Mateo 20

Wasanghani wakemigwe mumgunda

1Kilumbo undewa wa Mulungu ulingana na mwene ngʼanda yalawile imitondo, yagendile kugoneka wanghulima, yawagale kumgunda wake wa mitongoni. 2Viyamalile kulagana na walimi yawenghe zuwa dimwe dinari, kawagala kumgunda wake wa imitongoni. 3Kalawa kimilo cha msangalalo, kawavika wayagwe wemile wima hagulilo, wali bule na cha ukusanghana. 4Kawalongela, Gendeni na mweye kumgunda wangu wa imitongoni, na kitumetume chenu nomwinghani. Wachola. 5Kalawa kikomo cha imisi mikulu, kabili na zuwa dihongile, katenda vivija. 6Kimilo cha ichungulo kalawa, kawavika wayagwe wemile wima, kawalongela, Habali mwimile hano imisi migima, mwabule cha ukusanghana? 7Wamulongela, ‘Kilumbo haduhu munhu wa kutugoneka.ʼ Kawalongela, ‘Gendeni na mweye kumgunda wangu wa imitongoni!ʼ

8Vidiswele mwene umgunda kamulongela mnyapala wake, Wakeme iwalimi, uwalihe kitumetume chawo, usongele wa ikimambukizo, uzigilile wa ikilongozi! 9Aluja luwezile waja wa ichungulo, wenghigwa munhu dinari. 10Awaja wa imitondo vuwezile, wagiza kamba wokwinghigwa bwando; bali hewo vivo wabokela vivija kila munhu dinari. 11Bahaja vuwamalile ukubokela, wamgegedukila mwene ngʼanda. 12Walonga, Wano wa ikimambukizo wasanghana saa imonga yeka, agweye kuwalinganiza na tweye twazaganye usungu na vuke tetete. 13Aheyo kamwidika miyawo imonga, ‘Mbwiga, sikubunzile; hulagane na niye kwinghigwa dinari? 14Sola kija ichako uchole; nogelwa kumwingha ino wa ikimambukizo kamba vupatile gwegwe. 15Che, sidaha kulava vinhu vyangu kamba vinilonda, hebu siso jako dingila wiho, kilumbo niye noga umoyo?ʼ 16Vivo vondaviwe wa ikimambukizo wokuwa wa ulongozi, na wa ikilongozi wokuwa wa ikimambukizo!”

Migazo ya Kristo, lwekadatu

17Avija Yesu viyakalile yochola Yerusalemu, kawasola waja wanahina longo dimwe na wabili hamtibeho muja mnzila, kawalongela, 18“Loleni, tochola Yerusalemu, na Mwanage Munhu kogeligwa mmikono ya wakulu wa nhambiko nawo wana-Nzuma, na hewo womtagusa yafe. 19Womala womgala kwa wanhu hawamtangile Mulungu, na hewo womchezela na kumchapa mhalati na kumuwamba mbiki, na siku ja ikadatu kozuka.”

Wanage Zebedeo walonda ukulu

20Baho mama wawo wanage Zebedeo kamgendela Yesu hamonga na wanage, kamfugamila mavindi, yampule mbuli. 21Kamuuza, “Kolonda choni?” Kedika, “Longa kamba wano wanangu wabili wakale imonga mkono wako wa ukulume, na imonga mkono wako wa ukumoso mundewa wako!” 22Yesu kedika kalonga, “Hamditangile ajo dimpula. Avo modaha kungʼwela ikikonha changu chondaningʼwele niye?” Wamulongela, “Todaha.” 23Kawalongela, “Ona mokingʼwela ikikonha changu, bali kukala mkono wangu wa ukulume na mkono wangu wa ukumoso, sividaha kumwinghani, bali wekilwe umwaka na Tata wangu wogwelelwa.”

24Awaja Longo dimwe vuwahulike, wehilwa na waja iwandugu wabili. 25Yesu kawakema kalonga, “Mvitanga kamba watawala wa zingholo wowagudemeza, na Iwakulu zawo wowagaza kwa mhiko. 26Bali hondaviwe hivo kumwenu. Kilumbo ayo yolonda yawe mkulu kumwenu, yamtumikileni mweye. 27Na imunhu yoyose yolonda yawe wa ikilongozi kumwenu, na yawe nyakadala wenu. 28Kamba vivija Mwanage Munhu viyalekile kwiza kusanghanilwa, bali keza kusanghana na kulava ugima wake uwe honelo ja wanhu bwando.”

Vimbugumbugu hiko Yeriko

29Aluja luyakalile yolawa Yeriko, dale kulu dimkoleleza. 30Na vimbugumbugu wabili wakalile hangwazo ya inzila, vuwahulike kamba Yesu kobita, watowa nyangi wolonga, “Utonele bazi, Mndewa Mwanage Daudi!” 31Mtinghano wawakomhokela wanyamale, bali hewo weyoha kutowa nyangi wolonga, “Utonele bazi, Mndewa Mwanage Daudi!” 32Yesu kema, kawakema, kalonga, “Molonda nimtendeleni choni?” 33Wamulongela, “Mndewa, tolonda meso getu ga-mamazulwe.” 34Yesu kawonela bazi, kawakwasa meso gawo; kipigiti kikija walola, wamkoleleza.

Currently Selected:

Mateo 20: ZAM75

Highlight

Copy