KA BUKE MUA A MOSE, I KAPA ʻIA KINOHI 26
26
MOKUNA XXVI.
1 Ko ʻIsaʻaka hele i Gerara, no ka wī. 2 ʻŌlelo ke Akua iā ia. 7 Kāna hōʻole ʻana i kāna wahine. 12 Kona waiwai ʻana. 18 Kā lākou ʻeli ʻana i mau pūnāwai. 26 Ka berita a ʻAbimeleka me ʻIsaʻaka. 34 Nā wāhine a ʻEsau.
1¶ He wī nō ma ia ʻāina, he ʻokoʻa ka wī mua i hiki mai ai i ka wā iā ʻAberahama. A hele akula ʻo ʻIsaʻaka i o ʻAbimeleka lā, i ke aliʻi o ko Pilisetia ma Gerara.
2ʻIkea akula ʻo Iēhova e ia, ʻī maila, “Mai hele ʻoe i lalo i ʻAigupita. E noho iho ma ka ʻāina aʻu e haʻi aku ai iā ʻoe.
3“E noho ʻoe ma kēia ʻāina, a me ʻoe pū nō wau, a e hoʻopōmaikaʻi aku nō wau iā ʻoe; no ka mea, e hāʻawi aku auaneʻi au nou, a no kāu poʻe mamo i kēia mau ʻāina a pau; a e hoʻokō auaneʻi au i ka hoʻohiki ʻana aʻu i hoʻohiki ai i kou makua kāne iā ʻAberahama.
4“A e hoʻonui aku au i kāu poʻe mamo e like me nā hōkū o ka lani, a e hāʻawi aku nō wau i kēia mau ʻāina a pau no kāu poʻe mamo; a i kāu mamo e hoʻopōmaikaʻi ʻia ai nā lāhui kanaka a pau o ka honua;
5no ka mea, i hoʻolohe mai nō ʻo ʻAberahama i koʻu leo, a i mālama hoʻi i kaʻu mau kauoha, i kaʻu mau ʻōlelo, a me koʻu mau kānāwai.”
6A noho ihola ʻo ʻIsaʻaka ma Gerara.
7Nīnau maila nā kānaka o ia wahi iā ia no kāna wahine; ʻī akula ia, “ʻO koʻu kaikuahine nō ia;” no ka mea, makaʻu ihola ia i ka ʻī aku, “ʻO ia kaʻu wahine; o pepehi mai nā kānaka o ia wahi iaʻu no Rebeka; no ka mea, he maikaʻi ia ke nānā ʻia aku.”
8Iā ia i noho ai ma ia wahi a liʻuliʻu, nānā maila ʻo ʻAbimeleka ʻo ke aliʻi o ko Pilisetia, ma ka puka makani, ʻike maila ia, aia hoʻi, ʻo ʻIsaʻaka e leʻaleʻa ana me kāna wahine, me Rebeka.
9Hea maila ʻo ʻAbimeleka iā ʻIsaʻaka, ʻī maila, “Aia hoʻi, he ʻoiaʻiʻo nō, ʻo kāu wahine nō ia; a pehea hoʻi ʻoe i ʻōlelo mai ai, ‘ʻO koʻu kaikuahine ia’?” ʻĪ akula ʻo ʻIsaʻaka iā ia, “No ka mea, ʻī ihola au, ‘E make paha uaneʻi au nona.’”
10ʻĪ maila ʻo ʻAbimeleka, “He aha kēia āu i hana mai ai iā mākou? Inā i moe wale paha kekahi o nā kānaka me kāu wahine, inā ua hoʻoili mai ʻoe i ka hala ma luna o mākou.”
11Kauoha aku ʻo ʻAbimeleka i nā kānaka a pau, i ka ʻī ʻana, “ʻO ka mea hoʻopā aku i kēia kanaka, a i kāna wahine paha, he ʻoiaʻiʻo e make ia.”
12¶ Lūlū hua ihola ʻo ʻIsaʻaka ma ia ʻāina, a loaʻa pāhaneri maila iā ia ia makahiki; a hoʻopōmaikaʻi maila ʻo Iēhova iā ia.
13Lilo aʻela ua kanaka lā i mea nui, māhuahua aʻela ia, ulu aʻela, a lilo i kanaka nui loa;
14no ka mea, nāna nā hipa, a me nā bipi, a me nā kānaka he nui loa; a huāhuā maila ko Pilisetia iā ia.
15A ʻo nā pūnāwai a pau i ʻeli ʻia e nā kauā a kona makua kāne, i ka wā iā ʻAberahama, hūnā aʻela ko Pilisetia ia mau mea i ka hoʻopiha i ka lepo.
16ʻŌlelo maila ʻo ʻAbimeleka iā ʻIsaʻaka, “E hele aku ʻoe mai o mākou aku; no ka mea, ua nui loa aku kāu, i kā mākou.”
17Hele akula ʻo ʻIsaʻaka, a kūkulu ihola i kona halelewa ma ke awāwa ʻo Gerara, a noho ihola i laila.
18¶ ʻEli hou ihola ʻo ʻIsaʻaka i nā luawai a lākou i ʻeli iho ai i ka wā iā ʻAberahama ʻo kona makua kāne; no ka mea, ua hūnā iho ko Pilisetia ia mau mea ma hope o ka make ʻana o ʻAberahama; a kapa ihola ia i ko lākou mau inoa, ma nā inoa a kona makua kāne i kapa iho ai.
19ʻEli ihola nā kauā a ʻIsaʻaka ma ke awāwa, a loaʻa ihola ka pūnāwai i laila, he wai mau.
20Hakakā maila nā kahu bipi no Gerara me nā kahu bipi o ʻIsaʻaka, i ka ʻī ʻana mai, “No mākou ia wai,” a kapa ihola ia i ka inoa o ua luawai lā, ʻo ʻEseka, no ko lākou hakakā ʻana mai me ia.
21ʻEli ihola hoʻi lākou i ka luawai hou, a hakakā mai nō hoʻi lākou no ia mea; a kapa ihola ʻo ia i kona inoa, ʻo Sitena.
22Neʻeneʻe akula ia mai ia wahi aku, a ʻeli ihola i ka luawai hou; ʻaʻole nō lākou i hakakā mai no ia mea; a kapa ihola ʻo ia i kona inoa, ʻo Rehobota; ʻī ihola ia, “ʻĀnō hoʻi, ua hāʻawi mai ʻo Iēhova i kahi ākea no kākou; a e hoʻohua auaneʻi kākou ma ka ʻāina.”
23¶ A ma hope aku, piʻi akula ia ma laila aku a Beʻereseba.
24ʻIkea aʻela ʻo Iēhova e ia ia pō iho, ʻī maila,
“ʻO wau nō ke Akua o ʻAberahama ʻo kou makua kāne;
Mai makaʻu ʻoe, ʻo wau nō me ʻoe.
A e hoʻopōmaikaʻi nō au iā ʻoe a e hoʻonui hoʻi i kāu poʻe mamo,
No kaʻu kauā, no ʻAberahama.”
25Hana ihola ia i kuahu ma laila, a kāhea akula ia i ka inoa ʻo Iēhova, a kūkulu ihola i kona halelewa i laila; i laila hoʻi nā kauā a ʻIsaʻaka i ʻeli iho ai i ka luawai.
26¶ A laila, hele maila i ona lā ʻo ʻAbimeleka mai Gerara mai, ʻo ia me ʻAhuzata kekahi hoalauna ona, a me Pikola ka luna koa o kona poʻe kaua.
27ʻĪ akula ʻo ʻIsaʻaka iā lākou, “He aha kā ʻoukou i hele mai ai i oʻu nei; no ka mea, ke inaina mai nei ʻoukou iaʻu, a ua hoʻokuke mai nei ʻoukou iaʻu mai o ʻoukou aku?”
28ʻŌlelo maila lākou, “Ua ʻike ʻiʻo mākou, aia nō ʻo Iēhova me ʻoe,” ʻōlelo aʻela mākou, “I hoʻohiki ʻana ma waena o kākou, ʻo mākou nei, a ou lā, a e hoʻopaʻa mākou i berita me ʻoe,
29i hana ʻino ʻole mai ʻoe iā mākou, me mākou i hoʻopā ʻole aku ai iā ʻoe, ʻo ka maikaʻi wale nō kā mākou i hana aku ai iā ʻoe, a ua hoʻihoʻi aku iā ʻoe me ka maluhia; ʻo ʻoe ʻiʻo nō ka mea i hoʻopōmaikaʻi ʻia e Iēhova.”
30Hana ihola ia i ʻahaʻaina na lākou, ʻai ihola lākou a inu hoʻi.
31Ala aʻela lākou i kakahiaka nui, a hoʻohiki ihola lāua, i kekahi i kekahi; hoʻokuʻu akula ʻo ʻIsaʻaka iā lākou, a hoʻi hou akula lākou mai ona aku lā me ke kuʻikahi.
32Ia lā hoʻokahi nō, hele maila nā kauā a ʻIsaʻaka, a haʻi maila iā ia no ka luawai a lākou i ʻeli iho ai, ʻī maila iā ia, “Ua loaʻa iā mākou ka wai.”
33Kapa ihola ʻo ia ia wahi, ʻo Seba; no laila, ʻo Beʻereseba ka inoa o ia kūlanakauhale a hiki i kēia lā.
34¶ Hoʻokahi kanahā nā makahiki o ʻEsau iā ia i lawe ai iā Iehudita ke kaikamahine a Beʻeri no kā Heta, a me Basemata ke kaikamahine a ʻElona no kā Heta, i mau wāhine nāna.
35He mau mea ʻehaʻeha lāua no ka naʻau o ʻIsaʻaka a me Rebeka.
Currently Selected:
KA BUKE MUA A MOSE, I KAPA ʻIA KINOHI 26: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
