Luka 8

Watwanzi wamkoleleze Yesu

1Siku zizija Yesu katembelela viwambo na vibuga vyose yopeta na kuzuma mbuli zinogile za Undewa wa Mulungu. Na waja Longo dimwe na Wabili wachola hamonga nayo; 2hamonga na watwanzi wayagwe wakalile wahonyezwe mitamu ihile na mizuka; Maria yokemigwa Magdalena yalavigwe mizuka saba, 3na Joana sano ja Kuza, mtunza mali wa Herode, na Susana na wayagwe bwando; wakala wowatumikila kwa mali gawali nago.

Hanhu hane hahandigwe

4Dale kulu viditinghanile, na wanhu waja walawile mviwambo wamwizila, kawapetela hala, yolonga:

5“Kukala mlimi, kalawa kagenda kuhanda mbeyu zake; viyahandile, mbeyu zimonga zigwila behibehi na inzila, zibojagwa, ilawa baho ndege wazija. 6Ziyagwe zigwila hana gamabwe, zota, mhunde zinyala, kwa mzoko haduhu ludongo. 7Ziyagwe zigwila hagati hali mizomola, na imizomola ikula hamonga, igela sesela. 8Ziyagwe zigwila haludongo lunogile, zota, zilela mbeyu imonga muzo.” Viyakalile yolonga ago, katowa lwangi kalonga, “Mwene magutwi ga kuhulika, na yahulike!”

9Wanahina wake wamuuza, Hala hijo ditambula choni? 10Kedika, “Mweye mgolelwa kuzitanga nyongʼonyo zili mundewa wa Mulungu, bali wayagwe wolongelwa muna gamahala, giladi vuwalole sukuwalole, na vuwahulike sukuwavimanye.

11Na hala dino jotambula vino, Mbeyu dijo Longa da Mulungu. 12Hewo wagwile behi na inzila, iwo waja wadihulike Longa, ilawa baho kokwiza Mwenembago, kodisola dija Longa mmiyoyo mmwao, sikuwatogole bule wahone. 13Na waja wali hamabwe iwo waja wahulike dilonga, wadibokela na kudenghelela; awo wabule mizizi, wotogola kipigiti kidodo; kikomo cha kugezigwa wokinega. 14Azija zigwile hali imizomola iwo waja wahulike, wolawa baho wagenda na zao, wogazigwa na mzahizahi wa mali na dongho za ulumwengu; hawadabula kinhu. 15Azija zigwile haludongo lunogile iwo waja wadihulike dilonga, wadibokela mmiyoyo inogile ikolele, nawo wokwazaganya kuno wolela mujo.

Kubwinha taa; kubokigwa

16Haduhu munhu yabwinhaga taa, yaifise mkigelo hebu kuika haluvungu, komu koika uchana haikizingiti, giladi waja wakwingila wawone mlangaza wake. 17Kabili haduhu mbuli ya kwifisa ileke kubwililika, hebu difisigwe kwiza dileke kutangika.

18Avo teganyeni vilihi vonda muhulike; kilumbo munhu yahawa na kinhu, kongezelwa; komu munhu yahawa bule kinhu, na kija kiyagesile kamba kanacho, kobokigwa.”

Mamo wa Yesu kamuwinza

19Baho wamwizila mamaake na ndugu zake, hawadahile kumkwenhukila kilumbo cha wanhu bwando. 20Wampetela kamba, “Mamaako na ndugu zako wema kunze, wolonda kukona.”

21Komu heyo kedika kawalongela, “Mamaangu na ndugu zangu awo waja wotegeleza Longa da Mulungu na kuditenda.”

Nyukwanyukwa mbahali

22Ikala siku dimonga Yesu kengila mngalawa hamonga na wanahina wake, kawalongela, “Tuloke umwambu wa di-bwawa.” Wamana kukwega matanga. 23Na hewo vuwakalile wochola, kawasa utulo; mhunde dilawilila nyukwanyukwa kulu muja mdibwawa; ingalawa imema mazi, isonga kudidimila. 24Wamgendela wamulamsa wolonga, “Mndewa, Mndewa, tokwaga!” Na heyo kalamka, kadikomhokela dibeho na nyukwa nyukwa da gamazi, vyose vinyamala, kukala tulu. 25Kawalongela, “Ili kwahi ngogelo yenu?” Na hewo wadumba, wakanganya wailongela wenyego kwa wenyego, “Yali nani yuyo yolagiza, beho na mazi, na hezo zomuhulika?”

Mgerasi mwene mzuka wa Legio

26Vuwamalile kuloka, wavika isi ya Wagerasi ija ikilola na Galilea. 27Viyalawile mhwani, kaitinghanila na munhu imonga wa kiwambo kija, mwene mizuka, havalile nguwo siku bwando, wala hakalile mngʼanda komu kuna gamapanga. 28Viyamuwene Yesu, katowa nyangi, kagwa hamigulu ya Yesu yolonga kwa dizwi kulu, “Tuna choni niye na gweye, Yesu Mwanage Mulungu Yali Uchana nghani?” Nokupula sikuungaze; 29kilumbo kaulagiza uja umzuka mchapalisi, umulawe munhu yuja; kwa mzoko kavagalwa nawo miyanza bwando, vilemela kakala yokwimilizwa kukifungo na kukakigwa minyololo na mhikwi, kazibena zose, kawingigwa kuluwala na uja mzuka. 30Yesu kamuuza, “Twaga jako nani?” Kedika, “Dale da Ndwagi”; kwa mzoko mizuka bwando imwingile. 31Ija imizuka imuhembekeza sikuyawagale wagende kukolongo. 32Bahaja hakala na dale kulu da nguluwe, wodila hakigongo; ija imizuka impembela wawengile nguluwa waja; kawengha vuwalondile. 33Mizuka imulawa munhu ija wawengila nguluwe waja; mhunde dija didale da iwanguluwe dihulumuka mbwisa kulawa kuna ingehema, divika hasi, dingila mdibwawa, wafa mmazi.

34Waja iwachunga vuwawene galawilile haja, wakimbila, waibwililisa mbuli ija mkiwambo na mmigunda. 35Wanhu walawa, wagenda kulola gaja gatendigwe, wamgendela Yesu, wamvika munhu yuja yalavigwe mizuka, kakala hasi haimigulu ya Yesu, yavalile nguwo na nzewele zake zibwela; wagwa kingwaya. 36Waja waviwene wawapetela vija viyahonyigwe yuja yavagalwe na mizuka. 37Na wanhu wa ulukolo lwa Gerasi na mmambwegambwega wamuhembela, yasegele kumwao, kilumbo wagogwa na woga bwando; kengila mngalawa kabwela. 38Na munhu ija yalavigwe imizuka kamuwila yelongoze nayo. Komu Heyo kamulaga kalonga, 39“Genda ukaye kumwenu, ukawapetele unzonza mkulu uyakutendele Mulungu!” Kachola kumwake, kawapetela mkiwambo chose unzonza mkulu uyatendelwe na Yesu.

Biti Yairo; pinga mtamu yolawa mulopa

40Avo Yesu viyabwelile, mtinghano umgomela, kuno wodenghelela, kilumbo wose wakala wombeta. 41Lola munhu imonga keza, tagwa jake Yairo, na heyo yuyo mkulu wa kanisa; kagwa hamigulu ya Yesu, kamuhembela yengile mngʼanda yake. 42Kilumbo biti yake mwana nyadimwe, kammabehi kudanganika, kana miyaka longo dimwe na mibili; na viyakalile yochola, madale wambabana.

43Na pinga imonga kakala yolawa mulopa miyaka longo dimwe na mibili, yamalile mali gake bwando kwa kuwengha waganga, hahonyezwe na munhu yoyose. 44Keza hakisogo chake, kaukwasa umusa wa inguwo yake, mhunde kulawa mulopa kuziga. 45Yesu kalonga, “Yalihi yanghwasile?” Avo wanhu wose vuwabelile, Petro kamulongela, “Mndewa, madale gano gokuzunguluka, gokubana!” 46Yesu kalonga, “Munhu kanghwasa, kilumbo nokona mhiko zindawa.” 47Yuja mtwanzi viyawene kamba hadaha kwifisa, keza yogudema, kagwa haulongozi wa Yesu, kampetela havihanga vya wanhu kilumbo cha ukumkwasa na vija mhunde viyahonile. 48Kamulongela, “Biti yangu, kugoga kwako kukuhonya. Genda na mbeho.”

49Viyakalile yolonga ago, keza msenga kulawa ngʼanda ya yuja mkulu wa kanisa, kalonga, “Biti wako kadanganika, sikumgaze mkulufunzi kabili!” 50Komu Yesu viyagahulike, kedika, “Sikuudumbe, ngoge nene! na heyo kohona.” 51Viyengile mngʼanda, halondile munhu yengile hamonga na heyo kugati, komu Petro na Yohana na Yakobo na itata wa yuja imwana na mamaake. 52Na wanhu wose vuwakalile wolila na kwiyalala, kalonga, “Sikumlile; hafile yuno, komu kawasa utulo.” 53Wamana kumseka nghani, kwa vija vuwatangile kamba kaziga kudanganika. 54Kamgoga mkono kalonga, kwa dizwi kulu, “Go mmhale, inuka!” 55Mhunde loho yake imbwelela, kenuka bahaja; kalagiza yagolelwe mandiya. 56Wavyele wake wakanganya nghani; na heyo kawagomesa sukuwampetele munhu gano galawilile.

Currently Selected:

Luka 8: ZAM75

Highlight

Copy