KA BUKE MUA A MOSE, I KAPA ʻIA KINOHI 23
23
MOKUNA XXIII.
1 Ka make ʻana o Sara. 3 Kūʻai ʻia ʻo Makepela i ilina no ʻAberahama. 19 Kanu ʻia ʻo Sara.
1¶ Hoʻokahi haneri nā makahiki me ka iwakāluakumamāhiku o Sara; ʻo ia nā makahiki o ke ola ʻana o Sara.
2A make akula ʻo Sara ma Kiriata ʻAreba, ʻo ia ʻo Heberona ma ka ʻāina ʻo Kanaʻana; a hele maila ʻo ʻAberahama e uē a e kanikau iā Sara.
3Kū aʻela ʻo ʻAberahama i luna, mai ke alo aʻe o kāna mea i make, ʻōlelo akula ia i nā mamo a Heta, ʻī akula,
4“He malihini nō wau e noho wale ana me ʻoukou; e hāʻawi mai i ilina i waena o ʻoukou, i lilo ia noʻu, i kanu aku au i kuʻu mea i make, mai koʻu mau maka aku.”
5ʻŌlelo mai nā mamo a Heta iā ʻAberahama, ʻī maila iā ia,
6“E hoʻolohe mai ʻoe i kā mākou, e kuʻu haku, he aliʻi nui nō ʻoe i waena o mākou; ma ka ilina maikaʻi loa o mākou, e kanu iho ai ʻoe i kāu mea make. ʻAʻole e ʻauʻa kekahi o mākou i kona ilina iā ʻoe, i ʻole ʻoe e kanu i kou mea make.”
7Kū aʻela ʻo ʻAberahama, a kūlou ihola i mua o nā kānaka o ka ʻāina, ʻo nā mamo a Heta.
8Kamaʻilio akula ia me lākou, ʻī akula, “Inā ʻo ko ʻoukou manaʻo ia, i kanu iho ai au i kuʻu mea make mai oʻu mau maka aku; e hoʻolohe mai, a e noi aku ʻoukou iā ʻEperona ke keiki a Zohara noʻu;
9i hāʻawi mai ai ʻo ia i ke ana o Makepela noʻu; nona nō ia, aia nō ma ka palena o kāna mahina ʻai; no nā kālā e pono ke kūʻai, e hāʻawi mai nō ʻo ia ia wahi noʻu i ilina i waena o ʻoukou.”
10Noho pū ihola ʻo ʻEperona me nā mamo a Heta; ʻōlelo maila ʻo ʻEperona ka Heta iā ʻAberahama, ma ka lohe o nā mamo a Heta, a ʻo ka poʻe a pau i komo ma ka ʻīpuka o ke kūlanakauhale, ʻī maila,
11“E kuʻu haku, e hoʻolohe mai ʻoe iaʻu; ke hāʻawi wale aku nei au i ka mahina ʻai a me ke ana ma loko, nou, ke hāʻawi aku nei au nou ia wahi; i mua o nā keiki a oʻu poʻe kānaka, ke hāʻawi aku nei au nou ia wahi; e kanu aku ʻoe i kāu mea make!”
12Kūlou ihola ʻo ʻAberahama i lalo, i mua o nā kānaka o ia ʻāina.
13ʻĪ akula ʻo ia iā ʻEperona ma ka lohe o nā kānaka o ia ʻāina, i ka ʻī ʻana, “Ke noi aku nei au iā ʻoe, e hoʻolohe mai ʻoe iaʻu, Inā e ʻae mai ʻoe, e hāʻawi aku nō wau i ke kālā no ua mahina ʻai lā; e lawe ʻoe i kaʻu, a e kanu nō wau i kuʻu mea make i laila.”
14ʻŌlelo maila ʻo ʻEperona iā ʻAberahama, ʻī maila iā ia,
15“E kuʻu haku, e hoʻolohe mai iaʻu; ʻehā haneri sekela kālā ke kumu kūʻai o ia ʻāina; he aha hoʻi ia i waena o kāua? E kanu hoʻi ʻoe i kāu mea make.”
16ʻAe maila ʻo ʻAberahama iā ʻEperona; a kaupouna ihola ʻo ʻAberahama no ʻEperona i ke kālā āna i ʻōlelo ai ma ka lohe o nā mamo a Heta, ʻehā haneri sekela kālā, he kālā pono i ka poʻe kūʻai.
17¶ A ua hoʻolilo paʻa ʻia ka mahina ʻai a ʻEperona ma Makepela, ma ke alo o Mamere, ʻo ka mahina ʻai me ke ana ma loko, a me nā lāʻau a pau o ua mahina ʻai lā, a e puni ana ma nā palena a pau,
18No ʻAberahama i wahi nona ma ke alo o nā mamo a Heta, i mua hoʻi o ka poʻe a pau i komo ma ka ʻīpuka o kona kūlanakauhale.
19Ma hope iho kanu ihola ʻo ʻAberahama i kāna wahine iā Sara i loko o ke ana ma ka mahina ʻai ʻo Makepela ma ke alo o Mamere; ʻo ia ʻo Heberona i ka ʻāina ʻo Kanaʻana.
20Ua hoʻolilo paʻa ʻia ka mahina ʻai a me ke ana ma loko, no ʻAberahama i ilina nona, e nā mamo a Heta.
Currently Selected:
KA BUKE MUA A MOSE, I KAPA ʻIA KINOHI 23: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
