KA BUKE MUA A MOSE, I KAPA ʻIA KINOHI 20
20
MOKUNA XX.
1 Ko ʻAberahama noho ʻana ma Gerara. 2 Hōʻole i kāna wahine. 3 Aʻo ʻia ʻo ʻAbimeleka nona, 9 A nāna i aʻo aku iā ʻAberahama. 14 Kāna hoʻihoʻi ʻana iā Sara, 16 a me ke aʻo aku iā ia. 17 Ola ʻo ʻAbimeleka i kā ʻAberahama pule.
1¶ Hele akula ʻo ʻAberahama mai laila aku ma ka ʻĀina Kūkulu Hema, a noho hoʻi ia ma waena o Kadesa a ʻo Sura, a ma Gerara kona noho malihini ʻana.
2ʻŌlelo akula ʻo ʻAberahama no kāna wahine no Sara, “ʻO ia nō kuʻu kaikuahine,” a hoʻouna maila ʻo ʻAbimeleka ke aliʻi o Gerara, a lawe akula iā Sara.
3A hele maila ke Akua i o ʻAbimeleka lā ma ka moeʻuhane i ka pō, ʻī maila iā ia, “Aia hoʻi, he kanaka make ʻoe, no ka wahine āu i lawe iho nei; no ka mea, he wahine mea kāne ia.”
4Akā, ʻaʻole i hoʻopili ʻo ʻAbimeleka iā ia; ʻī akula ʻo ia, “E ka Haku, e pepehi mai nō hoʻi ʻoe i ka lāhui kanaka hala ʻole?
5“ʻAʻole anei ia i ʻōlelo mai iaʻu, ‘ʻO koʻu kaikuahine ia’? A ʻo ka wahine, ʻo ia kai ʻī mai, ‘He kaikunāne kēlā noʻu.’ Ma ka manaʻo pono o kuʻu naʻau a me ka hala ʻole o kuʻu mau lima kaʻu i hana aku ai i kēia.”
6ʻĪ maila ke Akua iā ia ma ka moeʻuhane, “ʻOiaʻiʻo, ke ʻike nei au, ua hana aku ʻoe i kēia ma ka manaʻo pono o kou naʻau; a ua hoʻopaʻa nō hoʻi au iā ʻoe, i ʻole ʻoe e hana hewa mai iaʻu; no laila, ʻaʻole au i ʻae aku iā ʻoe e hoʻopā iā ia.
7“No ia mea hoʻi, e hoʻihoʻi aku na ua kanaka lā i kāna wahine; no ka mea, he kāula ia, a nāna nō e pule mai nou, i ola ai ʻoe; a i ʻole ʻoe e hoʻihoʻi mai iā ia, a laila e ʻike pono ʻoe, he ʻoiaʻiʻo e make nō ʻoe, ʻo ʻoe a me ou poʻe a pau”
8¶ Ala aʻela ʻo ʻAbimeleka i kakahiaka nui, hōʻuluʻulu aʻela i kāna poʻe kauā a pau, a haʻi akula i kēia mau mea ma loko o ko lākou mau pepeiao; a makaʻu loa ihola nā kānaka.
9A laila, kāhea maila ʻo ʻAbimeleka iā ʻAberahama, ʻī maila iā ia, “He aha kāu i hana mai ai iā mākou? He aha hoʻi koʻu hala iā ʻoe, i hoʻoili mai ai ʻoe i luna iho oʻu a ʻo koʻu aupuni ka hewa nui? Ua hana mai ʻoe iaʻu i nā mea pono ʻole ke hana ʻia.”
10Nīnau maila ʻo ʻAbimeleka iā ʻAberahama, “He aha kāu i ʻike mai ai, i hana iho ai ʻoe i kēia mea?”
11ʻĪ akula ʻo ʻAberahama, “No ka mea, ʻī ihola au ma kuʻu naʻau, ‘He ʻoiaʻiʻo, ʻaʻole ka makaʻu i ke Akua ma kēia wahi; a e pepehi mai auaneʻi lākou iaʻu no kuʻu wahine.
12‘He ʻoiaʻiʻo hoʻi, ʻo koʻu kaikuahine nō ia, ke kaikamahine a kuʻu makua kāne, ʻaʻole naʻe ia ke kaikamahine a kuʻu makuahine, a lilo maila ia i wahine naʻu.’”
13A i ka manawa a ke Akua i hoʻoʻauana mai ai iaʻu mai ka hale o koʻu makua kāne mai, ʻī akula au iā ia nei, “Eia kou lokomaikaʻi āu e hōʻike mai ai iaʻu; i nā wahi a pau e hiki aku ai kāua, e ʻōlelo aku ʻoe noʻu, ‘ʻO koʻu kaikunāne ia.’”
14Lawe aʻela ʻo ʻAbimeleka i nā hipa, me nā bipi kāne, i nā kauā kāne a me nā kauā wahine, a hāʻawi maila iā ʻAberahama, a hoʻihoʻi maila ʻo ia iā Sara kāna wahine nāna.
15ʻĪ maila ʻo ʻAbimeleka, “Aia hoʻi, i mua ou koʻu ʻāina, e noho ma kahi i makemake ai ʻoe.”
16ʻĪ maila hoʻi ʻo ia iā Sara, “Aia hoʻi, ua hāʻawi iho nei au i nā ʻāpana kālā he tausani na kou kaikunāne; aia hoʻi, he mea pale maka ia nou i mua o ka poʻe a pau me ʻoe, a me nā mea a pau, pēlā ʻo ia i aʻo ʻia mai ai.”
17Pule akula ʻo ʻAberahama i ke Akua, a hoʻōla maila ke Akua iā ʻAbimeleka, me kāna wahine a me kāna poʻe kauā wahine; a hānau keiki lākou.
18No ka mea, ua papani ʻia e Iēhova nā ʻōpū o nā wāhine a pau o ka hale o ʻAbimeleka, no Sara ka wahine a ʻAberahama.
Currently Selected:
KA BUKE MUA A MOSE, I KAPA ʻIA KINOHI 20: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
