Luka 5

Yesu frɛ asuafoɛ bɔ beli moa ne

(Mateo 4.18-22; Marko 1.16-20)

1 # Mat 13.1-2; Mak 3.9-10; 4.1 Na ɔwale kyɛ, né mmenia ahyere ye so kyɛ bɛbaatie Nyameɛ dwirɛ ne. Né ogyi Gɛnesarɛte mboanoa. 2Onwuni ɛlɛen nyɔ bie kyɛ begyigyi nzue ne noa berɛ; nakoso bɛ bɔ bɛkye naen ne, né bafi nu badwudwu benwunzi b’asawu nemɔ. 3Na Yesu fole ɛlɛen ne ko bɔ ɔte Simɔn deɛ ɔ anu, na ɔsrɛle Simɔn kyɛ ɔhwe ɛlɛen ne fi etii so berɛ ɔhɔ moa kãa. Na ɔtenane ase yɛle ngyerɛkyerɛ hyirele mmenia ne fili ɛlɛen ne anu.

4Na odwudwo yiele nen, osele Simɔn kyɛ, “Fa ɛlɛen ne kɔ buma ne anu dɔ, ná ɛmɔgua asawu ne bɛhye naen.” 5#Yoh 21.3 Na Simɔn buale kyɛ, “Yɛ mene, yayɔ adwuma dee kɔngɔen amukoraa, na yangye huu! Nakoso bɔ ahã ne ati, ngogua asawu ne.” 6#Yoh 21.6 Na bɛyɔle sɔ nen, bɛhyele naen pee bɔ né b’asawu nemɔ nu pena sunzua ɔ. 7Yiti bɛbɔle bɛ mmango bɔ bɛwɔ ɛlɛen ko ne anu nemɔ ba bɛfrɛle bɛ kyɛ bɛɛboka bɛ. Na bɛwale bɛɛyele naen ne beguale ɛlɛen nyɔ nemɔ anu maa beyili fokyefokyee, bɔ ahaa bɛpena bɛmono ɔ. 8Na Simɔn nwuni ye sɔ nen, obuli ndwerɛ Yesu nyunu berɛ hane kyɛ, “O Awurade, fi me nwo wa kɔ, ofikyɛ nde sona bɔnefoɛ.” 9Ofikyɛ ye nwo dwirili ye, ɔne ye mmango bɔ baha ne amukoraa, ɔnate naen worawora bɔ bɛhyele ye ne ati; 10na sɔ ala yeɛ Sebedeo mma Yakobo ne Yohane bɔ bɛ ne Simɔn bɛyɔ adwuma bɛbɔ nu ne koso bɛ nwo yɛle bɛ ɔ. Na Yesu sele Simɔn kyɛ, “Nnɛsuro; ofi ɛnɛ bɔ ɔkɔ ɔ, mmenia yeɛ ɛkɔhwehwe bɛ kɔbrɛ me ɔ.” 11Na bɛhwene b’ɛlɛen nemɔ bɛwale etii so ne, bɛyakyili nikyee biala berɛ beelili Yesu si.

Yesu sa kwataniɛ bie anwonyerɛ

(Mateo 8.1-4; Marko 1.40-45)

12Na ɔwale kyɛ, né Yesu wɔ nguro nemɔ ko aso, na biaa bie bɔ kwata ayɛ ye nwo amukoraa ɔ ɔwale berɛ. Onwuni Yesu nen, ɔfale ye nyunu butuli aseɛnwo berɛ srɛle ye kyɛ, “Awurade, sɛ ekuro a, ɛkɔhora kɔma me nwo kofi.” 13Na Yesu tengyɛle ye sa hane ye, na ɔhane kyɛ, “Mekuro, wɔ nwo fi!” Na berɛ ne ala, kwata ne fili ye nwo. 14Na ɔberale ye kyɛ nnɛmaa ɔbɔ so kyire ebiala; na osele kyɛ, “Kɔfa wɔ nwo kyire ɔsɔfo, ná tua wɔ nwo bɔ wafi ne nwo ayɛyɛdeɛ, kyɛbɔ Mose hyɛle ne, ná ɔyɛ adanzeɛ ma bɛ.” 15Nakoso Yesu nwo dwirɛ trɛ hɔle dede, na ɛlɔen kandinga beeyiale berɛ kyɛ bɛbaatie ye dwirɛ, ná bɛmaa ɔsa bɛ anwonyerɛ. 16Nakoso ɔhwene ye nwo hɔle ɛserɛ so ɔɔbɔle mbaeɛ.

Yesu sa bubuaniɛ bie anwonyerɛ

(Mateo 9.1-8; Marko 2.1-12)

17Na ɔwale kyɛ, ɛlɛho bie, né ɔyɛ ngyerɛkyerɛ. Né Farasiifoɛ ne mmeraa akyerɛkyerɛfoɛ bɛtete berɛ bie. Befili Galilea ne Yudea nguraa mukoraa nu ne Yerusalem yeɛ bɛwale ɔ; na né Awurade tumi wɔ ye so bɔ ɔfa sa anwonyerɛ ɔ. 18Na yieee, mmenia biemɔ fale biaa bubuaniɛ bie bɔ ɔla bɛen so ɔ bɛwale, na né bɛpena atee bɛfa ye bɛkɔ nu bɛkɔto ye nyunu berɛ. 19Nakoso mmenia worawora ne ati, bannya atee bamva ye bamma nu. Yiti bɛfole sua ne ti afia, na bedwurale ye ne ye bɛen ne bɛfale abuu ne anu bɛɛtole mmenia ne anu wɔ Yesu nyunu berɛ. 20Na onwuni bɛ gyidie nen, osele ye kyɛ, “Ngyabiaa, bafa wɔ bɔne bahyɛ wɔ.”

21Na ahyerɛlɛfoɛ ne Farasiifoɛ nemɔ bɛhyɛle ye bo bɛdwenedwenene kyɛ, “Sona beni de ɛhe, bɔ ɔkã musue dwirɛ sɔaa ye? Nwa yeɛ ɔkora fa bɔne kyɛ ɔ, sana Nyameɛ ngome!”

22Na Yesu nwuni b’adwene nen, obuale bɛ kyɛ, “Nzu ati yeɛ ɛmɔdwene adwene sɔ ye? 23Nu beni yeɛ ɔyɛ mmerɛ ɔ, kyɛ ɛkɔhã kyɛ, ‘Bafa wɔ bɔne bahyɛ wɔ,’ anaakyɛ ɛkɔhã kyɛ, ‘Dwɔso ná nate’? 24Na kyɛbɔ ɔkɔyɛ bɔ ɛmɔkonwu kyɛ Sona Awa ne ole tumi wɔ aseɛ so, kyɛ ɔfa bɔne kyɛ ti ɔ,” na osele bubuaniɛ ne kyɛ, “Mekã mekyire wɔ kyɛ, dwɔso, fa wɔ bɛen ne ná kɔ w’awuro!”

25Na berɛ ne ala, odwɔsole wɔ bɛ nyunu berɛ, na ɔfale bɔ né ɔla so ne, na ɔhɔle ye awuro bɔ né ɔye Nyameɛ ayɛ ɔ. 26Na ɔyɛle bɛ mukoraa nwanwa, na bɛyele Nyameɛ ayɛ; ɛserɛ hane bɛ, na bɛhane kyɛ, “Ɛnɛ de, yanwu edwirɛ bɔ ɔyɛ nwanwa ɔ!”

Yesu frɛ Lewi

(Mateo 9.9-13; Marko 2.13-17)

27Na ɛhe asi ne, ofitele, na onwuni ɛtoɔdidelɛniɛ bie bɔ ye dumaa li Lewi kyɛ ɔte nekaa bɔ bedide ɛtoɔ ɔ, na osele ye kyɛ, “Di me si!” 28Na ɔyakyili nikyee biala berɛ, odwɔsole, na oolili ye si.

29Afei Lewi tole poen pirikua wɔ ye awuro mane ye; na ɛtoɔdidelɛfoɛ ne mmenia biemɔ pee bɛ ne bɛ bɛɛtena berɛ. 30#Luk 15.1-2 Na Farasiifoɛ ne b’ahyerɛlɛfoɛ nemɔ bɛpenepene bɛ komvi behyirele ye asuafoɛ nemɔ kyɛ, “Nzu ati yeɛ ɛmɔ ne ɛtoɔdidelɛfoɛ ne bɔnefoɛ bedidi ná bɛno ɔ?”

31Yeɛ Yesu buale bɛ kyɛ, “Bɛ bɔ bɛte apɔ ne, benhia safoɛ, na mmom bɛ bɔ bɛnde apɔ yeɛ behia ye ɔ. 32Mamma kyɛ mebaafrɛ teneneefoɛ, na mmom mmavrɛle bɔnefoɛ kyɛ bɛsakyera b’adwene.”

Akɔngyere nwo adwobisa

(Mateo 9.14-17; Marko 2.18-22)

33Na besele Yesu kyɛ, “Yohane asuafoɛ nemɔ bɛtaa bɛyɔ akɔngyere ná bɛbɔ mbaeɛ, yeɛ Farasiifoɛ b’asuafoɛ koso bɛyɔ sɔ ala; nakoso w’asuafoɛ nemɔ de, bedidi ná bɛno.” 34Yeɛ Yesu buale bɛ kyɛ, “Aso ɛmɔkɔhora bɛkɔma atɔmvorɛ bo ama bekoli abuadaa, wɔ mmerɛ bɔ atɔmvorɛ biaa ne ɔne bɛ wɔ berɛ ɔ? 35Mmerɛ bie kɔwa, bɔ bɛkɔfa atɔmvorɛ biaa ne bekofi bɛ nwo bɛkɔhɔ ɔ; na sɔ mmerɛ ne yeɛ bekoli abuadaa ɔ.”

36Na obuli bɛ anyandera he koso kyɛ, “Ebiala mbɛ ɛtena monɛ sii mva nda ataadeɛ daa nu. Sɛ ɔyɔ sɔ a, né watete ɛtena monɛ ne, na sii bɔ wapɛ wafi ɛtena monɛ ne anu ne, ɔne daa ne ngɔsɛ. 37Yeɛ ebie mva nzaa monɛ ngua nwomaa ngotoku daa nu; ɔba ye sɔ a, nzaa monɛ ne kɔma ngotoku nemɔ kote, na nzaa ne kohwie kogua, yeɛ ngotoku nemɔ kɔsɛkye. 38Na mmom odi kyɛ bɛfa nzaa monɛ begua nwomaa ngotoku monɛ nu. 39Yeɛ sɛ ebie no nzaa daa a, ɔmbena nzaa monɛ ko, ofikyɛ ɔkã kyɛ, ‘Nzaa daa ne yeɛ ɔte paa ɔ!’ ”

Currently Selected:

Luka 5: EBP

Highlight

Copy