Luka 18

Nnɛma w’abasa nu bu wɔ mbaeɛbɔlɛ nwo

1Afei Yesu buli bɛ anyandera he fa hyirele kyɛ, ɔsɛ kyɛ sona bɔ mbaeɛ daa biala, bɔ onni kyɛ ɔma ye abasa nu bu ɔ. 2Osele kyɛ, “Ndɛenbualɛniɛ bie tenane kuro bie aso, bɔ né onzuro Nyameɛ ná ɔmvɛre sona ɔ. 3Né braa kunaniɛ bie koso wɔ sɔ kuro ne aso, bɔ né ɔtaa ba ye berɛ bafa ye dwirɛ to ye nyunu kyɛ, ‘Di me dwirɛ ma me, ná pepɛ de me fi me pɔfoɛ sa nu.’ 4Na wandɛ ye so alaa maa ɔhyɛle kãa, nakoso nziɛ ye, ɔhane ye ye ti anu kyɛ, ‘Ɔwɔ nu kyɛ menzuro Nyameɛ ná memvɛre sona de, 5nakoso ɔnate ɛhalɛ bɔ braa kunaniɛ he ɔha me ne ati, ngɔnea ngoli ye dwirɛ ne ngɔma ye, ná wandɔ wangɔ so wammandwane me nwo.’ ”

6 # Luk 7.13 Na Awurade toale so hane kyɛ, “Ndɛenbualɛniɛ bɔ ɔndengyɛ ne, ɛ́mɔtie edwirɛ bɔ ɔkã! 7#Nye 6.10; Mat 24.22; Rom 8.33; Kol 3.12; 2 Tim 2.10 Na bɛ bɔ Nyameɛ aneanea nu waye bɛ, bɔ besu bɛfrɛ ye eyia ne kɔngɔen ne, sɛ ɔto ye bo ase ɔkyɛ kãa wɔ bɛ nwo a, aso ongoli bɛ dwirɛ ngɔma bɛ anaa? 8Na mekã mekyire ɛmɔ kyɛ, okoli bɛ dwirɛ kɔma bɛ ndɛndɛ. Nakoso, Sona Awa ne ba a, aso okonwu gyidie wɔ aseɛ ye aso?”

Farasiiniɛ ne ɛtoɔdidelɛniɛ ne

9Na ebiemɔ bɔ bɛfa bɛ nwo bɛto bɛ bɔbɔ bɛ nwo so kyɛ bɛtengyɛ, ná bebu bɛ mmango animtia ne, obuli bɛ anyandera he: 10“Mmenia nyɔ hɔle asɔneyɛɛ sua nu bɛɛbɔle mbaeɛ; ko te Farasiiniɛ, yeɛ ko wora ɔte ɛtoɔdidelɛniɛ. 11Na Farasiiniɛ ne gyinane berɛ bɔle mbaeɛ ye ti anu kyɛ, ‘O Nyameɛ, meda wɔ ase kyɛ me de, nnde kyɛ mmenia ngaa ne ɔ: apoobɔlɛfoɛ, ngondombofoɛ, agyaasɛkyelɛfoɛ, anaakyɛ ɛtoɔdidelɛniɛ he po. 12Dapɛn biala meyɛ akɔngyere pɛen nyɔ, na bɔ menya biala, meye so buru nu ngyɛmuɛ ko mema.’

13“Nakoso ɛtoɔdidelɛniɛ ne de, oogyinane nziɛ nziɛ, na wanguro kyɛ ɔkɔma ye nye so kɔnea nyameɛso po ɔ, na mmom ɔfale ye sa guale ye ahone so hane kyɛ, ‘O Nyameɛ, nde bɔnefoɛ, na nwu me anwumvoin!’ 14#Mat 23.12; Luk 14.11 Na Mekã mekyire ɛmɔ kyɛ, sɔ sona he mmom yeɛ Nyameɛ buale be maa ɔhɔle ye awuro ɔ, na nna ko ne ɔ; ofikyɛ ebiala bɔ ɔma ye nwo so ne, bɛkɔbrɛ ye ase, nakoso bɔ ɔbrɛ ye nwo ase ne de, bɛkɔma ye so.”

Yesu yirayira ngwadaammaa

(Mateo 19.13-15; Marko 10.13-16)

15Bɛfale ngwadaammaa koso bɛbrɛle Yesu kyɛ ɔfa ye sa hã bɛ. Na ye asuafoɛ nemɔ nwuni ye sɔ nen, bedwudwole bɛ. 16Nakoso Yesu frɛle ngwadaa nemɔ maa bɛwale ye nwo berɛ, na osele asuafoɛ nemɔ kyɛ, “Ɛ́mɔma ngwadaa nemɔ ate ma bɛbra me berɛ, na nnɛma ɛmɔsi bɛ ate; ofikyɛ ɛhemɔ sɔa ye yeɛ Nyameɛ ahennie ne ɔte bɛ deɛ ɔ. 17Nahorɛ nu, mekã mekyire ɛmɔ kyɛ, ebiala bɔ wanne Nyameɛ ahennie ne wando nu kyɛ akwadaa ne, ɔngɔhɔ nu le.”

Esikaniɛ bie ne daa ngoa

(Mateo 19.16-30; Marko 10.17-31)

18Yeɛ panyi bie bisale Yesu kyɛ, “Kyerɛkyerɛniɛ paa, nzu yeɛ nyɔ ná manya daa ngoa ɔ?” 19Na Yesu buale ye kyɛ, “Nzu ati yeɛ ɛfrɛ me sona paa ɔ? Ebiala nne berɛ bɔ ɔte paa ɔ, sana Nyameɛ ngome twe. 20#Ɛks 20.12-16; Deut 5.16-20 Ɛse mmeraa dwirɛ ne: ‘Nnɛsɛkye agyaa, Nnɛdi awue, Nnɛwua, Nnɛdi adanzewia, Di ɛse ne eni ni!’ ” 21Na biaa ne buale kyɛ, “Mvi me ngwadaa nu yeɛ mali ɛhemɔ amukoraa so ɔ.”

22Na Yesu tele sɔ dwirɛ nen, osele ye kyɛ, “Waha wɔ nikyee ko: Tɔne bɔ ele ye amukoraa, ná kyɛ sikaa ne ma ehiafoɛ, na ekonya agyapadeɛ wɔ nyameɛso; na afei bra baali me si.” 23Na ɔtele edwirɛ he nen, ye wora bɔle; ofikyɛ né ye sa nu le bie paa.

24Yesu nwuni kyɛ ye wora abɔ paa, na ɔhane kyɛ, “Ɔyɛ se ma bɛ bɔ banya bɛ nwo kyɛ bɛkɔhɔ Nyameɛ ahennie ne anu ɔ! 25Ofikyɛ ɔyɛ mmerɛ ma afupɔngɔ kyɛ okowura drɔwaa bɔen nu tra kyɛ esikaniɛ kɔhɔ Nyameɛ ahennie ne anu ɔ.”

26Na bɛ bɔ bɛtele sɔ dwirɛ nen, bɛhane kyɛ, “Nzaade, nwa yeɛ bɛkɔhora bekole ye ngoa ɔ?” 27Na Yesu buale kyɛ, “Bɔ sona bue nu ɔngɔhora ngɔyɛ berɛ ne, Nyameɛ bue nu de, ɔkɔhora kɔyɛ berɛ.” 28Yeɛ Petro sele kyɛ, “Eh! Yayakyi bɔ yɛle ye amukoraa yaali wɔ si oo.” 29Na Yesu sele bɛ kyɛ, “Nahorɛ nu, mekã mekyire ɛmɔ kyɛ, sona biala nne berɛ bɔ Nyameɛ ahennie ne ati wayakyi awuro, anaa ɔye, anaa aliɛmaa, anaa awofoɛ, anaa mmaa berɛ, 30bɔ ongonya ye mmɔhoɛ pee sɔ mmerɛ ye anu, ɔne daa ngoa wɔ wiase bɔ ɔbaawa ne anu ɔ.”

Yesu hyɛ ngɔm bɔ ɔtɔ so nza fa ye wue ne ye tingyelɛ nwo

(Mateo 20.17-19; Marko 10.32-34)

31Yesu fale asuafoɛ buru ne nyɔ nemɔ hɔle ahameɛ, na osele bɛ kyɛ, “Ɛ́mɔtie, yɛ́fo yɛ́kɔ Yerusalem, na nikyee biala bɔ ngɔmhyɛlɛfoɛ nemɔ bahyerɛ bafa Sona Awa ne anwo ne, ɔkɔwa nu. 32Ofikyɛ bɛkɔye ye bekowura Amaenmaensofoɛ sa, na bɛkɔgoro ye nwo, bɛkɔbɔ ye alapaa, ná bafefe nwɔserɛ bagua ye nwo. 33Bekofi ye mbire, ná bahu ye, na ye ɛlɛsa ne aso okotingye.” 34Nakoso bɛ de, bande edwirɛ hemɔ nu biala bo; né ɔbo b’adwene so, na bɔ ɔhane ne po, né bɛnze nikye horɛ.

Yesu te anyesiniwaaniɛ bie nye

(Mateo 20.29-34; Marko 10.46-52)

35Yesu pingyele Yeriko nen, né anyesiniwaaniɛ bie ɔte atee ne noa berɛ ɔsrɛsrɛ nikye. 36Ɔtele ɛlɔen bɔ bɛpɛ nu berɛ ne nga nen, obisale kyɛ, “Nzikyɛ dwirɛ ɔ?” 37Na bebuale ye kyɛ, “Yesu bɔ ofi Nasarɛte ne yeɛ ɔpɛ nu kɔ ɔ.” 38Na ɔteane nu kyɛ, “Dawide Awa Yesu, nwu me anwumvoin oo!” 39Na mmenia bɔ né beli moa ne, behwili ye nyunu kyɛ omua ye noa. Nakoso bekye po yeɛ ɔhɔle so teateane nu serɛserɛ paa kyɛ, “Dawide Awa ee, nwu me anwumvoin oo!”

40Yiti Yesu gyinane, na ɔhyɛle bɛ kyɛ bɛfa ye bɛbrɛ ye. Na opingyele Yesu nwo berɛ nen, Yesu bisale ye kyɛ, 41“Nzikyɛ yeɛ ɛpena kyɛ meyɔ mema wɔ ɔ?” Na obuale kyɛ, “Awurade, mepena kyɛ menwu nikye.” 42Na Yesu sele ye kyɛ, “Nwu nikye! Wɔ gyidie ale wɔ.” 43Na berɛ ne ala, onwuni nikye, na olili Yesu si hyɛle Nyameɛ animnyam. Na ɛlɔen ne amukoraa benwuni bɔ wasi nen, bɛ bɛyele Nyameɛ ayɛ.

Currently Selected:

Luka 18: EBP

Highlight

Copy