Mateo 17

Yesu kagaluka lukuli kudigongo

1Vizibitile siku sita, Yesu kawasola Petro, Yakobo na Yohana ndugu yake, kawagala uchana kudigongo tali hakifiso. 2Kagaluka lukuli lwake bahaja hawali; kihanga chake kingʼala kamba zuwa, nghanzu yake igaluka nzelu kuno yomelemeta. 3Na lola walawililwa na Mose na Eliya, wolongelela nayo. 4Petro kedika kamulongela Yesu, “Mndewa, vinoga tweye tukala bahano; uhalonda novizenga hano vingʼanda vidatu, kimonga chako gweye, kimonga cha Mose na kimonga cha Eliya.” 5Viyakalile yolonga, lola wingu zelu diwagela kiziza; bahaja kulawa dizwi dilawa mdiwingu dilonga, “Yuno yuyo mwanangu inogelwe nayo, mtegelezeni yuyo!” 6Awaja iwanahina vuwahulike, wagwa kingubanguba, wadumba nghani. 7Yesu keza kawakwasa kalonga, “Inukeni, sikumdumbe!” 8Wenula meso gawo, hawamuwene munhu komu Yesu yali yeka.

Eliya kamala kwiza

9Aluja luwakalile wohumuluka hakigongo, Yesu kawalagiza yolonga, “Sikumumpetele munhu wowose gamuwene, mpaka Mwanage Munhu vondayazuke kulawa kwa wafile!” 10Wanahina zake wamuuza, “Kumbe habali wana-Nzuma wolonga kamba Eliya vimwandakana kwiza lumosi?” 11Na heyo kedika, “Ihoko Eliya kokwiza lumosi yasanghane goya gose. 12Bali nomulongelani kamba Eliya kalongola, hawamtangile bule, vilema wamtendela gose gawalondile; avo vivo Mwanage Munhu na heyo kogenda kugazwa kumwawo.” 13Kileka wanahina baho wavitangile kamba kalonga na hewo mbuli za Yohana Msingula wanhu.

Mwana mwene chokamuhogo

14Vuwauvikile mtinghano, munhu imonga kamwizila, kamfugamila mavindi yolonga, 15“Mndewa, umonele bazi mwanangu, kilumbo kana chokamuhogo, kogazwa vihile; miyanza bwando kogwila hamoto, na miyana bwando mmazi. 16Nimgala kwa wanahina zako, hawamuhonyile.” 17Yesu kedika, “Mweye lukolo lupweteke ukugoga! Nokala hamonga na mweye mpaka kwahi? 18Nokilongoza namwe mpaka kwahi? Mgaleni kuno kumwangu!” Yesu kaukomhokela umzuka, na hiwo umulawa; yuja imhale kahona kimilo kikija.

19Womala iwanahina wamgendela Yesu hamtimbeho walonga, “Habali tweye hatudahile kuulava?” 20Yesu kawalongela, “Kileka hivo muhungukilwa kungoga. Amba hivo kingongongo nomulongelani, muhawa na kugoga kulingane na kibegu cha mvule, modilongela digongo dino, Segela hano, ugende kuja, na hijo josegela; kabili hondaiwe mbuli ileka kudahika kumwenu. 21Bali lukolo kamba luno halulawa komu muna ukupula na ukuleka kuja.”

Migazo ya Yesu, langulizo jekabili

22Na hewo vuwakalile wokala Galilea, Yesu kawalongela, “Mwanage Munhu kogenda kugeligwa mmikono ya wanhu. 23Na hewo womkoma, imala siku jekadatu kozuka.” Wagwa kizumbo nghani.

Kuliha kodi ya Hekalu

24Vuwavikile Kapernaumu, waja wawila kodi ya hekalu wamgendela Petro wamuuza, “Chei, avija mkulufunzi wenu halavaga kodi?” 25Kalonga, “Kalavaga.” Na heyo viyengile mngʼanda, Yesu kalongola kumuuza yolonga, “Kovo-naze, Simoni, wandewa wa isi wasolaga kodi bule nyongeza mwa wanhu walihi? Mwa iwanawo hebu mwa iwahenza?” 26Na heyo viyalongile, “Mwa iwahenza.” Yesu kedika, “Avo iwana wagolo. 27Bali sukutugombe nawo, genda muna ibahali, ukagele indiwano, ukasole isomba yuja yonamata ikilongozi; vondaumnanazule mulomo wake, kokona mhiya, isole hiyo ukawenghe, undavile niye hamonga na gweye.”

Currently Selected:

Mateo 17: ZAM75

Highlight

Copy