Luka 16

Hwɛsoniɛ anyeteɛ ne nwo anyandera

1Na Yesu sa sele ye asuafoɛ nemɔ kyɛ, “Né sikaniɛ bie wɔ berɛ bɔ ole hwɛsoniɛ bɔ ɔnea ye agyapadeɛ so ɔ. Na bɛɛbɔle ye kwaadu behyirele ye kyɛ ɔ́sɛkye ye agyapadeɛ ne. 2Yiti ɔfrɛle ye bisale ye kyɛ, ‘Nzikyɛ dwirɛ yeɛ metete mefa wɔ nwo ye? Wɔ nhwɛsoɛ adwuma ne, bra baabu ye nwo ngondaa, ofikyɛ mengɔma ɛngɔyɛ hwɛsoniɛ adwuma ne ko.’ 3Na hwɛsoniɛ ne hane ye ye ti anu kyɛ, ‘Na ɛhe de, meyɛ ye sɛ, ofikyɛ me mene ɔbaale nhwɛsoɛ adwuma ne ofi me sa nu. Me nwo nyɛ se bɔ ngɔhora adwuma serɛ yɔ ɔ, yeɛ mefɛre koso kyɛ ngɔsrɛsrɛ ɔ. 4Mese bɔ ngɔyɔ ɔ, na sɛ ode me nhwɛsoɛ adwuma ne ofi me sa a, ngonya mmenia bɔ bekole me b’awuro mɔ nu ɔ.’

5“Yiti ɔfrɛfrɛle bɛ bɔ bɛma ye mene kerɛ ne maa bɛwale ye berɛ ngoko ngoko, na obisale bɔ oli moa ne kyɛ, ‘Ɛma me mene kerɛ sɛɛ?’ 6Obuale kyɛ, ‘Ngoo graa ɛyaa ko.’ Na osele ye kyɛ, ‘Wɔ kerɛ ne, ye nwo krataa ne ɛhe, tena ase ndɛndɛ na kyerɛ aburannu!’ 7Yeɛ obisale ko ne koso kyɛ, ‘Wɔ koso, ɛma kerɛ sɛɛ?’ Na obuale kyɛ, ‘Atokoɔ ngotoku ɛyaa ko.’ Na osele ye kyɛ, ‘Wɔ kerɛ ne, ye nwo krataa ɛhe, kyerɛ aburawɔtwɛ!’ 8Na meneɛ ne kamvole hwɛsoniɛ bɔ onni nahorɛ ne, kyɛ wafa nworɛ wato bɔ wayɔ ne anwo. Ofikyɛ, wiase he anu ama bɛfa nworɛ atee so bɛyɔ bɛ nningyein wɔ bɛ mmango mɔ nu bɛtra kanea mma nemɔ.”

Anwonyadeɛ fiɛ

9Na mekã mekyire ɛmɔ kyɛ, ɛmɔ de, ɛ́mɔfa anwonyadeɛ fiɛ#16.9: Hela dwudwolɛ ne kã kyɛ: mammon, bɔ okyire sikaa anaa anwonyadeɛ. ne so bie bénya abiɛngoɛ mɔ, amaa sɛ ohia ɛmɔ a, bafa ɛmɔ bahɔ atenaleɛ afebɔɔ nemɔ anu.

10“Ebiala bɔ odi nahorɛ wɔ nningyein mmaa mmaa nu ne, odi nahorɛ wɔ nningyein mbiri mbiri nu koso; yeɛ ebiala bɔ onni nahorɛ wɔ nningyein mmaa mmaa nu ne, onni nahorɛ wɔ nningyein mbiri mbiri nu koso. 11Na sɛ ɛmɔanni nahorɛ wɔ anwonyadeɛ fiɛ nu a, nwa yeɛ ɔkɔfa anwonyadeɛ paa ne kowura ɛmɔ sa ɔ? 12Na sɛ ɛmɔanni nahorɛ wɔ ebie nikyee nwo a, nwa yeɛ ɔkɔfa ɛmɔ bɔbɔ bɛ deɛ kɔma ɛmɔ ɔ?

13 # Mat 6.24 “Akoaa biala ngɔhora ngɔso meneɛ nyɔ; ofikyɛ ɔba ye sɔ a, ɔkɔpɔ ko, né wahuro ko dwirɛ, anaakyɛ ɔkɔso ko nahorɛ nu, né wabu ko animtia. Ɛmɔngɔhora ngɔso Nyameɛ ne anwonyadeɛ.”

Yesu twi Farasiifoɛ nyunu

(Mateo 11.12-13; 5.31-32; Marko 10.11-12)

14Na Farasiifoɛ bɔ bɛ nye boro sikaa ne, bɛtele edwirɛ hemɔ amukoraa nen, bɛserele ye. 15Yiti Yesu sele bɛ kyɛ, “Ɛmɔte mmenia bɔ ɛmɔbu bɛ nwo kyɛ bɛtengyɛ wɔ mmenia nyunu, nakoso Nyameɛ yeɛ ɔse ɛmɔ ti anu ɔ. Ofikyɛ, bɔ ɔmoma ye nwo so wɔ mmenia nu ne, ɔte akyiwadeɛ wɔ Nyameɛ nyunu.

16 # Mat 11.12-13 “Mmeraa ne ne ngɔmhyɛlɛfoɛ nemɔ bɛpem Yohane so; na ofi sɔ mmerɛ ne, bɛ́ka Nyameɛ ahennie ne nwo nzɛmba ne, na ebiala pere kɔ nu. 17#Mat 5.18 Na ɔyɛ mmerɛ kyɛ anwuro ne aseɛ kɔpɛ nu tra kyɛ mmeraa ne anu kaaba pɔtrepɔɔ ko po ɔngɔyɛ adwuma ɔ.

18 # Mat 5.32; 1 Kor 7.10-11 “Bienzua biala bɔ okoyira ɔye ná okogya braa foforɛ nen, ɔsɛkye agyaa; yeɛ bienzua biala bɔ okogya brasua bɔ ohu ayira ye nen, ɔsɛkye agyaa.

Esikaniɛ bie ne Lasarɔso nwo dwirɛ

19“Esikaniɛ bie tenane ase bɔ né ɔkera kende ne ago, ná odi aleɛ fɛɛ ɔgye ye nye daa biala ɔ. 20Na ehianiɛ bie koso bɔ bɛfrɛ ye Lasarɔso bɔ ngena atutu ye nwo amukoraa ɔ ɔtenane ase. Né bɛfa ye bɛkɔto sikaniɛ n’anoanu berɛ. 21Né ɔpena aleɛ boso bɔ ɔporoporo fi sikaniɛ ne didipono so gua ase ne odi; asa koso, né ngyea bɛbatafe ye ngena nemɔ anu.

22“Na ɔwale kyɛ ehianiɛ ne wuli, na abɔfo mɔ bɛɛfale ye maa ɔhɔle Abraham berɛ. Esikaniɛ ne koso wuli, na besiele ye. 23Na ɔwɔ abɔnzam see nu,#16.23: ABƆNZAM SEE NU: Ahyerɛlɛ ne bie kã kyɛ, “Ɛborɔ”. ná onwu amaneɛ nen, ɔtole ye nye anwuro, na onwuni Abraham wɔ dedeede ɔne Lasarɔso kyɛ ɔwɔ ye berɛ ɔ. 24Na ɔteane nu kyɛ, ‘Ngya Abraham ee, nwu me anwumvoin oo, ná soma Lasarɔso maa ɔfa ye sa mmɛseka noa ɔbɔ nzue nu, ná ɔɔfa hã me temverema so ma so yɛ fɔnwoo; ɔnate kyɛ me nwo yerayera me wɔ see wuronyiwuronyi he anu!’

25“Nakoso Abraham sele ye kyɛ, ‘Mma, kaye kyɛ mmerɛ bɔ né ɛte ase ne, elili wɔ mmerɛ, na Lasarɔso de, onwuni amaneɛ; nakoso kekesaala ye de, ye wora akyekye, na wɔ koso de, wɔ nwo yerayera wɔ. 26Na ɛhe amukoraa si ne, bɔnga pirikua bie la yɛne ɛmɔ afia, kyɛbɔ ɔkɔyɛ bɔ bɛ bɔ bekuro kyɛ befi wa bɛba ɛmɔ dɔ ne, bɛngɔhora ba ɔ. Yeɛ bɛ bɔ bɛwɔ dɔ ne koso, bɛngora bɛndra bɛmma yɛ wa.’ 27Yeɛ osele kyɛ, ‘Nzaade, baba, mesrɛ wɔ, soma ye maa ɔhɔ me baba awuro; 28ofikyɛ nniɛma mmienzua mɔ bɛte nnu, ná ɔɔbɔ bɛ kɔkɔ, ná bɛ koso bamma ɛwa amaneɛnwunɛ ne anu bie.’

29“Nakoso Abraham buale ye kyɛ, ‘Bele Mose ne ngɔmhyɛlɛfoɛ nemɔ wɔ dɔ; odi kyɛ betie bɛ!’ 30Na osele kyɛ, ‘Daabi, Ngya Abraham; nakoso sɛ ebie fi awufoɛ nu kɔ bɛ berɛ a, yeɛ bɛkɔsakyera b’adwene ɔ.’ 31Na obuale ye kyɛ, ‘Sɛ bengotie Mose ne ngɔmhyɛlɛfoɛ nemɔ a, ye de sɛ ebie fi awufoɛ nu dwɔso po a, bengole ngoli.’ ”

Currently Selected:

Luka 16: EBP

Highlight

Copy