Luka 6

Sona Awa ne te afofikyẽa ne Mene

(Mateo 12.1-8; Marko 2.23-28)

1 # Deut 23.25 Na ɔwale kyɛ, afofikyẽa#6.1: Tete Ahyerɛlɛ ne bie kã kyɛ: Afofikyẽa bieku. bie, ɔɔfale aburoo boo bie anu, na ye asuafoɛ nemɔ bɛpombale aburoo ne bie, na bɛposale ye wɔ bɛ sa nu belili. 2Na Farasiifoɛ nemɔ anu biemɔ bisale bɛ kyɛ, “Nzu ati yeɛ ɛ́mɔyɔ bɔ otia mmeraa kyɛ bɛyɔ ye afofikyẽa ɔ?”

3 # 1 Sam 21.1-6 Na Yesu buale bɛ kyɛ, “Aso ɛmɔkkenngale bɔ Dawide yɔle, mmerɛ bɔ ɛhɔen huni ye ne bɛ bɔ bɛboka ye so ne? 4#Lew 24.9 Kyɛbɔ ɔhɔle Nyameɛ awuro, ɔfale paanoo krongron ne lili, ná osa mane bɛ bɔ bɛboka ye so ne koso bie, bɔ otia mmeraa kyɛ ebiala koli, sana asɔfo ngome yeɛ bedi ɔ ne?” 5Na osele bɛ kyɛ, “Sona Awa ne te afofikyẽa so Mene.”

Yesu sa anwonyerɛ afofikyẽa

(Mateo 12.9-14; Marko 3.1-6)

6Afofikyẽa bieku, Yesu hɔle nyianu sua nu ɔɔyɛle ngyerɛkyerɛ. Né biaa bie wɔ berɛ bɔ ye sa famaa awu ɔ. 7Né ahyerɛlɛfoɛ ne Farasiifoɛ nemɔ bɛtetɛ Yesu, sɛ ebiaa ɔkɔsa anwonyerɛ afofikyẽa a, ná banya dwirɛ bafa babɔ ye kwaadu. 8Nakoso né Yesu de ɔse b’adwene, na osele biaa bɔ ye sa ko awu ne kyɛ, “Dwɔso baagyina anyunu wa.” Na odwɔso gyinane berɛ. 9Yeɛ Yesu sele bɛ kyɛ, “Mébisa ɛmɔ, aso mmeraa ma ate kyɛ yɛyɔ paa anaakyɛ bɔne afofikyẽa, kyɛ yɛkole ebie ngoa anaakyɛ yɛkohu ye ɔ?” 10Ɔneane bɛ mukoraa bra yiale, na osele biaa ne kyɛ, “Tengyɛ wɔ sa ne anu!” Ɔtengyɛle nu, na ye sa ne yɛle paa kyɛ ye daa ne ala. 11Nakoso bɛ de, b’ahone huli, na bɛhɔle agyina bɛpenane nikye horɛ bɔ bɛkɔfa bɛkɔyɛ Yesu ɔ.

Yesu ye asuafoɛ buru ne nyɔ ne

(Mateo 10.1-4; Marko 3.13-19)

12Sɔ mmerɛ ne anu, Yesu hɔle bokaa bie aso ɔɔbɔle mbaeɛ, na kɔngɔen ne amukoraa ɔbɔle mbaeɛ hyirele Nyameɛ. 13Aleɛ hyene ne, ɔfrɛle ye asuafoɛ nemɔ maa bɛwale, na ɔyele bɛ nu buru ne nyɔ, bɔ ɔfrɛle bɛ asomafoɛ ɔ: 14Simɔn bɔ ɔtole ye dumaa Petro ɔne oliɛma Andrea, Yakobo ne Yohane, Filipo ne Batolomeo, 15Mateo ne Tɔmase, Alfeo awa Yakobo, Simɔn bɔ bɛfrɛ ye Selote ne, 16Yudase bɔ ye baba ole Yakobo ne, yeɛ Yudase Yiskariote bɔ ɔyele ye mane ne.

Yesu yɛ ngyerɛkyerɛ ná ɔsa anwonyerɛ

(Mateo 4.23-25)

17Na ɔne bɛ bedwu bɛwale ne, oogyinane aseɛ frɛtɛɛ bie aso; ɔne ye asuafoɛ pee ne ɛlɔen pirikua bɔ befi Yudea amukoraa ne Yerusalem ne Tiro ne Sidon mboanoa, bɔ bɛwale kyɛ bɛbaatie ye dwirɛ ná bɛmaa ɔsa bɛ anwonyerɛ ɔ; 18yeɛ bɛ bɔ sunzummɔne wɔ bɛ so koso ɔsale bɛ anwonyerɛ. 19Na mmenia worawora ne amukoraa bɛperele kyɛ bɛkɔfa bɛ nwo bɛkɔhã ye ɔ, ofikyɛ né tumi fi ye nu ɔsa bɛ mukoraa anwonyerɛ.

Saleɛ nwo ngyerɛkyerɛ

(Mateo 5.1-12)

20Na Yesu mane ye nye so neane ye asuafoɛ nemɔ, na osele kyɛ, “Ɛmɔ, ehiafoɛ, ɛmɔanya saleɛ, ofikyɛ ɛmɔ yeɛ Nyameɛ ahennie ne ɔte ɛmɔ deɛ ɔ!

21“Ɛmɔ bɔ ɛhɔen ku ɛmɔ kekesaala ye ɔ, ɛmɔanya saleɛ, ofikyɛ bɛkɔma ɛmɔ ko koyi.

“Ɛmɔ bɔ ɛmɔsu kekesaala ye ɔ, ɛmɔanya saleɛ, ofikyɛ ɛmɔkɔsere.

22 # 1 Pet 4.14 “Ɛmɔanya saleɛ, wɔ mmerɛ bɔ mmenia bɛpɔ ɛmɔ, bɛyɛ ɛmɔ nyeyemuɛ, bɛbɔ ɛmɔ alapaa, ná bɛpo ɛmɔ dumaa kyɛ ɔte musue nikye, ɔnate Sona Awa ne ati. 23#2 Abe 36.16; Aso 7.52 Ɛ́mɔma ɛmɔ nye gye wɔ sɔ kyẽa ne, ná ɛmɔli ahurusi, ɔnate kyɛ ɛmɔ akatuaa te piri wɔ nyameɛso; na sɔ ala yeɛ bɛ nana mɔ bɛfa belili ngɔmhyɛlɛfoɛ nemɔ ɔ.

24“Nakoso ɛmɔ bɔ ɛmɔanya ɛmɔ nwo de, ɛmɔ yaakɔ! Ofikyɛ ɛmɔanya ɛmɔ aworakyekyerɛ dada!

25“Ɛmɔ bɔ ɛmɔ ko ayi kekesaala ye ɔ, ɛmɔ yaakɔ! Ofikyɛ ɛhɔen kohũ ɛmɔ.

“Ɛmɔ bɔ ɛmɔsere kekesaala ye ɔ, ɛmɔ yaakɔ! Ofikyɛ ɛmɔkosu, ná ɛmɔabɔ awuye!

26“Sɛ mmenia mukoraa bɛkã ɛmɔ nwo dwirɛ paa a, ɛmɔ yaakɔ! Ofikyɛ sɔ ala yeɛ bɛ nana mɔ bɛhã bɛfale ngɔmhyɛlɛfoɛ ngondombofoɛ nemɔ nwo ɔ.”

Kuro wɔ pɔfoɛ dwirɛ

(Mateo 5.38-48; 7.12)

27“Na mekã mekyire ɛmɔ bɔ ɛmɔtie ne kyɛ: Ɛ́mɔhuro ɛmɔ pɔfoɛ mɔ dwirɛ, ná ɛmɔyɛ bɛ bɔ bekyi ɛmɔ ne paa. 28Ɛ́mɔyira bɛ bɔ bɛnoma ɛmɔ ɔ, ná ɛ́mɔbɔ mbaeɛ bɛ́ma bɛ bɔ bɛteetee ɛmɔ ɔ. 29Sɛ ebie pakye wɔ nye so a, kakyi bue dɔ ne koso ma ye. Sɛ ebie de w’ataadeɛ aguasoɛ a, nnɛyakyi kyɛ ɛkɔfa w’ataadeɛ bɔ owura ye bo ne ɛkɔboka ye so ɔ. 30Ebiala bɔ ɔsrɛ wɔ nikyee ne, fa ma ye; yeɛ sɛ ebie de wɔ sa nu nikyee a, nnesa de ye ko. 31#Mat 7.12 Na bɔ ɛmɔkuro kyɛ mmenia bɛfa bɛyɛ ɛmɔ ne, sɔ ala yeɛ ɛ́mɔyɛ bɛ ɔ.

32“Na sɛ bɛ bɔ bekuro ɛmɔ dwirɛ yeɛ ɛmɔkuro bɛ dwirɛ a, asennaa beni yeɛ ɛmɔnya ɔ? Ofikyɛ bɔnefoɛ mɔ po, bekuro bɛ bɔ bekuro bɛ dwirɛ ɔ dwirɛ. 33Na sɛ bɛ bɔ bɛyɛ ɛmɔ paa yeɛ ɛmɔyɛ bɛ paa a, asennaa beni yeɛ ɛmɔnya ɔ? Bɔnefoɛ mɔ po, bɛyɔ sɔ ala! 34Na sɛ ɛmɔfa bɛfɛmo bɛ bɔ ɛmɔ nye la so kyɛ bekotua ɛmɔ kerɛ a, asennaa beni yeɛ ɛmɔnya ɔ? Bɔnefoɛ mɔ po, bɛfa bɛfɛmo bɔnefoɛ, kyɛ bekole bɔ bɛfa bɛfɛmone ne ala. 35Yiti ɛ́mɔhuro ɛmɔ pɔfoɛ mɔ dwirɛ, ná ɛmɔyɛ paa, ɛ́mɔfa bɛ́fɛmo bɔ ɛmɔ nye ngoli ye si kyɛ ɛmɔkosa bekole ɔ; na ɛmɔkonya akatuaa piri, ná ɛmɔayɛ Anwuro Anwuroniɛ ne mma; ofikyɛ ye de, ɔte paa ma boniayɛfoɛ ne bɔnefoɛ. 36Yiti ɛ́mɔnwu anwumvoin, kyɛbɔ ɛmɔ Baba koso onwu anwumvoin ne.

Nnɛbua wɔ mmango ndɛen

(Mateo 7.1-5)

37“Nnɛma ɛmɔbua ndɛen, ná bammua ɛmɔ ndɛen; nnɛma ɛmɔbua foɛ, ná bammua ɛmɔ foɛ; ɛ́mɔfa (bɔne) bɛhyɛ, na bɛkɔfa bɛkɔhyɛ ɛmɔ. 38Ɛ́mɔfa bɛ́ma, na bɛkɔfa bɛkɔma ɛmɔ; asusudeɛ paa bɔ bamiamia so, bɔ bawoso ye, bɔ wayi wabo so ɔ yeɛ bekohwie bekogua ɛmɔ tena nu ɔ. Ofikyɛ asusudeɛ bɔ ɛmɔfa besusu ne, sɔ asusudeɛ ne ala yeɛ bɛkɔfa bekosusu bɛkɔma ɛmɔ ɔ.”

39Na obuli bɛ anyandera kyɛ, “Aso anyesiniwaaniɛ kɔhora kohyire anyesiniwaaniɛ atee? Aso bɛ munyɔ bɛngɔtɔ kumaa nu? 40Suaniɛ ndra ye kyerɛkyerɛniɛ, nakoso ebiala bɔ bahyire ye nikyee maa wanwu ye yé ne, ɔkɔyɛ kyɛ ye kyerɛkyerɛniɛ ala. 41Nzu ati yeɛ enwu baka sii bɔ ɔla eliɛma nye so, nakoso ennwu mbuna bɔ ɔla wɔ bɔbɔ wɔ nye so ɔ? 42Ɔkɔyɛ sɛɛ né ahora ahã ahyire eliɛma kyɛ, ‘Aliɛmaa, maa nye baka sii bɔ ɔla wɔ nye so ne mma wɔ, aberɛ bɔ wɔ bɔbɔ wɔ nye so mbuna de, ennwu ye ɔ?’ Wɔ, nyaatwomniɛ! Di moa ye mbuna bɔ ɔla wɔ bɔbɔ wɔ nye so ne, na ɔkɔmaa ekonwu nikyee yé, ná ahora aye baka sii bɔ ɔla eliɛma nye so ne.

Bakaa biala ne ye mma

(Mateo 7.16-20; 12.33-35)

43“Bakaa paa biala nne berɛ bɔ osu mmaa tɛɛ ɔ, yeɛ bakaa tɛɛ biala nne berɛ bɔ osu mmaa paa ɔ. 44#Mat 12.33 Ofikyɛ bakaa biala ye bɔbɔ ye mma yeɛ bɛfa benwu ye baka sue ɔ. Bɛndete borɔdoma mma bemvi mmowue so, yeɛ bɛndete bobe mma bemvi agurɛ so. 45#Mat 12.34 Sona paa fi nningyein paa bɔ waboaboa ye noa wɔ ye ahone nu ɔ nu yeɛ ɔda nningyein paa ali ɔ; yeɛ sona bɔnefoɛ fi bɔne nningyein bɔ waboaboa ye noa wɔ ye ahone nu ɔ nu yeɛ ɔda bɔne nningyein ali ɔ; ofikyɛ bɔ wayi ahone nu maa wabu wafa so ne yeɛ ofite ye noa ɔ.

Suasilɛfoɛ nyɔ nwo anyandera

(Mateo 7.24-27)

46“Nzu ati yeɛ ɛmɔfrɛ me ‘Awurade, Awurade’ nakoso ɛmɔnyɔ bɔ mekã mekyire ɛmɔ ɔ? 47Ebiala bɔ ɔba me berɛ, ná otie me dwirɛ, ná odi so ne, ngohyire ɛmɔ bɔ osoma ye ɔ: 48Ɔte kyɛ ebie bɔ osili sua, bɔ ɔpɛle kumaa ne maa ɔhɔle, ná ɔtole fapem ne siele nyɔbotaen so ɔ. Nzue yili, obu fale sua ne abo, nakoso wangora ye woso, ɔnate kyɛ osili sua ne yé. 49Nakoso ebiala bɔ otie, ná onni so nen, ɔte kyɛ ebie bɔ osili sua siele aseɛnwo bɔ wamva wanzie fapem so ɔ. Nzue yili obu fale ye bo, na berɛ ne ala obuli, na obuli gyirigorɔɔ!”

Currently Selected:

Luka 6: EBP

Highlight

Copy