Mateo 19

Munhu na sano jake

1Imala Yesu viyamambukize malonga higo, kakulawa Galilea, kavika isi ya Uyuda mwambu wa Yordani. 2Madale bwando wamkoleleza, kawahonya kuko.

3Wayagwe wa Mafariseo wamgendela, wamgeza wamulongela, “Kovonaze vyandakana munhu kumuleka sano jake, yahawa na mbuli yoyose?” 4Yesu kedika kawalongela, “Hamsomile kamba Heyo yawaumbile ikilongozi, kawaumba munhu mbigalo na mtwanzi? 5Kalonga, Kilumbo kino munhu komuleka tataake na mamaake, wokilumba na sano jake, na hiwo wabili wogalamka lukuli lumonga. 6Vilemela hawali wabili bule, bali lukuli lumonga. Avo kiyalungile Mulungu, munhu sikuyakimamazule!” 7Wamulongela, “Kumbe habali Mose yalagize kumgwelela sano utango wa kumuleka muna italaka?” 8Kedika, “Kilumbo cha ugaga wa miyoyo yenu, Mose kamwinghani luto lwa kuwaleka masano genu, bali lulawile ichanduso havikalile hivo. 9Avo niye nomulongelani mweye: kamba munhu yahamuleka sano jake, kamba si mbuli ya ugoni, yosola sano diyagwe, katenda ugoni, nayo yuja yamsolile ija yasigwe, katenda ugoni.”

Kuleka ndowa

10Wanahina zake wamulongela, “Mbuli za munhu na sano jake zihawa hivo, viha na ukusola.” 11Bali heyo kawalongela, “Si wose wodaha kuibokela mbuli hiyo, bali waja wamotile. 12Kilumbo wabaho wanhu waleligwe kamba vivo wali bule kimbigalo, lulawile muiinda za mama zawo; kabili wabaho wanhu watendigwe na wanhu wawe bule kimbigalo; kabili wabaho wali bule kimbigalo, waitendile wenyego giladi ja Undewa wa Mulungu. Yodaha kuibokela mbuli ino, na yaibokele.”

Yesu kawamoteza iwana

13Baho wamgalila wana wadodo, giladi yeke mikono yake mmatwi gawo na kuwapulila. Wanahina wake wawagomesa. 14Bali Yesu kalonga, “Walekeni iwana wadodo weze kumwangu, sikumuwagomese; kilumbo wagambile kamba wano, Undewa wa Mulungu uwo wawo.” 15Kaika mikono yake mmatwi gawo, kakulawa hiko.

Imhale mwene mhiya bwando

16Imala baho munhu imonga kamgendela kumuuza, “Mku-lufunzi, nhende mbuli ilihi inogile, kileka mhate upile wa digunge?” 17Kamulongela, “Habali uniuza mbuli za unovu? Yanogile Heyo Imonga. Avo uhalonda kwingila muugima, zigoge zindagizi!” 18Kamuuza, “Zilihi?” Yesu kalonga, “Zizo zino: Sikuukome, sikuutende ugoni, sikuwibe, sikuulave usindi wa uvwizi. 19Wahulike tataako na mamaako, mnogele miyago yukala nayo habehi, vuwinogele mwenyecho.” 20Ija imhale kamulongela, “Gano gose nigagoga. Swelelwa na choni kabili?” 21Yesu kamulongela, “Uhalonda kukunguluka, genda ukagulize vuli navyo vyose, uwenghe iwakiwa, na gweye kokuwa na bikilo kuulanga; imala izo ungholeleze!” 22Ija imhale viyahulike mbuli ija, kachola na mfundo, kilumbo kakala na mhiya bwando.

Ugaga wa mhiya

23Yesu kawalongela wanahina zake, “Ihoko nomulongelani, vokuwa vigaga mwene mhiya kwingila mundewa wa Mulungu. 24Kabili nomulongelani, vobuha ngamiya kubita mchonzo cha msonga, kubanza mwene mhiya kwingila mundewa wa Mulungu.” 25Iwanahina vuwagahulike, wakanganya nghani walonga, “Kumbe yuyo yalihi mina yondayahone?” 26Yesu kawabunhulila meso, kawalongela, “Kwa wanhu buli dino hadidahika, bali kwa Mulungu gose godahi-kaga.”

27Petro kedika kamulongela, “Lola tweye tuleka vyose, tukukoleleza. Hivo togwelelwa choni?” 28Yesu kawalongela, “Kingongongo nomulongelani, Mwanage Munhu vondayakale mkigoda cha iyenzi yake mulumwengu wondawize, mweye mngholeleze niye, mokala na mweye mvigoda longo dimwe na vibili, muwataguse ngholo za Israeli longo dimwe na wabili. 29Ayo imunhu yalekile ngʼanda bule ndugu wa kimbigalo bule wa kitwanzi, bule tata bule mama bule wana bule migunda, giladi ja tagwa jangu, kobokela miyanza muzo na kuuhala ugima wa digunge. 30– Bali bwando wa ikilongozi, wondawawe wa kimambukizo, na hiwo wali wa ikimambukizo, wondawagaluke wa ikilongozi!

Currently Selected:

Mateo 19: ZAM75

Highlight

Copy