Saint Jean 20

1Ka titili name semaine, ka toulapélé, ko̱ guèl mi pane yira fifiti, Marie Magdala mi gui njaka pal, da kème ko̱ loukou kone saou mi bourou guèfal an njaka pal tou. 2Mono, kème ngou sé ka di Simon Pierre da njou‐séna bong hana on ko̱ Jésus mi ji nè ta, da kème sa hi kli: Kli bi Nanjou an bil pal tou, da name tane ga tou guèl on ko̱ klime bou nè rou ya.

3Mono, Pierre da kène njou‐séna bong on mi tèn kala da sé guè njaka pal. 4Da kli séré bon mi ndé ngou jing hana, da kène njou‐séna bong on mi ngou ta Pierre, ka ti kan njaka pal ti dambèl. 5Da kème houkou koukoula ka po ènrèn guè bil pal, da kè ko̱ ba la lin ko̱ na an koukoula, da tane ga ri guè bilkè ya. 6Da mono, Simon Pierre mi ndé tèn gui falè kéng, ka ri guè bil pal; da ko̱ la lin an koukoula, 7da goune lélé la ko̱ klime gna toulè jing rou mi tane ga na jing kène la lin ya, da kiwili bi toul hana ka na bi guèl aféké ka toul. 8Da afal kène njou‐séna bong on ko̱ mi ti kan njaka pal dambèl mi ndé ri guè bil pal kéng, da kè ko̱, ka la bilaou. 9Da kli tane ga toutou ko̱ Takarata a Ouone mi sa ba Jésus ma tome an wora houli ya. 10Da njou‐séna bongli on mi féré sé guè voul kli.

11Da Marie mi o njaka pal ka lé léou. Da ko̱ kème lé léou kè houkou ka po ènrèn guè bil pal, 12da kème ko̱ angeli séré ko̱ bou pouki la; aïn mbéo mi o an mboro laou toulè, an guèl on ko̱ houla Jésus mi na ndourou, da kènkè an mboro taka bo̱kè. 13Da kli sa hi nè: Waïn, baïfèn da mome lé léou on lé? Da kème féré sa hi kli: Baï ko̱ klime bi Nanjou ni tou, da mè tane ga tou guèl on ko̱ klime bou nè rou ya. 14Da ko̱ kème sa on o̱tou, kè ki monè ka ko̱ Jésus ko̱ o guè soko; da kème tane ga toutou ko̱ ba Jésus ya. 15Jésus mi sa hi nè: Waïn, baïfèn da mome lé léou on lé? Fème ko̱ mo nza lé? Kè kèrè ka laou‐è ko̱ kème ba njou‐pèngna waka, da kè sa hi nè: Nanjou, tokoré mome bi nè bou guèl hana, mo to̱ko̱ guèlkè hi mi, yé mè ma sé bi nè. 16Jésus mi sa hi nè: Marie! Kè ki monè ka sa hi nè ka njaka Hébreu: Rabbouni! on mi sa ba: Njou‐to̱ko̱nafèn! 17Jésus mi sa hi nè: Da ndo̱ko̱ moni ya; baï ko̱ mè tane ga hé sé guè mona Baba fènè ya. Da mo sé guè mona yine nili ka sa hi kli: Mè guè héna sé guè mona Baba ni tèn Baba baï, da Ouone ni tèn Ouone baï. 18Marie Magdala mi sé da to̱ko̱ bong fèn on hi njou‐séna bongli ko̱ kème ko̱ Nanjou tou, da kème sa fèn aïnli hi nè.

19Mono ko̱ bèlaléou mi lé tou, ka name o̱kèo̱ ko̱ ba titili name semaine, njou‐séna bongli mi tou njaka mboro bi rou an guèl on ko̱ klime kaou ndourou, baï ngouna waou nona Juifli, Jésus mi tèn gui ka o zéng kli, ka sa hi kli: Go̱ro̱ iki mi na jing oui! 20Da ko̱ kème sa on tou, kè to̱ko̱ ndo̱kè jing bèl hang‐è hi kli. Mono njou‐séna bongli mi jangndaï nyèta ko̱ klime ko̱ Nanjou. 21Mono, Jésus mi sa hi kli ba aféké: Go̱ro̱ iki mi na jing oui! Mahana ko̱ Baba fènè mi pi mi, mono on, mème ndé pi oui. 22Da ko̱ kème sa on o̱tou, kè gourifèn kon toul kli, ka sa hi kli: Oui ya Saint‐Esprit. 23Njoukouli on ko̱ ouime yèng bi mboro békéfèn klili, békéfèn klili mi o̱tou, da njoukouli on ko̱ ouime yèng békéfèn klili bi toul kli, békéfèn klili mi pane toul kli.

24Da Thomas ko̱ kène ling‐è ba Didyme, hana mbéo an woro kli botoulè‐séré, mi tane ga ti jing kli ya ko̱ Jésus mi gui. 25Mono on, gara njou‐séna bongli mi sa hi nè: Name ko̱ Nanjou tou. Da kème sa hi kli: Tokoré mème tane ga ko̱ nongno pandé an ndo̱kè, da tane ga bou njangnaran ni on an bèl hang‐è ya, mè ba lana bilaou tane tiya.

26Afal ko̱ name mi mane difala‐saï tou, njou‐séna bong nèli mi kaou an bil voulou da Thomas mi ndé kaou jing kli. Da ko̱ njaka mboro mi tou bi rou tou, Jésus mi tèn gui ka o zéng kli, da sa: Go̱ro̱ iki mi na jing oui! 27Da afal kème sa hi Thomas: Ndara njangnaran no gui ka bou bil ndo̱ko̱ ni ka ko̱, da mo ndara ndo̱ko̱ gui ka bou bèl hang ni, da tane kaou ka ndouri ya, ka la bilaou. 28Thomas mi féré sa, ka sa hi nè: O! Nanjou ni da Ouone ni! 29Jésus mi sa hi nè: Baï on ko̱ mome ko̱ mi tou mi ko̱ mo la bilaou, jangndaï ba baï akli on ko̱ mi tane ga ko̱ mi ya, da la bilaou.

30Mono, Jésus mi nding fèn‐to̱ko̱nakè afékéli nyèta an nona njou‐séna bong nèli, ko̱ mi tane ga dé bi takarata aïn ya. 31Da fèn aïnli mi dé an bil takarata tou, baï an ouime la bilaou ko̱ Jésus ba Christ ka babaï, Goune a Ouone; da ko̱ ouime la on bi laou baï, oui ma jing yana ka ling‐è.

Currently Selected:

Saint Jean 20: KBN1947

Highlight

Copy