Luka 5

Unzonza wa Petro kuvuwa somba bwando

1Kukala na madale gamemile vuwomfingafinga, wotegeleza mbuli ya Mulungu, heyo kakala yemile mmambwegambwega mwa dilamba ja Genesareti. 2Kazona ngalawa mbili zikalile hamngwazo ya dilamba; waja wavuwa somba wakalile wahulumuka muna gamazi, wosunha nyavu zawo. 3Kengila mngalawa imonga ikalile yake Simoni, kampula yaikwenhuse mhunde; kakala hasi yowafunza matinghanilo muna ingalawa.

4Viyamalile kulonga kamulongela Simoni, “Kwenhusa uvike hagatigati, muhumuluse nyavu zenu mvuwe!” 5Simoni kedika yolonga, “Mndewa, tugaya tweye kilo kigima usiku tobo, hatupatile kinhu; bali kwa longa jako nozihumulusa zino zinyavu.” 6Vuwatendile kamba hivo, wamemeza misomba bwando, kumwande nyavu zawo zisonga kugedeka. 7Wawahungila mkono wayawo wali mngalawa iyagwe, weze kuwataza; wamana kugenda kukuja, wazimemeza zose ngalawa mbili, zisonga kudidimila. 8Simoni Petro viyagawene gano, yomana kugwa hamavindi ga Yesu yolonga, “Halawe hamwangu, Mndewa, niye na matozo!” 9Kilumbo kingudemo kimgoga heyo na wose wakalile hamonga na heyo, kwa sosombi ja somba bwando wawapatile. 10Yakobo na Yohana senhambo wana wa Zebedeo, waja wakalile woitaza na Simoni. Na Yesu kamulongela Simoni, “Sikuudumbe; lulawile baha kokala na kazi ya kuvuwa wanhu.” 11Wamana kukwega ngalawa zawo mhwani, waleka zose, wamkoleleza.

Mwene dikulu kahona

12Na heyo viyakalile kuja kuna viwambo, kukala na munhu yenele dikulu lukuli lose; aluja luyamuwene Yesu, kamgwila kingubanguba, kampula yolonga, “Mndewa, uhalonda kodaha kumhonya.” 13Yesu kagolosa mkono, kamkwasa kalonga, “Nolonda uhone!” Mhunde dikulu dimulawa. 14Yomala kamulagiza, “Sikuumpetele munhu, komu chola umulagusile mkulu wa nhambiko, ukalave vinhu vya nhosa kilumbo cha ukuhona, kamba viyalagize Mose, viwe utango kumwawo!” 15Komu simulizi zake zenela nghani, vyemela madale bwando wammemela, giladi wamtegeleze na kuhonyigwa mitamu yao. 16Na heyo kakala yokinega na wanhu, kagenda hanhu halibule na wanhu, giladi yampule Tataake.

Mtamu wa kuholola kasegezelwa matozo

17Siku dimonga viyakalile yolanguliza, Mafariseo na Wana Nzuma wakala bahaja, walawa viwambo vyose vya Galilea na Uyuda na Yerusalemu; na mhiko za Mulungu za kuhonya wanhu zikala hamonga na heyo. 18Mhunde weza wanhu, wamgala miyawo yatambalale mulusazi, mwene kuholola, na hewo walonda kumwingiza mngʼanda, wamwike habehi na Yesu. 19Bali hawawene ulegeho wa kwingila kilumbo cha wanhu bwando, wamana kukwela kukiswili cha ingʼanda wasegeza mabati, wamuhumulusa hamonga na lusazi hagati, behi na Yesu. 20Yesu viyaiwene ngogelo yawo, kalonga, “Mbwiga, matozo gako gasegezwa!” 21Baho Wana Nzuma na Mafariseo wandusa kwiuzagiza, “Iyo yalihi ino yofukula? Yalihi yodaha kusegeza matozo, si Mulungu yaiyeka?” 22Avija Yesu viyamanyile magelegeza gawo, kedika kawalongela, “Habali muna vinghwaso mmiyoyo mmwenu? 23Kibuhile kilihi, kulonga Kusegezelwa matozo gako, hebu kulonga, Inuka ugende? 24Komu nolonda mvitange kamba Mwana wa Munhu kana magweka muisi ga kusegeza matozo;” baho yamulongele ija mtamu wa ukuholola, “Nokulongela, inuka, widwike lusazi lwako, ugende kungʼanda yako!” 25Mhunde kenuka hameso gao, kaidikwa ulusazi luyawasile, kachola kungʼanda yake, kuno yomtuniza Mulungu. 26Baho wose wasinhuka nghani, wamtunila Mulungu, wagwa kingwaya wolonga, “Lelo tuwona unzonza hautangikaga!”

Lawi kakemigwa; gomba da kuleka ukuja

27Imala baho Yesu kalawa hiko, kamona muwila kodi yakalile yowila kodi, tagwa jake Lawi, kamulongela, “Ngholeleza!” 28Yomana kuleka vyose, kenuka, kamkoleleza.

29Aija Lawi kamgomela mandiya bwando mngʼanda yake, na wawila kodi na wayawo bwando weza, wakala hamonga hana gamandiya. 30Mafariseo wayagwe na Wana Nzuma wao wasonga kizugumo, wawalongela wanahina wake, “Habali muja na kungʼwa hamonga na wawila kodi na wene matozo?” 31Yesu kedika kawalongela, “Wanhu wagima hawalonda mganga, komu waja wolumwa. 32Niye sizile kukema wene ihoko, bali wene matozo giladi wagaluke.”

33Baho wayagwe wamulongela, “Lola wanahina wa Yohana na wa Mafariseo vuwalekaga ukuja miyanza bwando na kutenda sala, bali wanahina wako wajaga na kungʼwa.” 34Yesu kawedika, “He, wagonekwe hana ihalusi modaha kuwagomesa sikuwaje, kamba Msola mhambe yahali hamonga na hewo? 35Komu mazuwa gokwiza, aho honda wasegezelwa Msola mhambe; mazuwa ago baho vonda waleke ukuja.”

36Kawalongela hala dino: “Haduhu munhu yakanhe kinzazi cha nguwo ya sambi na kukigela mnguwo ya umwaka; kamba yahagela, kija kinzazi cha sambi kwiza chodega na inguwo ya umwaka, wala cha umwaka hakiilumba na kija cha sambi. 37Kabili haduhu munhu yagelaga ugimbi wa sambi mmiyandulo ya umwaka. Kwiza kamba yahagela, aija miyandulo ya umwaka yotulika, ugimbi wokwitika, na miyandulo yobanangika. 38Komu wagelaga ugimbi wa sambi mmiyandulo ya sambi. 39Bali haduhu munhu yangʼwaga ugimbi wa umwaka, yalonde wa isambi, kilumbo kolonga, Uja wa umwaka uwo ukolaga.”

Currently Selected:

Luka 5: ZAM75

Highlight

Copy