Luka 6

Kubena lukuso lwa uhemba

1Ilawa baho viyabitile mmigunda siku ya ukuhumula, wanahina wake wabena lukuso lwa uhemba, waluhugusa mmikono yao, wamana kuuja. 2Mafariseo wayagwe walonga, “Habali motenda mbuli hailingane kusanghanwa siku ja Sabato?” 3Yesu kedika kawalongela, “Hamsomile Daudi hamonga na wayage viyakalile na nzala, viyatendile? 4Avija viyengile mngʼanda ya Mulungu na kuisola imigate ya nhambiko, kaija kawengha na wayage, vyemela kuija migate ija iha, komu Wakulu wa Nhambiko wayeka.” 5Kawalongela, “Mwanage Munhu yuyo Mndewa wa Sabato.”

Mkono uholole uhonyigwa siku ya sabato

6Ikala siku iyagwe ya sabato kengila mkanisa, kalanguliza; mumuja mkala na munhu, senhambo mkono wake wa ukulume uholola. 7Avo Wana Nzuma na Mafariseo wakala womsepa kamba yahamuhonya siku ja ukuhumula, wagoge mbuli ya kumgela mkitala. 8Bali heyo kazitanga ngelegeza zao, kamulongela yuja munhu mwene mkono uholole, “Inuka ima wima hagati!” Kenuka kema hagati. 9Yesu kawalongela, “Nowauzani mweye, ilumba siku ya ukuhumula kutenda ganogile au kutenda gehile? kuhonya loho ya munhu au kuibananga?” 10Kawabunhulila meso wose wali baho, kamulongela, “Golosa mkono wako!” Kaugolosa uja mkono, ubwela mgima. 11Na hewo wagwa lusango kamba wana kikwale, waiuzagiza wenyego kwa wenyego, vonda wamtendele Yesu.

Watumigwa wasagulwe

12Ikala siku zija Yesu kalawa kagenda kuvigongo kumpula Tata wake, kagonelela ikilo ngima yosali. 13Viivikile imitondo, kawakema wanahina wake, kawasagula longo dimwe na wabili, kawengha tagwa Watumigwa. 14Simoni iyamkemile Petro, na Andrea ndugu yake; Yakobo na Yohana, Filipo na Bartolomeo; 15Mateo na Tomaso, Yakobo mwanage Alfeo na Simoni yakemigwe Zelote; 16Yuda mwanage Yakobo na Yuda Iskariote yuja yonda yamuhonze.

17Kahulumuka hamonga na hewo, kema hamtunha, aho hakala na dale gima da wanahina wake bwando, na wanhu wayagwe bwando nghani, walawile Uyuda yose na Yerusalemu na mhwani ya Tiro na Sidoni. 18Weza giladi wamtegeleze na kuhonyigwa mitamu yao; na waja wogazigwa na mizuka michapalisi wahonyezwa. 19Waja wanhu wose wasulukila kumkwasa, kwa mzoko mhiko zilawa kumwake, ziwahonya wanhu.

Wamota iwo walihi

20Avo viyenule meso gake, kawona wanahina wake kalonga, “Mmotile iyo mwemwe muli wakiwa, kilumbo undewa wa Mulungu uwo wenu.

21Mmotile iyo mwemwe mkona nzala vino, kilumbo kwiza mokwiguta.

Mmotile iyo mwemwe, vino vumulila, kilumbo kwiza moseka.

22Mmotile iyo mwemwe vonda mwihilwe na wanhu na kubagulwa kumwao, kuno wowaliga na kugalema matagwa genu kamba geha, kilumbo cha twaga ja Mwana wa Munhu. 23Siku dija dengheni na kuvina kwa mzoko kitumetume chenu kikulu kuulanga; avo vivo tata zao vuwawatendele Watulandagu.

24Komu mojona mweye wene mhiya, kilumbo mziga kubokela hembekezo jenu.

25Mojona mweye mwigute sambi, kilumbo kwiza moyona nzala.

Mojona na mweye mseka sambi, kilumbo kwiza mosusuwala na kulila.

26Mojona na mweye muhatunilwa na wanhu wose, kilumbo avo vivo tata zao vuwawatendele malungu wa uvwizi.

Wanogeleni iwandumu

27Komu mweye mnhegeleze niye, nomulagizani, Wanogeleni wandumu zenu, watendeleni ganogile waja wamwihileni! 28Wamotezeni waja womdumilizani, watambikileni waja womgazani!

29Kamba munhu yahakutowa kanza dimonga, muhindusile na daikabili, yaditowe na dijo; na heyo yakubokile nghanzu yako, sikuumgomese yasole na idigwanda. 30Yokupula mwinghe, na yakubokile mali gako, sikuumuwile kabili yakubwezele. 31Gose gomulonda mtendelwe na wanhu, na mweye mwanduse kuwatendela kamba vivo.

32Kilumbo muhawanogela waja wamnogeleni mweye, avo mowengha choni? Vilema wene matozo nawo wanogelaga waja wawanogele. 33Kabili muhawatendela ganogile waja wamtendelani ganogile mweye, avo mowengha choni? Vilema wene matozo na hewo watendaga kamba vivo. 34Kabili muhawakopesha wanhu, kuno mbeta wambwezeleni mweye, avo mowengha choni? Vilema wene matozo na hewo wakopeshaga wene matozo wayao, giladi wabwezelwe vivija. 35Komu mweye wanogeleni waja wamwihileni na kuwatendela ganogile; kopesheni wanhu, sikumbete kubwezelwa kinhu; aho kitumetume chenu chokuwa kikulu, na mweye mogalamka wanage yuja Yali Uchana nghani, kilumbo na Heyo kowagwelela waja wene nghimwa na ubananzi.

36Avo mgalamke wene bazi kamba Tata wenu viyali mwene bazi!

Sikuuwataguse wayagwe

37Sikumtaguse na mweye honda mtaguswe; kabili sikumdununze munhu, na mweye honda mdununzwe; lekeseni, na mweye molekeswa. 38Goleni, na mweye mogwelelwa; ningo imemile bwadu, idomeligwe isigiswe na kwitika, wanhu womwinghani hamhambaga yenu; kilumbo ningo ija yumuwalingila wayenu, iyo yonda mulingilwe na mweye.”

39Kawalongela hala dino: “Kimbugumbugu kodaha kulongoza kimbugumbugu miyage? Honda wengile mkolongo wose wabili? 40Mwanahina hambanza mkulufunzi wake, komu ija yakolele malangulizo, kogamba kamba mkulufunzi wake.

41Habali ukilola kibale kili mdisiso ja ndugu yako, bali banhi dili msiso jako mwenyecho hujona? 42Bule komulongelaze ndugu yako, Ndeka, ndugu yangu, nikilave ikibale kili msiso jako! na gweye banhi dili msiso jako mwenyecho hujona? Kwa mzenzeleganye gweye, dilave tanhu ajo dibanhi dili msiso jako mwenyecho, kileka ulole goya, vonda ulave acho ikibale kili himo msiso ja ndugu yako!

Biki na mujo wake

43Haduhu biki dinogile dilelaga mujo wihile, kabili haduhu biki dihile dilelaga mujo unogile. 44Biki jojose ditangikaga mmujo wake wenyego; kilumbo hawabawa nghuyu mmilengeja, hebu kulundiza mitongoni mmizomola. 45Munhu yanogile kalavaga ganogile mbikilo jake dinogile dili mmoyo mmwake, bali munhu yehile kalavaga gehile mbikilo jake dihile; kilumbo mulomo ulongaga gamemile mmoyo mmwake.

Kwika mizengo hakigongo

46Monghemaze Mndewa, Mndewa, wala hamsanghana ganimlagizani? 47Munhu yonizila niye na kutegeleza malonga gangu, kuno yagasanghana, nomulagusilani vonda yagalamke. 48Kogalamka munhu yazengile ngʼanda, yahimbule hasi goya na kwika mizengo uchana hakigongo; avija vidingile gubiko da mazi, na zanda dihulumukila ngʼanda ija kwa mhiko, hadidahile kwitinghisa, kwa mzoko izengigwa vinogile. 49Komu yuja yomhulika, imala hagasanghana, nomgamba na munhu yazengile ngʼanda hasi hali bule na lukwambaza; avija zanda vidihulumuke kwa mhiko, mhunde baho igwa, imana kubomoka ngʼanda ija nghani.”

Currently Selected:

Luka 6: ZAM75

Highlight

Copy