Saint Jean 21

1Afal fèn aïnli, Jésus mi kaïn to̱ko̱ monè ba aféké hi njou‐séna bongli an bèl loukou mbi Tibériade. Da kème to̱ko̱ monè hi kli mahana ka on.

2Simon Pierre da Thomas ko̱ kène ling‐è ba Didyme, da Nathanaël an pou Cana guèl Galilée, goundi a Zébédée, tèn njou‐séna bong nè hanali séré, klime kaou jing hana an guèl mbéo. 3Simon Pierre mi sa hi kli: Mè guè séna nzana njoui. Kli sa hi nè: Na ma ndé sé jing mo kéng. Da klime tèn kala ka kaou bil kombone ka sé, da kli tane ga jing njoui hana mbéo ka hangnachoung o̱kèo̱ ya. 4Da ko̱ guèlapélé mi taka tou, Jésus mi o an njaka nguéng; da njou‐séna bongli mi tane ga toutou ko̱ kè ba Jésus ya. 5Da mono Jésus mi sa hi kli: Goundi, fèn sona mana lé? Klime féré sa hi nè: Haï. 6Da kème sa hi kli: Oui bou ri guè mboro wonron ndo̱ko̱ kombone, da oui ma ko̱. Da mono klime bou ri on tou, da kassénaï kli bi guè siya pélé baï ko̱ njouili mi mba rou tou. 7Da mono, njou‐séna bong on ko̱ Jésus mi sé hang‐è ta mi sa hi Simon Pierre: Kè ba Nanjou! Da ko̱ Simon Pierre mi la ko̱ kè ba Nanjou, kème bou la nè an monè, baï ko̱ kème kaou bolok, da mbame sé guè bil mbi. 8Da gara njou‐séna bongli on mi gui jing lélé kombone, da ko̱ko̱ ri on ko̱ mi mba jing njouili, baï ko̱ klime diya jing nguéng mahana ka mètre té.

9Da ko̱ klime ba nguéng tou, kli ko̱ dokona hèlè hèkèlè an ndourou, da njoui jing tarou mi na toulkè. 10Jésus sa hi kli: Oui fan gara njouili on ko̱ ouime ya kassénaï. 11Mono, Simon Pierre mi ourou siya da kaou bil kombone da ko̱ko̱ ri gui nguéng on ko̱ loukou njouili mi mba rou, mane té‐faltoulkè‐bongkè dioui‐falbo̱ko̱kè‐saï. Njouili on nyèta da ri mi tane ga dourou ya. 12Jésus sa hi kli: Oui gui ka son laka. Da njou‐séna bong hana mbéo mi tane ma baï ouina nè ya: Mo ba guè lé? baï ko̱ klime toutou ko̱ kè ba Nanjou. 13Da Jésus mi bi tarou da wal hi kli jing njoui kéng.

14On ba an bo̱ko̱ saïkè mono ko̱ Jésus mi to̱ko̱ monè hi njou‐séna bong nèli afal ko̱ kème tome an wora houli tou.

15Da mono, afal ko̱ klime son laka on o̱tou, Jésus mi sa hi Simon Pierre: Simon, goune a Jonas, mome sé hang ni ta kli on lé? Kè sa hi nè: Ii, Nanjou, mo toutou ko̱ mème ji mo ta. Jésus sa hi nè: Mo ko̱ro̱ goune badoua nili. 16Kè kaïn oui nè an bo̱ko̱ sêrékè: Simon, goune a Jonas, mome sé hang ni lé? Pierre mi féré sa hi nè: Ii, Nanjou, mo toutou ko̱ mème ji mo ta. Jésus mi sa hi nè: Mo ko̱ro̱ badoua nili. 17Kè kaïn féré oui nè an bo̱ko̱ saïkè: Simon, goune a Jonas, mo ji mi lé? Go̱ra Pierre mi sé nè baï ko̱ Jésus mi oui nè bo̱ko̱ saï ba: Mo ji mi lé? Da kème sa hi nè: Nanjou, mo toutou fènli bon, mo toutou ko̱ mème ji mo ta. Jésus mi sa hi nè: Mo ko̱ro̱ badoua nili. 18Babaï, babaï, mi mè sa hi mo, ko̱ mome pane ka bala goune mo bou la no fèno, da sé guèl on mahana ko̱ mome ji, da ko̱ mome tèn hona njoukou tou, mo ma yaïli ndo̱ko̱ bi da njoukou aféké ma bou la hi mo da bi mo sé guèl on ko̱ mome tane ga ji ya. 19Da kè sa on ba baï to̱ko̱na mboro houl on ko̱ kè ma hi jonafèn hi Ouone. Da afal ko̱ kème sa on tou kè sa hi nè: Mo gui fali.

20Da Pierre mi ki monè ka ko̱ njou‐séna bong on ko̱ Jésus mi sé hang‐è ta mi gui fal kli; kè mono ko̱ mi na ékéré toul goudi a Jésus, ko̱ klime pane sona laka ka bèlaléou, ka sa: Nanjou, kè ba guè mi ko̱ jo̱l mo lé? 21Mono, ko̱ Pierre mi ko̱ nè, kè sa hi Jésus: Nanjou, yé njoukou aïn ma nding amè ba fèn lé? 22Jésus mi sa hi nè: Tokoré mème ji baï an kème kaou bo̱l tèn ko̱ mème kaïn féré gui, fèn aïn jing mo ba fèn lé? Mo gui fali. 23Da mono tiri baïnjaka aïn mi ti manguèl sé mona yindi ko̱ yé njou‐séna bong aïn ba houl tiya, da Jésus mi tane ga sa on hi nè ya, ba yé kè ba houl tiya ya; da kème sa ba: Tokoré mème ji baï an kème kaou bo̱l tèn ko̱ mème kaïn féré gui, fèn aïn jing mo ba fèn lé?

24Kè ba njou‐séna bong on ko̱ mi sa bongbaï toul fèn aïnli, da kème dé fèn aïnli bi takarata. Da na toutou ko̱ sana bongbaï nè ba babaï.

25Da Jésus mi ndé nding fèn afékéli nyèta kéng; da tokoré mi dé bon bi takarata, mè kèrè ka touya guèl tane ga ti an koukoula aïn mane ya, baï takarata aïnli ko̱ klime dé.

Currently Selected:

Saint Jean 21: KBN1947

Highlight

Copy