Luka 14

Yesu sa biaa bie anwonyerɛ afofikyẽa

1Na ɔwale kyɛ afofikyẽa bie, ɔhɔle Farasiiniɛ panyi bie awuro kyɛ ɔkwaadidi nen, né bɛtetɛ ye bɛnea. 2Na yieee, né biaa bie bɔ ye nwo anwunwu ɔ ɔwɔ ye nyunu berɛ. 3Na Yesu bisale mmeraa nwo nimdeɛfoɛ ne Farasiifoɛ nemɔ kyɛ, “Aso yɛ mmeraa ma ate kyɛ yɛsa anwonyerɛ afofikyẽa anaakyɛ ɔmma ate?” 4Na bɛyɛle dinn. Na ɔsɔle ye nu sale ye anwonyerɛ, na ɔmaa ɔhɔle. 5#Mat 12.11 Afei obisale bɛ kyɛ, “Ɛmɔ nu nwa yeɛ sɛ ye afunum anaa nandwie tɔ kumaa nu afofikyẽa a, ɔngɔyɛ ndɛndɛ ngɔɔye ye berɛ ne ala ɔ?” 6Na bangora ɛhe noa ye.

Anwobrɛaseɛ ne adɔeɛyɛlɛ nwo dwirɛ

7Na bɛ bɔ bato bɛ sa bafrɛ bɛ ne, Yesu nwuni kyɛ mbanyi bia yeɛ bɛpere bɛtena so ɔ, yiti obuli bɛ anyandera sele bɛ kyɛ, 8#Any 25.6-7 “Sɛ ebie to ye sa frɛ wɔ atɔmvorɛ bo a, nnɛkɔtena mbanyi bia so! Ebiaa né wato ye sa wafrɛ ebie bɔ ɔte titire tra wɔ ɔ. 9Na bɔ ɔtole ye sa frɛle wɔ ne ye ne, ɔkɔwa koose wɔ kyɛ, ‘Fa wɔ bia ne ma ɛhe!’ Na afei ele ɛfɛrelɛ ɛkɔɔtena ahameɛ bia bie aso. 10Yiti sɛ ebie to ye sa frɛ wɔ a, kɔ ná kɔtena ahameɛ bia bie so, amaa sɛ bɔ ɔtole ye sa frɛle wɔ ne ba a, wahã wahyire wɔ kyɛ, ‘Me damvo, kɔtena anwuro dɔ bie.’ Na ɛhe kɔmaa ekonya animnyam wɔ mmenia bɔ ɛne bɛ bɛte poen nwo bedidi ne anyunu. 11#Mat 23.12; Luk 18.14 Ofikyɛ ebiala bɔ ɔma ye nwo so ne, bɛkɔbrɛ ye ase; na bɔ ɔbrɛ ye nwo ase ne, bɛkɔma ye so.”

12Afei osele bɔ ɔtole ye sa frɛle ye ne kyɛ, “Sɛ ɛto poen eyia anaa nɔsoa a, nnɛfrɛfrɛ wɔ mmango mɔ anaa eliɛma mɔ anaa w’abusuafoɛ anaa wɔ mandamu berɛ sikafoɛ. Ebiaa né bɛ koso bato bɛ sa bafrɛ wɔ bie bafa basi ye gya nu. 13Yiti sɛ ɛto poen a, to wɔ sa frɛ ehiafoɛ, mmubuafoɛ, abafaen mɔ ne anyesiniwaafoɛ, 14na ekonya saleɛ; ofikyɛ bɛ de, bɛngɔhora bie yɔ ma wɔ ngɔfa ngosi ye gya nu. Na teneneefoɛ edwɔsolɛ ne anu yeɛ wɔ sa kɔhã ye nwo akatuaa ɔ.”

Ɛpoentolɛ piri ne nwo anyandera

(Mateo 22.1-10)

15Na bɛ bɔ né bɛ ne Yesu bɛte poen nwo bedidi ne, nu ko tele edwirɛ he nen, osele Yesu kyɛ, “Bɔ okodidi wɔ Nyameɛ ahennie nu ne, wanya saleɛ!” 16Yeɛ Yesu sele ye kyɛ, “Biaa bie tole poen piri bie, na ɔtole ye sa frɛle mmenia pee. 17Na adidie mmerɛ dwuli nen, ɔsomane ye somvoɛ kyɛ oose bɛ bɔ wato ye sa wafrɛ bɛ ne kyɛ, ‘Ɛmɔbra, na m’anwoboa atotɔ nu!’ 18Na bɛ mukoraa bɛhyɛle ye bo bɛyeyele ye noa. Bɔ oli moa ne sele ye kyɛ, ‘Matɔ aseɛ bie, na ɔsɛ kyɛ mekɔnea; mesrɛ wɔ, mengɔhora ba.’ 19Bɔ ɔtoa berɛ ne nwa: ‘Matɔ nandwie nyii nyɔ nyɔ bɔ bafa kɔnnua basosɔ bɛ babɔ nu ɔ sɔ alaa nnu, bɔ mekwaafa bɛ meyɔ adwuma menea ɔ, mesrɛ wɔ, mengɔhora ba.’ 20Na foforɛ koso nwa: ‘Magya braa kekesaala ye, yiti mengɔhora ba.’

21“Yiti somvoɛ ne sa wale ɔɔbɔle ye mene amaneɛ. Yeɛ ye mene ne fɛle yaa, na osele ye somvoɛ ne kyɛ, ‘Ma wɔ nwo yɛ nyera, ná kɔ kuro nu dɔ dwaa nemɔ aso ne mandamu, ná fa ehiafoɛ, mmubuafoɛ, anyesiniwaafoɛ ne abafaen mɔ bra!’ 22Yeɛ somvoɛ ne hane kyɛ, ‘Me mene, mayɔ bɔ ɛhyɛle ne, nakoso nekaa bieku tɛwɔ berɛ.’ 23Na meneɛ ne sele somvoɛ ne kyɛ, ‘Kɔ atimbire mɔ ne fie atee mɔ so, ná hyɛ mmenia ma bɛbra nu,‘ ná m’awuro wa oyi to. 24Na mekã mekyire ɛmɔ kyɛ, mmenia bɔ ndole me sa mvrɛle bɛ ne, bɛ nu biala nne berɛ bɔ m’aleɛ ye kaala kɔhã ye noa ɔ!’ ”

Yesu si lilɛ nwo dwirɛ

(Mateo 10.37-38)

25Né mmenia pee yeɛ bɛne Yesu bɛ́kɔ ɔ, na ɔkakyili ye nwo sele bɛ kyɛ, 26#Mat 10.37 “Sɛ ebie ba me berɛ, ná ɔmbɔ ɔse ne oni, ɔye ne ye mma, oliɛma mmienzua ne oliɛma mmrasua, ɔne ye bɔbɔ ye ngoa a, ngɔhora ngɔyɛ me suaniɛ. 27#Mat 10.38; 16.24; Mak 8.34; Luk 9.23 Yeɛ ebiala bɔ wanzoa ye mmeamudua ná wanni me si nen, ɔngɔhora ngɔyɛ me suaniɛ.

28“Ɛmɔ nu nwa yeɛ sɛ ɔpena kyɛ osi abandenden a, ongoli moa ngɔtena ase ngɔsese kerɛ bɔ ɔkɔbɔ ɔ koraka, sɛ ole bɔ ɔkɔsõ ye si yie a? 29Sɛ wanyɔ sɔ a, ɔto ye bo fapem yie, ná wangora ye si yie a, ebiala bɔ okonwu ye sɔ ne, ɔkɔhyɛ ye bo kɔsere ye 30kyɛ, ‘Biaa he hyɛle ye bo kyɛ osi, nakoso wangora wanyie.’

31“Anaakyɛ ɛhene beni yeɛ ɔne ɛhene bie bɛkwaaho koɛ, bɔ ongoli moa ɔngɔtena ase ngɔfa ye nwo adwene, sɛ ɔkɔhora kɔfa asraafoɛ apee buru okooyia ɛhene bɔ ole asraafoɛ apee aburanyɔ ɔbaafa koɛ toa ye ne a? 32Na sɛ ɔnea ná ɔngɔhora a, mmerɛ bɔ ko ne ɔwɔ nziɛ nziɛ ne, otu ɛbɔfoɛ mɔ maa bɛkɔsrɛ ye kyɛ ɔma besiesie b’afia. 33Na sɔ ala yeɛ ɛmɔ nu biala bɔ ɔnyakyi bɔ ole ye amukoraa berɛ ne, ɔngɔhora ngɔyɛ me suaniɛ ɔ.

Ngyee bɔ mvasoɛ nne so ɔ

(Mateo 5.13; Marko 9.50)

34“Ngyee te nikye paa, nakoso sɛ nu fɛɛ tu a, nzikyɛ yeɛ bɛkɔfa bekowura ye maa okosa kɔkakyi ngyee ɔ? 35Ɔmvata eboo aseɛ anaa fofoɛ bɔ bɛfa bedua nningyein ɔ, na mmom begyi begua. Bɔ ole asoɛ tie ne, maa otie!”

Currently Selected:

Luka 14: EBP

Highlight

Copy