Luka 9

Ndagizi za wasenga

1Yesu kawakema waja mulongo umwe na wabili, kawengha magweka na mhiko za kulava mizuka yose na kuhonya mitamu. 2Kawaswagiza waupwililise undewa wa Mulungu na kuhonya watamu. 3Kawalongela, Sukumsole kinhu muna imiyanza yenu, si mkwaju hebu mkwizi hebu mgate hebu mhiya hebu nghanzu mbili! 4Na ngʼanda yoyose yonda mwingile, kaleni mumo, kwiza mulawe mumo! 5Na waja walemile kumgomelani, muhalawa mkiwambo hicho, kungʼunheni ditimbwisi dinanahile mmagulu genu, giladi dize diwasindile. 6Walawa wazunguluka mviwambo, wopeta mbuli za unozi wa injili, na kuwahonya waja wolumwa kila hanhu.

Herode kamuzahila Yesu

7Mtawala Herode viyagahulike gose gatendigwe kadungwadungwa, kilumbo wanhu bwando walongile kamba Yohana kazuka kulawa kuzimu. 8Wayagwe walonga kamba Eliya kalawilila, na wayagwe walonga kamba imonga wawo Watulandagu wa uhenga kazuka. 9Komu Herode kalonga, Yohana nimkanha iditwi; yalihi kabili ayo yogamba nozihulika mbuli zake?” Kazahila nzila ya kumbona.

Wanhu elfu nhano weguswa

10Waja wanahina vuwabwelile, wampetela mbuli zose ziwasanghane; yomana kuwasola kachola nawo kinyele kukiwambo kimonga kikemigwa Betisaida. 11Madale bwando ga wanhu vigamanyile, wamana kumuwinza; kawagomela, kuno yowalongela mbuli za undewa wa Mulungu, kawahonya waja walondile kuhonyigwa.

12Zuwa vidihongile, waja mulongo umwe na wabili wamgendela wamulongela, ‘Ugalage madale ga wanhu, wagende mviwambo na mmigunda na mmambwegambwega, wakapule uwaso na vyakuja, kilumbo hano hatuli, twa haluwala.” 13Yesu kawalongela, “Wengheni mwemwe chakuja!” Walonga, “Tweye twabule kinhu komu migate mitano na visomba vibili; avo tuchole tukawagulile wanhu wano mandiya?” 14Kwa mzoko wambigalo waiyeka wavika kamba elfu nhano. Kawalongela wanahina wake, “Walongeleni wakale kilundo kilundo, milongo mitano mitano!” 15Wasanghana kamba viyawalongele, wawakaliza wose. 16Yomana kuisola ija imigate mitano na vija ivisomba vibili, kalola uchana kuulanga, kavimoteza, kavimogolamogola kawengha wanahina wake, giladi wawagolele gaja gamadale. 17Womana kuja, weguta wose, na uja uupakapaka waulundiza vigelo mulongo umwe na vibili.

Kumtogola Yesu na migazo yake

18Siku dimwe viyakalile yopula yaiyeka, wanahina wake wakala hamonga na heyo, kawauza, “Che! Avo madale ga wanhu wanongaga niye iyo yalihi?” 19Hewo wedika walonga, Wakulongaga kamba gweye kwa Yohana msingula wanhu, komu wayagwe, Eliya; wayagwe walongaga kwa imonga wa Watulandagu wa uhenga yazukile.” 20Kawauza, “Na mweye monongaze?” Petro kedika kalonga, “Gweye kwa Kristo wa Mulungu.”

21Kawazuma kawagomesa sukuwamulongele munhu mbuli hizo! 22Kalonga, “Vimwandama Mwana wa Munhu kugeligwa mgaduko na kulemwa na Wavyele na Watambika Wakulu na Wana Nzuma, na kukomigwa, komu siku ja ikadatu kozuswa.”

Kwidikwa msalaba na kwihonya loho

23Kawalongela wose, “Munhu wowose yahalonda kuminza, na yaibele mwenyecho, yaidikwe msalaba wake mazuwa gose, yaminze! 24Kwa mzoko munhu yolonda kwihonya mwenyecho, koigwasika; na yuja yonda yaigwasike mwenyecho kwa kilumbo changu, ayo yuyo yonda yaihonye. 25Avo vonogaze munhu kuipata mbago yose, kamba yahaigwasika hebu kuyagiza mwenyecho? 26Kilumbo munhu yonda yanyonele kinyala niye na malonga gangu, Mwana wa Munhu komonela kinyala munhu hiyo, vonda yeze kuna iyenzi yake na ya Tata na malaika wangʼalile. 27Na niye nowalongela ihoko, Wemile hano, wabaha wayagwe, awo honda waulanze mdanganiko ngʼo, komu wawone tanhu Undewa wa Mulungu.

Yesu kagaluswa lukuli kudigongo

28Viyalongile malonga higo zibita siku nane, kawasola Petro na Yohana na Yakobo, kakwela kukigongo kumpula Tata wake. 29Viyakalile yopula, kihanga chake kihinduka, nguwo zake zigaluka nzelu, kuno zomelemeta. 30Mhunde wanhu wabili wakala wolongelela nayo, nawo kumbe yuyo Mose na Eliya. 31Weza na ungʼazi, wampetela mbuli za kuduganya gose gaja ga ikifo chake kuja Yerusalemu. 32Komu Petro na wayage wakala walemelwe na utulo; bali vuwalamuke wawona ungʼazi wake na waja wanhu wabili wema nayo. 33Waja wabili vuwamulekile, Petro kamulongela Yesu, “Mndewa, hano hanoga kukala tweye, na tuzenge vibanda vidatu, kimwe chako, kimwe cha Mose na kimwe cha Eliya.” Wala havimanyile voyokala yolonga. 34Viyakalile yolonga higo, hakala na bingu diwagela kiziza; wengilwa na kingudemo vuwengilwe na dingu dija. 35Dizwi dilawa mdibingu dilonga, “Yuno yuyo Mwanangu inimsagule, mtegelezeni yuyo!” 36Dizwi dija vidihulikwe, Yesu koneka yali yeka; wanahina siku zija wanyamala, hawamulongele munhu hata yumwe gaja gawawene.

Mmhale yavagalwe

37Viivikile imitondo, wahulumuka kulawa kudigongo; waitinghanila na dale da wanhu bwando. 38Muja mdidale mkala na munhu, katowa nyangi kalonga, “Mkulufunzi nokupula, umulole mwanangu yuno yuyo mwana nyadimwe wangu! 39Lola mzuka umvagala, mhunde uhamvagala kolila, kuno yolava hovu, haumleke sagambwisa, womkukubulakukubula. 40Niwahembela wanahina wako wawinge uja mzuka, komu hawaudahile.”

41Yesu kedika kalonga, “Amweye wa umulelo ubobotale ulemaga kunhogola, mpaka kwahi nghale hamonga namwe na kumwazaganyeni?”

42Avija ija imwana viyamkwenhukile, uja mzuka umgoga nghani, umbwanha hasi; komu Yesu kaukomhokela uja umzuka mchapalisi, kamuhonya imwana, kambwezela tata wake. 43Wose baho wakanganye kilumbo cha ukulu wa mhiko za Mulungu.

Migazo ya Kristo, lwekabili

Na waja vuwakalile wakanganya manzonza gose gayatendile, kawalongela wanahina zake, 44“Gagogeni malonga gano mmagutwi genu, kwa mzoko Mwana wa Munhu kochola kugeligwa mmikono ya wanhu.” 45Komu hawaditangile longa dija; difisigwe kumwao sukuwaditambule, kabili wadumba kumuuza mbuli ija.

Ukulu wa ihoko

46Wasonga kwiuzagiza, yalihi yonda yawe mkulu mmwanza wetu? 47Yesu viyatangile ngelegeza zao, kasola mwana mdodo, kamwika behibehi yake. 48Kawalongela, “Yoyose yonda yambokele mwana yuno kwa twaga jangu, kambokela niye, na yoyose yonda yambokele niye, kambokela Yuyo Yangalile; kwa mzoko heyo yali mdodo kumwenu, ayo yuyo mkulu.”

Kumgomesa munhu yungwa

49Yohana kedika kamulongela, “Mndewa mkulu, tumona munhu yolava mizuka kwa twaga jako; na tumgomesa, kilumbo hailongozaga na tweye.” 50Yesu kamulongela, “Sikumumgomese! kwa mzoko ayo yali bule bamila kumwetu, kotutaza twetwe.”

Wasamaria vuwamlemile Yesu

51Vizikalile siku zake za kukwenezwa kuulanga zammabehi, Yesu kalagusila kihanga kuchola Yerusalemu. 52Kalongoza wasenga; nawo wagenda wengila mkibuga kimonga cha Wasamaria, kumtunduwilila hanhu. 53Komu wenekaye hawambokele, kilumbo kihanga chake kilola Yerusalemu. 54Yakobo na Yohana wanahina wake vuwaviwene walonga, “Mnde-wa, kolonda tulonge moto uhulumuke kulawa kuulanga, uwamambukize wano kamba Eliya viyatendile?” 55Komu kawahindukila, kawadumbiza. Kalonga, “Chei, hamvimanyile Loho ilihi yumuli nayo? 56Mwana wa Munhu hezile kubananza loho za wanhu, komu kuzihonya.” Wasegela wachola wavikila kibuga kiyagwe.

Wakolelezi wapotigwe

57Vuwakalile wochola mnzila, munhu imonga kamulongela, “Nokuwinza hose hose honda uchole.” 58Yesu kamulongela, “Vibakwi wanazo mhango, na ndege za uchana wana mvulu zawo, komu Mwanage Munhu kabule hakusagamiza ditwi jake.” 59Viyamulongele munhu iyagwe, “Niwinze!” Ayo kalonga, “Leka tanhu nhyole hazike tata wangu!” 60Na heyo kamulongela, “Walekeni wafile waizike wenyego kwa wenyego; agweye genda kaubwililise Undewa wa Mulungu!” 61Munhu iyagwe kamulongela, “Mndewa nokukoleleza, bali ima tanhu nikawalage wanhu wali mngʼanda yangu!” 62Yesu kamulongela, “Munhu yagogile gembe mumkono, yosonga kulima yahalola kukisogo, honda yaudahe Undewa wa Mulungu.”

Currently Selected:

Luka 9: ZAM75

Highlight

Copy