Saint Jean 10

1Babaï, babaï, mi mè sa hi oui, kè on ko̱ tane ri ka njaka ndol an badouali ya, da hé gui bilkè ka guèl afèkè, kè ba njou‐riya da ba njou‐rinafèn tane waou. 2Da kè on ko̱ mi ri ka njakakè, kè ba njou‐kora‐badoua a badouali. 3Boï bourou njaka ndol hi nè, da badouali mi la mbokè; kè di dodok badoua nèli fènè ka ling kli mbèo mbèo bon, da lang kli sé kala. 4Ko̱ kème bourou dodok badoua nèli kon kala tou, kè sé dambèl hi kli; da badouali mi tong nè, baï ko̱ klime toutou mbo̱kè. 5Da kli tane tong goni njoukou ya, kli ngou nè, baï ko̱ klime tane tou mbo̱ka goni njoukouli ya.

6Jèsus mi sa ébèlbaï aïn hi kli, da kli tane tou nguite toul fènli on ko̱ kème sa hi kli ya.

7Da mono Jésus mi kaïn sa baï ba aféké hi kli: Babaï, babaï, mi mè sa hi ou, mè ba njaka ndol a badouali. 8Kli on bon ko̱ ti gui dambèl hi mi, kli ba njou‐riyali da ba njou‐rinafènli tane waou; da badouali mi tane ga la kli ya. 9Mè ba njaka mboro. Tokorè njoukouna mi ri bilkè ka mboro ni, kè ma kou, da kè ri gui bilkè ka tèn sé kala, da kè ma jing laka bèlta. 10Njou‐riya gui baï rina fèn ho̱kè, ka i fèn da baï bona fèn. Ami, mè gui baï an klime jing yana, da yana on mi ti jing kli guèbambèl.

11Mè ba bèla njou‐kora‐badoua. Bèla njou‐kora?-?badoua mi yèng yana nè baï toula badouali. 12Da njou‐pina ko̱ mi tane ga ti ba njou‐kora‐badoua ya, da badouali mi tane ga ti ba amè ya, da ko̱ kème ko̱ naïn loup mi yé guina, kè yèng badouali ka ngou, da naïn loup mi ba kli, da badouali mi yaïli. 13Njou‐pina mi ngou baï ko̱ kè ba njou‐pina, da tane ga ko̱ro̱ badouali ya. 14Mè ba bèla njou‐kora‐badoua, da mè toutou badoua nili da badoua nili mi toutou mi, 15mahana ko̱ Baba fènè mi toutou mi da mè toutou Baba. Da mème yèng yana ni baï toula badouali. 16Da badoua ni hanali ba aféké mana ko̱ mi tane ga ti ba an ndol aïn ya; dadaon yé mè ndé lang kli kéng; da kli ma la mbo̱ko̱ ni, da ma ndoï ndol mbéo, da njou‐kora‐badoua mbéo. 17Mono, baï on ko̱ Baba mi sé hang ni ta, baï ko̱ mème yèng yana ni, an mème féré kaïn ya nè ba aféké. 18Njoukouna mbéo ma ya yana on, an ndo̱ko̱ ni ya, da mème ko̱ yèng yana on fèni: mè jing njèran baï yèngnakè; da mè jing njèran baï féra yanakè; bina baïnjaka on mi gui ka ba mona Baba ni.

19Baï toul baïnjaka aïnli Juifli mi wal jing hana ba aféké. 20Njoukou hanali nyèta an woro kli mi sa: Kè jing zabolo da kè ba ngawa, baïfèn da ouime la baï nè lé? 21Njou‐afékéli mi sa: Baï aïn tane ti ba baïnjaka njoukou jing zabolo ya; zabolo ma baï boura nona njou‐foukoura none dé?

22Name gnèna laka Dédicace mana an pou Jérusalem. Da ko̱ ka ba féou tétél. 23Da Jésus mi sèrè an bil temple, an bo̱ko̱ po̱ko̱ro̱kè ko̱ lingkè ba Salomon. 24Mono, da Juifli mi gui da o gui ki nè, ka sa hi nè: Name ro̱ko̱ ane da mome nignili jing na on lé? Tokoré mome yé ba Christ ka babaï, mo sa baï bi kala tang hi na.

25Jésus féré sa hi kli: Mè sa hi oui tou, da oui tane ga la bilaou ya. Pinali on ko̱ mème nding ka ling a Baba ni, mi ko̱ sa bongbaï touli. 26Da ko̱ ouime la bilaou ya, ba baï ko̱ oui tane ga ti ba badoua nili ya. 27Badoua nili mi la mbo̱ko̱ ni; da mè toutou kli, da klime sé fali. 28Da mè hi yana kambèlè hi kli; da kli ba limna tane tiya kambèlè, da njoukouna ba yana kli an ndo̱ko̱ ni tane tiya. 29Baba ni, kè on ko̱ mi hi kli hi mi, kè ta fènli bon; da njoukouna mbéo tane ma baï yana kli an ndo̱ka Baba ya. 30Mè da Baba ba mbéo.

31Da Juifli mi bi kone ba aféké baï wouna nè.

32Jésus féré sa hi kli: Mè to̱ko̱ bèla pina on ko̱ mi gui ka mona Baba nyèta hi oui: none pina ba fèn da ouime ji baï wouna mi ka kone dé? 33Juifli mi féré sa hi nè: Tane ti ba baï bèla pina mi ko̱ name ji baï wouna mo ka kone ya, da baï ko̱ mome poukou ba Ouone, da ko̱ mo ba njoukou da mome sé fong ba Ouone. 34Jésus mi féré sa hi kli: Mahana ka on ko̱ mi dé an takarata guingna abaï on ya lé?

Mè sa: Oui ba ouondi.

35Da tokoré kème bi ling akli ba ouondi, kli on ko̱ baïnjaka Ouone mi gui mone kli jinguèl, da Takarata a Ouone mi tane ga ma baï mougnoura ya. 36Oui sa baï an kè on ko̱ Baba fèni mi walè bi, da pi nè gui mona njou‐koukoula li: Mo poukou ba Ouone! Baï ko̱ mè sa: Mè ba Goune a Ouone dé? 37Da tokoré mème nding pina Baba ni ya, oui ba lana bilaou ni ya. 38Da tokoré mème nding pina on, mi ko̱ ouime tane ga la bilaou ni ya, oui la bilaou a pina aïnli, an ouime tou nguite ka babaï ko̱ Baba makaou an bili da mè an bila Baba.

39Roko baï aïn kli nza mborokè baï bana nè ba aféké; da kème ourou an ndo̱ko̱ kli.

40Da kème kaïn féré sé guè hélé mbi Jourdain ba aféké, an guèl on ko̱ Jean mi nding baptême an ndourou jinguèl, da kaou ndourou. 41Njoukouli nyèta mi guè monè da kli sa: Jean mi tane ga nding fèn‐to̱ko̱nakè hana mbéo ya; da fènli on bon ko̱ kème sa toula njoukou aïn ba babaï. 42Da njoukouli nyèta mi la bilaou‐è an ndourou.

Currently Selected:

Saint Jean 10: KBN1947

Highlight

Copy