Mateo 16

Kutambula milongo ya Yesu

1Wamwizila Mafariseo na Masadukeo wamgeze, wampula yawalagile kilolomboto kulawa kuulanga. 2Kedika kawalongela, “Kuhawa ichungulo, molonga, Kokuwa na kiyanga, kilumbo ulanga mdunghu. 3Na imitondo molonga, Lelo kokuwa na bidabida, kilumbo ulanga mdunghu na mtitu. Mweye wazenzeleganye, mvitanga kutambula kihanga cha ulanga, habali vilolomboto vya milongo ino hamdaha kuvitambula? 4Mlelo wihile na wa ugoni wolonda kilolomboto; bali hondaugwelelwe komu kilolomboto cha Yona.” Kawaleka, kachola na zake.

Mhumba ya Mafariseo

5Na hewo iwanahina waloka umwambu uyagwe, wesemweza kusola imigate. 6Yesu kawalongela, “Teganyeni mwituze na mhumba ya Mafariseo na Masadukeo!” 7Webamilila wenyego kwa wenyego wolonga, “Mmanye vutulekile kusola migate!” 8Aheyo Yesu kavitanga kawalongela, “Habali mkibamilila mwemwe kwa mwemwe, mweye wene nhamanilo ndodo, kilumbo mwabule migate? 9Hamnavitanga, kabili hamkumbukila ija imigate mitano na waja wanhu elfu tano; vigelo vingahi vumdondole? 10Kabili ija migate saba na waja wanhu elfu ne, na vigelo vingahi vumdondole? 11Vokuwaze mleka kuvitanga, niye silongile mbuli ya migate? Bali ituzeni na mhumba ya Mafariseo na Masadukeo!” 12Baho wavitanga kamba kawalongela wateganye malangulizo ga Mafariseo na Masadukeo, si mhumba ya migate.

Petro viyamtogole Yesu na kukemigwa dibwe

13Imala Yesu kachola isi ya Kaisaria-Filipi, kawauza wanahina zake yolonga, “Wanhu wolonga Mwanage Munhu yuyo yalihi?” 14Wamulongela, “Wayagwe wokulonga kwa Yohana Msingula wanhu, wayagwe Eliya, wayagwe Yeremia bule imonga wa Watula-Ndagu.” 15Kawauza, “Na mweye mononga niye kamba nili yalihi?” 16Simoni Petro kedika kalonga, “Gweye gwegwe Kristo Mesia, mwanage Mulungu yali Mpile.” 17Yesu kedika kamulongela, “Kumota gweye Simoni Bar-Yona! Kilumbo lukuli na mulopa havikugubulile dino, bali Tata wangu yali kuulanga. 18Na niye nokulongela: Gweye gwegwe Petro, na uchana mdibwe dino nodizenga didale jangu, na nyivi za kuzimu hondazidihume. 19Na niye nokugwelela mvugulilo za undewa wa Mulungu; jojose jondaudihindile mulumwengu, na kwa Mulungu johindilwa, najo jose jondaudivugulile mulumwengu, na kwa Mulungu dovugulilwa.” 20Baho yawagomesele nghani wanahina zake, sikuwamulongele munhu hata imonga kamba heyo yuyo Kristo Mesia.

Migazo ya Yesu; kwihonya hebu kwibela

21Kulawa kipigiti kicho Yesu kasonga kuwalanguliza wanahina zake, kamba vimwandakana kuchola Yerusalemu na kugazwa nghani na Walala, wakulu wa nhambiko na wana-Nzuma, na kudanganika na siku jekadatu kuzuka. 22Petro kamsola, kandusa kumkomhokela yolonga, “Sivivo, Mndewa, higo hondagakuwandame.” 23Kahinduka kamulongela Petro, “Segela kukisogo changu, Kinyamkela! Gweye kwa nghwalo kumwangu, kilumbo hugelegeza ga Mulungu, komu ga wanhu.”

24Kikomo hicho Yesu kawalongela wanahina zake, “Munhu yahalonda kungholeleza, yanduse kwibela mwenyecho, yedwike biki ja kudanganika heyo, avo yangholeleze. 25Kilumbo munhu yolonda kwihonya loho yake, koyagiza; bali yondayagize loho yake kwa kunonda niye, koihonya. 26Bule kopata choni munhu yahaupata ulumwengu wose, kamba yahamala kuyasa loho yake? Bule kolava choni cha kuikombola loho yake? 27Kilumbo Mwanage Munhu kokwiza na iyenzi ya Tata wake hamonga na malaika zake, baho komuliha kila munhu ningo ya masanghano gake. 28Ihoko nomulongelani, bahano hana wanhu wemile, na hewo hondawailanze ifa ngʼo, mpaka vondawamone Mwanage Munhu yokwiza mundewa wake.”

Currently Selected:

Mateo 16: ZAM75

Highlight

Copy