔ ra ne na ɔvale boane ne ɔyelale ye, ɔbɔle azu ne. 14Yemɔti Ebileham vɛlɛle ɛleka ne, “Ɛdɛnkɛma bahile.”#22.14 Ɛdɛnkɛma bahile: anzɛɛ Ɛdɛnkɛma banwu ye, anzɛɛ Ɛdɛnkɛma ɛhile anzɛɛ ɛnwu ye. Na kɛkala bɔbɔ menli ka kɛ, “Wɔ Ɛdɛnkɛma Boka ne azo, ɔdaye ɔbahile.”
15Ɛdɛnkɛma soanvolɛ ne eza vɛlɛle Ebileham vi anwuma bieko, 16na ɔzele ye kɛ, “Ɛdɛnkɛma se, ‘Meka medame mumua ne me nwo kɛ, ɛhye mɔɔ wɔyɛ, na wɔanva ɛ ra nrenya kokye ne wɔanyɛ me abokɛ la, 17#Hib 6.13-14 mebayila wɔ na meamaa ɛ bo zo amra ayɛ dɔɔnwo kɛ anwomanyunlu nwɔlɔra nee ɛnweazo anwea. Ɛ bo zo amra bali bɛ agbɔvolɛ nwo zo konim na bɛazie bɛ, 18#Gyi 3.25 na ɛ bo zo amra anwo zo yɛɛ maanle maanle mɔɔ wɔ ewiade la balua anyia nyilalɛ a, ɔboalekɛ wɔdie me ne.’ ” 19Yemɔti Ebileham ziale rale ye mgbavolɛ ne mɔ anwo ɛkɛ ne, na bɛ muala bɛziale bɛhɔle Biyɛhyiba. Na Ebileham dɛnlanle Biyɛhyiba.
Neehɔ abo zo amra
20Ɛhye mɔ anzi bɛhanle bɛhilele Ebileham kɛ, “Melekaa ɛwo mralɛ ɛmaa ɛ diema nrenya Neehɔ. Bɛ aluma ɛne: 21Ɛɛze a le kpanyinli a, ɔ diema nrenya a le Bɛɛze, Alam ɔ ze Kɛmuwɛle, 22Kɛsɛde, Heezo, Peledahye, Gyedelafe, yɛɛ Bɛtuwɛle.” 23Bɛtuwɛle a wole Relɛbɛka a. Ngakula mɔtwɛ ɛhye yɛɛ Melekaa wole bɛ manle Ebileham adiema nrenya Neehɔ a. 24Ye mgbɔnla Wulumaa ɔdaye noko ɔwole Tiba, Geeham, Teehahye, yɛɛ Meeyaka.
Currently Selected:
Mɔl 22: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
