Luka 4

Abɔnzam so Yesu nea

(Mateo 4.1-11; Marko 1.12-13)

1Na Yesu, bɔ Sunzum Krongron ayi ye nu tɛkyɛ ne, ofili Yɔɔdan nwo dɔ wale, na Sunzum ne fale ye hɔle ɛserɛ so, 2na abɔnzam sole ye neane eleburanna. Na sɔ mmerɛ ne, wanni hwee; na oyiele nen, ɛhɔen huni ye.

3Na abɔnzam sele ye kyɛ, “Sɛ wɔ ole Nyameɛ Awa ne a, hyɛ nyɔboɛ he ma ɔkakyi paanoo.” 4#Deut 8.3 Na Yesu buale ye kyɛ, “Bahyerɛ kyɛ, ‘Nna paanoo ngome so yeɛ sona nate nya ngoa ɔ.’ ”

5Afei abɔnzam fale ye hɔle bokaa bie aso anwuro anwuro, na ohyirele ye ewiase ahennie amukoraa maa ɔpɛle ye nye so frɛ, 6na osele ye kyɛ, “Ngɔfa tumi he amukoraa ne nu animnyam ngɔma wɔ, ofikyɛ bafa bawura me sa, na mefa mema ebiala bɔ mekuro ɔ. 7Sɛ ɛkɔsɔne me a, ye de, ye mukoraa kɔyɛ wɔ deɛ.” 8#Deut 6.13 Na Yesu buale ye kyɛ, “[Dwɔso berɛ kɔ dɔ, Satan!] ofikyɛ bahyerɛ kyɛ,

Sɔne Awurade wɔ Nyameɛ,

na ye ngome twe yeɛ so ye ɔ!’ ”

9Na abɔnzam fale ye hɔle Yerusalem, na ɔfale ye oosiele asɔneyɛɛ sua ne ti afia, na osele ye kyɛ, “Sɛ wɔ ole Nyameɛ Awa ne a, to wɔ nwo fi wa tɔ aseɛnwo dɔ! 10#Edw 91.11 Ofikyɛ Bahyerɛ kyɛ,

‘Wɔ ti, ɔkɔfa ahyɛdeɛ kɔma ye abɔfo mɔ maa bɛkɔbɔ wɔ nwo waen,’

11 # Edw 91.12 na ‘bɛkɔsoa wɔ wɔ bɛ sa so,

amaa ɔnate so wɔ gya ambura nyɔboɛ.’ ”

12Na Yesu buale ye kyɛ, “Bahã kyɛ, ‘Nneso Awurade wɔ Nyameɛ nea.’ ” 13#Luk 22.28 Na abɔnzam yiele nzɔhwɛ ne amukoraa nen, ɔyakyili Yesu berɛ hɔle mmerɛ kãa.

Yesu bɔ ye adwuma bo wɔ Galilea

(Mateo 4.12-17; Marko 1.14-15)

14Yesu nate Sunzum tumi so sa wale Galilea, na ye nwo dwirɛ trɛ hɔle mbɔtam berɛ amukoraa bra yiale. 15Ɔyɛle ngyerɛkyerɛ wɔ bɛ nyianu sua nemɔ anu, na bɛ mukoraa bɛhyɛle ye animnyam.

Bɛpo Yesu wɔ Nasarɛte

(Mateo 13.53-58; Marko 6.1-6)

16Yesu hɔle Nasarɛte, nekaa bɔ bɛtetele ye ne; na afofikyẽa ne, kyɛbɔ ɔyɔ ye daa ne, ɔhɔle nyianu sua nu. Na odwɔso gyinane berɛ kyɛ ɔbaakenga. 17Bɛfale ngɔmhyɛlɛniɛ Yesaya nwomaa ne bɛmane ye; na obukyele nwomaa ne anu nwuni nekaa bɔ bahyerɛ ye kyɛ,

18 # Yes 61.1-2 “Awurade Sunzum wɔ me so,

ɔnate kyɛ wapopa me ngoo kyɛ

nga nzɛmba ne ngyire ehiafoɛ.

Wasoma me kyɛ mmɔ fawɔnwodi nwo dawure ngyire bɛ bɔ bahye bɛ nnure ɔ,

ɔne nikyee nwunɛ nwo dawure ngyire anyesiniwaafoɛ,

kyɛ mma bɛ bɔ bɛwɔ nhyɛsoɛ nu ɔ bɛfa bɛ nwo beli,

19kyɛ mmɔ Awurade anwumvoinnwunɛ afoɛ ne nwo dawure.”

20Yesu bobɔle nwomaa ne, ɔfa mane somvoɛ ne, na ɔtenane ase; na bɛ bɔ bɛwɔ nyianu sua nu berɛ amukoraa betuli bɛ nye beguale ye so. 21Na ɔhyɛle ye bo sele bɛ kyɛ, “Ɛnɛ kyẽa ye, Ahyerɛlɛ he awa nu maa ɛmɔate.”

22Na bɛ mukoraa bɛhane edwirɛ paa bɛfale Yesu nwo, na ye noa dwirɛ bɔ ɔte adom dwirɛ ne ɔyɛle bɛ nwanwa; nakoso bebisale kyɛ, “Aso nna Yosef awa ne ɛhe anaa?”

23Na Yesu sele bɛ kyɛ, “Ɔnyɛ nwanwa kyɛ ɛmɔkobu anyandera he bekohyire me kyɛ, ‘Safoɛ, sa wɔ nwo anwonyerɛ e! Bɔ yate kyɛ ɛyɔle ye wɔ Kapanɔm nen, yɔ bie wɔ wɔ bɔbɔ wɔ kuro wa e!’ ” 24Na ɔhane kyɛ, “Amba, mekã mekyire ɛmɔ kyɛ, benne ngɔmhyɛlɛniɛ biala bɛndo nu wɔ ye bɔbɔ ye kuro. 25Nahorɛ nu, mekã mekyire ɛmɔ kyɛ, Elia aberɛ so bɔ anwuro nu tole afoɛ nza ne bue, bɔ ɛhɔen piri bie wale aseɛ ne aso amukoraa nen, né akunafoɛ mmrasua pee wɔ Yisrael, 26#1 Ahe 17.8-16 nakoso banzoma Elia maa wangɔ bɛ nu biala berɛ, sana braa kunaniɛ bie bɔ ɔwɔ Sidon kuro Sarefate ɔ ngome berɛ. 27#2 Ahe 5.1-14 Asa koso, né kwatafoɛ pee bɛwɔ Yisrael wɔ ngɔmhyɛlɛniɛ Elisa aberɛ so; nakoso wamma ebiala nwo amvi, sana Sirianiɛ Naaman ngome.”

28Na mmenia mukoraa bɔ né bɛwɔ nyianu sua ne anu berɛ ne, bɛtele sɔ dwirɛ nen, bɛfɛle yaa hahii. 29Bedwɔsole besumusumuni Yesu befili kuro berɛ, na bɛfale ye bɛhɔle bokaa bɔ bɛkyekyele kuro ne wɔ so ne aso, kyɛ bɛkwaasumu ye ma ye kɔme kɔwɔ berɛ. 30Nakoso ɔfale b’afia hɔle.

Yesu tu sunzummɔne fi biaa bie nu

(Marko 1.21-28)

31Yesu hɔle Galilea kuro bie bɔ oli Kapanɔm so, na afofingyẽa nemɔ, ɔyɛle ngyerɛkyerɛ hyirele bɛ. 32#Mat 7.28-29 Ye ngyerɛkyerɛ ne yɛle bɛ nwanwa, ofikyɛ né tumi wɔ ye dwirɛ ne anu. 33Né biaa bie wɔ nyianu sua nu berɛ bɔ ole sunzummɔne bɔ ɔte sunzum fiɛ ɔ; na ɔteane nu serɛserɛ kyɛ, 34“Yesu bɔ efi Nasarɛte, nnɛba teetee yɛ! Nzikyɛ yeɛ yɛ ne wɔ le yɔ ɔ? Awa kyɛ ɛbaasɛkye yɛ hɔ ɔ? Mese wɔ sona sue, wɔ ole Nyameɛ ye Krongronniɛ ne!” 35Nakoso teateane ye kyɛ, “Mua wɔ noa, ná fi ye nu fite!” Na sunzummɔne ne tele ye fini bɛ nu berɛ, na otu fili ye nu, bɔ wanyɔ ye hwee ɔ. 36Na ɔyɛle bɛ mukoraa nwanwa, na besisele bɛ nwo kyɛ, “Edwirɛ beni yeɛ ɔte sɔaa ye? Ofikyɛ tumi nu ne anwoserɛ nu yeɛ ɔhyɛ sunzummɔne mɔ maa betutu befi nu ɔ!” 37Na ye nwo dwirɛ trɛ hɔle mbɔtam berɛ amukoraa bra yiale.

Yesu sa Simɔn sia anwonyerɛ

(Mateo 8.14-17)

38Yesu dwɔsole fili nyianu sua ne anu, na ɔhɔle Simɔn awuro. Né Simɔn sia brasua afokyɛ paa, na bɛsrɛle ye kyɛ ɔboka ye. 39Oogyinane ye nwo berɛ, na ɔteateane ɛfokyɛlɛ ne, na otu fili ye nwo; na berɛ ne ala, odwɔsole sole bɛ.

40Na eyia kwaatɔ ne, bɛ bɔ bele ayarefoɛ bɔ anwonyerɛ ahoroɔ abɔ bɛ amukoraa, bɛfale bɛ brɛle ye; na ɔfale ye sa guale ebiala so sale bɛ anwonyerɛ. 41Na sunzummɔne mɔ koso betutu befili mmeni pee nu, na bɛteateane nu kyɛ, “Wɔ ole Nyameɛ Awa ne!” Nakoso Yesu teateane bɛ, na wamma bɛ ate ma bandwudwo, ɔnate kyɛ né bɛse kyɛ ye ole Kristo ne.

Yesu kã nzɛmba wɔ Yudea

(Marko 1.35-39)

42Na aleɛ hyene ne, ofili berɛ hɔle ɛserɛ so nekaa bie. Na ɛlɔen ne penane ye si atee, na beedwuli ye nwo berɛ nen, né bɛmbena kyɛ bɛyakyi ye maa ɔkɔ. 43Nakoso osele bɛ kyɛ, “Ɔsɛ kyɛ mekã Nyameɛ ahennie ne nwo nzɛmba ne mekyire nguro foforɛ koso; ɔnate kyɛ ɛhe ati yeɛ bɛsomane me ɔ.” 44Na ɔhane nzɛmba ne wɔ nyianu sua mɔ nu wɔ Yudea.#4.44: YUDEA: Tete Ahyerɛlɛ ne bie kã kyɛ: Galilea.

Currently Selected:

Luka 4: EBP

Highlight

Copy