Saint Jean 9

1Ko̱ Jésus mi ta, kè ko̱ njou‐foukoura none ko̱ ma nè mi mboung nè on jing rou. 2Da njou‐séna bong nèli mi oui nè, ka sa: Rabbi, guème ko̱ nding békéfèn, njoukou aïn maléba baba nè da ma nè, da kème tèn ba njou‐foukoura none on lé? 3Jésus mi féré sa hi kli: Tane ti ba njoukou aïn maléba baba nè da ma nè, mi ko̱ nding békéfèn ya, da on ba baï téna none pina Ouone an bilè bi kala. 4Dadaon an nème nding pina a kè on ko̱ mi pi mi ka séssé, da ko̱ hangnachoung mi si tou, njoukouna mbéo mi tane ga ma baï ndingna pina ya. 5Da mono, ko̱ mème pane jing njou‐koukoulali, mè ba takanafèn a njou‐koukoulali.

6Da afal ko̱ kème sa on tou, kè san sassame kon koukoula, da wan poïn rou ka lèn bi nona njou‐foukoura none on, 7da kè sa hi nè: Mo sé tourou guè bil mbi Siloé (ling on mi sa ba pi tou). Njoukou aïn mi sé, da tourou tou, da ko̱ kème féré fal kè ko̱ guèl tangta. 8Da ba nèli da kli on ko̱ mi toutou nè ambèl, ko̱ kè ba njou‐ndounafèn, kli sa: Tane ti ba kè on mono ko̱ mi kaou jinguèl baï ndouna fèn mini ya lé? 9Hanali mi sa: Kè mono. Da afékéli mi sa: Haï, kè mabahana ka kè. Da kè sa: Mè mini. 10Mono, da kli oui nè: Fème ko̱ nding nono da bourou lé? 11Kè féré sa hi kli: Njoukou on ko̱ ling‐è ba Jésus mi wan poïn ka lèn bi noni, da sa hi mi: Mo sé guè bil mbi Siloé ka tourou. Da mono, mè sé ka tourou tou, da ko̱ guèl. 12Kli sa hi nè: Kè on an hane dé? Kè sa: Mè tane tou ya.

13Da kli, ya nè, kè tang njou‐foukoura none on jinguèl, gui mona pharisienli. 14Ka name o̱keo̱ ba name sabbat ko̱ Jésus mi wan poïn, da bourou nona njoukou on. 15Mono, pharisienli mi ndé oui nè kéng ba aféké, fème ko̱ nding nonè da kème ko̱ guèl on. Da kème sa hi kli: Kème wan poïn ka bi noni, da mè tourou, da mè ko̱ guèl. 16Da njoukou hanali an wora pharisienli mi sa: Njoukou on tane ga ourou gui ka mona Ouone ya, baï ko̱ kème tane ga pèng name sabbat ya. Da afékéli mi sa: Njou‐békéfèn ma baï ndingna fèn‐to̱ko̱nakèli mahana ka aïnli ko̱ kème nding ane mèlé? Da kli bon mi wal hana. 17Da kli oui njou‐foukoura none aféké: Mo sa amo ba fèn toula kè on, ko̱ mi bourou nono tou, kè ba guè lé? Da kè sa: Kè ba prophète.

18Juifli tane ga la baï on bilaou ya, ko̱ kè on ba njou‐foukoura none ambèl da nonè mi bourou tou, bo̱l tèn ko̱ klime di ba baba nè da ma a kè on ko̱ nonè mi bourou tou. 19Da kli oui kli, ka sa: Kè ba goune baï mini, ko̱ ouime sa ouime mboung nè ka ba foukoura none dé? Fème ko̱ nding nonè da kème ko̱ guèl koukoulion lé? 20Baba nè da ma nè mi féré sa, ka sa: Na toutou kè on ba goune na ka babaï, ko̱ name mboung nè ba foukoura none; 21da na tane ga tou fèn on ko̱ mi nding nonè da kème ko̱ guèl koukoulion ya, da tane ga tou kong ba guème ko̱ bourou nonè, na tou ya. Kè pong tou, oui oui nè, da yé kè ma to̱ko̱ bongkè fènè. 22Baba nè da ma nè mi sa baïnjaka ainli baï ko̱ klime ngou waou nona Juifli; baï ko̱ Juifli mi kang bon jing hana tou, tokoré njoukouna mi sa bi kala ko̱ kè ba Christ, kli ma ni nè tèn kala an bil synagogue. 23Mono, baï on ko̱ baba nè da ma nè mi sa: Kè pong tou, oui oui nè fènè.

24Da pharisienli mi di tang njou‐foukoura none on jinguèl, bo̱ko̱ séré, ka sa hi nè: Mo jone ba Ouone; na toutou njoukou aïn ba njou‐békéfèn. 25Da njoukou on mi féré sa: Tokoré kème ba njou‐békéfèn mè tane tou ya; da mè toutou fèn mbéo, ko̱ ambèl mè ba njou‐foukoura, da kassénaï mème ko̱ guèl. 26Kli kaïn oui nè ba aféké: Kè nding ba fèn jing mo lé? Da kè bourou nono ka ba fèn lé? 27Kè féré sa hi kli: Mè sa hi oui tou, da oui tane ga la ya, baïfèn da ouime ji baï lanakè ba aféké lé? Oui ji baï guina njou‐séna bong nèli kéng lé? 28Kli kèkè nè ka sa: Mo ba njou‐séna bong nè, ka ama, na ba njou‐séna bongli a Moïse. 29Na toutou ko̱ Ouone mi sa baï jing Moïse jinguèl; da an njoukou on na tane ga tou guèl on ko̱ kème ourou gui ka ndourou ya. 30Njoukou aïn mi féré sa, ka sa hi kli: Fèn aïn laou baï mi sé siya baï ko̱ ouime tane ga tou guèl guina amè ya; da kème bourou noni tou. 31Na toutou ko̱ Ouone mi tane la baï a njou‐békéfènli ya, da tokoré njoukouna mi hiou Ouone da kaou mara fal toulè, kè on Ouone mi la nè. 32Jinguèl ka tang ambèl na tane ga la njoukouna mi bourou nona njou‐foukoura on ko̱ kème tèn jing rou ya. 33Da tokoré njoukou aïn mi tane ga gui ka ba mona Ouone ya, kè tane ma baï ndingna fèna mbéo ya. 34Klime féré sa, ka sa hi nè: Mo ko̱ tèn an bo̱ko̱ békéfènli bon, da mome ji baï to̱ko̱na fèn hi na lé? Da kli ni nè tèn sé kala.

35Jésus lala ko̱ klime ni nè tèn kala; da ko̱ kème jing nè, kè sa hi nè: Mo la bilaou a Goune a Ouone dé? 36Kème féré sa, ka sa: Kè ba guè, Nanjou, da mème la bilaou‐è lé? 37Jésus sa hi nè: Mo ko̱ nè tou da ba kè mini, ko̱ sa baï jing mo kassénaï. 38Da kè sa: Nanjou, mè la bilaou. Da kème houkou mbèlè ka hiou nè.

39Da Jésus mi sa: Mè gui koukoula aïn baï wala baï, da an kli on ko̱ tane ga ko̱ guèl ya, mi ko̱ guèl, da an kli on ko̱ mi ko̱ guèl, mi féré tèn ba njou‐foukoura. 40Ko̱ pharisien hanali on ko̱ kaou jing nè mi la baïnjaka aïn, kli sa hi nè: Na ba foukoura kéng lé? 41Jésus mi sa hi kli: Tokoré ouime yé ba foukoura, békéfèn abaï tane tiya. Da kassénaï ko̱ ouime sa: Na ko̱ guèl; mono baï on békéfèn baï mi pane.

Currently Selected:

Saint Jean 9: KBN1947

Highlight

Copy