KA BUKE MUA A MOSE, I KAPA ʻIA KINOHI 22
22
MOKUNA XXII.
1 ʻŌlelo ke Akua iā ʻAberahama e mōhai iā ʻIsaʻaka. 3 Kā ʻAberahama hoʻolohe ʻana. 11 Hea mai ka ʻānela iā ia. 13 Loaʻa ka hipa kāne i mōhai. 15 Hoʻomaikaʻi hou ʻia ʻo ʻAberahama. 20 Ka moʻoʻōlelo no Nahora.
1¶ Ma hope mai o ia mau mea, hoʻāʻo maila ke Akua iā ʻAberahama, ʻī maila iā ia, “E ʻAberahama!” ʻĪ akula kēlā, “Eia nō wau.”
2ʻĪ maila ʻo ia, “E lawe aku ʻoe i kāu keiki i kāu ponoʻī, iā ʻIsaʻaka, i kāu mea āu e aloha nei, a e hele aku ʻoe i ka ʻāina ʻo Moria; ma laila ʻoe e kaumaha aku ai iā ia i mōhai kuni ma luna o kekahi puʻu aʻu e hōʻike aku ai iā ʻoe.”
3Ala aʻela ʻo ʻAberahama i kakahiaka nui, hoʻēʻe akula ia i ka noho ma luna o kona hoki, kono pū aʻela i nā kānaka uʻi ʻelua ona me ia, a me ʻIsaʻaka kāna keiki, kākā ihola i ka wahie no ka mōhai kuni, kū aʻela a hele akula i kahi a ke Akua i ʻī mai ai iā ia.
4I ke kolu o ka lā ʻalawa aʻela nā maka o ʻAberahama, a ʻike akula ia wahi mamao aku.
5ʻĪ akula ʻo ʻAberahama i kona mau kānaka uʻi, “E noho iho ʻolua ma ʻaneʻi me ka hoki, a hele nō māua me ke keiki i ʻō e hoʻomana ai; a hoʻi hou mai i o ʻolua nei.”
6Lawe aʻela ʻo ʻAberahama i ka wahie no ka mōhai kuni, a kau ihola ma luna o kāna keiki ʻo ʻIsaʻaka, lawe akula ia i ke ahi, a me ka pahi ma kona lima, a haele pū akula lāua.
7ʻŌlelo akula ʻo ʻIsaʻaka i kona makua kāne, iā ʻAberahama, “E kuʻu makua!” ʻĪ maila kēlā, “Eia wau, e kuʻu keiki.” ʻĪ akula ia, “Eia ke ahi, a me ka wahie; ʻauhea hoʻi ke keiki hipa i mōhai kuni?”
8ʻĪ maila ʻo ʻAberahama, “E kuʻu keiki, na ke Akua nō e hoʻomākaukau i keiki hipa nāna i mōhai kuni.” A haele pū akula lāua.
9¶ A hiki akula lāua i kahi a ke Akua i ʻī mai ai iā ia; hana ihola ʻo ʻAberahama i kuahu i laila, kau pono akula i ka wahie ma luna, hīkiʻi ihola ia i kāna keiki iā ʻIsaʻaka, a kau akula iā ia ma ke kuahu ma luna o ka wahie.
10ʻŌ akula ko ʻAberahama lima, a lālau i ka pahi e pepehi i kāna keiki.
11Kāhea maila ka ʻānela o Iēhova mai ka lani mai, ʻī maila, “E ʻAberahama! E ʻAberahama!” ʻĪ akula kēlā, “Eia wau.”
12ʻĪ maila ia, “Mai kau aku ʻoe i kou lima ma luna o ke keiki, ʻaʻole hoʻi e mea iki aku iā ia; no ka mea, ke ʻike nei au, ua makaʻu ʻoe i ke Akua; no ka mea, ʻaʻole ʻoe i ʻauʻa i kāu keiki, i kāu keiki ponoʻī iaʻu.”
13ʻAlawa aʻela nā maka o ʻAberahama i luna, ʻike akula, aia hoʻi, ma kona kua he hipa kāne, ua hihia kona pepeiaohao i ka nāhelehele; hele akula ʻo ʻAberahama, lālau akula i ua hipa kāne lā, a kaumaha akula iā ia i mōhai kuni, i kala no kāna keiki.
14Kapa akula ʻo ʻAberahama i ka inoa o ia wahi, ʻo IĒHOVA-Iire; me ia i ʻōlelo ʻia mai ai a hiki i kēia lā, Ma ka mauna o Iēhova e hoʻomākaukau ʻia ai.
15Kāhea hou maila ka ʻānela o Iēhova iā ʻAberahama mai ka lani mai,
16ʻī maila, “Ke ʻōlelo mai nei ʻo Iēhova, ma oʻu nei au i hoʻohiki iho ai, no kāu hana ʻana i kēia mea, ʻaʻole hoʻi i ʻauʻa i kāu keiki, i kāu keiki ponoʻī,
17“E hoʻopōmaikaʻi nui aku nō au iā ʻoe, a e hoʻonui loa aku hoʻi au i kāu poʻe mamo e like me nā hōkū o ka lani, a me nā one ma kahakai; a e lilo auaneʻi i kāu poʻe mamo ka ʻīpuka o kona poʻe ʻenemi.
18“A ma kou mamo e hoʻopōmaikaʻi ʻia ai nā lāhui kanaka a pau o ka honua; no ka mea, ua hoʻolohe mai ʻoe i koʻu leo.”
19Hoʻi hou akula ʻo ʻAberahama i kona mau kānaka uʻi, kū aʻela lāua a hele pū akula i Beʻereseba; a noho ihola ʻo ʻAberahama i Beʻereseba.
20¶ Ma hope mai o ia mau mea, haʻi ʻia mai iā ʻAberahama, i ka ʻī ʻana mai, “Aia hoʻi, ʻo Mileka, ua hānau nō hoʻi ʻo ia i nā keiki na kou kaikuaʻana na Nahora:
21“ʻO Huza kāna hiapo, ʻo Buza kona kaikaina, a ʻo Kemuʻela ka makua kāne o ʻArama,
22ʻo Keseda, a ʻo Hazo, a ʻo Piledasa, a ʻo Iidelapa, a ʻo Betuʻela.”
23Na Betuʻela ʻo Rebeka. ʻO kēia mau mea ʻewalu kā Mileka i hānau ai na Nahora ke kaikuaʻana o ʻAberahama.
24Na kāna haiā wahine hoʻi, ʻo Reuma kona inoa, nāna hoʻi i hānau mai ʻo Teba, ʻo Gehama, ʻo Tahasa, a ʻo Maʻaka.
Currently Selected:
KA BUKE MUA A MOSE, I KAPA ʻIA KINOHI 22: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
