Luka 3

Asubɔlɛniɛ Yohane nzɛmbahanɛ

(Mateo 3.1-12; Marko 1.1-8; Yohane 1.19-28)

1Na Kaesare Tiberio ahennie afoɛ bɔ ɔtɔ so buru ne nnu ne, bɔ né Pontio Pilato te amrado wɔ Yudea nen, bɔ né Herode yeɛ ɔnea Galilea manzini ne aso ne, né oliɛma Filipo yeɛ ɔnea Yiturea ne Trakoniti manzini nemɔ aso ɔ, yeɛ né Lisania koso ɔne Abilene manzini so ɔ. 2Na mmerɛ bɔ né Anase ne Kaifa yeɛ bɛte asɔfo mbanyi paa ne, Nyameɛ lale ye dwirɛ ali hyirele Sakaria awa Yohane wɔ ɛserɛ so. 3Yiti ohyinini asue Yɔɔdan nwo aseɛ ne aso amukoraa hane adwenesakyera asubɔlɛ nwo nzɛmba bɔ ɔmaa benya bɔnefakyɛ ɔ; 4#Yes 40.3-5 kyɛbɔ bahyerɛ ye wɔ ngɔmhyɛlɛniɛ Yesaya dwirɛ nwomaa ne anu kyɛ,

“Ebie tea nu wɔ ɛserɛ so kyɛ,

Ɛ́mɔsiesie Awurade atee!

Ɛ́mɔma ye atimbire tengyɛ!

5Bekotuatua mmɔnga mmɔnga amukoraa,

bekodwiri mmokaa ne pambaa amukoraa maa bɛkɔhã ase;

na atee bɔ wahyea ne, bɛkɔtengyɛ ye,

na bɛkɔma atee mborɛ mborɛ nemɔ kɔla so yɔɔ.

6Na anwoɔnaen amukoraa konwu Nyameɛ ngoalelɛ ne.”

7 # Mat 12.34; 23.33 Yeɛ osele mmenia wora bɔ bɛwale kyɛ ɔbɔ bɛ asu ne kyɛ, “Ɛbɔnaa mmaa! Nwa yeɛ ɔbɔle ɛmɔ kɔkɔ kyɛ ɛmɔnwati befi ɛyaafɛlɛ bɔ ɔ́ba ne ɔ? 8#Yoh 8.33 Ɛ́mɔbɔ bra bɔ ɔfata adwenesakyera ɔ, na nnɛma ɛmɔhyɛ ye bo bɛkekã bekyirekyire ɛmɔ nwo kyɛ, ‘Abraham te yɛ nana’; na mekã mekyire ɛmɔ kyɛ, Nyameɛ kɔhora kotingye nnomaa kofi nyɔboɛ hemɔ anu kɔma Abraham. 9#Mat 7.19 Na kekesaala ye po, bafa akumaa ne babɔ bakaa ne ndii nu, na bakaa biala bɔ onzu mmaa paa nen, bɛkɔpɛ bekogyi bɛkɔto see nu.”

10Na ɛlɔen ne bisale ye kyɛ, “Yiti nzikyɛ yeɛ odi kyɛ yɛyɔ ɔ?” 11Na obuale bɛ kyɛ, “Sona bɔ ole ataadeɛ aguasoɛ nyɔ ne, maa ɔhyɛ nu ma bɔ olle bie ɔ bie; yeɛ bɔ ole aleɛ ne koso, maa ɔyɔ sɔ ala.”

12 # Luk 7.29 Na ɛtoɔdidelɛfoɛ koso bɛwale kyɛ ɔbɔ bɛ asu, na bebisale ye kyɛ, “Kyerɛkyerɛniɛ, nzu yeɛ odi kyɛ yɛyɔ ɔ?” 13Na osele bɛ kyɛ, “Nnɛma ɛmɔdide ɛtoɔ maa ɔbo bɔ bapɛ bama ɛmɔ ne aso.” 14Yeɛ asraafoɛ koso bisale ye kyɛ, “Yɛ koso, nzu yeɛ odi kyɛ yɛyɔ ɔ?” Na obuale bɛ kyɛ, “Nnɛma ɛmɔhyɛ ebiala so, nnɛma ɛmɔto ebiala soen, yeɛ ɛ́mɔma ɛmɔ akatuaa ɔsɔ ɛmɔ nye.”

15Na maen ne, né bɛ nye la ate, yiti bebisabisale bɛ nwo wɔ bɛ ti anu, sɛ ebiaa Yohane ole Kristo ne anaa, anaakyɛ nna ye ɔ. 16Na Yohane buale bɛ mukoraa kyɛ, “Me de, mefa nzue yeɛ mebɔ ɛmɔ asu ɔ; nakoso ebie ɔ́ba bɔ odi mu tra me ɔ, bɔ ye mbaboa nyamaa po memvata kyɛ mesangye ɔ. Na ye de, ɔkɔfa Sunzum Krongron ne see yeɛ ɔkɔbɔ ɛmɔ asu ɔ. 17Ye huhuamoa tira ye sa nu, kyɛ ɔfa prapra ye nekaa bɔ bɛboro aburoo ne ma berɛ yɛ sannwuu, ná ɔboaboa atokoɔ ne noa ogua ye pata so; nakoso afafu ne de, ɔkɔfa see bɔ onnua le ɔ yeɛ ɔkɔyera ye ɔ.”

18Na ɔfale edwirɛ pee bokale so otuli maen ne foɛ, na ɔhane nzɛmba ne hyirele bɛ. 19#Mat 14.3-4; Mak 6.17-18 Né Yohane ahwi manzini hene Herode nyunu, ofikyɛ né Herode agya Herodiase bɔ ɔte oliɛma aye ɔ, afei koso né Herode ali edwirɛ tɛɛ pee; 20yiti sɔ dwirɛ he, ɔfa bokale ye mukoraa so, na ɔfale Yohane tole kuku nu.

Yohane bɔ Yesu asu

(Mateo 3.13-17; Marko 1.9-11)

21Na ɔwale kyɛ, ɔbɔle mmenia ne amukoraa asu nen, ɔbɔle Yesu koso asu, na ɔ́bɔ mbaeɛ nen, anwuro bukyele, 22#Gye 22.2; Edw 2.7; Yes 42.1; Mat 3.17; Mak 1.11; Luk 9.35 na Sunzum Krongron dwu wale ye so wɔ anwoɔnaen tebea nu, kyɛ abubure, na edwudwolɛ bie fili nyameɛso hane kyɛ, “Wɔ ole Mma bɔ mekuro wɔ dwirɛ bɔ ɛsɔ me nye paa ɔ.”

Yesu abusua aworɛ ndoatoasoɛ

(Mateo 1.1-17)

23Yesu hyɛle ye adwuma ne abo nen, né wali afoɛ kɔyɛ aburasa. Ye baba (kyɛbɔ né mmenia bede bedi ne) ye ole Yosef bɔ ɔse ole 24Heli, bɔ ɔse ole Matate, bɔ ɔse ole Lewi, bɔ ye koso ɔse ole Mɛlki, bɔ ɔse ole Yana, bɔ ɔse ole Yosef, 25bɔ ɔse ole Matatia, bɔ ɔse ole Amose, bɔ ɔse ole Nahum, bɔ ɔse ole Esili, bɔ ɔse ole Nagae, 26bɔ ɔse ole Maate, bɔ ɔse ole Matatia, bɔ ɔse ole Semin, bɔ ɔse ole Yoseke, bɔ ye koso ɔse ole Yoda, 27bɔ ɔse ole Yoanan, bɔ ɔse ole Resa, bɔ ɔse ole Serubabɛl, bɔ ye koso ɔse ole Sɛtiɛl, bɔ ɔse ole Neri, 28bɔ ɔse ole Mɛlki, bɔ ɔse ole Adi, bɔ ɔse ole Kosam, bɔ ɔse ole Ɛlmadam, bɔ ɔse ole Ɛre, 29bɔ ɔse ole Yosua, bɔ ɔse ole Eliesa bɔ ɔse ole Yorim, bɔ ɔse ole Matate, bɔ ɔse ole Lewi, 30bɔ ɔse ole Simeon, bɔ ɔse ole Yuda, bɔ ɔse ole Yosef, bɔ ɔse ole Yonam, bɔ ɔse ole Eliakim, 31bɔ ɔse ole Melea, bɔ ɔse ole Mena, bɔ ɔse ole Matata, bɔ ɔse ole Natan, bɔ ɔse ole Dawide, 32bɔ ɔse ole Yese, bɔ ɔse ole Obɛde, bɔ ɔse ole Boase, bɔ ɔse ole Salmon, bɔ ɔse ole Nason, 33bɔ ɔse ole Aminadabo, bɔ ɔse ole Adimin, bɔ ɔse ole Ani, bɔ ɔse ole Hesron, bɔ ɔse ole Pɛrɛse, bɔ ɔse ole Yuda, 34bɔ ɔse ole Yakob, bɔ ɔse ole Yisake, bɔ ɔse ole Abraham, bɔ ɔse ole Tera, bɔ ɔse ole Nahɔ, 35bɔ ɔse ole Seruge, bɔ ɔse ole Reo, bɔ ɔse ole Pɛlɛge, bɔ ɔse ole Heberi, bɔ ɔse ole Sela, 36bɔ ɔse ole Kenan, bɔ ɔse ole Afasade, bɔ ɔse ole Sem bɔ ɔse ole Nowa, bɔ ɔse ole Lamɛke, 37bɔ ɔse ole Metusela, bɔ ɔse ole Henɔke, bɔ ɔse ole Yarede, bɔ ɔse ole Mahalaleel; bɔ ɔse ole Kenan, 38bɔ ɔse ole Enose, bɔ ɔse ole Sɛte, bɔ ɔse ole Adam, bɔ ɔse ole Nyameɛ ne.

Currently Selected:

Luka 3: EBP

Highlight

Copy