KA BUKE MUA A MOSE, I KAPA ʻIA KINOHI 25
25
MOKUNA XXV.
1 Nā keiki a ʻAberahama lāua ʻo Ketura. 7 Ko ʻAberahama make ʻana. 12 Ke kūʻauhau na ʻIsemaʻela. 17 Kona make ʻana. 21 Ka pule a ʻIsaʻaka lāua ʻo Rebeka. 24 Hānau ʻia ʻo ʻEsau a me Iakoba. 27 Kā lāua hana. 31 Kūʻai aku ʻEsau i kāna hoʻoilina o ka hānau mua.
1¶ Lawe hou aʻela ʻo ʻAberahama i wahine nāna, ʻo Ketura kona inoa.
2ʻO nā keiki āna i hānau ai nāna, ʻo Zimerama, ʻo Iokesana, ʻo Medana, ʻo Midiana, ʻo ʻIsebaka a ʻo Sua.
3Na Iokesana ʻo Seba, a ʻo Dedana. Eia ka poʻe mamo a Dedana, ʻo kā ʻAsurima, kā Letusima, a me kā Leumima.
4ʻO nā keiki a Midiana: ʻo ʻEpa, ʻo ʻEpera, ʻo Hanoka, ʻo ʻAbida, a ʻo ʻEledaʻa. ʻO kēia poʻe a pau na Ketura mai.
5Kauoha maila ʻo ʻAberahama i kona waiwai a pau iā ʻIsaʻaka.
6Akā, hāʻawi akula ʻo ʻAberahama i nā makana na nā keiki kāne a nā haiā wahine a ʻAberahama, a hoʻokuʻu akula iā lākou, i kona wā e ola ana, mai kāna keiki ʻo ʻIsaʻaka aku, e hele i ka ʻāina o ka hikina.
7Eia nā lā o nā makahiki o ko ʻAberahama ola ʻana: hoʻokahi haneri a me kanahikukumamālima.
8A laila kāʻili ʻia aku ke ea o ʻAberahama, a make ihola ia i ka wā ʻelemakule maikaʻi; he kanaka kahiko loa ia, a ua nui nā lā ona, a ua hui ʻia aku ia me kona poʻe kānaka.
9Na kāna mau keiki na ʻIsaʻaka lāua ʻo ʻIsemaʻela i kanu aku iā ia ma loko o ke ana o Makepela, ma ka mahina ʻai a ʻEperona ke keiki a Zohara no kā Heta, ma ke alo o Mamere,
10ma ka mahina ʻai a ʻAberahama i kūʻai ai me nā mamo a Heta; i laila i kanu ʻia ai ʻo ʻAberahama, a me Sara ʻo kāna wahine.
11Ma hope mai o ka make ʻana o ʻAberahama, hoʻopōmaikaʻi maila ke Akua iā ʻIsaʻaka; a noho ihola ʻo ʻIsaʻaka ma ka Luawai ʻo Lahai Roi.
12¶ Eia ka moʻoʻōlelo no ʻIsemaʻela, no ke keiki kāne a ʻAberahama, ʻo ka mea a Hagara no ʻAigupita ke kauā wahine a Sara i hānau ai na ʻAberahama.
13Eia hoʻi nā inoa o nā keiki kāne a ʻIsemaʻela, ma ko lākou mau inoa, e like me ko lākou hānau ʻana: ʻo Nebaiota kāna hiapo, ʻo Kedara, ʻo ʻAdebeʻela, ʻo Mibesama,
14ʻo Misama, ʻo Duma, ʻo Masa,
15ʻo Hadara, ʻo Tema, ʻo Ietura, ʻo Napisa, a ʻo Kedema.
16ʻO ia nā keiki kāne a ʻIsemaʻela, ʻo ia hoʻi ko lākou mau inoa; ma ko lākou mau kauhale, a ma ko lākou mau kūlanahale; he ʻumikumamālua mau aliʻi e like me ko lākou mau lāhui kanaka.
17Eia nā makahiki o ke ola ʻana o ʻIsemaʻela: hoʻokahi haneri nā makahiki me kanakolukumamāhiku; ua kāʻili ʻia aku kona ea, a make ihola ia; a ua hui ʻia aku ia me kona poʻe kānaka.
18Noho ihola lākou mai Havila a hiki i Sura, ma ke alo o ʻAigupita, i kou hele ʻana i ʻAsuria; pēlā ʻo ia i noho ai ma ke alo o kona poʻe hoahānau a pau.
19¶ Eia ka moʻoʻōlelo no ʻIsaʻaka no ke keiki a ʻAberahama; na ʻAberahama ʻo ʻIsaʻaka.
20He kanahā nā makahiki o ʻIsaʻaka i kona wā i lawe ai iā Rebeka ke kaikamahine a Betuʻela no Suria, a ke kaikuahine o Labana no Suria, i wahine nāna.
21Nonoi akula ʻo ʻIsaʻaka iā Iēhova no kāna wahine; no ka mea, ua pā ʻo ia; a hoʻolohe maila ke Akua iā ia, a hāpai aʻela kāna wahine ʻo Rebeka.
22ʻOni pū aʻela nā keiki i loko ona; ʻī ihola ia, “A i pēlā ia, i aha kēia mea aʻu?” A hele akula ia e nīnau iā Iēhova.
23ʻĪ maila ʻo Iēhova iā ia,
“ʻElua nō lāhui kanaka i loko o kou ʻōpū;
ʻElua hoʻi poʻe kānaka e puka mai ana no loko mai o kou ʻōpū,
A e ʻoi aku ka ikaika o kekahi poʻe i ko kekahi poʻe;
A e hoʻokauā aku ka hānau mua i ka hānau hope.”
24A hiki mai kona manawa e hānau ai, aia hoʻi, he mau māhoe i loko o kona ʻōpū.
25A puka maila ka mua, ua huluhulu, a ʻulaʻula, e like me ka ʻaʻahu huluhulu, a kapa ihola lākou i kona inoa, ʻo ʻEsau.
26Ma hope iho, puka maila kona kaikaina, a paʻa akula kona lima i ke kuʻekuʻe wāwae o ʻEsau; a kapa ʻia kona inoa, ʻo Iakoba. He kanaono nā makahiki o ʻIsaʻaka i ko Rebeka manawa i hānau ai lāua.
27¶ Nui aʻela ua mau keiki lā; he kanaka akamai ʻo ʻEsau i ka hahai holoholona hihiu, he kanaka no ka nāhelehele; akā, he kanaka noho mālie ʻo Iakoba, e noho ana ma nā halelewa.
28Aloha akula ʻo ʻIsaʻaka iā ʻEsau; no ka mea, ʻai ihola ia i ka ʻiʻo o nā mea hihiu; a ʻo Rebeka kai aloha iā Iakoba.
29Hoʻolapalapa ihola ʻo Iakoba i ka mea ʻai; a hoʻi maila ʻo ʻEsau mai ka nāhelehele mai, a ua nāwaliwali ia.
30ʻĪ maila ʻo ʻEsau iā Iakoba, “Ke noi aku nei au iā ʻoe, e hō mai naʻu e ʻai ia mea ʻulaʻula; no ka mea, ua nāwaliwali au,” no laila, ua kapa ʻia kona inoa ʻo ʻEdoma.
31ʻĪ akula ʻo Iakoba, “E kūʻai kāua i kēia lā, i lilo mai iaʻu kāu pono o ka hānau mua.”
32ʻĪ ihola ʻo ʻEsau, “Eia wau, ua kokoke e make, a he aha auaneʻi koʻu pōmaikaʻi i kēia pono o ka hānau mua?”
33ʻĪ akula ʻo Iakoba, “E hoʻohiki ʻoe naʻu kēia lā,” a hoʻohiki akula ia nāna; a kūʻai lilo maila ia i kāna pono o ka hānau mua, na Iakoba.
34A laila, hāʻawi akula ʻo Iakoba na ʻEsau i ka berena a me nā pāpapa i hoʻolapalapa ʻia; ʻai ihola ia a inu hoʻi, kū aʻela ia a hele akula i kona wahi i hele ai; pēlā ʻo ʻEsau i hoʻowahāwahā ai i kāna pono o ka hānau mua.
Currently Selected:
KA BUKE MUA A MOSE, I KAPA ʻIA KINOHI 25: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
