Saint Jean 19

1Da mono, Pilate mi ba Jésus da jo̱ nè ka baraza. 2Da tourougouli mi kang mbélé ka ngassadi, da goukou bi toulè, da bou bitibiti la hi nè: 3Da klime gui bèl monè ka sa: Woromon! Nanjoukaou a Juifli! Da klime o̱ nè ka ndo̱ko̱ kli.

4Da Pilate mi kaïn féré tèn kala ba aféké, ka sa hi kli: Oui ko̱, mè ya nè gui kala hi oui, an ouime toutou ba mè tane ga ko̱ békéfèn hana mbéo an toulè ya. 5Mono, Jésus mi tèn gui kala jing mbélé ngassadi on ko̱ mi goukou toulè, da bitibiti la on ko̱ kème bou. Da Pilate mi sa hi kli: Oui ko̱ njoukou on!

6Da ko̱ loukou sacrificateurli tèn kabitali mi ko̱ nè, kli wan njaka guè siya ka sa: Bara nè bi di‐croix! Bara nè bi di‐croix! Pilate mi sa hi kli: Oui fèn baï, mi ya nè ka bara nè bi di‐croix, baï ko̱ mè tane ga ko̱ békéfèn hana mbéo an toulè ya. 7Juifli mi féré sa hi nè: Guingna na mana, da mahana ka bong guingna na dadaon kème hou, baï ko̱ kè fènè mi toung bilè ka sa kè ba Goune a Ouone.

8Ko̱ Pilate mi la baïnjaka on, waou mi i nè nyèta. 9Da kème féré kaïn lé sé guè bil voul walabaï ba aféké, da kè sa hi Jésus: Mo gui ka hane dé? Da Jésus mi tane ga féré falkè hi nè ya. 10Mono, Pilate mi sa hi nè: Mo ba sana baï hi mi tane tiya lé? Mo tane ga tou on ko̱ an njaka ni baï yèngna mo, da an njaka ni baï bara mo bi di‐croix ya lé? 11Jésus mi féré sa: Tane ga ti an njako̱ gounfènakè baï touli ya, wara ko̱ nonkala mi tane ga hi nè hi mo ya, mono, kè on ko̱ hi mi hi mo mi nding békéfèn ta toul amo.

12Afal baï on, Pilate mi ji baï yèngna nè. Da Juifli mi wan njaka guè siya, ka sa: Tokoré mome yèng njoukou aïn, mo tane ti ba bako̱la jing César ya. Njoukouna ko̱ mi toung bilè fènè ka sa, kè ba nanjoukaou, mi pong César. 13Da ko̱ Pilate mi la baïnjaka on kème ya Jésus tèn gui kala, da kème kaou toul kangala walabaï an guèl on ko̱ klime bi lingkè ba Pavé, da ka njaka Hébreu, ba Gabbatha. 14Da ka ba name mossona Pâque, mono. Ko̱ l’heure mi mane difala‐mbéo. Da Pilate mi sa hi Juifli: Oui ko̱ nanjoukaou baï! 15Da mono, klime wan njaka guè siya: I nè, i nè, bara nè bi di‐croix! Pilate mi sa hi kli: Oui ji ba mè bara nanjoukaou abaï bi di‐croix lé? Loukou sacrificateur mi féré sa: Nanjoukaou na hana aféké tane tiya, bo̱l ba César ka ho̱kè on. 16Da mono, klime yèng Jésus bi ndo̱ka kli baï bara nè bi di‐croix; da mono klime ya nè ka ourou.

17Jésus mi hol di‐croix nè fènè, da kan guèl on, ko̱ klime bi lingkè ba guèl hourou toul, da lingkè ka njaka Hébreu ba Golgatha. 18Da klime bara nè bi di‐croix an ndourou, tèn njoukou afékéli séré jing nè, aïn mbéo an mbora lèkè, da aïn mbéo an mboro kène an lèkè, da Jésus an hanguèl kli.

19Da Pilate mi dé fèn, da mbo̱lo̱ bi di‐croix, ko̱ mi sa on ba: JESUS AN POU NAZARETH NANJOUKAOU A JUIFLI. 20Da mono, Juifli nyèta mi kèn fèn on, baï ko̱ guèl on ko̱ klime bara Jésus bi di‐croix mi diya guè pou; kème dé on ka njaka Hébreu, da njaka Grec tèn ka njaka Latin. 21Da mono loukou sacrificateurli a Juifli mi sa hi Pilate: Mo ko̱ dé on ba nanjoukaou a Juifli ya. Da mo dé ba kème ko̱ sa: Mè ba nanjoukaou a Juifli. 22Pilate mi féré sa: Fèn on ko̱ mème dé tou, mè dé o̱ tou.

23Mono, afal ko̱ tourougouli mi bara Jésus bi di‐croix tou, klime bi la nè da go̱ro̱ mane nèng, la mbéo hi toulougou mbéo, da klime ndé bi loukou la nè kéng ko̱ mi tane ti ba sanakè ya, da mi na vou ka siya kon tiya. 24Da kli bakèdakè jing hana, ka sa: Na tane ga ji baï go̱rakè ya, da name rou ba mbadé lou ka ko̱ kong ba guème ko̱ ma i lé. Mono fèn on mi tèn baï an tènrèn none Takarata a Ouone mi tèn kala ka babaï ko̱ sa:

Kli wal la ni jing hana,

Da klime rou mbadé jing loukou la ni.

Mono tourougouli mi nding fèn on.

25Diya an di‐croix a Jésus, ma nè mi o ndourou da yine a ma nè a goune waïnkè, ko̱ ba Marie waïn a Cléopas tèn Marie Magdala. 26Da mono, ko̱ Jésus mi ko̱ ma nè jing njou‐séna bong on ko̱ kème sé hang‐é ta mi o an ndourou, kè sa hi ma nè: Waïn, mo ko̱ goune no mono! 27Da afal kème sa hi njou‐séna bong on: Mo ko̱ ma no mono! Da ka mbé l’heure o̱kèo̱ njou‐séna bong on mi ya nè sé guè bil voulè.

28Afal fèn aïn, Jésus mi toutou ko̱ fènli bon mi o̱tou kassénaï, baï an tènrèn none Takarata a Ouone mi tèn kala ka babaï, kè sa: Po̱ko̱ mbi mi i mi. 29Da ili mana ndourou ko̱ fona‐mbi‐lénadi mi mba rou. Mono kli bi raro da bou bil fona‐mbi‐lénadi ka gna bi njaka di hysope, da bi guè njakè. 30Da mono, afal ko̱ Jésus mi njo fona‐mbi‐lénadi on tou, kè sa: Fènli bon o̱tou, ka ding toulè guè tiya da féré hi esprit nè.

31Mono, name on ba name mossona Pâque, baï ko̱ name sabbat on ba loukou name da klime ngou waou baï yèngna houli on bi siya an toul di‐croix ka name sabbat. Da Juifli oui Pilate baï haouna hola njoukouli on ko̱ klime bara kli bi di‐croix, da baï an klime bi houl kli guèfal. 32Da tourougouli mi gui ka haou hola titili njoukou, da a kène njoukou on ko̱ klime ndé bara nè bi di‐croix jing nè. 33Da ko̱ klime gui mona Jésus, kli ko̱ko̱ kème hou tou, da tane ga haou holè ya, 34da tourougou hana mbéo mi toung bèl hang‐è jing zaou, da koukoulion séme da mbi mi tèn kala. 35Da njoukou on ko̱ mi ko̱ tou, kè sa bongbaï on, da sana bongbaï nè on ba babaï; da kème toutou ko̱ kème sa ka babaï, baï an ouime ndé la bilaou kéng. 36Fèn aïnli mi tèn mahana on baï an tènrèn none Takarata a Ouone mi tèn kala ka babaï:

Yé kli ba haouna hourou monè tane tiya.

37An guèl aféké Takarata a Ouone mi sa:

Yé kli ma ko̱ kè on ko̱ klime toung nè tou.

38Afal fèn aïn Joseph an pou Arimathée ko̱ ba njou‐séna bong a Jésus, ka foli baï ko̱ kème ngou waou nona Juifli mi gui mona Pilate, da oui nè baï bina houl a Jésus. Da Pilate mi jibo̱ko̱kè tou. Da mono kème gui da bi houl a Jésus. 39Da Nicodème mi ndé gui kéng, kè on ko̱ mi gui mona Jésus ambèl ka hangnachoung; kè bi yombo myrrhe da aloes ko̱ mi ji mane kilo bongkè‐nèng‐faltoulkè‐dioui. 40Da mono klime bi houl a Jésus da gna nè ka la jing épice dongui, mahana ka do gora houl a Juifli an pou kli. 41Da an guèl on ko̱ klime bara Jésus bi di‐croix, waka mana ndourou, da an bil waka on ba féké pal ko̱ njoukouna mi tane ga goro houl an ndourou ya. 42Mono, klime goro Jésus an ndourou, baï ko̱ name mossona Pâque mi hèdi tou, da loko pal mi na diya guè ndourou.

Currently Selected:

Saint Jean 19: KBN1947

Highlight

Copy