Mateo 18

Mgaluke muwe vinghele

1Kimilo kikija iwanahina wamgendela Yesu walonga, “Mkulu muundewa wa Mulungu yuyo yalihi?” 2Kakema mwana imonga, kamwika hagatigati jawo. 3Kalonga, “Kingongongo nomulongelani, muhaleka kugaluka mgalamke wana wadodo, hondamwingile mundewa wa Mulungu ngʼo. 4Kilumbo yondayesanghane mwenyecho kamba mwana mdodo yuno, yuyo yali mkulu mundewa wa Mulungu. 5Na yoyose yondayambokele mwana imonga yalingane kamba yuno mtagwa jangu, kambokela niye.

6Bali yondayamwagize imonga wawo iwadodo wano wangogile niye, vomnogela yakotelezwe mugosi dibwe kulu ja kusagila, na kudidimizwa hali inghuta ya ibahali.

Nghwalo zidumilizwa

7Amba kimu cha nghwalo, isi baye yojona; kilumbo hondazileke kwiza mbuli za kwikwala, bali leka kojona munhu yuja yavigalile vikwangwazo!

8Kamba mkono bule mgulu wako uhakuhonza, ukanhe uwase kutali nagwe; vonoga goya wingila muupile, kuno uhungukilwe na mkono bule mgulu, kamba kukala na mikono mibili au migulu mibili, imala wasigwe muna umoto wa digunge. 9Kamba siso jako dihakuhonza, dingʼole ujase kutali nagwe; vonoga goya wingila muupile na siso dimonga, kamba kukala na meso mabili, imala wasigwe muna umoto wa digunge.

Kukihonya chagile

10Teganyeni sikumbeze miyawo imonga wa iwadodo wano, kwa mzoko nomulongelani, malaika zawo kuulanga siku zose wokilola ikihanga cha Tata wangu yali kuulanga. 11Kilumbo Mwanage Munhu keza kukihonya chagile. 12Mokonaze munhu yahawa na nghondolo muzo umonga, imonga yahaga, avo hawaleka waja milongo kenda na kenda, yachole mvigongo yakamzahile yuja yagile? 13Vondayamone, togola nomulongelani, komdenghelela hiyo nghani kubanza waja milongo kenda na kenda hawagile. 14Avo havimnogele Tata wenu yali kuulanga, kamba imonga wa wadodo wano yage.

Ndugu yako yahakutozela

15Kamba ndugu yako yahakutozela, genda umzume muli yeka; yahakuhulika, mwilumba na ndugu yako. 16Kamba hakuhulike, msole mgale ha munhu imonga hebu wabili, giladi imbuli ikale goya kwa milomo ya wasindi wabili bule wadatu. 17Kamba hawahulike hiwo, dilongele dale ja wanahina; kamba haditegeleze dale da wanahina, umtende kumwako kamba munhu yungwa na muwila kodi.

18Togola nomulongelani, gosegose gondamgahindile mulumwengu, gohindilwa kwa Mulungu, na higo gose gondamgavugulile mulumwengu, govugulilwa kwa Mulungu.

19Kabili nomulongelani: wabili wenu mana wokitogoza mulumwengu muna imbuli yose yondawapule, wogwelelwa na Tata wangu yali kuulanga. 20Kilumbo hawali wabili wadatu welundiza mditagwa jangu, na niye nabahano hagatigati jawo.”

Wene denyi wabili

21Yomala Petro kamgendela Yesu kamuuza, “Mndewa, ndugu yangu yahanhozela miyanza mingahi, na niye nimulekesele; ivike miyanza Saba?” 22Yesu kamulongela, “Sikulongele ivike miyanza saba aka, bali miyanza saba kubweleza milongo saba. 23Kileka hivo Undewa wa Kuulanga ulingana na mndewa imonga yalondile kupeta mhiya zake na nyakadala zake. 24Viyasongile kuitenda, kagalilwa munhu imonga yowiligwa mhiya talanta elfu kumi. 25Na heyo viyakalile bule cha ukuliha, mndewa wake kalagiza yagaligwe heyo na sano jake na iwanage na vinhu vyose viyali navyo, dikalihigwe dija didenyi. 26Bali ija nyakadala kagwa hasi, kamfugamila mavindi, yomuhembekeza yolonga, Mndewa, ndekesa, na niye nokuliha gose gomala. 27Mndewa wa nyakadala yuja kamonela bazi, kamdohola, kamulekela dija didenyi.

28Nyakadala yuja kalawa, kamona miyage imonga wa unyakadala wawo, yakalile yomuwila mhiya muzo umonga; kamgoga yomfida dimelo yolonga, Ndiha chunghopile! 29Bali nyakadala miyage kamgwila hamigulu yake, kamuhembekeza yomulongela, Ndekesa, na niye nokuliha gose higo! 30Bali hatogole, kagenda kamgela mkifungo, mpaka vondayailihe ija idenyi. 31Nyakadala wayage vuwagawene gatendigwe, wagwa lusango nghani, wagenda wampetela mndewa wawo gose gatendigwe. 32Baho mndewa wake kamkema, kamulongela, Gweye nyakadala wihile umoyo, nikulekesa gweye denyi dija jose vumhembekeze. 33Agweye havikunogele kumonela bazi nyakadala miyago, kamba niye vinikonele bazi gweye? 34Mndewa wake kona lusango, kamgala kuwagazaga iwanhu, mpaka vondayadilihe didenyi dija jose. 35Vivo na Tata wangu wa Kuulanga vondayamtendeleni mweye, muhaleka kulekesela mmoyo munhu na ndugu yake.”

Currently Selected:

Mateo 18: ZAM75

Highlight

Copy