KA BUKE MUA A MOSE, I KAPA ʻIA KINOHI 21
21
MOKUNA XXI.
1 Hānau ʻia ʻo ʻIsaʻaka. 4 ʻOki poepoe ʻia hoʻi. 6 ʻOliʻoli Sara. 9 Hoʻokuke ʻia ʻo Hagara lāua ʻo ʻIsemaʻela. 17 Loaʻa ka ʻānela o ke Akua iā Hagara ma ka wao nahele. 21 Ko ʻIsemaʻela mare ʻana. 22 Kā ʻAbimeleka berita me ʻAberahama. 34 Kona noho ʻana me ko Pilisetia.
1¶ ʻIke maila ʻo Iēhova iā Sara e like me kāna i ʻī mai ai; a hana maila ʻo Iēhova iā Sara e like me kāna i ʻōlelo mai ai.
2No ka mea, hāpai aʻela ʻo Sara, a hānau maila he keiki kāne na ʻAberahama i kona wā ʻelemakule; i ka manawa a ke Akua i ʻōlelo mai ai iā ia.
3Kapa akula ʻo ʻAberahama i ka inoa o kāna keiki i hānau nāna, i ka mea a Sara i hānau ai nāna, ʻo ʻIsaʻaka.
4I ka pō ʻawalu, ʻoki poepoe aʻela ʻo ʻAberahama i kāna keiki iā ʻIsaʻaka e like me kā ke Akua i kauoha mai ai iā ia.
5Hoʻokahi haneri makahiki o ʻAberahama i ka wā i hānau ai ʻo ʻIsaʻaka nāna.
6ʻĪ maila ʻo Sara, “Ua hōʻakaʻaka mai nō ke Akua iaʻu, a e ʻakaʻaka pū hoʻi me aʻu ka poʻe lohe a pau.”
7ʻĪ maila hoʻi ʻo ia, “ʻO wai ka mea i ʻōlelo iā ʻAberahama, e hānai auaneʻi ʻo Sara i nā keiki i ka waiū? No ka mea, ua hānau iho nei au i keiki kāne nāna i kona wā ʻelemakule.”
8¶ Nui aʻela ua keiki nei, a ukuhi ia; a hana ihola ʻo ʻAberahama i ka ʻahaʻaina nui, i ka lā a ʻIsaʻaka i haʻalele ai i ka waiū.
9ʻIke akula ʻo Sara i ke keiki a Hagara no ʻAigupita, i ka mea āna i hānau ai na ʻAberahama, e hoʻomāʻewaʻewa ana.
10No ia mea, ʻī maila ʻo ia iā ʻAberahama, “E hoʻokuke aku ʻoe i ua kauā wahine lā a me kāna keiki; no ka mea, ʻaʻole e hoʻoili pū ʻia aku ka waiwai i ke keiki a ua kauā wahine lā me kaʻu keiki, me ʻIsaʻaka.”
11He mea ʻehaʻeha loa ia i ka manaʻo o ʻAberahama, no kāna keiki.
12ʻĪ maila ke Akua iā ʻAberahama, “Mai hōʻehaʻeha ʻoe i kou naʻau no ke keiki, a no kāu kauā wahine, e hoʻolohe aku ʻoe i ka leo o Sara i ka mea a pau āna i ʻōlelo mai ai iā ʻoe; no ka mea, e kapa ʻia aku kāu poʻe mamo ma muli o ʻIsaʻaka.
13“A e hoʻolilo auaneʻi hoʻi au i ke keiki a ke kauā wahine i lāhui kanaka; no ka mea, ʻo kāu keiki ia.”
14Ala aʻela ʻo ʻAberahama i ke kakahiaka nui, lālau akula ia i ka berena a me ka wai i loko o ka hue a hāʻawi aʻela iā Hagara, a kau akula ma luna o kona poʻohiwi, a me ke keiki nō hoʻi, a kuʻu akula iā ia; hele aku nō ia, a kuewa wale aʻela ma loko o ka wao nahele ʻo Beʻereseba.
15A pau aʻela ka wai i loko o ka hue wai, waiho ihola ia i ke keiki ma lalo o kekahi lāʻau ʻuʻuku.
16Hele akula ia, a noho ihola i kahi kūpono iā ia, e mamao aku ana e like me ka pana ʻana o ka pua; no ka mea, ʻī ihola ia, “ʻAʻole au e pono ke ʻike i ka make ʻana o ke keiki.” Noho akula ia i kahi kūpono, a hoʻokiʻekiʻe aʻela ia i kona leo, a uē ihola.
17Hoʻolohe maila ke Akua i ka leo o ke keiki; a kāhea maila ka ʻānela o ke Akua iā Hagara mai ka lani mai, ʻī maila iā ia, “He aha kāu e Hagara? Mai makaʻu ʻoe; no ka mea, ua hoʻolohe mai nō ke Akua i ka leo o ke keiki ma kona wahi i waiho ai.
18“E kū aʻe ʻoe, e kaʻikaʻi aʻe i ke keiki, a e hoʻopaʻa aku kou lima iā ia; no ka mea, e hoʻolilo auaneʻi au iā ia i lāhui kanaka nui.”
19Hoʻokaʻakaʻa aʻela ke Akua i kona mau maka, a ʻike akula ia i kekahi luawai; hele akula ia, ukuhi ihola a piha ka hue wai i ka wai, a hoʻoinu ihola i ke keiki.
20Me ua keiki nei nō ke Akua, a nui aʻela ia, a noho ihola ma ka wao nahele, a lilo aʻela ia i kanaka pana pua.
21Noho ihola ia ma ka wao nahele ʻo Parana; a lawe aʻela kona makuahine i wahine nāna, no ʻAigupita mai.
22¶ Ia manawa, ʻōlelo maila ʻo ʻAbimeleka lāua ʻo Pikola kona luna koa iā ʻAberahama, i ka ʻī ʻana mai, “Me ʻoe nō ke Akua i nā mea a pau āu e hana nei.
23“No laila hoʻi, e hoʻohiki ʻoe noʻu ʻānō ma ke Akua, ʻaʻole ʻoe e hoʻopunipuni mai iaʻu, ʻaʻole i kaʻu keiki, ʻaʻole hoʻi i kaʻu moʻopuna; e like me ka lokomaikaʻi aʻu i hana aku ai iā ʻoe, pēlā hoʻi ʻoe e hana mai ai iaʻu, a i ko ka ʻāina āu i noho iho ai.”
24ʻĪ akula ʻo ʻAberahama, “E hoʻohiki nō wau.”
25Aʻo akula hoʻi ʻo ʻAberahama iā ʻAbimeleka no ka luawai a nā kauā a ʻAbimeleka i kāʻili aku ai.
26ʻĪ maila ʻo ʻAbimeleka, “ʻAʻole au i ʻike i ka mea nāna i hana ia mea; ʻaʻole hoʻi ʻoe i haʻi mai; ʻaʻole hoʻi au i lohe a hiki i kēia lā.”
27Lālau akula ʻo ʻAberahama i nā hipa a me nā bipi kāne, a hāʻawi akula ia mau mea no ʻAbimeleka; a hoʻopaʻa ihola lāua a ʻelua i berita.
28A hoʻonoho akula ʻo ʻAberahama i nā hipa keiki wahine i ʻehiku ma kahi kaʻawale.
29Nīnau maila ʻo ʻAbimeleka iā ʻAberahama, “I mea aha kēia mau hipa keiki wahine ʻehiku, āu i hoʻonoho iho ai ma kahi kaʻawale?”
30ʻĪ akula kēlā, “No ka mea, e lawe ʻoe i kēia mau hipa keiki wahine ʻehiku na kuʻu lima aku, i mea hōʻike maka noʻu, naʻu nō i ʻeli iho i kēia luawai.”
31No laila, kapa ihola ʻo ia ia wahi, ʻo Beʻereseba; no ka mea, i laila i hoʻohiki aku ai lāua a ʻelua.
32Pēlā nō lāua i hoʻopaʻa iho ai i berita ma Beʻereseba; a laila, kū aʻela ʻo ʻAbimeleka lāua ʻo Pikola kona luna koa, a hoʻi hou akula lāua i ka ʻāina o ko Pilisetia.
33Kanu ihola ʻo ʻAberahama i lāʻau ma Beʻereseba, a kāhea akula i laila i ka inoa ʻo Iēhova ke Akua Mau Loa.
34Noho ihola ʻo ʻAberahama ma ka ʻāina o ko Pilisetia i nā lā he nui loa.
Currently Selected:
KA BUKE MUA A MOSE, I KAPA ʻIA KINOHI 21: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
