Saint Jean 11

1Njoukouna mbéo mi na jangma ling‐è ba Lazare njou‐pou Béthanie, pou a Marie da Marthe njo̱ waïn fènè. 2Kè ba Marie on ko̱ mi kon nome yombo toula Jésus, da lou bo̱kè ka pouran toulè, yine nè Lazare mini ko̱ na jangma. 3Mono, njo̱ waïn fènèli on mi pi guè mona Jésus, ka sa hi nè: Nanjou, mo ko̱, kè on ko̱ mome ji nè ta, mi na jangma. 4Da ko̱ Jésus mi la baï aïn, kè sa: Jangma on tane ti ba baï houl ya, da ba baï hina jonafèn hi Ouone, da baï an Goune a Ouone mi jing jonafèn an ndourou.

5Da Jésus mi sé hang Marthe da njo̱ waïn fèné tèn Lazare ta. 6Da mono, ko̱ kème lala ba Lazare mi na jangma, kè kaou ma name séré an guèl on ko̱ kème kaou ndourou. 7Da afal on kè sa hi njou‐séna bongli: Gui, an name féré sé guè guèl Judée. 8Da njou‐séna bongli mi sa hi nè: Rabbi, kassénaï ko̱ Juifli mi nza mborokè baï wouna mo ka kone, da mome ji baï féra sé guè guèl Judée ba aféké lé? 9Jésus féré sa: Séssé mbéo l’heure mane botoulè‐séré ya lé? Da tokoré njoukouna mi sé ka séssé, kè tane bèn ya, baï ko̱ kème ko̱ takanafèn an koukoula aïn. 10Da tokoré njoukouna mi sé ka hangnachoung kè bèn, baï ko̱ takanafèn mi tane ga ti bilè ya. 11Da afal ko̱ kème sa baï aïn o̱tou, kè sa hi kli: Bako̱la na Lazare mi na name tou. Yé mè sé baï toumna nè. 12Mono, njou‐séna bongli mi sa hi nè: Nanjou, tokoré kème na name yé monè ma haï. 13Jésus sa ba baï toul houlè, da njou‐séna bongli mi kèrè ko̱ kème sa ba toul yana tana nè ka ba mboro nana name. 14Mono, baï on mi ko̱ Jésus sa tang bi kala ka babaï hi kli: Lazare hou tou. 15Da baï toul baï aïn an ouime la bilaou, mè jangndaï baï ko̱ mè tane ga ti soko ambèl ya, da oui gui an name sé guè monè. 16Mono, Thomas ko̱ kène ling‐è ba Didyme, mi sa hi gara njou‐séna bongli: Name ndé sé kéng ka hou jing nè.

17Da ko̱ Jésus mi gui tou, kè lala ko̱ Lazare mi na an bil pal ma name nèng tou. 18Pou Béthanie mi diya guè pou Jérusalem mahana ka kilomètre saï; 19da Juifli nyèta mi gui mona Marthe da Marie baï sana vo go̱ro kli baï ko̱ yine kli mi hou tou.

20Ko̱ Marthe mi la ba Jésus mi nding baï guina, kè sé baï wouna toul jing nè an domboro, da Marie mi pane amè an bil voulou. 21Marthe mi sa hi Jésus: Nanjou, tokoré mome yé guèl aïn jinguèl yine ni tane ga hou ya. 22Da mè toutou kassénaï fèn on ko̱ mome oui Ouone, yé Ouone ma hi mo. 23Jésus sa hi nè: Yé yine no tome. 24Marthe sa hi nè: Mè toutou ko̱ kè ma tome ka sèkèrè name tomnahoul. 25Jésus mi sa hi nè: Mè ba tomnahoul da yana kambèlè. Kè on ko̱ mi la bilaou ni da tongna kème hou, kè ma yan; 26da njoukouna ko̱ mi yan da la bilaou ni kè ba houl tane tiya kambèlè. Mo la bilaou on lé? 27Marthe sa hi nè: Ii, Nanjou, mè la bilaou on ko̱ mo ba Christ, Goune a Ouone, kè on ko̱ mi gui koukoula aïn.

28Da ko̱ kème sa baï on o̱tou, kè sé da di yine nè Marie, ka dèkèlè hi nè, ka sa: Njou‐to̱ko̱nafèn gui tou, da di mo. 29Da ko̱ Marie mi la baï aïn kè ourou siya gata ka sé guè mona Jésus. 30Jésus mi tane ga kan bil pou ya, kè pane guèl on ko̱ Marthe mi wou toul jing nè an ndourou. 31Da mono, Juifli on ko̱ mi kaou jing Marie an bil voulou, baï sana vo go̱rè, mi ko̱ ko̱ kème ourou gata ka tèn gui kala, kli tong bong‐è, baï ko̱ klime kèrè ba kè guè séna njaka pal baï léna léou.

32Da mono ko̱ Marie mi kan guèl on ko̱ Jésus mi kaou ndourou, kè ko̱ nè, ka lé bou koukoula an mbèlè, ka sa hi nè: Nanjou, tokoré mome yé guèl aïn jinguèl yine ni tane ga hou ya. 33Da ko̱ Jésus mi ko̱ ko̱ kème lé léou, da Juifli on ko̱ mi gui jing nè, mi ndé lé léou kéng, laou‐è mi hou mbi da go̱rè mi sé nè nyèta. 34Da kè sa: Oui bou nè hane dé? Kli sa hi nè: Nanjou, mo gui ka ko̱.

35Nona Jésus mi tèn mbiléou.

36Da mono, Juifli mi sa: Oui ko̱, ko̱ kème ji nè ta! 37Da njou‐hanali an zéng kli mi sa: Kè on ko̱ mi bourou nona njou‐foukoura none, yé kè ndé ma baï dèna mboro ambèl kéng an njoukou aïn mi tane hou ya lé?

38Da mona Jésus mi hou mbi ba aféké, da kème gui njaka pal. Ko̱ on ba kou, da kone saou mi tou njakakè. 39Jésus sa: Oui bourou kone saou guèfal. Marthe njo̱ waïn fèn a houl on mi sa hi nè: Nanjou, kassénaï monè mi fon tou, baï ko̱ kème hou ma name nèng tou. 40Jésus sa hi nè: Mè tane ga sa on hi mo jinguèl ya lé? Ko̱ mome la bilaou, yé mo ma ko̱ jonafèn a Ouone ya lé? 41Da mono, kli bourou kone saou guèfal tou. Da Jésus mi bi nonè da ènrèn guè sé nonkala, ka sa: Baba, mè kaou koukoula hi mo baï ko̱ mome la baï ni tou. 42Da mè toutou ko̱ mome la baï ni guèbassoko; da mè sa baï on, baï toula rokè njoukou aïnli bon on ko̱ o guèl aïn gui ki mi, an klime la bilaou ba mome ko̱ pi mi tou. 43Da afal ko̱ kème sa on tou, kè di fèn guè siya: Lazare mo tèn! 44Kè on ko̱ hou mi tèn kala, jing la gora houl on ko̱ mi gna bo̱kè tèn ndo̱kè bon, da goune lélé la ko̱ mi goukou nonè, Jésus mi sa hi kli: Oui sélè ka yèng nè an kème sé.

45Da mono Juifli an wora kli on ko̱ mi gui mona Marie, kli ko̱ fèn aïn ko̱ Jésus mi nding, da la bilaou‐è. 46Da hanali mi sé guè mona pharisienli, da sa bong fèn on ko̱ Jésus mi nding.

47Mono, loukou sacrificateurli da pharisienli mi ndoï njou‐wala baïli, da sa: Yé name nding ba fèn lé? Baï ko̱ njoukou aïn mi nding fèn‐to̱ko̱nakèli nyèta. 48Da tokoré name yèng nè mahana ka on bo̱on, yé njoukouli bon ma la bilaou‐è, da njou‐Romainli ma gui da tokoro pou na tèn mèrèn na bon. 49Da njoukouna mbéo an zéng kli, ko̱ ling‐è ba Caïphe, zaworo sacrificateur ka sakanaï, mi sa hi kli: Oui tane ga tou fèn mbéo ya. 50Da oui tane ga kèlè ya ko̱ dadaon baï abaï an njoukou mbéo mi hou baï toula njoukouli bon, da an mèran njoukouli bon mi tane hou ya. 51Da kè tane ga sa baï aïn fènè ya; da baï ko̱ kè ba zaworo sacrificateur ka sakanaï, da kème sa mahana ka prophète ko̱ yé Jésus ma hou baï pime pou aïn. 52Da tane ti ba baï pime pou aïn ho̱kè ya; da mono baï an kème ndoï goundi a Ouone bon on ko̱ mi yaïli manguèl toutoul ba mone mbéo.

53Mono, tinassaon ka name o̱kèo̱ kli bakèdakè jing hana an klime i nè. 54Da mono Jésus mi tane ga tèn nona ro̱kè ba aféké an nona Juifli ya; da kème ourou an ndourou da sé diya guè guèl woropa an pou Éphraïm; da kaou guè ndourou jing njou‐séna bong nèli.

55Name Pâque a Juifli mi hèdi tou. Da njoukouli nyèta mi ti hé sé ti dambèl hi name Pâque guè pou Jérusalem, baï ndingna dofèn toura kli. 56Da mono kli nza Jésus, da ko̱ klime kaou an bil temple kli sa jing hana: Oui kèrè ba fèn lé? Yé kè ba guina name gnèna laka aïn ya lé? 57Loukou sacrificateur da pharisienli mi hi bina baïnjaka hi kli ba, tokoré njoukouna mi tou guèlè, kème to̱ko̱ hi kli, an klime sé ba nè.

Currently Selected:

Saint Jean 11: KBN1947

Highlight

Copy