Luka 15

Boaen bɔ wamini ne

(Mateo 18.12-14)

1 # Luk 5.29-30 Afei, ɛtoɔdidelɛfoɛ ne bɔnefoɛ nemɔ amukoraa bepingyele Yesu nwo berɛ kyɛ bɛbaatie ye noa dwirɛ. 2Yeɛ Farasiifoɛ ne ahyerɛlɛfoɛ nemɔ bɛyɛle nwuhunwuhu kyɛ, “Biaa he ode bɔnefoɛ to nu, na osa ne bɛ bedidi.” 3Yiti obuli bɛ anyandera kyɛ, 4“Ɛmɔ nu nwa yeɛ sɛ ole mmoaen ɛyaa ko, ná nu ko mini a, ɔngɔyakyi aburahona ne ngona ne wɔ ɛserɛ so berɛ, ná ɔngɔɔpena ko bɔ wamini ne kɔpem kyɛ okonwu ye ɔ? 5Na sɛ onwu ye a, ɔfa ye to ye kɔme anwo, na odi ahurusi. 6Na sɛ ɔba awuro a, ɔfrɛfrɛ ye mmango mɔ ne ye mandamu berɛ ama maa bɛbayia, na ose bɛ kyɛ, ‘Ɛ́mɔma yɛgye yɛ nye, ofikyɛ manwu me boaen bɔ ominini ne.’ 7Na mekã mekyire ɛmɔ kyɛ, sɔ ala yeɛ sɛ bɔnefoɛ ko sakyera ye adwene a, ye nwo anigye ba nyameɛso tra bɔ ɔba mmenia tenenee aburahona ne ngona bɔ benhia adwenesakyera nwo ɔ.

Esikadwetɛ bɔ wamini ne

8“Anaakyɛ brasua beni yeɛ ole sikadwetɛ buru, ná nu ko mini a, ɔngɔsɔ kanea ngɔpoa sua nu berɛ, ná ɔngɔyere ye nwo ngɔpena kɔpem kyɛ okonwu ye ɔ? 9Na sɛ onwu ye a, ɔfrɛfrɛ ye mmango mɔ ne ye mandamu berɛ ama maa bɛbayia, na ose kyɛ, ‘Ɛ́mɔma yɛgye yɛ nye, ofikyɛ manwu sikadwetɛ bɔ ominini ne.’ 10Na mekã mekyire ɛmɔ kyɛ, sɔ ala yeɛ sɛ bɔnefoɛ ko sakyera ye adwene a, ye nwo anigye ba Nyameɛ abɔfo mɔ bɛ nyunu ɔ.”

Baa sɛkyefoɛ ne nwo anyandera

11Yeɛ Yesu sele kyɛ, “Né biaa bie wɔ berɛ bɔ ole mmaa mmienzua nyɔ ɔ. 12Bɛ nu kãa ne sele ye baba kyɛ, ‘Baba, agyapadeɛ ne, fa me kyɛfa deɛ bɔ ɔwɔ nu ɔ ma me!’ Yiti baba ne hyɛle ye nningyein nu mane bɛ. 13Na wangyɛ biala yeɛ baa kãa ne boaboale ye agyapadeɛ deɛ amukoraa noa ɔ, na otuli atee hɔle maen bɔ ɔwɔ dede bie aso, na dɔ yeɛ ɔbɔle asanzabra mane ye anwodeɛ ne fili ye sa ɔ. 14Na ye mukoraa fili ye sa yiele nen, ɛhɔen piri bie pene sɔ maen ne anu, na ye nwo hyɛle ye bo hyerele ye. 15Yiti ɔfale ye nwo ɔɔbɔle kuromani bie wɔ maen ne anu, na ɔmaa ɔhɔle nekaa bɔ osie ye mbrako ɔ kyɛ ɔɔnea bɛ so. 16Na ye komvi wale so kyɛ onya aleɛ bɔ mbrako nemɔ bedi ne bie a ahaa okoli kɔma ye ko koyi; nakoso ebiala amma ye bie. 17Afei ye nye wale ye nwo so, na ɔhane kyɛ, ‘Apaafoɛ bɔ bɛwɔ me baba awuro ɔ bedidi bɛma bɛ ko yi ma ebie ka, yeɛ me de, ɛhɔen dosa me wɔ wa ye! 18Ngodwɔso ngɔhɔ me baba berɛ, ná mahã mahyire ye kyɛ: Baba, mayɔ nyameɛso ne wɔ nyunu bɔne; 19memvata kyɛ ɛkɔfrɛ me ɛwa ko ɔ, fa me yɛ kyɛ w’apaafoɛ nemɔ anu ko.’

20Yiti odwɔsole sili nu kyɛ osa kɔ ye baba berɛ. Na ɔwɔ dedeede nen, yeɛ ye baba nwuni ye ɔ, na ɔyɛle ye anwumvo, na baba ne tuli amirika ɔɔfale ye sa tole ye kɔme anu, na ɔyɛle ye awaawaatuu. 21Na ɔwa ne sele ye kyɛ, ‘Baba, mayɔ nyameɛso ne wɔ nyunu bɔne, na memvata kyɛ ɛkɔfrɛ me ɛwa ko ɔ.’ 22Yeɛ ye baba ne sele ye ngoaa nemɔ kyɛ, ‘Ɛmɔhã bɛ nwo bɛɛfa ataadeɛ paa beewura ye; ɛ́mɔfa pɛteaa bewura, ná ɛ́mɔfa mbaboa bewura ye; 23ná ɛ́mɔfa nandwie akrɔngrɔma bɔ walɔ ɔ bɛbra beehu ye, ná ɛ́mɔma yɛgye yɛ nye; 24ofikyɛ mma he owuli, na watingye; ominini, na manwu ye.’ Na bɛhyɛle ye bo kyɛ bɛgye bɛ nye.

25“Na sɔ mmerɛ ne, né ɔwa panyi ne wɔ fieso. Na osa ba ná opingyele awuro nen, ɔtele edwein ne abiliegolɛ. 26Yiti ɔfrɛle ngoaa nemɔ nu ko, na obisale ye penane bɔ ye ti yeɛ sɔ nikyee ne ɔkɔ so ne. 27Na obuale ye kyɛ, ‘Eliɛma ne awa, na wɔ baba ahu nandwie akrɔngrɔma bɔ walɔ ne, ɔnate kyɛ ye sa ahã ye wɔ asomdwee nu.’

28“Nakoso ɔfɛle yaa, na wanguro kyɛ ɔkɔhɔ awuro berɛ ɔ. Yiti ye baba fite wale ɔɔkorɔkorɔle ye kyɛ ɔbra awuro. 29Na obuale ye baba kyɛ, ‘Tie, afoɛ worawora he yeɛ mafa maso wɔ ɔ, yeɛ wɔ dwirɛ koso nnyɛle ye nwo asoserɛ le; nakoso abɔngye ba po, ɛmmane me bie le kyɛ me ne me mmango mɔ yɛfa yɛgye yɛ nye. 30Nakoso ɛwa he bɔ wasɛkye w’agyapadeɛ wɔ gyanderafoɛ nwo ne, ɔwale ye ala pɛ, ahu nandwie akrɔngrɔma bɔ walɔ ne ama ye!’ 31Na osele ye kyɛ, ‘Mma, wɔ de, ɛwɔ me nwo wa mmerɛ biala, na me nikyee biala te wɔ deɛ. 32Ɔsɛ kyɛ yɛgye yɛ nye ná yɛmaa ɔyɛ yɛ fɛ ɔ, ofikyɛ eliɛma ye, owuli, na watingye; ominini, na manwu ye.’ ”

Currently Selected:

Luka 15: EBP

Highlight

Copy