Luka 17

Sundiduatolɛ

(Mateo 18.6, 7, 21, 22; Marko 9.42)

1Na Yesu sele ye asuafoɛ nemɔ kyɛ, “Ɔyɛ sɛɛ ala a, sundiduatolɛ kɔwa, nakoso sona bɔ ɔnate ye so ɔkɔwa ne de, ye yaakɔ! 2Ahaa ɔte paa ma ye kyɛ bɛkɔfa nyɔboɛ bɔ bɛfa beti aburoo bekosinze ye kɔme, ná bagyi ye bato ɛpo nu, tra kyɛ ɔkɔto ngwadaammaa hemɔ anu ko sundidua ɔ. 3#Mat 18.15 Yiti ɛ́mɔnea ɛmɔ nwo yé! Sɛ eliɛma yɛ wɔ tɛɛ a, kã ye nyunu, na sɛ ɔsakyera ye adwene a, fa kyɛ ye. 4Na sɛ ɔyɛ wɔ tɛɛ pɛen nzoo ɛlɛho, ná osa ba wɔ berɛ pɛen nzoo bakã kyɛ, ‘Masakyera m’adwene’ a, odi kyɛ ɛfa kyɛ ye.”

Tumi wɔ gyidie nu

5Na asomafoɛ nemɔ sele Awurade kyɛ, “Ma yɛ gyidie onyi!” 6Na Awurade buale kyɛ, “Sɛ ɛmɔle gyidie bɔ ye piri te kyɛ sinapi baa ko a, ahaa ɛmɔkɔhora bɛkɔhã bekohyire akyea he kyɛ, ‘Wɔ bo tutu, ná kogyina ɛpo nu!’ Na okotie ɛmɔ.

Akoaa asɛdeɛ

7“Ɛmɔ nu nwa yeɛ ole akoaa bɔ ɔyɔ fieso adwuma, anaakyɛ ɔnea mmoaen so, ná akoaa ne fi eburo ba a, ɔkɔhã kohyire akoaa ne kyɛ, ‘Ka wɔ nwo bra baadidi’ ɔ? 8Aso ongose ye kyɛ, ‘To m’aleɛ, ná bɔ w’abɔsoɛ so me, na medidi ná meno meyie a, ye si ye né wɔ koso adidi ná ano.’? 9Aso ɔda akoaa ne ase kyɛ wayɔ bɔ ɔhyɛle ye kyɛ ɔyɔ ne? 10Sɔ ala yeɛ ɛmɔyɔ koso, sɛ ɛmɔyɔ ahyɛdeɛ amukoraa bɔ bafa bama ɛmɔ ne a, odi kyɛ ɛmɔkã kyɛ ‘Yɛte ngoaa bɔ mvasoɛ biala nne yɛ so ɔ, na bɔ ɔte y’asɛdeɛ yeɛ yayɔ ɔ.’ ”

Yesu sa kwatafoɛ buru anwonyerɛ

11Na ɔwale kyɛ ɔkɔ Yerusalem nen, ɔɔfale Samaria ne Galilea ɛwɛen so. 12Na mmerɛ bɔ ɔkwaawura akuraa bie anu nen, mmienzua buru bie bɔ bɛte kwatafoɛ ɔ beeyiale ye, bɔ né baagyinagyina dedeede ɔ, 13na bɛteateane nu kyɛ, “Yesu, Yɛ mene, nwu yɛ anwumvoin oo!” 14#Lew 14.1-32 Na onwuni bɛ nen, osele bɛ kyɛ, “Ɛ́mɔfa ɛmɔ nwo beehyire asɔfo nemɔ.” Na ɔwale kyɛ bɛ́kɔ nen, bɛ nwo fili. 15Na bɛ nu ko nwuni kyɛ ye nwo asa nen, osale ye si teateane nu yele Nyameɛ ayɛ; 16na ɔfale ye nyunu butuli ase wɔ Yesu gya bo lale ye ase. Né ye de, ɔte Samarianiɛ. 17Yeɛ Yesu sele kyɛ, “Aso nna mmenia buru yeɛ bɛ nwo fili ɔ? Na ngona ne de, bɛwɔ nisua? 18Bannwu bɛ nu biala kyɛ wasa ye si wawa kyɛ ɔbaafa animnyam ma Nyameɛ ɔ, sana amanvraniɛ he ngome?” 19Na osele ye kyɛ, “Dwɔso kɔ, wɔ gyidie ale wɔ.”

Nyameɛ ahennie ne walɛ

(Mateo 24.23-28, 37-41)

20Farasiifoɛ nemɔ bisale Yesu mmerɛ bɔ Nyameɛ ahennie ne kɔwa ɔ, na obuale bɛ kyɛ, “Nyameɛ ahennie ne, ɔmma bɔ mmenia bɛ nye tua ɔ; 21yeɛ bɛngɔhã kyɛ, ‘Nea, ye ɛhe!’ Anaakyɛ: ‘Nea, ye yeɛ ɔwɔ dɔ ne!’ Na ɛ́mɔtie, Nyameɛ ahennie ne, ɔwɔ ɛmɔ nu.”

22Na osele ye asuafoɛ nemɔ kyɛ, “Mmerɛ bie kɔwa bɔ Sona Awa ne, ɛmɔkohuro kyɛ ɛmɔkonwu ye ngyẽa nemɔ anu ko ɔ, nakoso ɛmɔngonwu ye. 23Na bekose ɛmɔ kyɛ, ‘Nea dɔ!’ anaa ‘Nea wa!’ Nakoso nnɛma ɛmɔkɔ, yeɛ nnɛma ɛmɔdi bɛ si. 24Na kyɛbɔ agralaa bɔ frɛ, ná ɔta ewienu fi ye bue ko kɔkã ye bue ko ne, sɔ ala yeɛ Sona Awa ne kɔyɛ wɔ ye kyẽa ne anu ɔ. 25Nakoso ɔsɛ kyɛ onwu amaneɛ pee ná ɛnɛmmafoɛ he bɛpo ye koraka. 26#Gye 6.5-8 Na kyɛbɔ Nowa mmerɛ ne yɛle ne, sɔ ala yeɛ Sona Awa ne mmerɛ koso kɔyɛ ɔ. 27#Gye 7.6-24 Bedidili, bɛnone, begyigyale mmraa, na bɛmane agyaa maa oodwuli kyẽa bɔ Nowa fole ɛlɛen ne anu, ná nzueyilɛ ne wale oohuni bɛ mukoraa ɔ. 28#Gye 18.20—19.25 Sɔ ala koso yeɛ Lɔto mmerɛ ne yɛle ɔ. Bedidili, bɛnone, bɛtɔle nningyein, bɛyɛle nningyein atɔen, beluale nningyein, na besisili sua mɔ. 29Na kyẽa bɔ Lɔto fili Sodom hɔle nen, see ne sɔfe tɔ fili nyameɛso oohuhuni bɛ mukoraa. 30Na sɔ ala yeɛ ɔkɔyɛ ɔ wɔ kyẽa bɔ Sona Awa ne kɔye ye nwo ali ne.

31 # Mat 24.17-18; Mak 13.15-16 “Sɔ kyẽa ne, sona bɔ ɔwɔ sua ti afia, bɔ ye nningyein wɔ sua nu ne, onni kyɛ odwu ba kyɛ ɔbaafa kɔ; yeɛ sona bɔ ɔwɔ fieso ne koso, onni kyɛ osa ye si ba. 32#Gye 19.26 Ɛ́mɔkaye Lɔto aye ne! 33#Mat 10.39; 16.25; Mak 8.35; Luk 9.24; Yoh 12.25 Ebiala bɔ ɔkɔpere kyɛ okole ye bɔbɔ ye ngoa ne, ɔkɔhwere ye; nakoso ebiala bɔ ɔkɔhwere ye ngoa ne, okonya ye ngoa. 34Mekã mekyire ɛmɔ kyɛ, sɔ kɔngɔen ne, mmenia nyɔ bɔ bɛla bɛen ko aso ɔ, bɛkɔfa ko bɛkɔhɔ, né bayakyi ko berɛ. 35Mmrasua nyɔ bɔ bési aburoo bɛ́bɔ nu ɔ, bɛkɔfa ko bɛkɔhɔ, né bayakyi ko berɛ. 36[Mmienzua nyɔ bɔ bɛwɔ fieso ɔ, bɛkɔfa ko bɛkɔhɔ, né bayakyi ko berɛ.”]#17.36: Tete Ahyerɛlɛ ne bie fa ngyekyɛmuɛ 36 boka so.

37Yeɛ bebisale ye kyɛ, “Awurade, nisua ɔ?” Na obuale bɛ kyɛ, “Nekaa bɔ efuin la ne, berɛ yeɛ mbɛtɛ bɛboa bɛ noa ɔ!”

Currently Selected:

Luka 17: EBP

Highlight

Copy